En portouvert avek en bi

“KI ZOT fer laba?” Bokou dimoun i demann sa kestyon kan zot pas o bor sa gran batiman ki pour Temwen Zeova dan Lavil Mogale (Krugersdorp), pros avek Johannesburg, Sid Afrik. Alor bann Temwen ti deside fer en portouvert kot sa biro brans le 12 ek 13 Oktob 2007. Sa portouvert ti annan de bi; premyerman pour prouve ki bann rimer i fo e dezyenmman pour montre manm piblik ki sa biro brans pe fer pour siport sa travay ki Zezi ti komande.—Matye 28:19, 20.

Bann ki travay kot sa biro brans ti met bann gro plakar devan larantre pour akey manm piblik e zot ti osi distribye bann lenvitasyon spesyal avek zot vwazen. Bann biznesmenn ki zot travay i relye avek serten nou travay ek zot fanmir ti ganny envite. Avek ki rezilta? Plis ki 500 viziter ki pa Temwen Zeova ti fer en vizit dan sa batiman.

Sa ki ti atir laplipar dimoun ti sa masin MAN Roland Lithoman ki servi sistenm web offset, ki kapab enprim 90,000 magazin par erdtan. Zis parey kot latelye ki kol bann liv ansanm, bann viziter ti osi enpresyonnen kan zot ti vizit sa landrwa kot plis ki 14 tonn piblikasyon i ganny anpakte e apre met pare pour transporte. Bann Temwen dan diferan departman ti prepar bann demonstrasyon enteresan enkli enn ki ti fer en rezimen lo listwar bann masin ki enprimen depi Gutenberg ziska bann masin modern ki parey litho-offset. En lot demonstrasyon ti montre ki mannyer biro brans Temwen Zeova i pran swen avek lanvironnman. Par egzanp, en akseswar spesyal dan sa masin lenprimri i elimin bann gas toksik ek bann loder e i osi anmas lapousyer papye ki plitar ganny zete.

En zournal lokal ti pibliy en lartik ki ti dir ki sa 700 volonter ki pe viv lo sa propriyete “i bann minis ki’n ganny apwente e ki’n dedye zot lavi avek Zeova.” I ti osi fer komanter lo sa “lapropte tre o nivo ek lafason ki bann keksoz i ganny fer aler” dan lenprimri. En zonm ki pa ti kontan Temwen Zeova ti osi vin vizite. Apre sa i ti ekrir en let ki lir koumsa: “Felisitasyon. I vreman rar pour vwar en lorganizasyon ki son nivo i sitan o.”

Bokou viziter ti eksprim zot lapresyasyon pour sa vizit dan sa batiman e zot ti sirprann pour vwar ki sa biro brans Temwen Zeova i ranpli avek bann piblikasyon ki baze lo Labib dan 151 langaz e i enprim sa bann piblikasyon pour 18 pei dan sid ek sant Lafrik. Bann biro brans Temwen Zeova atraver lemonn i ouver pour vizit pandan ler travay. Akoz ou pa kontakte biro brans Temwen Zeova dan ou pei e vwar ki ler ki disponib pour ou fer en vizit?

 [Portre lo paz 10]

Biro brans Temwen Zeova dan Lavil Mogale, Sid Afrik

[Portre lo paz 10]

Masin MAN Roland Lithoman ki servi sistenm web-offset

[Portre lo paz 10]

Latelye kot bann liv i ganny kole

[Portre lo paz 10]

Piblikasyon pour transportasyon

[Portre lo paz 11]

Viziter pe ariv kot biro brans

[Portre lo paz 11]

Lenvitasyon