Eski ou pou gard ou lentegrite?
Eski ou pou gard ou lentegrite?
“Ziska mon lanmor mon pa pou perdi mon lentegrite!”—ZOB 27:5.
1, 2. Dan ki proze konstriksyon nou devret partisip ladan e ki kestyon nou pou egzaminen?
FER krwar ou pe get plan en lakaz. Ou vreman etonnen avek plan sa lakaz ki’n ganny byen desinen. Ou vreman kontan kan ou mazinen dan ki fason sa lakaz pou benefisye ou ek ou fanmir. Me pa ou pou dakor toudmenm ki sa bann plan ensi ki bann panse lo la pa pou fer gran keksoz amwen ki ou’n vreman konstrir sa lakaz, reste ladan e okip li?
2 Pareyman nou kapab mazinen ki lentegrite i en kalite vreman enportan ki pou fer nou dibyen ensi ki bann ki nou kontan. Pourtan, zis mazin lo lentegrite pa pou benefisye nou bokou amwen ki nou batir e gard nou lentegrite konman Kretyen. Dan sa lemonn ozordi, bann proze konstriksyon i souvan kout ser. (Lik 14:28, 29) Pareyman, batir nou lentegrite i demann bokou letan ek zefor, me i vreman vo lapenn. Alor annou diskit trwa kestyon: Ki mannyer nou kapab vin bann dimoun ki gard zot lentegrite? Ki mannyer nou kapab gard nou lentegrite konman Kretyen? Kwa ki kapab ganny fer si pour en serten letan en dimoun pa’n gard son lentegrite?
Konman pour vin bann dimoun ki gard nou lentegrite?
3, 4. (a) Dan ki fason Zeova i ed nou batir nou lentegrite? (b) Parey legzanp Zezi i montre, ki mannyer nou kapab batir nou lentegrite?
3 Nou’n vwar dan lartik presedan ki Zeova i demontre loner anver nou par les nou deside si nou pou vin bann dimoun ki gard nou lentegrite. Erezman i pa senpleman kit nou tousel an rapor avek sa. I ansenny nou konman pour batir sa kalite vreman presye e i donn nou son lespri sen zenerezman pour ed nou aplik sa ki i ansennyen. (Lik 11:13) I menm donn proteksyon spirityel bann ki vreman fer zefor pour demontre lentegrite.—Prov. 2:7.
4 Ki mannyer Zeova in ansenny nou pour vin bann dimoun ki gard nou lentegrite? Premyerman par anvoy son Garson Zezi lo later. Zezi ti obeir son Papa parfetman dan tou sa ki i ti fer. I ti menm “montre li obeisan ziska lanmor.” (Fili. 2:8) Dan tou sa ki i ti fer, Zezi ti obeir son Papa ki dan lesyel menm dan bann moman vreman difisil. I ti dir Zeova: “Pa dapre mon lavolonte, me ou lavolonte.” (Lik 22:42) I byen pour nou tou demann nou lekor: ‘Eski mwan osi mon annan sa menm latitid obeisan?’ Nou pou vin bann dimoun ki gard nou lentegrite si nou obeisan dan tou sa ki nou fer avek bon motivasyon. Egzamin detrwa domenn dan lavi kot lobeisans i sirtou enportan.
5, 6. (a) Ki mannyer David ti met lanfaz lo lenportans gard nou lentegrite ler lezot dimoun pa vwar nou? (b) Kan zot tousel, ki defi bann Kretyen i fer fas avek konsernan zot lentegrite?
5 Nou bezwen obeir Zeova menm ler nou paret tousel. Psalmis David ti montre lenportans pour gard son lentegrite dan bann moman kot i ti kapab paret tousel. (Lir Psonm 101:2. *) Konman lerwa, David ti pas bokou letan avek lezot dimoun. San dout i ti osi annan bann moman kot plizyer santenn, menm plizyer mil dimoun ti obzerv li. (Konpar Psonm 26:12.) I ti enportan pour li gard son lentegrite dan sa bann moman parski en lerwa ti devret kit en bon legzanp pour son pep. (Det. 17:18, 19) Me David ti aprann ki ler i ti kapab paret tousel ‘dan son lakaz,’ i ti pou bezwen mars avek lentegrite dan son leker. Me nou?
6 Dan Psonm 101:3, nou trouv parol David: “Mon pa pou met devan mon lizye okenn keksoz ki pa vo nanryen.” Ozordi i annan bokou loportinite kot nou kapab met devan nou lizye bann keksoz ki pa vo nanryen, sirtou kan nou tousel. Pour bann dimoun ki ganny akse avek Internet, sa in vin en defi pour zot. I fasil pour ganny tante pour get bann keksoz ki pa apropriye, menm pornografi lo Internet. Si nou fer sa, eski sa i montre ki nou pe obeir sa Bondye ki ti enspir David pour ekrir sa bann parol? Pornografi i danzere akoz i eksit bann move dezir egois, i afekte konsyans en dimoun, ptitapti i kas bann maryaz e anmenn laont lo bann ki enplike.—Prov. 4:23; 2 Kor. 7:1; 1 Tesa. 4:3-5.
7. Ki prensip ki kapab ed nou pour gard nou lentegrite kan nou tousel?
7 Byensir, napa okenn serviter Zeova ki’n deza vreman tousel. Nou Papa i vey lo nou avek lanmour. (Lir Psonm 11:4. *) Pa Zeova i vreman rezwir kan i vwar ou pe reziste tantasyon! Ler ou fer sa ou pe swiv sa lavertisman dan parol Zezi dan Matye 5:28. Fer tou sa ki ou kapab e reste determinen pour pa get okenn portre ki kapab tant ou pour fer sa ki mal. Eski ou pou pare pour perdi ou lentegrite ki vreman presye pour en gonaz parey get pornografi oubyen lir konsernan sa bann aksyon degoutan?
8, 9. (a) Ki defi konsernan zot lentegrite Danyel ek son trwa zanmi ti fer fas avek? (b) Ki mannyer bann zenn Kretyen ozordi i fer Zeova ek lezot frer ek ser Kretyen rezwir?
8 Nou osi kapab vin bann dimoun ki gard nou lentegrite si nou obeir Zeova kan nou parmi bann dimoun ki pa Temwen. Mazin legzanp Danyel ek son trwa zanmi. Konman bann zenn garson zot ti ganny anmennen an egzil Babilonn. Laba zot ti antoure avek bann dimoun ki pa ti konn bokou oubyen nanryen lo Zeova. Sa kat Ebre ti ganny bokou presyon pour manz bann bon manze lerwa ki Lalwa Bondye ti defann manze. Sa bann garson ti’n kapab fasilman konvenk zot lekor ki sa aksyon pa ti sitan mal. Apre tou, zot paran, bann ansyen ek bann pret pa ti pou vwar sa ki zot ti pou fer. Lekel ki ti pou konnen? Zeova li ti pou konnen. Alor zot ti pran en pozisyon ferm e obeir li malgre presyon ek risk ki sa ti anmennen.—Dan. 1:3-9.
9 Dan lemonn antye i annan bann zenn Temwen Zeova ki pe swiv sa menm semen. Zot pe reste atase avek standar Bondye pour bann Kretyen e zot refize soumet avek presyon danzere sorti kot lezot zenn. Kan zot bann zenn zot refize servi drog, vin vyolan, zoure, pratik limoralite ek lezot move aksyon ankor, zot pe obeir Zeova. Anmezir zot fer sa, zot pe gard zot lentegrite. Zot menm ki benefisye e zot fer Zeova ek lezot frer ek ser Kretyen rezouir.—Ps. 110:3.
10. (a) Ki move pwennvi lo aksyon seksyel imoral ki’n fer serten zenn kas zot lentegrite? (b) Ki mannyer lentegrite i kapab ed nou pour azir kont danze bann aksyon seksyel imoral?
10 Nou devret obeisan osi dan nou fason azir avek bann dimoun lot seks. Sirman nou konnen ki Parol Bondye i defann pratik bann aksyon seksyel imoral. Parkont, nou fasilman kapab bes lebra e vin dezobeisan. Par egzanp, serten zenn in pratik seks par labous, seks par deryer ouswa mastirbasyon avek en lot dimoun e zot panse ki sa bann aksyon pa vreman mal parski zot pa pe “fer seks.” Sa bann zenn i oubliye, ouswa swazir pour inyore ki sa mo ki Labib i servi pour pratik seksyel imoral ouswa fornikasyon i enplik tou bann move kondwit seksyel e sa i kapab fer en dimoun ganny ekskli dan kongregasyon. * Pli pir ankor i ki zot pa pran kont ki zot bezwen gard zot lentegrite. Vi ki nou pe fer bokou zefor pour gard nou lentegrite, nou pa esey rod lekskiz pour okenn move kondwit. Nou pa esey gete ziska ki zistans dan en move kondwit nou kapab arive san ki nou ganny pini. Nou pa zis konsantre lo disiplin ki kongregasyon i kapab donn nou. O kontrer, nou konsantre lo fer bann keksoz ki fer plezir Zeova e evit bann keksoz ki pou fer li lapenn. Olye rode ziska ki degre nou pou arive avan nou fer pese, nou devret reste lwen avek sa bann move kondwit e “elwanny [nou] avek bann pratik imoral.” (1 Kor. 6:18) Alor dan sa fason nou pou montre ki nou bann dimoun ki annan sa vre lentegrite.
Ki mannyer nou kapab gard nou lentegrite?
11. Akoz sak aksyon lobeisans i enportan? Donn en legzanp.
11 Nou batir nou lentegrite atraver lobeisans, alor nou gard nou lentegrite kan nou andire e reste obeisan. En senp aksyon obeisan i kapab paret pa enportan ouswa en pti keksoz. Me avek letan, lobeisans i kapab ed ou vin en dimoun ki vreman gard ou lentegrite. Pour donn en legzanp: En blok tousel i kapab paret pa tro enportan, me si nou pran letan pour met plizyer blok ansanm, nou pou kapab konstrir en zoli lakaz. Alor, si nou kontinyen reste obeisan, nou pou kapab gard nou lentegrite.—Lik 16:10.
12. Ki mannyer David in kit en legzanp an rapor avek ganny trete dan en move fason ek lenzistis?
12 Nou lentegrite i sirtou evidan kan nou andir bann difikilte, ganny trete dan en move fason ouswa fer fas avek lenzistis. Egzamin legzanp David ki dan Labib. Ler i ti en zennonm i ti sibir en kantite persekisyon avek en lerwa ki ti sipoze pe reprezant lotorite Zeova. Parkont Lerwa Sail ti’n perdi laprouvasyon Zeova e i ti vreman zalou David akoz li ki ti’n ganny laprouvasyon Bondye. Pourtan, Sail ti kontinyen reste o pouvwar pour en serten letan e i ti servi larme Izrael pour menas e tay deryer David. Zeova ti les sa lenzistis kontinyen pour en serten letan. Eski David ti ankoler avek Bondye? Eski i ti krwar ki i ti napa okenn rezon pour li andire? Non. I ti annan en gran respe pour pozisyon Sail konman en zonm ki ti’n ganny swazir par Bondye e i pa ti revanze kan i ti annan sa sans pour fer li.—1 Sam. 24:2-7.
13. Ki mannyer nou kapab gard nou lentegrite si en dimoun i ofans nou ouswa fer nou ditor?
13 Pa David i vreman en legzanp pwisan pour nou ozordi! Nou tou nou enparfe e nou form parti en lorganizasyon enternasyonal kot nenport ki i kapab tret nou dan en fason enzis ouswa menm kit laverite. Byensir, nou annan en gran privilez pour viv dan en letan kot pep Zeova konman en group pa pou zanmen kapab ganny sali avek standar sa lemonn. (Iza. 54:17) Kantmenm sa, ki mannyer nou pou reazir si en lot dimoun i dezapwent nou ouswa fer nou ditor? Si dan nou leker nou gard rankin anver en lot frer ouswa ser Kretyen, nou lentegrite anver Bondye pou kapab an danze. Kondwit lezot pa devret en lekskiz pour ankoler avek Bondye ouswa kit laverite. (Ps. 119:165) Si nou andire anba bann leprev, sa pou ed nou gard nou lentegrite.
14. Ki mannyer bann ki gard zot lentegrite i reazir kan i annan bann sanzman dan lorganizasyon ouswa bann nouvo leksplikasyon lo serten pwen dan Labib?
14 Nou osi kapab gard nou lentegrite si nou evit sa labitid pour kritike e rod defo. Byensir sa i vedir ki nou fidel avek Zeova. Konmela i pe beni son pep plis ki oparavan. Sa vre ladorasyon pa’n zanmen ganny glorifye ziska sa degre dan listwar. (Iza. 2:2-4) Kan i annan bann nouvo leksplikasyon lo bann verse Labib ouswa dan lafason keksoz i ganny fer, nou anvi aksepte zot. Nou vreman kontan pour vwar levidans ki sa lalimyer spirityel pe kontinyen klere deplizanpli. (Prov. 4:18) Si nou vwar li difisil pour konpran en sanzman, nou demann Zeova pour ed nou konpran sa pwen pli byen. Antretan, nou reste obeisan anmezir nou andire e sa i fer ki nou gard nou lentegrite.
Me si en dimoun pa gard son lentegrite?
15. Lekel tousel ki kapab fer nou aret gard nou lentegrite?
15 Sa kestyon i fer nou reflesir en kantite, pa i vre? Parey nou’n aprann dan lartik presedan, nou lentegrite i vreman esansyel. San li, nou napa ni en relasyon avek Zeova, ni en lespwar. Gard sa antet: I annan zis en sel dimoun dan liniver ki kapab fer ou aret gard ou lentegrite. Sa i ou menm. Zob ti byen konpran sa laverite. I ti dir: “Ziska mon lanmor mon pa pou perdi mon lentegrite!” (Zob 27:5) Si ou annan sa menm determinasyon e si ou reste pros avek Zeova sa pou ed ou gard ou lentegrite.—Zak 4:8.
16, 17. Si en dimoun i komet en pese grav: (a) ki i pa devret fer? (b) ki i devret fer?
16 Kantmenm sa, serten dimoun pa reisi gard zot lentegrite. Zis parey i ti arive ler bann zapot ti ankor vivan, serten Kretyen denozour i kontinyelman tonm dan bann pese vreman grav. Si sa in ariv ou, eski ou sityasyon i san okenn lespwar? Pa neseserman. Kwa ki kapab ganny fer? Premyerman annou vwar ki nou pa devret fer. Konman imen nou annan sa tandans pour kasyet sa ki nou fer mal ki swa avek nou paran, zanmi dan laverite ouswa bann ansyen. Me Labib i rapel nou: “Sa enn ki pe kasyet son bann lofans pa pou reisi, me sa enn ki pe konfese e pe kit zot pou ganny demontre mizerikord.” (Prov. 28:13) Sa bann ki rod fason pour kasyet zot pese pe fer en gran fot akoz napa nanryen ki kasyet devan Bondye. (Lir Ebre 4:13.) Serten i menm esey kasyet sa ki zot ete e fer krwar ki zot pe servi Zeova anmezir ki zot pe fer bann pese grav. Sa kalite lavi pa montre okenn siny lentegrite, i tou le kontrer avek sa kalite. Zeova pa trouv okenn plezir dan en ladorasyon ki ganny fer par en dimoun ki pe kasyet bann pese grav ki i pe fer. O kontrer sa kalite lipokrizi i fer li ankoler.—Prov. 21:27; Iza. 1:11-16.
17 Kan en Kretyen i fer en fot grav, i annan bann gidans dan Labib ki kapab ed sa Kretyen aksepte son fot. I lemoman pour rod led avek bann ansyen dan kongregasyon. Zeova in apwent bann ansyen pour ed bann ki malad spirityelman. (Lir Zak 5:14.) Pa les lafreyer pour ganny en serten disiplin oubyen koreksyon anpes ou rod gerizon spirityel. Apre tou, eski en dimoun pou les sa pti douler apre en pikir ouswa loperasyon anpes li pran swen avek en problenm lasante vreman grav?—Ebr. 12:11.
18, 19. (a) Ki mannyer legzanp David i montre ki en dimoun i kapab rebatir son lentegrite? (b) Ki ou determinen pour fer an rapor avek ou lentegrite?
18 Eski i annan lespwar pour konpletman rekipere? Eski i posib pour rebatir nou lentegrite enn fwa ki i’n perdi? Egzamin ankor en kou legzanp David. I ti tonm dan pese grav. I ti get madanm en lot zonm avek en move dezir e sa ti fer li komet adilter e apre sa i ti fer laranzman ki sa zonm inosan i ganny touye. I pa fasil pour mazin David sa letan konman en zonm ki ti annan lentegrite, pa i vre? Me eski son sityasyon ti san okenn lespwar? David ti bezwen disiplin e i ti ganny enn ki ti serye. Alor, son repantans senser ti fer Zeova demontre mizerikord anver li. David ti benefisye avek son disiplin e i ti rebatir son lentegrite par kontinyen obeir Bondye malgre nenport kwa ki ti kapab arive. Lavi David i en legzanp sa parol ki nou lir dan Proverb 24:16: “En dimoun drwat i kapab tonm menm set fwa, me definitivman i pou leve.” Avek ki rezilta? Remark sa ki Zeova ti dir Salomon lo David apre lanmor David. (Lir 1 Lerwa 9:4. *) Bondye ti mazin David konman en zonm ki ti gard son lentegrite. Sirman Zeova i kapab pirifye en peser ki repantir e tir sa tas pese menm si i grav.—Iza. 1:18.
19 Wi, ou pou vin en dimoun ki gard ou lentegrite si ou obeir Bondye akoz ou kontan li. Kontinyen andire fidelman e si i arive ki ou fer pese, montre ki ou repantir senserman. Pa lentegrite i en kalite ki vreman presye! Fotespere ki sakenn parmi nou i annan menm determinasyon avek David: “Tandis ki mwan, mon pou annan lentegrite dan lafason ki mon marse.”—Ps. 26:11.
[Not anba lo paz]
^ par. 5 Psonm 101:2: “Mon pou azir dan en fason pridan e san defo. Kan ou pou vin kot mwan? Mon pou mars avek lentegrite dan mon leker dan mon lakaz.”
^ par. 7 Psonm 11:4: “Zeova i dan son tanp sen. Zeova, son tronn i dan lesyel. Son lizye i gete, son lizye kler i egzamin bann garson zonm.”
^ par. 18 1 Lerwa 9:4: “E ou, si ou mars devan mwan parey ou papa David, avek lentegrite dan ou leker e avek ladrwatir, par fer tou sa ki mon’n ordonn ou e si ou gard mon bann regilasyon ek mon bann zizman.”
Ki ou pou reponn?
• Ki mannyer ou kapab vin en dimoun ki gard ou lentegrite?
• Dan ki fason ou kapab gard ou lentegrite?
• Ki mannyer i posib pour rebatir ou lentegrite?
[Kestyon]
[Bwat lo paz 17]
‘I TI VREMAN ENKRWAYAB’
En madanm ki ti ansent pour senk mwan ti dir sa parol an rapor avek labonte ek lentegrite ki en zenn madanm ti annan. En pe letan plitar apre ki i ti’n sorti dan en restoran, i ti realize ki i ti’n kit son pers deryer. Dan son pers ti annan 2000 Dolar Ameriken e sa larzan ti plis ki sa ki i ti abitye mars avek. Plitar dan en zournal i ti dir: “Mon ti vreman dezespere.” Parkont, en zenn madanm ti trouv sa pers e imedyatman i ti fer demars pour retourn sa pers kot son met. I pa ti reisi zwenn sa madanm alor i ti anmenn sa pers kot kordgard e bann gard ti finalman reisi lokaliz sa madanm ansent. Sa madanm ki ti vreman rekonesan ti dir: “I ti vreman enkrwayab.” Akoz sa zenn madanm ti fer tou sa zefor pour retourn sa larzan? Sa lartik dan sa zournal ti fer resorti ki konman en Temwen Zeova sa zenn madanm ti “demontre sa kalite lentegrite akoz son larelizyon ki i ti’n grandi ladan.”
[Portre lo paz 18]
Bann zenn i kapab gard zot lentegrite kan zot ganny teste