Ki vreman arive apre lanmor?

“Tou nanm i imortel, menm bann move dimoun. . . . Zot ganny pini pour touzour dan en dife ki pa tennyen e zot pa mor. I enposib pour zot met [en lafen] avek zot soufrans.”—Clement ki sorti Alexandria, en ekriven dezyenm ek trwazyenm syek N.L.

PAREY Clement, bann ki promot sa lansennyman ki lanfer i en landrwa kot dimoun i ganny tourmante apre lanmor, i prezimen ki imen i imortel. Eski Labib i siport sa lansennyman? Egzamin larepons ki Parol Bondye i donnen pour sa bann kestyon swivan.

Eski sa premye zonm Adan, ti imortel? Deswit apre ki Adan ti ganny kree, Bondye ti donn li sa komannman: “Fri dan tou pye dibwa sa zarden ou kapab manze ziska ou rasazye. Me an sa ki konsern sa pye konnesans bon e move ou pa devret manze, parski sa zour ki ou manz son fri, sirman ou pou mor.” (Zenez 2:16, 17) Adan pa ti imortel.

Ki ti finalman arive avek Adan apre ki i ti’n fer pese? Adan ti ganny en pinisyon avek Bondye. Son pinisyon pa ti pour li al ganny tourmante dan lanfer me plito tradiksyon Labib Katolik New American Bible i fer resorti sa ki Bondye ti dir: “Ou pou transpire pour ganny ou dipen pour manze ziska ou retourn dan sirfas later dan ki ou’n sorti; parski ou lapousyer e ou pou retourn lapousyer.” (Zenez 3:19; nou ki’n met an italik) Sa ki Bondye ti dir i klerman montre ki ler Adan ti mor napa nanryen avek li ki ti kontinyen viv.

Eski i annan okenn imen ki imortel? Non, imen pa imortel. Labib i dir dan Eklezyast 3:20: “Tou pe al dan menm landrwa. Zot tou zot in vin apartir lapousyer e zot pe retourn lapousyer.” Zapot Pol ti ekrir: “Pese in antre dan lemonn par en sel zonm [Adan], e pese in anmenn lanmor, e lanmor in pas avek tou dimoun, parski tou dimoun in k[o]met pese.” (Romen 5:12) Tou imen i fer pese, alor tou imen i mor.

Eski bann ki’n mor i santi oubyen konn keksoz? Parol Bondye i dir: “Bann vivan i konnen ki zot pou mor, me bann mor, zot nepli konn nanryen.” (Eklezyast 9:5, NAB) Labib i dekrir sa ki arive avek en dimoun ler i’n mor dan sa fason: “I retourn dan son later, sanmenm sa zour son bann panse i disparet.” (Psonm 146:4, King James version) Si bann mor “nepli konn nanryen” e zot “panse i disparet,” ki mannyer zot ti pou kapab santi si zot ti pe ganny tourmante dan lanfer?

Zezi Kri ti konpar lanmor avek ler en dimoun pe dormi me pa avek en kondisyon kot en dimoun i konsyan. * (Zan 11:11-14) Malgre sa, serten dimoun i kapab pa dakor e dir ki Zezi ti ansennyen ki dan lanfer i so e bann peser pou ganny zete dan lanfer. Annou egzamin sa ki Zezi ti vreman dir lo lanfer.

[Not anba lo paz 4]