Reste determinen pour anons plennman sa bon nouvel
Reste determinen pour anons plennman sa bon nouvel
“I’n donn nou lord pour prese e anons [“plennman avek,” NW] bann dimoun ki se limenm ki Bondye in etabli[r] pour ziz bann vivan ek bann mor.”—AKT 10:42.
1. Kan i ti pe koze devan Korney, ki travay Pyer ti met lanfaz lo la?
SA ZOFISYE larme ti rasanble son fanmir ek zanmi ansanm pour en lokazyon ki ti anmenn en sanzman enportan dan lafason ki Bondye ti azir avek bann imen. Sa zonm ki ti annan lakrent pour Bondye ti apel Korney. Zapot Pyer ti dir zot ki bann zapot ti’n ganny sa lord pour “prese e anons [“plennman,” NW]” sa bon nouvel lo Zezi. Temwannyaz Pyer ti anmenn bokou bon rezilta. Bann dimoun ki pa ti sirkonsi sorti dan lezot nasyon ti ganny lespri sen Bondye, zot ti batize e zot ti ganny sa lespwar pour vin bann lerwa ansanm avek Zezi dan lesyel. Pyer ti’n anons plennman sa bon nouvel e sa ti anmenn bon rezilta.—Akt 10:22, 34-48.
2. Ki mannyer nou konnen ki pa zis sa 12 zapot ki ti ganny demande pour anons plennman sa bon nouvel?
2 Sa ti lannen 36 N.L. Apepre de-z-an pli boner, en zonm ki ti determinen pour opoz bann Kretyen ti pas atraver en leksperyans ki ti sanz son lavi. Sol sorti Tars ti lo son semen pour al Damas kan Zezi ti aparet avek li e dir: “Antre dan lavil e la, zot a dir ou tou sa ki ou annan pour fer.” Zezi ti asir Ananyas ki ti en disip ki Sol ti pou anons sa bon nouvel avek “bann nasyon ek bann lerwa ek pep Izrael.” (Lir Akt 9:3-6, 13-20.) Ler i ti avek Sol, Ananyas ti dir: “Bondye nou bann zanset in swazir ou . . . [p]arski ou pou vin son temwen pour anons tou sa ki ou’n [v]war e tande avek tou dimoun.” (Akt 22:12-16, nou ki’n met an italik.) Ki mannyer Sol ki plitar ti ganny rekonnet konman Pol ti konsider son privilez pour anons sa bon nouvel?
I ti vreman anons plennman sa bon nouvel
3. (a) Nou pou konsantre lo ki resi Labib? (b) Ki mannyer bann ansyen Efez ti reazir anver mesaz Pol e ki bon legzanp zot in kite?
3 I pou vreman enteresan pour etidye an detay tou sa ki Pol ti fer apre, me pour lemoman annou konsantre lo en diskour ki Pol ti fer apepre lannen 56 N.L., parey i’n ganny ekrir dan Akt sapit 20. Pol ti donn sa diskour ver lafen son trwazyenm vwayaz misyonner. I ti’n debarke Mile ki ti en por dan Lanmer Eze e i ti’n anvoy en mesaz kongregasyon Efez pour demann bann ansyen pour vin zwenn li. Efez ti apepre 50 kilomet avek Mile, menm si vwayaz lo sa semen ki ti annan en kantite kontour ti pli long. Ou kapab mazinen ki degre eksite bann ansyen Efez ti ete kan zot ti ganny mesaz Pol. (Konpar Proverb 10:28.) Kantmenm sa, zot ti bezwen fer laranzman pour zot vwayaz ziska Mile. Eski serten parmi zot ti bezwen pran zour konze dan travay ouswa ferm zot biznes? Denozour bokou Kretyen i fer sa pour asire ki zot pa mank ni menm en sesyon lasanble distrik ki fer tou le-z-an.
4. Ki Pol ti fer ler i ti Efez pour en pe letan?
4 Ki ou krwar Pol ti fer Mile pandan sa trwa oubyen kat zour ziska ki bann ansyen ti arive? Ki ou ti pou’n fer? (Konpar Akt 17:16, 17.) Parol ki Pol ti dir avek bann ansyen Efez i ed nou pour konn larepons. I ti dekrir sa ki i ti pe fer diran bann lannen ki ti’n pase enkli sa letan pli boner kan i ti Efez. (Lir Akt 20:18-21.) I ti konnen ki personn pa ti pou kapab kontredir sa ki i ti pe dir, alor i ti dir: “Zot konnen . . . [ki] depi premye zour ki mon ti ariv dan Provens Lazi . . . [m]on’n fer apel [oubyen “anons plennman,” NW].” Wi, i ti determinen pour akonplir sa misyon ki Zezi ti’n donn li. Ki mannyer i ti akonplir sa travay Efez? En fason ti par rann temwannyaz avek bann Zwif dan bann landrwa kot ti annan en kantite zot. Lik ti raporte ki kan Pol ti Efez apepre lannen 52-55 N.L., i ti donn bann diskour e persyad bann dimoun dan sinagog. Bann Zwif ti “antete e refize krwar,” alor Pol ti kontinyen pres en lot landrwa dan sa menm lavil. Alor i ti anons sa bon nouvel avek bann Zwif ek Grek ki ti dan sa gran lavil.—Akt 19:1, 8, 9.
5, 6. Akoz nou kapab asire ki predikasyon kaz an kaz ki Pol ti fer ti enplik bann non krwayan?
5 Avek letan serten parmi bann ki Pol ti koz avek Mile ti vin Kretyen e zot ti kalifye konman bann ansyen. Pol ti fer zot rapel sa metod ki i ti’n servi: “Mon pa’n kasyet nanryen ki kapab itil pour zot, ler mon’n ansennyen an piblik ek dan zot lakaz.” Dan nou letan serten in dir ki la Pol ti pe senpleman refer avek vizit ki bann ansyen ti fer kot bann krwayan. Me sa pa leka. Sa deskripsyon ‘ansenny an piblik e dan zot lakaz’ oubyen “kaz an kaz” (NW) i aplik partikilyerman avek sa travay predikasyon ki ganny fer avek bann dimoun ki pa krwayan. Sa i kler dan sa parol ki i ti dir answit. Pol ti’n rann temwannyaz “avek bann Zwif konman avek non-Zwif pour sanz zot lavi pese e vin kot Bondye, e krwar dan nou Senyer Zezi-Kri.” I kler alor ki Pol ti’n anons sa bon nouvel avek bann dimoun ki pa ti krwayan, ki ti pou bezwen sanz zot lavi oubyen repantir e annan lafwa dan Zezi.—Akt 20:20, 21, nou ki’n met an italik.
6 Dan en gran resers ki i’n fer dan Lekritir Grek, en spesyalis Labib ti dir sa lo Akt 20:20: “Pol ti pas trwa-z-an Efez. I ti vizit tou bann lakaz, oubyen menm i ti pres avek tou bann dimoun (verse 26). Dan Labib sa verse i sa baz pour propaz levanzil kaz an kaz e osi bann renyon piblik.” Ki swa i ti vizit tou bann lakaz literalman parey sa spesyalis i dir oubyen non, Pol pa ti oule ki bann ansyen Efez i oubliy lafason ki i ti’n anons sa bon nouvel. Avek ki rezilta? Lik i raporte: “Tou sa bann ki ti pe viv dan provens Lazi, Zwif konman non-Zwif, ti tann Parol Senyer.” (Akt 19:10) Me ki mannyer “tou” dimoun Lazi ti kapab tande e ki sa i kapab endike lo nou travay pour anons sa bon nouvel?
7. Ki mannyer predikasyon Pol ti petet annan lefe lo bann ki i pa ti pres avek direkteman?
7 Lefet ki Pol ti pres dan bann landrwa piblik e kaz an kaz, sa ti fer ki bokou dimoun ti tann son mesaz. Eski ou vreman krwar ki tou sa bann dimoun ki ti tann sa mesaz ti bann zabitan Efez? Eski ou krwar ti napa personn ki ti al reste lezot landrwa pour fer biznes, reste pros avek fanmir ouswa pour rod en landrwa trankil? I pa fer sans. Bokou ozordi in sanz landrwa reste pour sa bann rezon, petet ou osi ou parmi. Deplis, pandan sa letan bann dimoun ki ti sorti dan lezot landrwa ti vizit Efez pour bann rezon sosyal e komersyal. I tre probab ki kan zot ti laba zot ti zwenn Pol ouswa tann li pe anons sa bon nouvel. Ki ti pou arive kan zot ti retourn kot zot? Bann ki ti aksepte laverite ti anons sa bon nouvel zot osi. Petet lezot pa ti vin bann krwayan, me sirman i kapab ki zot ti koz lo sa ki zot ti’n tande Efez. Alor i kapab ki bann fanmir, vwazen ouswa kliyan ti tann sa laverite e serten ti aksepte. (Konpar Mark 5:14.) Ki sa i montre konsernan lefe ki anons plennman sa bon nouvel i kapab annan lo dimoun?
8. Ki mannyer petet bann dimoun dan provens Lazi ti tann laverite?
8 Konsernan son minister Efez pli boner, Pol ti ekrir ki ‘en gran laport ti’n ouver pour li fer en gran travay.’ (1 Kor. 16:8, 9) Ki laport e ki mannyer i ti ganny ouver pour li? Lefet ki Pol ti kontinyen prese Efez, sa ti permet ki sa bon nouvel ti propaze. Reflesir lo lafason ki sa bon nouvel ti ariv dan sa trwa lavil: Kolos, Laodise ek Hierapolis ki ti dan menm distrik avek Efez me lwen avek lanmer. Pol pa ti zanmen vizit zot, me sa bon nouvel ti ariv kot zot. Epafras ti sorti dan sa rezyon. (Kol. 2:1; 4:12, 13) Eski Epafras ti tann Pol rann temwannyaz Efez e apre sa i ti vin en Kretyen? Labib pa spesifye, me ler Epafras ti propaz laverite dan son vwazinaz i ti petet fer li konman en reprezantan Pol. (Kol. 1:7) I kapab osi ki sa mesaz ti ariv dan bann lavil parey Filadelfi, Sard ek Tyatir pandan bann lannen ki Pol ti pe anons sa bon nouvel Efez.
9. (a) Ki dezir senser Pol ti annan? (b) Ki teks pour lannen 2009?
9 Alor, bann ansyen Efez ti annan tou rezon pour aksepte komanter Pol: “Mon pa atas okenn valer spesyal avek mon lavi, pourvi ki mon kapab akonpli[r] mon misyon e fini sa travay ki Senyer Zezi in konfye mwan, pour anons [“plennman sa bon nouvel konsernan,” NW] lagras Bondye.” Nou ganny ankouraze e motive par sa teks pour lannen 2009: “Anons plennman sa bon nouvel.”—Akt 20:24, NW.
Anons plennman sa bon nouvel ozordi
10. Ki mannyer nou konnen nou devret rann temwannyaz plennman?
10 Sa lord “pour prese e anons [“plennman,” NW]” sa bon nouvel pa ti enplik zis bann zapot. Ler Zezi ki ti’n resisite ti koz avek sa apepre 500 disip ki ti’n rasanble Galile, i ti donn zot sa lord: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei[r] tou sa ki mon’n k[o]mande.” Parey parol Zezi i endike, sa lord i pour tou bann vre Kretyen ozordi. I ti dir: “E konnen ki mwan mon avek zot toulezour, ziska lafen [oubyen “konklizyon sa sistenm,” NW].”—Mat. 28:19, 20.
11. Temwen Zeova i ganny rekonnet par ki travay enportan?
11 Bann Kretyen devoue i kontinyen obeir sa lord, zot fer bokou zefor pour “anons plennman sa bon nouvel.” Zot servi sa menm metod ki zapot Pol ti koz lo la avek bann ansyen Efez e sa i predikasyon kaz an kaz oubyen portanport. Dan en liv ki ti sorti 2007 e ki ti koz lo travay efikas bann misyonner, David Stewart ti dir: “Metod ki bann Temwen Zeova pe servi kot zot ansenny bann dimoun ki mannyer pour partaz zot krwayans avek lezot, i pli efikas ki zis donn bann diskour ki pa kler [deryer pipit]. Pour bokou Temwen Zeova, partaz zot krwayans avek lezot i en aktivite ki zot byen kontan.” Avek ki rezilta? “Lannen 1999, zis 2 a 4 poursan dimoun ki mon ti aprose pour fer en serve dan de kapital dan Les Lerop ki ti dir ki zot in deza ganny aprose par bann misyonner Latter-day Saints ouswa ‘Mormon.’ Plis ki 70 poursan ti dir ki bann Temwen Zeova in deza apros zot personnelman e plizyer fwa.”
12. (a) Akoz nou pres “plizyer fwa” kot bann lakaz dan nou teritwar? (b) Eski ou kapab rakont leksperyans en dimoun ki son latitid anver nou mesaz ti sanze?
12 Petet dimoun dan ou zanmirant i kapab dir menm zafer. Sirman ou osi ou responsab pour sa. Ler ou’n apros bann dimoun “personnelman” dan predikasyon portanport, ou’n koz avek bann zonm, fanm ek bann zenn devan laport. Serten petet pa ti ekoute menm si zot in ganny aprose “plizyer fwa.” I kapab ki lezot in ekout an bref anmezir ki ou ti partaz en verse Labib ouswa en panse sorti dan Labib avek zot. Me pourtan avek lezot ou’n kapab rann en bon temwannyaz e zot in aksepte sa mesaz. Tousala i posib anmezir ki nou “anons plennman sa bon nouvel.” Parey ou kapab konnen, i annan plizyer legzanp bann dimoun ki pa ti montre bokou lentere kan zot ti ganny aprose pour “plizyer fwa” me ki apre ti sanze. Petet en keksoz ti ariv avek zot ouswa avek en dimoun ki zot kontan, ki ti ouver zot lespri ek leker pour laverite. Aprezan zot enn nou bann frer ek ser. Alor, pa dekouraze menm si tou resaman ou pa’n zwenn bokou ki’n aksepte sa mesaz. Nou pa ekspekte tou dimoun vin dan laverite. Me sa ki Bondye i ekspekte avek nou i ki nou kontinyen anons plennman sa bon nouvel seryezman e avek bokou devouman.
Rezilta ki nou kapab pa konnen
13. Kan nou rann temwannyaz plennman, ki mannyer i posib pour sa anmenn bon rezilta ki nou menm nou pa konnen?
13 Predikasyon Pol pa ti annan lefe zis lo bann ki i ti personnelman ede pour vin Kretyen. I parey pour nou osi. Nou fer sir ki nou partisip regilyerman dan predikasyon portanport ouswa kaz an kaz, nou rann temwannyaz avek otan dimoun ki nou kapab. Nou partaz sa bon nouvel avek nou vwazen, koleg travay, kanmarad lekol ek fanmir. Eski nou konn tou rezilta? Avek serten, i kapab annan bon rezilta deswit. Me avek lezot, lagrenn laverite i kapab pa zermen deswit me avek letan i pous rasin dan leker en dimoun e i konmans pouse. Menm si sa pa arive, bann dimoun ki nou koz avek i kapab koz avek lezot konsernan sa ki nou’n dir, sa ki nou krwar ek nou fason azir. Wi, i kapab ki san realize zot permet ki sa lagrenn i ganny en pli bon later lezot landrwa.
14, 15. Ki rezilta temwannyaz en frer ti anmennen?
14 Konman en legzanp egzamin ka Ryan ek son madanm Mandi ki reste Laflorid, Leta-z-ini. Dan son travay Ryan ti rann temwannyaz enformelman avek enn son koleg travay. Sa zonm ki ti grandi dan larelizyon Endou ti enpresyonnen par lafason ki Ryan ti sanze e eksprim son lekor. Dan zot konversasyon Ryan ti koz lo bann topik parey rezireksyon ek kondisyon bann dimoun mor. En zour swar pandan mwan Zanvye sa zonm ti demann son madanm Jodi ki i ti konnen lo Temwen Zeova. Jodi ti en Katolik e i ti dir ki sel keksoz ki i ti konnen lo bann Temwen i zot “predikasyon portanport.” Alor Jodi ti tip sa mo “Temwen Zeova” lo Internet e i ti konmans fer resers ki ti anmenn li lo nou sit www.watchtower.org. Pour trwa mwan Jodi ti lir bann lenformasyon lo sa sit enkli Labib ek lezot lartik ki ti enteres li.
15 Vi ki Jodi ek Mandi ti ners, alor avek letan zot ti zwenn. Mandi ti byen kontan pour reponn bann kestyon Jodi. Avek letan Jodi ek Mandi ti diskit plizyer topik baze lo Labib. Jodi ti aksepte en letid Labib ki i ti ganny ofer. Pa tro bokou letan apre i ti konmans al Lasal Rwayonm. Pandan mwan Oktob, Jodi ti vin en proklanmater non batize e i ti batize Fevriye. I ekrir: “La ki mon konn laverite, mon lavi i annan en bi e mon santi mwan ere.”
16. Ki leksperyans sa frer Laflorid i montre konsernan nou zefor pour anons plennman sa bon nouvel?
16 Ryan pa ti konnen ki apre ki i ti’n anons sa bon nouvel avek en zonm sa ti pou fer ki en lot dimoun ti pou vin dan laverite. I vre, i ti aprann plitar ki rezilta in annan apre ki i ti’n determinen pour “anons plennman sa bon nouvel.” Toudmenm, i posib ki ou anons sa bon nouvel portanport, kot travay, kot lekol ouswa enformelman e san ki ou konnen sa i vin en fason pour lezot tann sa bon nouvel. Zis parey Pol pa ti konn tou sa ki son travay pour rann temwannyaz ti pou akonplir dan “Provens Lazi,” ou pa pou konn tou bon rezilta ki ou travay pour anons plennman sa bon nouvel pou anmennen. (Lir Akt 23:11; 28:23.) Pa i vreman enportan alor ki ou kontinyen fer li!
17. Ki ou determinen pour fer pandan lannen 2009?
17 Pandan lannen 2009, annou pran aker nou travay pour pres portanport ensi ki dan lezot fason. Dan sa fason nou pou dan en pli bon pozisyon pour eksprim nou santiman parey Pol ki ti dir: “Mon pa atas okenn valer spesyal avek mon lavi, pourvi ki mon kapab akonpli[r] mon misyon e fini sa travay ki Senyer Zezi in konfye mwan, pour anons [“plennman sa bon nouvel konsernan,” NW] lagras Bondye.”
Ki ou pou reponn?
• Ki mannyer zapot Pyer ek Pol e lezot dan premye syek ti anons plennman sa bon nouvel?
• Akoz nou travay pour anons sa bon nouvel i kapab annan plis lefe ki sa ki nou konnen?
• Ki teks pour lannen 2009 e akoz ou krwar i apropriye?
[Kestyon]
[Pwen adisyonnel]
Teks pour lannen 2009 i: “Anons plennman sa bon nouvel.”—Akt 20:24, NW.