Eski ou en bon administrater labonte ekstraordiner Bondye?
Eski ou en bon administrater labonte ekstraordiner Bondye?
“Annan en gran lafeksyon pour kanmarad parey bann frer, e setaki montre plis respe pour kanmarad.”—ROM. 12:10.
1. Ki Parol Bondye i asir nou?
PAROL BONDYE i kontinyelman asir nou ki Zeova pou ed nou ler nou dekouraze ouswa tris. Remark par egzanp sa parol rekonfortan: “Zeova pe donn sipor tou sa bann ki pe tonbe e i pe redres tou sa bann ki’n kourbe.” “I pe geri sa bann ki zot leker in brize, e i pe pans zot blesir.” (Ps. 145:14; 147:3) Deplis nou Papa ki dan lesyel i dir li menm: “Mwan, Zeova, mon ou Bondye, mon pe tyonbo ou lanmen drwat, sa Enn ki pe dir ou, ‘Pa bezwen per. Mwan, mon pou ed ou.’”—Iza. 41:13.
2. Ki mannyer Zeova i siport son bann serviter?
2 Me ki mannyer Zeova, sa enn ki reste anler dan lesyel envizib i kapab ‘tyonbo nou lanmen’? Ki mannyer i ‘redres nou kan nou kourbe’ akoz nou leker i fer mal? Zeova i donn nou sa sipor dan diferan fason. Par egzanp, i donn son pep sa “p[w]isans ki napa son parey” atraver son lespri sen. (2 Kor. 4:7; Zan 14:16, 17) Bann serviter Bondye i osi ganny pwisans ek lankourazman dan sa mesaz ki dan Parol enspire Bondye, Labib. (Ebr. 4:12) Eski i annan lezot fason ki Zeova i fortifye nou? Nou ganny en larepons dan premye liv Pyer.
Labonte ekstraordiner Bondye i ganny demontre dan diferan fason
3. (a) Ki zapot Pyer ti dir konsernan bann leprev? (b) Kwa ki ganny diskite dan dezyenm parti premye let Pyer?
3 Dan son let pour bann Kretyen ki ti’n ganny swazir par lespri sen, zapot Pyer ti ekrir ki zot ti annan bon rezon pour zwaye akoz en gran rekonpans ti pe esper zot. Apre sa i ti azoute: “Menm si i neseser aprezan pour zot pas, pour en pti moman, par divers difikilte.” (1 Pyer 1:1-6) Not sa mo “divers.” Sa mo i endike ki zot ti pou pas atraver diferan leprev. Parkont Pyer pa ti aret la e les son bann frer reflesir si zot ti pou kapab andir sa bann diferan tes. Plito i ti fer resorti ki bann Kretyen i kapab asire ki Zeova pou ed zot siport sak leprev ki zot pas atraver, nenport ki kalite i kapab ete. Sa lasirans i ganny donnen dan dezyenm parti let Pyer, kot bann zapot ti diskit lo bann size ki ti relye avek “lafen tou keksoz.”—1 Pyer 4:7.
4. Akoz sa parol dan 1 Pyer 4:10 i rekonfort nou?
4 Pyer ti dir: “Dapre sa don ki sakenn in gannyen, servi li pour fer dibyen lezot konman bann bon administrater labonte ekstraordiner Bondye ki ganny demontre dan diferan fason.” (1 Pyer 4:10, NW) La Pyer i servi sa mo “diferan” ki menm mo Grek ki’n ganny tradwir “divers” dan paragraf 3. Annefe i ti pe dir: ‘Leprev i vin dan diferan form, me pareyman Bondye i demontre son labonte ekstraordiner dan diferan fason.’ Akoz sa parol i rekonfortan? Parski i fer vwar ki dan nenport ki kalite leprev ki kapab vini, labonte ekstraordiner Bondye pou touzour ganny demontre dan en fason ki pou adapte e ed nou andire. Me dan parol Pyer, eski ou’n remarke ki mannyer Zeova i demontre son labonte ekstraordiner anver nou? Atraver nou bann frer ek ser Kretyen.
“Servi li pour fer dibyen lezot”
5. (a) Ki sak Kretyen i devret fer? (b) Ki bann kestyon ki ganny souleve?
5 Ler i ti pe koz avek tou manm dan kongregasyon Kretyen, Pyer ti dir: “Avan tou, zot devre[t] annan en gran lanmour pour kanmarad.” Apre sa i ti azoute: “Dapre sa don ki sakenn in gannyen, servi li pour fer dibyen lezot.” (1 Pyer 4:8, 10, NW) Alor, sak dimoun dan kongregasyon i devret ede pour kontinyen batir lezot frer ek ser Kretyen. Nou responsab en keksoz ki pour Bondye ki annan valer e nou annan sa devwar pour partaz li avek lezot. Alor, ki sa keksoz ki annan valer? Pyer ti dir ki sa i “en don.” Ki sa don? Ki mannyer nou “servi li pour fer dibyen lezot”?
6. Nonm serten parmi bann don ki bann Kretyen in gannyen.
6 Parol Bondye i dir: “Tou don ekselan, tou kado parfe i sorti lao.” (Zak 1:17) I vre, tou don ki Zeova in konfye son pep i en fason ki i demontre son labonte ekstraordiner. En don vreman remarkab ki Zeova i donn nou i son lespri sen. Sa don i permet nou devlop bann kalite ki Bondye i annan parey lanmour, labonte ek ladouser. Sa bann kalite i motiv nou an retour pour annan en lafeksyon senser e profon pour nou bann frer ek ser Kretyen e pare pour ed zot. Vre lasazes ek konnesans i osi en laspe parmi bann bon don ki nou gannyen avek led lespri sen. (1 Kor. 2:10-16; Gal. 5:22, 23) Anfet nou lenerzi, abilite ek talan i kapab ganny vwar konman bann don ki kapab ganny servi pour loue e onor nou Papa ki dan lesyel. Nou annan sa responsabilite sorti kot Bondye pour servi nou bann kalite ek abilite konman en mwayen pour demontre anver nou bann frer ek ser Kretyen sa labonte ekstraordiner ki Bondye in demontre anver nou.
Ki mannyer pour “servi li pour fer dibyen”?
7. (a) Ki sa lekspresyon “dapre” i endike? (b) Ki kestyon nou devret demann nou lekor e akoz?
7 An rapor avek bann don ki nou’n gannyen, Pyer ti osi dir: “Dapre sa don ki sakenn in gannyen, servi li.” Sa lekspresyon “dapre” i endike ki kalite ek abilite i kapab varye dan diferan fason ek degre. Nenport ki kalite don, sak dimoun in ganny demande pour “servi li [setadir nenport don an partikilye ki i’n gannyen] pour fer dibyen lezot.” Deplis, sa lekspresyon “servi li . . . konman bann bon administrater” i en lord. Alor nou bezwen demann nou lekor: ‘Eski mon servi sa bann don ki mon’n gannyen pour fortifye mon bann frer ek ser Kretyen?’ (Konpar 1 Timote 5:9, 10.) ‘Ouswa eski mon servi bann abilite ki mon’n gannyen avek Zeova sirtou pour benefisye mon prop lekor, petet par rod larises ouswa pozisyon dan lasosyete?’ (1 Kor. 4:7) Nou pou fer plezir Zeova si nou servi nou bann don “pour fer dibyen lezot.”—Prov. 19:17; lir Ebre 13:16.
8, 9. (a) Ki serten fason bann Kretyen dan lemonn antye i ed zot frer ek ser Kretyen? (b) Ki mannyer bann frer ek ser dan ou kongregasyon i ed lezot?
8 Parol Bondye i mansyonn diferan fason bann Kretyen dan premye syek ti fer dibyen lezot. (Lir Romen 15:25, 26; 2 Timote 1:16-18.) Pareyman ozordi, bann vre Kretyen i obeir sa lord pour servi zot don an faver bann frer ek ser Kretyen e zot fer sa avek tou zot leker. Egzamin serten fason zot fer sa.
9 Bokou frer i pas bokou letan sak mwan pour prepar zot partisipasyon dan renyon. Dan renyon, ler zot transmet serten sa bann lenformasyon presye ki zot in dekouver dan zot letid Labib, zot bon resers i motiv kongregasyon antye pour andire. (1 Tim. 5:17) Bokou frer ek ser i renonmen pour zot tandres ek konpasyon ki zot demontre anver lezot. (Rom. 12:15) Serten i vizit bann ki malad regilyerman e priy avek zot. (1 Tesa. 5:14) Lezot i ekrir bann pti mo ankourazan pour zot bann frer ek ser ki pe fer fas avek en leprev. Lezot ankor i ed bann ki fizikman limite pour asiste renyon kongregasyon. Plizyer milye Temwen i partisip dan bann travay sekour, zot ed bann lezot frer ek ser pour rekonstrir zot lakaz ki’n ganny andomaze par bann dezas. Sa lafeksyon senser ek led ki bann frer ek ser i demontre, tousala i “labonte ekstraordiner Bondye ki ganny demontre dan diferan fason.”—Lir 1 Pyer 4:11.
Kwa ki pli enportan?
10. (a) Ki sa de laspe dan son servis pour Bondye Pol ti konsernen avek? (b) Ki mannyer nou imit Pol ozordi?
10 Bann serviter Bondye napa zis en don ki zot in ganny konfye pour servi an faver lezot frer ek ser Kretyen, zot osi annan en mesaz pour anmenn pour zot prosen. Zapot Pol ti rekonnet sa de laspe dan son servis pour Zeova. I ti ekrir kongregasyon Efez konsernan “sa travay ki Bondye dan son lanmour [oubyen “par son labonte ekstraordiner,” NW] in sarz [li] pour fer” pour zot byennet. (Efe. 3:2) Pourtan i ti osi dir: “Bondye in aprouv nou pour konfye nou Levanzil.” (1 Tesa. 2:4) Parey Pol, nou osi nou rekonnet ki Bondye in konfye nou en travay konman bann predikater Rwayonm Bondye. Par partisip dan sa travay predikasyon avek devouman, nou fer bokou zefor pour imit legzanp ki Pol in kite konman en predikater ki pa ti zanmen aret pres sa bon nouvel. (Akt 20:20, 21; 1 Kor. 11:1) Nou konnen ki pres sa mesaz Rwayonm i kapab sov lavi. An menm tan nou fer bokou zefor pour imit Pol par sezi tou loportinite pour “partaz . . . kado spirityel” avek lezot frer ek ser Kretyen.—Lir Romen 1:11, 12; 10:13-15.
11. Ki mannyer nou devret konsider nou devwar pour prese e batir nou bann frer ek ser?
11 Lekel parmi sa de aktivite Kretyen ki pli enportan? Demann en kestyon koumsa i konmsi ou pe demande lekel ant sa de lezel en zwazo ki pli enportan. Larepons i evidan. En zwazo i bezwen tou le de son lezel pour li kapab anvol byen. Pareyman, nou bezwen partisip dan tou le de laspe nou servis pour Bondye pour nou kapab fer tou sa ki en Kretyen i ganny demande pour fer. Alor, olye konsider nou devwar pour pres sa bon nouvel e batir nou bann frer ek ser Kretyen konman de travay diferan, nou devret vwar zot parey zapot Pyer ek Pol ti vwar zot, setadir konman bann responsabilite ki mars ansanm. Dan ki fason?
12. Ki mannyer nou ganny servi konman en lenstriman dan lanmen Zeova?
12 Konman bann evanzelizater, nou servi nenport abilite ki nou kapab annan pour tous leker nou prosen avek sa mesaz ankourazan lo Rwayonm Bondye. Dan sa fason nou swete ed zot vin bann disip Kris. Parkont, nou osi servi nou abilite ek lezot don ki nou annan pour esey ankouraz nou bann frer ek ser Kretyen atraver bann parol ankourazan ek led, tousala i en fason Bondye i demontre son labonte ekstraordiner atraver nou. (Prov. 3:27; 12:25) Dan sa fason, nou swete ed zot reste bann disip Kris. Dan tou le de aktivite, pres avek manm piblik e “fer dibyen lezot,” nou annan sa privilez merveye pour Zeova servi nou konman bann lenstriman dan son lanmen.—Gal. 6:10.
“Annan en gran lafeksyon pour kanmarad”
13. Ki pou arive si nou aret “fer dibyen lezot”?
13 Pol ti ankouraz son bann frer ek ser Kretyen: “Annan en gran lafeksyon pour kanmarad parey bann frer, e setaki montre plis respe pour kanmarad.” (Rom. 12:10) Vreman, annan lafeksyon pour nou frer i motiv nou pour servi lezot avek tou nou leker konman bann administrater labonte ekstraordiner Bondye. Nou realize ki si Satan i reisi anpes nou “fer dibyen lezot” i pou afekte nou linite. (Kol. 3:14) An retour, en mank linite pou fer nou annan mwens devouman dan travay predikasyon. Satan i konnen ki i zis bezwen kas enn nou lezel senbolik pour li anpes nou anvole.
14. Lekel ki benefisye ler nou kontinyen “fer dibyen lezot”? Donn en legzanp.
14 “Fer dibyen lezot” pa benefisye zis bann ki resevwar labonte ekstraordiner Bondye me osi bann ki transmet li. (Prov. 11:25) Pran par egzanp Ryan ek Roni, en koup ki reste Illinois, Leta-z-ini. Kan zot ti aprann ki siklonn Katrina ti’n detrir lakaz plizyer Temwen, lanmour pour lezot ti pous zot pour kit zot louvraz, rann zot apartman e aste en karavann dezyenmmen, aranz li e vwayaz 1,400 kilomet ziska Louisiana. Zot ti reste plis ki enn an laba e zot ti depans zot letan, lenerzi ek resours pour ed zot bann frer ek ser. Ryan ki annan 29 an ti dir: “Partisip dan travay sekour in fer mwan vin pli pros avek Bondye. Mon’n vwar ki mannyer i pran swen avek son pep.” I ti osi azoute: “Mon’n aprann bokou konman pour pran swen avek mon bann frer kan mon’n travay avek bann frer pli aze. Mon’n osi aprann ki konman en zenn nou annan bokou pour fer dan lorganizasyon Zeova.” Roni ki annan 25 an ti dir: “Mon vreman rekonesan ki mon’n kapab ed lezot. Mon santi mwan pli ere ki zanmen oparavan. Mon konnen ki pour bann lannen ki pe vini, mon pou kontinyen benefisye avek sa leksperyans merveye.”
15. Ki rezon nou annan pour kontinyen ganny servi konman bann administrater labonte ekstraordiner Bondye?
15 I vre, obeir lord Bondye pour pres sa bon nouvel e batir nou bann frer ek ser Kretyen i anmenn benediksyon pour tou dimoun. Bann ki nou ede i vin pli for spirityelman tandis ki nou nou eksperyans en lazwa o fon nou leker ki nou kapab resanti zis ler nou ed lezot. (Akt 20:35) Kongregasyon antye i devlop plis tandres anmezir ki sak manm i pran en lentere ranpli avek lanmour dan lezot. Deplis, lanmour ek lafeksyon ki nou demontre pour lezot i klerman idantifye nou konman bann vre Kretyen. Zezi ti dir: “Dimoun pou [v]war ki zot mon bann disip si zot kontan kanmarad.” (Zan 13:35) Apre tou, tou loner i al pour nou Papa Zeova, vi ki son dezir pour fortifye bann ki dan bezwen i ganny demontre atraver son bann serviter lo later. Pa nou vreman annan bon rezon alor, pour servi nou don pour “fer dibyen lezot konman bann bon administrater labonte ekstraordiner Bondye”! Eski ou pou kontinyen fer li?—Lir Ebre 6:10.
Eski ou rapel?
• Dan ki fason Zeova i fortifye son bann serviter?
• Ki responsabilite Zeova in konfye nou?
• Nonm serten fason nou kapab servi nou bann frer ek ser Kretyen?
• Kwa ki pou motiv nou pour kontinyen servi nou don pour “fer dibyen lezot”?
[Kestyon]
[Portre lo paz 17]
Eski ou servi ou “don” pour servi lezot ouswa pour fer plezir ou lekor?
[Portre lo paz 19]
Nou pres sa bon nouvel avek lezot e siport nou frer ek ser Kretyen
[Portre lo paz 20]
Bann travayer sekour i merit felisitasyon pour zot leta lespri sakrifis