Serviter Zeova in “ganny perse pour nou lofans”
Serviter Zeova in “ganny perse pour nou lofans”
“I ti ganny perse pour nou lofans; I ti ganny kraze pour nou bann fot. . . . Akoz son bann blesir nou’n ganny geri.”—IZA. 53:5.
1. Ki nou devret gard antet ler nou obzerv Memoryal e ki profesi ki pou ed nou fer sa?
NOU obzerv Memoryal pour komemor lanmor Kris e pour mazin tou sa ki son lanmor ek rezireksyon in akonplir. Memoryal i fer nou rapel ki zis Zeova tousel ki devret dirize, i osi fer nou rapel sanktifikasyon son non, lakonplisman son plan enkli delivrans pour limanite. Petet napa en lot profesi dan Labib ki sa enn dan Izai 53:3-12 ki kapab pli byen dekrir sakrifis Kris e sa ki i’n akonplir. Izai ti predir ki sa Serviter ti pou soufer e i ti donn bann detay spesifik lo lanmor Kris e lo benediksyon ki son lanmor ti pou anmennen pour son bann frer swazir ek ‘lezot mouton.’—Zan 10:16.
2. Ki laprev profesi Izai i donn nou e ki lefe sa pou annan lo nou?
2 Set syek avan ki Zezi ti ne lo later, Zeova ti enspir Izai pour profetize ki Son Serviter ki i’n swazir ti pou reste fidel menm ler i ti pou ganny teste ziska lanmor. Lefet ki Zeova ti enspir sa profesi i prouve ki i annan konfyans total dan fidelite son Garson. Anmezir ki nou egzamin sa profesi, nou leker pou ranpli avek rekonnesans e nou lafwa pou vin pli for.
“Meprize” e konsidere “konman en nanryen ditou”
3. Akoz bann Zwif ti’n devret akeyir Zezi, me ki mannyer zot ti resevwar li?
3 Lir Izai 53:3. Zis mazinen ki sa ti kapab vedir pour sa sel Garson Bondye les dekote sa lazwa ki i ti annan pour travay akote son Papa e vin lo later pour donn son lavi konman en sakrifis pour sov limanite dan pese ek lanmor! (Fili. 2:5-8) Son sakrifis ki ti ganny reprezante par bann sakrifis zannimo anba Lalwa Moiz ti pou permet imen ganny sa vre pardon pour zot pese. (Ebr. 10:1-4) Eski pa i ti’n devret omwen ganny akeyir e onore, par bann Zwif ki ti pe esper sa Mesi promiz? (Zan 6:14) O kontrer, bann Zwif ti ‘mepriz’ li e zot ti “konsider li konman en nanryen ditou,” parey Izai ti’n profetize. Zapot Zan ti ekrir: “I ti vin kot li, me son prop dimoun pa ti aksepte li.” (Zan 1:11) Zapot Pyer ti dir avek bann Zwif: “Bondye tou nou bann zanset, in montre laglwar son serviter Zezi-Kri, ki zot ti livre avek lotorite gouvernman, an rennyan li devan Pilat, tandis ki Pilat ti’n deside pour larg li. Zot in rezet sa enn ki sen e zis.”—Akt 3:13, 14.
4. Ki mannyer Zezi ti konnen ki si sa maladi?
4 Izai ti osi profetize ki Zezi ti pou bezwen “konnen ki si sa maladi.” Pandan son minister, sirman parler Zezi ti fatige, me napa okenn lendikasyon ki montre ki i ti tonm malad. (Zan 4:6) Parkont, i ti konn maladi sa bann ki i ti pres avek. I ti pran pitye pour zot e i ti geri en kantite dimoun. (Mark 1:32-34) Zezi ti akonplir sa profesi ki dir: “Vreman i’n anmenn nou maladi ek nou soufrans.”—Iza. 53:4a; Mat. 8:16, 17.
Konmsi “Bondye ti’n frap li”
5. Ki mannyer bann Zwif ti konsider lanmor Zezi e akoz sa ti fer li soufer plis ankor?
5 Lir Izai 53:4b. En kantite Zwif pa ti konpran akoz Zezi ti pou soufer e mor. Zot ti krwar ki Bondye ti pe pini li, konmsi i ti pe fer li soufer avek en maladi repinyan. (Mat. 27:38-44) Bann Zwif ti akiz Zezi konman en dimoun ki ti blasfenm. (Mark 14:61-64; Zan 10:33) Sirman, Zezi pa ti ni en peser ni en dimoun ki ti blasfenm. Me akoz son gran lanmour pour son Papa, zis sa lide ki i ti pou ganny akize e mor konman en dimoun ki ti pe blasfenm, ti’n bezwen fer li soufer plis ankor konman Serviter Zeova. Malgre tousala, i ti pare pour soumet avek lavolonte Zeova.—Mat. 26:39.
6, 7. Dan ki sans Zeova ti ‘kraz’ son Serviter fidel e akoz sa ti fer Bondye “plezir”?
6 Nou konpran akoz profesi Izai ti dir ki Kris ti pou ganny konsidere konmsi “Bondye ti’n frap” li, me an menm tan i kapab drol akoz sa profesi ti dir ki: “Zeova li menm ti pran plezir pour kraz li.” (Iza. 53:10) Vi ki Zeova ti osi dir: “Gete! Mon serviter . . . ki mon’n swazir, e ki mon’n aprouve,” ki mannyer Zeova ti kapab pran “plezir pour kraz li”? (Iza. 42:1) Dan ki sans nou kapab dir ki sa ti fer Zeova plezir?
7 Pour konpran sa bout profesi, nou devret mazinen ki ler Satan ti kestyonn souvrennte Zeova, i ti pretann ki bann serviter Bondye ki dan lesyel oubyen lo later pa pou reste fidel avek li. (Zob 1:9-11; 2:3-5) Lefet ki Zezi ti reste fidel ziska lanmor, i ti donn larepons parfe pour sa kestyon ki Satan ti souleve. Alors, menm si Zeova ti permet ki Kris ti ganny touye par son bann lennmi, nou asire ki Zeova ti soufer ler i ti vwar sa Serviter ki i ti’n swazir ganny met a mor. Me ler i ti obzerve ki mannyer son Garson ti reste totalman fidel sa ti fer Li plezir en kantite. (Prov. 27:11) Deplis, i ti konnen ki lanmor son Garson ti pou anmenn en gran lazwa pour bann imen ki repantir.—Lik 15:7.
“Perse pour nou lofans”
8, 9. (a) Ki mannyer Zezi ti ganny “perse pour nou lofans”? (b) Ki mannyer Pyer ti konfirm sa?
8 Lir Izai 53:6. Parey bann mouton perdi, bann imen peser pa ni konnen kot zot pe ale e zot pe rod delivrans pour maladi ek lanmor ki zot in erite avek Adan. (1 Pyer 2:25) Lefet ki nou enparfe napa en desandans Adan ki ti pou kapab aste sa ki Adan in perdi. (Ps. 49:7) Me akoz son gran lanmour, “Zeova li menm in fer ki nou tou nou larg nou fot lo sa enn,” son Garson byenneme e sa Serviter ki i’n swazir. Lefet ki i ti aksepte ganny “perse pour nou lofans” e “kraze pour nou fot,” Kris in anmenn nou pese lo poto e i’n mor dan nou plas.
9 Zapot Pyer ti ekrir: “Se pour sanmenm ki . . . Bondye in apel zot, parski Kris li[ ]menm in soufer pour zot, an lesan pour zot en legzanp pour zot swiv. Kris li[ ]menm in anmenn nou pese dan son lekor lo en dibwa, pour ki nou mor konsernan pese e viv pour lazistis.” Apre ki i ti’n sit profesi Izai, Pyer ti azoute: “Par son bann blesir zot in ganny geri.” (1 Pyer 2:21, 24; Iza. 53:5) Sa in ouver semen pour bann peser rekonsilye avek Bondye, parey Pyer ti azoute: “Kris in osi mor pour nou pese enn fwa pour tou; i’n mor pour bann ki move, pour anmenn nou tou kot Bondye.”—1 Pyer 3:18.
“Anmennen parey en pti mouton kot labatwar”
10. (a) Ki mannyer Zan Batis ti dekrir Zezi? (b) Akoz parol ki Zan ti dir i apropriye?
10 Lir Izai 53:7, 8. Ler Zan Batis ti vwar Zezi pe aprose, i ti dir: “La Lanyo Bondye ki efas pese lemonn.” (Zan 1:29) Ler i ti pe koz konsernan Zezi konman en pti mouton, petet Zan ti pe mazin parol Izai ki dir: “I ti ganny anmennen parey en pti mouton kot labatwar.” (Iza. 53:7) Izai ti profetize: “I ti vers son nanm menm ziska lanmor.” (Iza. 53:12) I enteresan pour note ki sa zour swar ler Zezi ti entrodwir Memoryal son lanmor, i ti donn en lakoup diven avek son 11 zapot fidel e i ti dir: “Sa i mon disan, disan lalyans ki’n koule pour bokou, pour pardon[n] pese.”—Mat. 26:28.
11, 12. (a) Lefet ki Izaak ti volonterman ofer son lekor konman en sakrifis, ki rapor sa i annan avek sakrifis Kris? (b) Ki nou devret gard antet konsernan Zeova ki sa pli Gran Abraam ler nou obzerv Memoryal?
11 Parey Izaak, Zezi ti pare pour li ganny ofer konman en sakrifis lo lotel Zeova pour fer son lavolonte. (Zen. 22:1, 2, 9-13; Ebr. 10:5-10) Menm si Izaak ti aksepte pour ganny sakrifye, se Abraam ki ti pare pour ofer sa sakrifis. (Ebr. 11:17) Pareyman, Zezi ti aksepte volonterman ki i ti pou mor, me se Zeova ki ti fer laranzman sa sakrifis. Sakrifis son Garson ti en fason ki Bondye ti eksprim son gran lanmour pour bann imen.
12 Zezi ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Zapot Pol ti ekrir: “Bondye in prouv son lanmour pour nou: Kan nou ti ankor peser, Kris in mor pour nou.” (Rom. 5:8) Alors, ler nou pe onor Kris par komemor son lanmor, nou pa devret oubliye ki sa enn ki’n fer laranzman pour sa sakrifis ti Zeova, sa pli Gran Abraam. Nou obzerv Memoryal pour loue li.
Sa Serviter “pou fer bokou dimoun ganny konsidere drwat”
13, 14. Ki mannyer Serviter Zeova ti “fer bokou dimoun ganny konsidere drwat”?
13 Lir Izai 53:11, 12. Konsernan son Serviter ki i’n swazir, Zeova ti dir: “Mon serviter ki drwat, pou fer bokou dimoun ganny konsidere drwat.” Dan ki fason? Lafen verse 12 i donn nou en lide pour larepons sa kestyon. “E i [sa Serviter] ti konmans entervenir pour bann ki komet lofans.” Tou bann desandans Adan in ne peser setadir “bann ki komet lofans,” alor zot resevwar “rekonpans pour pese,” lanmor. (Rom. 5:12; 6:23) I neseser ki i annan en rekonsilyasyon ant bann imen ki peser ek Zeova. Dan Izai 53 sa profesi i dekrir dan en zoli fason konman Zezi ‘ti entervenir’ oubyen entersed pour bann imen peser, an dizan: “Pinisyon ki ti sipoze anmenn lape pour nou in vin lo li, e akoz son bann blesir nou’n ganny geri.”—Iza. 53:5.
14 Lefet ki i’n anmenn nou pese e mor pour nou, Kris in “fer bokou dimoun ganny konsidere drwat.” Pol ti ekrir: “Par son Garson alor, Bondye in deside rekonsilye avek li[ ]menm liniver an antye. E ensi par lanmor son Garson lo [“poto martir,” NW] Bondye in fer lape, e i[’]n rekonsilye avek li[ ]menm tou keksoz swa lo later ou dan lesyel.”—Kol. 1:20.
15. (a) Lekel sa bann ‘keksoz dan lesyel’ ki Pol ti mansyonnen? (b) Zis lekel ki kapab pran sa dipen e bwar sa diven zour Memoryal e akoz?
15 Bann ‘keksoz dan lesyel’ ki’n ganny rekonsilye avek Zeova akoz disan ki Kris in verse i bann Kretyen swazir, ki Bondye in apele pour viv dan lesyel. Bann Kretyen “ki Bondye in apele” in ganny konsidere ‘drwat pour lavi.’ (Ebr. 3:1; Rom. 5:1, 18) Zeova i vin zot Papa spirityel. Lespri sen i konfirm avek zot ki zot “zeritye ansanm avek Kris,” ki’n ganny apele pour vin bann lerwa ek pret dan son Rwayonm dan lesyel. (Rom. 8:15-17; Rev. 5:9, 10) Zot form parti Izrael spirityel oubyen “Izrael Bondye,” e zot in antre dan sa “nouvo lalyans.” (Zer. 31:31-34; Gal. 6:16, NW) Konman bann manm sa nouvo lalyans, zot kapab manz sa dipen e bwar sa diven zour Memoryal e konsernan sa diven Zezi ti dir: “Sa lakoup i nouvo lalyans ki’n ganny sele par mon disan, verse pour zot.”—Lik 22:20.
16. Ki si sa sa bann ‘keksoz lo later’ e dan ki fason zot ganny konsidere drwat devan Zeova?
16 Bann ‘keksoz ki lo later’ i lezot frer ek ser ki annan sa lespwar pour viv lo later pour touzour. Sa Serviter ki Zeova in swazir i osi fer sa bann dimoun ganny konsidere drwat devan Zeova. Akoz zot annan lafwa dan sakrifis Kris e “lav zot rob e blansi li dan disan Lanyo” Zeova i konsider zot drwat, pa konman bann garson spirityel, me konman zanmi, par donn zot sa lespwar merveye pour sirviv sa gran ladetres. (Rev. 7:9, 10, 14; Zak 2:23) Vi ki zot pa form parti sa nouvo lalyans e zot napa sa lespwar pour viv dan lesyel, zot pa manz sa dipen ni bwar sa diven zour Memoryal me zot asiste e obzerv sa ki pe pase avek respe.
Nou remersi Zeova ek Son Serviter ki i’n aprouve!
17. Ki mannyer letid sa bann profesi dan Izai konsernan sa Serviter in ed nou pour prepar nou lespri pour sa Memoryal?
17 Egzamin sa profesi konsernan sa Serviter ti en bon fason pour prepar nou lespri pour sa Memoryal lanmor Kris. I’n ed nou pour “gard nou regar fikse lo Zezi, sa enn ki linisyater nou lafwa, e ki anmenn li ziska perfeksyon.” (Ebr. 12:2) Nou’n aprann ki Garson Bondye i pa rebele. Kontrerman avek Satan, i kontan pour ganny ansennyen par Zeova e i aksepte li konman sa Souvren Senyer. Nou’n vwar ki ler Zezi ti lo later i ti demontre konpasyon anver bann dimoun ki i ti pres avek e i ti geri en kantite zot fizikman e spirityelman. Par fer sa i ti demontre sa ki i pou fer konman sa Lerwa dan Rwayonm Bondye dan sa nouvo sistenm ler “i etablir lazistis lo later.” (Iza. 42:4) Sa devouman ki i ti montre ler i ti pres konsernan sa Rwayonm konman “en lalimyer pour bann nasyon,” i rapel son bann disip pour pres sa bon nouvel avek devouman lo later antye.—Iza. 42:6.
18. Akoz profesi Izai i ranpli nou leker avek rekonnesans pour Zeova ek son Serviter fidel?
18 Profesi Izai i osi ed nou pour konpran pli byen sa gran sakrifis ki Zeova ti fer ler i ti anvoy son Garson ki i byen kontan lo later pour soufer e mor pour nou. Zeova pa ti pran plezir pour vwar son Garson soufer, me sa ki ti fer li plezir se pour vwar Zezi reste totalman fidel ziska lanmor. Nou osi nou devret zwaye parey li, par rekonnet tou sa ki Zezi in fer pour prouve ki Satan i en manter e sanktifye non Zeova, pour prouve ki Li tousel ki devret dirize. Deplis, Kris in amenn nou pese e mor pour nou. Dan sa fason, i’n fer li posib pour sa pti troupo setadir son bann frer swazir ek lezot mouton ganny konsidere drwat devan Zeova. Ler nou zwenn pour sa Memoryal, fotespere nou leker i ranpli avek rekonnesans pour Zeova ek son Serviter fidel.
Revizyon
• Dan ki sans Zeova ti ‘pran plezir’ pour son Garson ganny ‘kraze’?
• Ki mannyer Zezi ti ganny “perse pour nou lofans”?
• Ki mannyer sa Serviter ti “fer bokou dimoun ganny konsidere drwat”?
• Ki mannyer letid lo sa bann profesi konsernan sa Serviter i’n prepar ou lespri ek leker pour Memoryal?
[Kestyon]
[Portre lo paz 26]
“I ti ganny meprize, nou ti konsider li konman en nanryen ditou”
[Portre lo paz 28]
“I ti vers son nanm menm ziska lanmor”
[Portre lo paz 29]
“Lezot mouton” i asiste Memoryal e obzerv sa ki pe pase avek respe