Trouv lazwa dan sa travay pour fer disip
Trouv lazwa dan sa travay pour fer disip
“Ale e fer . . . disip.”—MAT. 28:19.
1-3. (a) Ki mannyer bokou dimoun i santi an rapor avek sa loportinite pour kondwir letid Labib? (b) Ki kestyon nou pou egzaminen?
EN SER ki pe servi dan en group Leta-z-ini ki koz Hindi ti ekrir: “Pour sa 11 semenn ki’n pase mon ti pe fer letid en fanmir ki sorti Pakistan.” I ti kontinyen: “Natirelman, mon’n vin zanmi avek zot. Larm i marse dan mon lizye kan mon mazinen ki sa fanmir pe al retourn Pakistan byento. Mon larm pa koule zis akoz sa latristes ki mon santi pour perdi zot konpanni me osi akoz sa lazwa ki mon’n eksperyanse pandan ki mon ti pe ansenny zot lo Zeova.”
2 Eski parey sa ser, ou osi ou’n eksperyans sa lazwa ki ou gannyen kan ou fer letid Labib avek en dimoun? Zezi ek son bann disip dan premye syek ti ganny bokou lazwa dan sa travay pour fer disip. Kan sa 70 disip ki Zezi ti’n formen ti retournen dan lazwa, “Lespri-Sen ti ranpli Zezi avek lazwa.” (Lik 10:17-21) Pareyman, bokou dimoun ozordi i kontan pour fer disip. Anfet, lannen 2007 bann proklanmater ki travay dir e ki zwaye ti kondwir apepre sis milyon edmi letid Labib tou le mwan!
3 Kantmenm sa, ziska aprezan serten proklanmater pa’n ganny sa plezir pour kondwir en letid Labib. Lezot pa’n kondwir en letid pandan sa detrwa dernyen lannen. Ki defi nou kapab rankontre anmezir ki nou fer zefor pour kondwir en letid Labib? Ki mannyer nou kapab sirmont sa bann defi? Ki rekonpans nou pou gannyen kan nou fer tou sa ki nou kapab pour obeir lord Zezi pour “ale e fer . . . disip”?—Mat. 28:19.
Defi ki kapab fer nou perdi nou lazwa
4, 5. (a) Dan serten parti lemonn, ki mannyer bann dimoun i reazir? (b) Ki defi bann proklanmater i fer fas avek dan lezot landrwa?
4 Dan serten parti lemonn, bann dimoun i kontan lir nou bann piblikasyon e zot enterese pour etidye Labib avek nou. En koup sorti Lostrali ki ti pe tanporerman servi Zanbi ti ekrir: “Bann leksperyans i vre. Zanbi i en paradi pour predikasyon. Temwannyaz lo semen i enkrwayab! Bann dimoun i apros nou e serten i menm demann nou en serten magazin an partikilye.” Dan sa enn an ki’n pase, bann frer ek ser Zanbi ti kondwir plis ki 200,000 letid Labib e sa i anviron plis ki en letid Labib par proklanmater.
5 Parkont dan lezot landrwa, bann proklanmater i vwar li difisil pour plas bann piblikasyon e kondwir letid regilyerman. Akoz? Souvandfwa, bann dimoun pa kot lakour kan sa bann proklanmater i pase, tandis ki bann ki kot zot i kapab pa enterese avek larelizyon. I kapab ki zot in ganny elve dan en lakour ki pa tro antren larelizyon ouswa zot deteste lipokrizi ki evidan dan fo larelizyon. Bokou dimoun i deprimen e dekouraze akoz bann fo berze. (Mat. 9:36) Parey nou kapab konpran, sa bann dimoun i kapab fatige partisip dan bann konversasyon lo Labib.
6. Ki limitasyon serten proklanmater i enpoz lo zot lekor?
6 Serten proklanmater fidel i fer fas avek en lot defi ki kapab fer zot perdi zot lazwa. Menm si en serten moman zot ti vreman aktif dan sa travay pour fer disip, i kapab ki konmela zot pe fer fas avek problenm lasante ouswa zot pa kapab fer bokou akoz lavyeyes. Annou egzamin osi serten limit ki nou kapab enpoz lo nou lekor. Par egzanp, eski ou santi ou pa kalifye pour kondwir en letid Labib? Ou kapab santi parey Moiz ler Zeova ti donn li lord pour al koz avek Faraon. Moiz ti dir: “Eskiz mwan Zeova, me mon pa koz byen, ni depi yer ni depi avan sa.” (Egz. 4:10) Sa mank lasirans i relye etrwatman avek lafreyer ki nou pa pou reisi. Nou kapab panse ki en dimoun pa pou vin en disip akoz nou pa sa pli bon ansennyan. Pour evite eksperyans sa, i kapab ki nou pou les pase sa loportinite pour kondwir en letid. Ki mannyer nou kapab fer fas avek sa bann defi ki nou fek mansyonnen?
Prepar ou leker
7. Kwa ki ti motiv Zezi dan son minister?
7 En premye pa nou bezwen pran se pour prepar nou leker. Zezi ti dir: “Labous i koz sa ki debord dan leker.” (Lik 6:45) Dan son minister, Zezi ti ganny motive par en lentere senser ki i ti annan pour byennet lezot dimoun. Par egzanp, kan i ti obzerv kondisyon spirityel bann Zwif ki ti’n afeblir, i “ti ranpli avek konpasyon pour lafoul.” I ti dir son bann disip: “I annan en gran rekolt . . . sipliy met rekolt pour anvoy zouvriye.”—Mat. 9:36-38.
8. (a) Ki nou devret mazin lo la? (b) Ki nou kapab aprann avek komanter en etidyan Labib?
8 Anmezir ki nou partisip dan sa travay pour fer disip, i bon pour nou mazin seryezman lo ki kantite nou’n benefisye akoz en dimoun ti pran letan pour etidye Labib avek nou. Mazin osi bann dimoun ki nou pou zwenn dan predikasyon e ki mannyer zot pou benefisye ler zot pou tann sa mesaz ki nou pe anmennen. En madanm ti ekrir biro brans Temwen Zeova dan pei kot i pe reste: “Mon ti a kontan dir zot ki degre mon rekonesan anver sa bann ser ki’n ansenny mwan kot mon lakour. Mon konnen ki petet parfwa zot ti fatige avek mwan parski mon demann en kantite kestyon e mon touzour fer zot reste pli tar ki sa ler ki ti’n ganny plàn. Me zot pran pasyans avek mwan e zot vreman anvi ansenny mwan sa ki zot in aprann. Mon remersye Zeova ek Zezi ki sa bann dimoun in vin dan mon lavi.”
9. Lo kwa Zezi ti konsantre e ki mannyer nou kapab imit li?
9 Byensir, pa tou dimoun ki ti aksepte pour swiv Zezi. (Mat. 23:37) Serten ti swiv li pour en serten letan me apre zot pa ti aksepte son lansennyman e finalman zot ti “aret swiv li.” (Zan 6:66) Me Zezi pa ti les reaksyon serten sa bann dimoun fer li santi ki son mesaz ti napa valer. Menm si en kantite parmi bann lagrenn ki i ti senmen pa ti raport fri, Zezi ti konsantre lo sa bon keksoz ki i ti pe fer. I ti vwar ki lagrenn dan plantasyon ti’n mir pour rekolt e i ti ganny bokou lazwa pour ede dan sa rekolt. (Lir Zan 4:35, 36.) Olye vwar zis sa later sek, eski pareyman nou kapab konsantre lo potansyel rekolt dan nou teritwar? Annou vwar ki mannyer nou pou kapab gard en latitid pozitif.
Senm avek bi pour rekolte
10, 11. Ki ou kapab fer pour gard ou lazwa?
10 En fermye i senm lagrenn avek bi pour li rekolte apre. Pareyman, nou devret pres avek bi pour konmans bann letid Labib. Me si ou pas bokou letan dan predikasyon me ou pa zwenn bokou dimoun kot lakour ouswa ou vwar li difisil pour zwenn ou bann retourn vizit? Sa i kapab agasan. Eski ou devret aret pres kaz an kaz? Definitivman non! Nou ankor pe zwenn bokou dimoun pour premye fwa atraver sa metod ki’n efikas pour en kantite letan.
11 Parkont pour gard ou lazwa, eski ou kapab sanz ou metod ouswa servi lezot mwayen pour zwenn bann dimoun? Par egzanp, eski ou’n esey rann temwannyaz lo semen ouswa dan bann landrwa travay? Eski ou kapab kontakte bann dimoun par telefonn ouswa ganny nimero telefonn bann ki ou’n deza pres sa mesaz Rwayonm avek pour ki ou kapab gard kontak avek zot? Si ou adapte e persevere dan predikasyon, ou pou ganny bokou lazwa pour zwenn bann dimoun ki pou pare pour aksepte sa mesaz Rwayonm.
Adapte avek bann ki pa enterese
12. Ki nou kapab fer si bokou dimoun dan nou teritwar pa enterese?
12 Me si bann dimoun dan ou teritwar pa enterese avek larelizyon? Eski ou kapab adapte ou lapros par koz lo en keksoz ki enteres zot? Zapot Pol ti ekrir bann krwayan Korent: “Parmi bann Zwif mon fer mwan en Zwif, . . . parmi bann ki pa konn lalwa, mon ti viv parey bann ki pa konn lalwa, pour mwan ganny sa ki pa konn lalwa. Pourtan mwan[ ]menm, mon obeir lalwa Bondye.” Ki bi Pol ti annan? I ti dir: “Mon fer mwan vin tou avek tou dimoun pour mwan sov d[e]trwa parmi zot par tou mannyer posib.” (1 Kor. 9:20-22) Eski pareyman nou osi nou kapab koz lo bann keksoz ki enteres bann dimoun dan nou teritwar? Bokou dimoun ki pa relizye i anvi amelyor zot lavi fanmir. Zot menm kapab pe rod en bi dan lavi. Eski nou kapab prezant sa mesaz Rwayonm avek sa bann dimoun dan en fason ki i pou atir zot latansyon?
13, 14. Ki mannyer nou kapab ganny plis lazwa dan sa travay pour fer disip?
13 En kantite proklanmater pe ganny plis lazwa dan sa travay fer disip menm dan bann landrwa kot lamazorite dimoun i paret pa enterese. Ki mannyer? Zot in aprann en nouvo langaz. En koup ki dan zot 60 an an montan ti dekouver ki bokou etidyan Sinwan ek zot fanmir ti pe viv dan teritwar zot kongregasyon. Sa msye ti dir: “Akoz sa, nou ti ganny ankouraze pour aprann Sinwan.” I ti kontinyen: “Menm si sa ti vedir ki nou ti bezwen pran en pe letan tou le zour pour aprann sa langaz nou’n ganny plizyer letid Labib avek bann dimoun ki koz Sinwan dan nou rezyon.”
14 Menm si ou pa kapab aprann en lot langaz, ou kapab servi byen sa brosir Good News for People of All Nations kan ou zwenn bann dimoun ki koz en lot langaz. Ou menm kapab ganny bann piblikasyon dan langaz ki sa dimoun ki ou zwenn i koze. I vre, i demann bokou letan an plis ek zefor pour kominik avek bann ki koz en lot langaz e ki sorti dan en lot kiltir. Me pa bliy sa prensip ki ganny trouve dan Parol Bondye: “Sa ki senm bokou, i pou rekolte bokou.”—2 Kor. 9:6.
Kongregasyon antye i enplike
15, 16. (a) Akoz sa travay pour fer disip i enplik zefor kongregasyon antye? (b) Ki rol bann aze i zwe?
15 Parkont, fer disip pa depan zis lo zefor en sel dimoun. O kontrer, i depan lo zefor kongregasyon antye. Akoz? Zezi ti dir: “Dimoun pou [v]war ki zot mon bann disip si zot kontan kanmarad.” (Zan 13:35) Vreman alor, kan bann etidyan Labib i asiste renyon, zot souvan enpresyonnen avek sa latmosfer ranpli avek lanmour ki annan dan nou bann rasanbleman. En etidyan Labib ti ekrir: “Mon vreman kontan asiste bann renyon. Bann dimoun i vreman akeyan!” Zezi ti dir ki bann ki anvi swiv li pou kapab ganny lopozisyon sorti kot zot fanmir. (Lir Matye 10:35-37.) Parkont, i ti promet ki dan kongregasyon zot ti pou ganny plis ‘frer, ser, manman ek zanfan’ spirityel.—Mark 10:30.
16 Nou bann frer ek ser aze sirtou i zwe en gran rol pour ed bann etidyan Labib progrese. Dan ki fason? Menm si serten dimoun aze pa kapab kondwir bann letid, zot komanter dan renyon kongregasyon i kapab batir e ranforsi lafwa tou bann ki pe ekout zot. Pa i zoli pour vwar dan kongregasyon sa bann ki pe mars “dan semen ladrwatir” pour bokou lannen, sa i atrakte bann ki annan sa leker senser ver lorganizasyon Bondye!—Prov. 16:31.
Sirmont nou lafreyer
17. Ki nou kapab fer pour sirmont sa santiman ki nou pa pou reisi?
17 Me si ou santi ki ou pa pou kapab kondwir en letid Labib? Mazinen ki Zeova ti ed Moiz par donn li son lespri sen e Aaron son frer konman en konpanyon. (Egz. 4:10-17) Zezi ti promet ki lespri sen Bondye ti pou ede dan sa travay rann temwannyaz. (Akt 1:8) Deplis, Zezi ti anvoy son bann disip pour pres de par de. (Lik 10:1) Alor, si ou vwar li en defi pour kondwir en letid Labib, priye pour ki lespri sen Bondye i donn ou lasazes e apre sa aranze pour travay avek en dimoun ki kapab donn ou sa konfidans e ki son leksperyans i kapab ed ou. Ou lafwa i kapab ganny ranforsi si ou mazinen ki Zeova in swazir bann dimoun ordiner setadir “sa ki paret feb pour lemonn” pour akonplir sa travay ekstraordiner.—1 Kor. 1:26-29.
18. Ki mannyer nou kapab sirmont sa lafreyer ki nou pa pou reisi?
18 Ki mannyer nou kapab sirmont lafreyer ki nou pa pou reisi? Par egzanp, pour en repa byen reisi i pou tou depan lo kwizinyen. Be pour predikasyon i diferan, fer disip i enplik plis ki nou zefor. Premyerman Zeova i fer sa bout pli enportan, i atir bann dimoun ver li. (Zan 6:44) Dezyenmman nou osi, ansanm avek lezot dan kongregasyon nou fer nou mye pour servi nou lar pour ansennyen pour ed bann etidyan progrese. (Lir 2 Timote 2:15.) Trwazyenmman sa etidyan osi i devret met an pratik sa ki i aprann. (Mat. 7:24-27) Petet nou kapab dezapwente si en dimoun i aret etidye Labib. Nou swete ki sa etidyan Labib i fer sa bon swa, me sak dimoun pou “rann kont devan Bondye pour son prop lekor.”—Rom. 14:12.
Ki rekonpans
19-21. (a) Ki byenfe nou gannyen ler nou kondwir letid Labib? (b) Ki mannyer Zeova i vwar tou bann ki partisip dan sa travay predikasyon?
19 Kondwir letid Labib i ed nou pour reste konsantre lo rod plito Rwayonm. I osi fer ki sa laverite ki dan Parol Bondye i ganny grave o fon nou leker e dan nou lespri. Ki mannyer? En pionye ki apel Barak i eksplike: “Kondwir bann letid Labib i fors ou pour vin en pli bon etidyan Parol Bondye. Mon vwar ki mon bezwen fortifye mon konviksyon personnel avan ki mon kapab ansenny lezot.”
20 Si ou pa pe kondwir en letid Labib, eski sa i vedir ki ou servis napa valer devan Bondye. Non! Zeova i apresye nou zefor pour loue li en kantite. Tou bann ki partisip dan sa travay predikasyon i “travay ansanm [avek] Bondye.” Parkont, kondwir en letid Labib i anmenn plis lazwa anmezir ki nou vwar ki mannyer Bondye i fer pouse sa lagrenn ki nou’n plante. (1 Kor. 3:6, 9) En pionye ki apel Amy ti dir: “Anmezir ki ou vwar progre sa etidyan, ou vreman kontan e rekonesan anver Zeova ki i’n servi ou pour donn sa dimoun en kado merveye e sa i sa loportinite pour konn Zeova e ganny lavi eternel.”
21 Si nou fer tou sa ki nou kapab pour konmans e kondwir bann letid Labib, sa pou ed nou reste konsantre dan nou servis pour Bondye la konmela e i pou ranforsi nou lespwar pour sirviv dan nouvo lemonn. Avek sipor Zeova, fotespere ki nou osi nou ede pour sov bann ki ekout nou. (Lir 1 Timote 4:16.) Pa sa pou anmenn en kantite lazwa!
Eski ou rapel?
• Ki defi ki kapab anpes serten kondwir letid Labib?
• Ki nou kapab fer si bokou dimoun dan nou teritwar i paret pa enterese?
• Ki rekonpans nou gannyen ler nou kondwir en letid Labib?
[Kestyon]