Zezi—Sa ki dimoun i dir lo li

“San dout, Zezi sorti Nazaret . . . i sa dimoun pli enportan dan listwar.”—H.Wells, istoryen Angle.

“Kris . . . i sa dimoun ki inik parmi tou bann ero dan listwar imen.”—Philip Schaff, istoryen ek profeser larelizyon ki ti ne laswis.

LEKEL ki kalifye pour ganny apele sa pli gran zonm ki’n deza egziste? Eski talan ki en dimoun i annan konman en sef larme, son lentelizans oubyen lafors fizik ki fer li vin enportan? Oubyen eski lafason ki son parol ek aksyon i annan lefe lo bann dimoun ek legzanp ki i kit pour zot ki fer li enportan?

Remark sa ki bann istoryen, syantis, profeser, ekriven, lider politik ek lezot dan lepase e dan nou letan in dir konsernan Zezi Kri, sa zonm ki ti sorti Nazaret:

“I ti pou en rezonnman bet e drol pour refize krwar ki sa sel dimoun pli remarkab, pa zis dan sa de mil an ki’n pase me dan tou listwar imen, i Zezi sorti Nazaret.”—Reynolds Price, ekriven e profeser Labib Ameriken.

“En zonm ki ti konpletman inosan ti ofer son lekor konman en sakrifis pour ki lezot i benefisye, enkli son bann lennmi e i ti vin en ranson pour lemonn. Sa ti en aksyon parfe.”—Mohandas Gandhi, sef politik e relizye, Lenn.

“Kan mon ti en zanfan, mon ti ganny enstrir dapre Labib ek Talmud. Mon en Zwif, me sa dimoun eksepsyonnel sorti Nazaret in vreman enpresyonn mwan.”—Albert Einstein, syantis ki’n ne Lalmanny.

“Pour mwan, Zezi Kri i sa dimoun pli remarkab dan listwar imen konman Garson Bondye e osi konman Garson Zonm. Tou sa ki I’n deza dir oubyen fer i annan valer pour nou ozordi e sa i en keksoz ki ou pa kapab dir lo en lot zonm, ki swa i ankor vivan oubyen i’n mor.”—Sholem Asch, ekriven ki’n ne Lapolonny parey in ganny dir dan Christian Herald; zot ki’n met an italik.

“Pandan 35 an mon lavi, mon ti en zonm ki pa ti krwar dan nanryen. Me i fer senk an depi ki mon’n aksepte ki Zezi ti reel. Mon ti krwar dan sa lansennyman konsernan Zezi Kri e mon lavi antye ti sanz en sel kou.”—Count Leo Tolstoy, ekriven liv e filozof Larisi.

“Napa personn dan listwar imen ki’n enfliyans plis imen lo sa later ki [Zezi] e i ankor pe kontinyen enfliyans lezot.”—Kenneth Scott Latourette, istoryen ek ekriven Ameriken.

“Eski nou kapab krwar ki listwar lavi Zezi i zis en zistwar ki’n ganny envante? Me non mon zanmi, i pa paret en zistwar ki’n ganny envante. Parkont listwar lo Socrates ki personn pa doute napa sitan laprev ki i ti egziste parey sa enn pour Zezi Kri.”—Jean-Jacques Rousseau, filozof Franse.

I kler ki si i annan en dimoun ki merit vin nou model dan lavi se Zezi Kri. Pol, en zonm byen edike dan premye syek ki ti ganny swazir par Zezi pour vin Son disip e pour koz lo Li avek bann nasyon, i konsey nou pour “gard nou regar fikse” lo Zezi. (Ebre 12:2, nou ki’n met an italik; Akt 9:3) Ki Zezi i kapab ansenny nou konsernan fason nou devret viv? Konman ki son lavi i kapab benefisye ou?