Parol Zeova i vivan

Bann pwen enteresan dan liv Revelasyon—2

KI POU arive alavenir avek bann ki ador Zeova ek bann ki pa pe ador li? Ki pou arive avek Satan ek son bann demon? Ki benediksyon bann imen obeisan pou eksperyanse pandan sa Mil An ki Kris pou dirize? Larepons pour sa bann kestyon ek lezot kestyon enportan ankor in ganny revele dan Revelasyon 13:1–22:21. * Sa bann sapit i koz konsernan sa 9 dernyen vizyon parmi sa 16 vizyon ki zapot Zan ti gannyen ver lafen premye syek N.L.

Zapot Zan ti ekrir: “Byennere, sa enn ki lir bann parol sa profesi e byennere bann ki ekout e obei[r] sa ki i’n ekri[r] ladan.” (Rev. 1:3; 22:7) Ler nou lir e aplik sa ki nou aprann dan liv Revelasyon sa i kapab annan en lefe lo nou leker, ranforsi nou lafwa dan Bondye ek son Garson Zezi Kri, e donn nou en lespwar briyan pour lavenir. *—Ebr. 4:12.

SET LAKOUP LAKOLER BONDYE I GANNY VIDE

(Rev. 13:1–16:21)

Revelasyon 11:18 i dir: “Bann nasyon ti ankoler, me ler in arive pour [Bondye] montre [son] lakoler . . . e pour detri[r] bann ki detri[r] later.” Pour montre akoz Bondye ti ankoler, sa wityenm vizyon ti montre ki sa “bebet . . . [k]i ti annan dis korn ek set latet” ti pe fer.—Rev. 13:1.

Dan sa nevyenm vizyon, Zan ti vwar “Lanyo pe debout lo montanny Siyon” e avek li “144,000 dimoun.” Zot ti’n ganny aste “parmi bann zonm.” (Rev. 14:1, 4) Apre sa, sis lanz ti anons bann mesaz. Dan sa lot vizyon, Zan ti vwar “set lanz avek set fleo.” I kler ki se Zeova li menm ki ti demann sa bann lanz pour vid “sa set lakoup lakoler Bondye” lo diferan parti lemonn Satan. Dan sa bann lakoup ti annan bann mesaz ek lavertisman konsernan bann zizman ki Bondye pou anmennen. (Rev. 15:1; 16:1) Sa de vizyon ti donn detay lo lezot zizman ki pou ganny egzekite, an rapor avek sa trwazyenm maler ek sa setyenm tronpet ki ganny soufle.—Rev. 11:14, 15.

Larepons pour bann kestyon lo Labib:

13:8—Ki si sa sa “liv lavi Lanyo”? Sa liv i en liv senbolik ki i annan zis non sa bann ki pou dirize avek Zezi Kri dan son Rwayonm dan lesyel. Non bann Kretyen swazir ki annan sa lespwar pour resevwar lavi dan lesyel me ki ankor lo later, i osi enkli dan sa liv.

13:11-13—Ki mannyer sa bebet ki annan de korn i azir parey en dragon e fer dife sorti dan lesyel? Lefet ki sa bebet ki annan de korn ki reprezant Pouvwar Mondyal Angle ek Ameriken i koz parey en dragon, sa i endike ki i servi menas, presyon ek vyolans pour fors dimoun aksepte son kalite dominasyon. I fer sorti dife dan lesyel dan sa sans ki i pretann zwe rol en vre profet par dir ki i’n ganny laviktwar lo lemal dan sa de lager mondyal dan ventyenm syek e osi lo Kominism.

16:17—Sa “ler” lo ki sa setyenm lakoup ti ganny vide i reprezant kwa? Sa “ler” i reprezant fason panse Satan, sa “lespri [oubyen latitid] ki aprezan pe travay dan bann zanfan dezobeisans.” Tou dimoun ki form parti sa move lemonn Satan pe respir sa ler anpwazonnen.—Efe. 2:2.

 Leson pour nou:

13:1-4, 18. “En bebet” ki pe reprezant bann gouvernman imen ti monte “sorti dan lanmer” setadir bann imen ki azite oubyen ki annan en latitid rebel. (Iza. 17:12, 13; Dan. 7:2-8, 17) Sa bebet, ki’n ganny kree e ganny son pouvwar avek Satan i annan sa sif 666 ki montre ziska ki degre i enparfe. Ler nou konpran ki sa bebet i reprezante, sa i ed nou pour pa swiv li avek admirasyon, ni ador li parey bann imen an zeneral i fer.—Zan 12:31; 15:19.

13:16, 17. Malgre bann difikilte ki nou kapab rankontre ler nou pe fer bann aktivite tou le zour parey ‘aste oubyen vann,’ nou pa devret bes lebra e les sa bebet kontrol nou lavi. Si nou aksepte ‘mark sa bebet lo nou lanmen oubyen lo nou fron’ sa pou montre ki nou permet sa bebet kontrol nou bann aksyon oubyen enfliyans nou fason panse.

14:6, 7. Mesaz ki sa bann lanz ti anonse i ansenny nou ki nou pa devret tarde pour anons sa bon nouvel konsernan Rwayonm Bondye ki’n ganny etablir. Nou devret ed nou bann etidyan Labib pour devlop en lakrent apropriye pour Bondye e donn li laglwar.

14:14-20. Kan “rekolt later” setadir ler bann ki pou ganny sove in fini ganny rasanble, i pou’n ariv ler pour sa lanz zet sa “[pye] rezen lo later” ki pou’n ganny rekolte, “dan sa gran preswar lakoler Bondye.” Sa pye rezen setadir bann gouvernman koronpi sa sistenm Satan ki vizib enkli son “bann grap” ki move, pou ganny detrir pour touzour. Nou devret determinen pour pa les nou ganny enfliyanse par sa pye rezen lo later.

16:13-16. Sa lekspresyon “trwa move lespri” oubyen parol enpir i vedir bann propagann sorti kot bann demon avek lentansyon pour fer sir ki bann lakoup lakoler Bondye ki pe ganny vide pa fer okenn lefe lo bann lerwa later me ki o kontrer pous zot pour opoz Zeova.—Mat. 24:42, 44.

16:21. Anmezir ki lafen i aprose petet bann mesaz zizman sorti kot Zeova ki pou ganny anonse kont sa move lemonn Satan pou parey bann gro morso lagrel setadir zot pou vreman sever. Kantmenm sa laplipar imen pou kontinyen blasfenm Bondye.

SA LERWA VENKER I DIRIZE

(Rev. 17:1–22:21)

“Gran Babilonn” ki reprezant tou bann fo larelizyon i degoutan e i form parti sa move lemonn Satan. Dan sa onzyenm vizyon i ganny dekrir konman en “gran prostitye,” en madanm imoral ki pe “asiz lo en bebet rouz.” Sa bebet ki sa gran prostitye pe asiz lo la pou servi son “dis korn” pour detrir li konpletman. (Rev. 17:1, 3, 5, 16) Par konpar sa prostitye avek en “gran lavil” sa lot vizyon i anons son destriksyon e pas en mesaz enportan avek pep Bondye pour “sorti dan sa lavil.” En kantite dimoun pou plere ler sa gran lavil pou ganny detrir. Parkont sa pou anmenn lazwa dan lesyel akoz “maryaz Lanyo.” (Rev. 18:4, 9, 10, 15-19; 19:7) Dan sa trezyenm vizyon, sa kavalye lo “en seval blan” pou al lager avek bann nasyon. I pou met en lafen avek sa move lemonn Satan.—Rev. 19:11-16.

Ki pou arive avek “sa serpan lantikite, setadir dyab ou[byen] satan”? Kan ki i pou “ganny zete dan lak dife”? Sa i enn parmi bann size ki ganny aborde dan sa katorzyenm vizyon. (Rev. 20:2, 10) Sa de dernyen vizyon i donn en apersi lo ki mannyer lavi pou ete pandan sa Mil An ki Kris pou dirize. Anmezir ki sa “revelasyon” ti ariv ver son lafen, Zan ti vwar ‘en larivyer delo lavi ki ti o milye lari dan lavil’ e en lenvitasyon merveye ti ganny ofer avek “sa ki swaf.”—Rev. 1:1; 22:1, 2, 17.

Larepons pour bann kestyon lo Labib:

17:16; 18:9, 10—Akoz “bann lerwa later” pou pler lo sa lavil ki zot menm zot pou detrir? Zot pou plere pour en rezon pirman  egois. Apre destriksyon Gran Babilonn, bann lerwa later pou realize ki kantite itil i ti ete pour zot. Bann lerwa later in servi larelizyon pour fer sa bann soufrans ki zot in anmennen lo lezot paret akseptab. Gran Babilonn in osi ed zot pour fer bann zenn partisip dan lager. Deplis, i ti zwe en rol enportan pour kontrol bann dimoun e fors zot soumet anba sa bann gouvernman.

19:12—Ki mannyer zis Zezi tousel ki konn son non ki pa’n ganny mansyonnen? I paret ki sa non i reprezant sa pozisyon ek privilez ki Zezi i gannyen pandan zour Senyer parey sa bann ki’n ganny mansyonnen dan Izai 9:6. Napa personn ki konn sa non me li tousel akoz zis li ki annan sa privilez e ki kapab konpran ki i vedir pour okip en o pozisyon koumsa. Me, Zezi i partaz serten son privilez avek lezot manm ki form parti nouvel marye, par ‘ekrir lo zot son nouvo non.’—Rev. 3:12.

19:14—Lekel ki pou avek Zezi zour Armagedon? I pou annan bann lanz ensi ki bann Kretyen swazir ki’n ranport laviktwar e ki’n fini resevwar zot rekonpans dan lesyel parmi “bann larme lesyel,” ki pou zwenn Zezi dan Lager Bondye.—Mat. 25:31, 32; Rev. 2:26, 27.

20:11-15—Non lekel ki’n ganny ekrir dan “sa liv [oubyen “roulo”] lavi”? Dan sa liv i annan non tou dimoun ki pou ganny lavi eternel setadir bann Kretyen swazir, bann dimoun ki form parti sa gran lafoul e bann serviter fidel Zeova ki pou ganny “resisite” konman bann bon dimoun. (Akt 24:15; Rev. 2:10; 7:9) Non bann ‘dimoun move ki pou resisite’ pou ganny ekrir dan “liv lavi” selman si zot azir an armoni avek “sa ki[’n] . . . ganny ekri[r] dan sa bann liv” lenstriksyon ki pou ganny ouver pandan sa Mil An ki Zezi pou dirize. Me, zot non pa ganny marke dan en fason permanan. Non bann Kretyen swazir i ganny marke dan en fason permanan ler zot prouv zot fidelite ziska lanmor. (Rev. 3:5) Non bann dimoun ki resevwar lavi lo later pou ganny marke dan en fason permanan ler zot pas sa tes final a lafen sa mil an.—Rev. 20:7, 8.

Leson pour nou:

17:3, 5, 7, 16. “Lasazes ki sorti dan lesyel” i ed nou pour konpran “mister sa fanm, ek sa bebet [rouz] ki i pe asiz lo la.” (Zak 3:17) Sa bebet senbolik ti konmans konman League of Nations e pli tar i ti lev ankor konman Nasyon-z-ini. Eski leksplikasyon sa mister pa i devret pous nou pour pres avek devouman sa bon nouvel lo Rwayonm Bondye e pour anons zour zizman Zeova?

21:1-6. Nou kapab annan lasirans total ki sa bann benediksyon ki’n ganny predir anba dominasyon Rwayonm Bondye pou vin en realite. Akoz? Akoz sa ki’n ganny dir konsernan zot: “Tou keksoz in akonpli[r]!”

22:1, 17. Sa “larivyer delo lavi” i reprezant bann dispozisyon ki Zeova in pran pour delivre bann imen obeisan dan pese ek lanmor. En pe sa delo i disponib ozordi. Fotespere nou pa zis aksepte avek rekonesans sa lenvitasyon pour vini e “pran delo lavi” me ki nou osi partaz avek lantouzyasm sa delo avek lezot.

[Not anba lo paz]

[Portre lo paz 25]

Pa bann imen pou eksperyans bann benediksyon merveye anba dominasyon Rwayonm Bondye!