Konman parol Zezi i promot boner
Konman parol Zezi i promot boner
“[Zezi] ti mont lo en montanny e . . . son bann disip ti vin otour li e i ti konmans ansenny zot.”—MAT. 5:1, 2.
1, 2. (a) Anba ki sirkonstans Zezi ti donn son Sermon lo Montanny? (b) Ki mannyer Zezi ti konmans son diskour?
I TI lannen 31 N.L. Pour en pti pe letan, Zezi ti aret son predikasyon ki i ti pe fer toultour Galile pour li kapab al selebre Lapak Zerizalenm. (Zan 5:1) Ler i ti retourn Galile, i ti priye tou lannwit pour li ganny gidans Bondye pour swazir 12 zapot. Son lannmen, en lafoul ti rasanble pandan ki Zezi ti geri bann malad. Avek son bann disip ek lezot ki ti prezan, i ti asiz lo en montanny e i ti konmans ansenny zot.—Mat. 4:23–5:2; Lik 6:12-19.
2 Zezi ti konmans son Sermon lo Montanny, ki ti en diskour par montre ki boner i vin atraver en bon relasyon avek Bondye. (Lir Matye 5:1-12.) Boner i ler ou santi ou byen, kot ou annan lakontantman ki kapab menm entansifye e ou santi ou dan en gran lazwa. Sa nef boner ki Zezi ti koz lo la i met lanfaz lo rezon ki bann Kretyen i ere e sa bann parol i anmenn byenfe pour nou osi ozordi zis parey 2,000 an pase. Annou aprezan egzamin parol Zezi, enn par enn.
“Bann ki konsyan zot bezwen spirityel”
3. Ki savedir konsyan nou bezwen spirityel?
3 “Byennere bann ki pov an-espri [oubyen “ki konsyan zot bezwen spirityel,” NW] akoz rwayonm lesyel i pour zot.” (Mat. 5:3) “Bann ki konsyan zot bezwen spirityel” i realize ki zot pov spirityelman e zot bezwen mizerikord Bondye.
4, 5. (a) Akoz bann ki konsyan zot bezwen spirityel i ere? (b) Ki mannyer nou kapab satisfer nou bezwen spirityel?
4 Bann ki konsyan zot bezwen spirityel i ere “akoz rwayonm lesyel i pour zot.” Pour bann premye disip Zezi, lefet ki zot ti aksepte li konman Mesi, zot ti ganny sa loportinite pour dirize ansanm avek li dan Rwayonm Bondye ki dan lesyel. (Lik 22:28-30) Ki swa nou annan sa lespwar pour vin zeritye ansanm avek Kris dan lesyel ouswa nou pe esper avek enpasyans pour ganny lavi eternel dan Paradi lo later anba dominasyon Rwayonm, nou kapab ere si nou vreman konsyan nou bezwen spirityel e depan lo Zeova.
5 Pa tou dimoun ki konsyan zot bezwen spirityel parski bokou i mank lafwa e zot pa apresye bann keksoz sakre. (2 Tesa. 3:1, 2; Ebr. 12:16) En letid Labib oprofon, partisip avek devouman dan sa travay fer disip e asiste renyon regilyerman, i bann fason ki nou pou satisfer nou bezwen spirityel.—Mat. 28:19, 20; Ebr. 10:23-25.
“Byennere bann ki dan latristes”
6. Lekel sa “bann ki dan latristes” e akoz zot ‘ere’?
6 “Byennere bann ki dan latristes, akoz zot pou ganny konsole.” (Mat. 5:4) “Bann ki dan latristes” i parey avek sa “bann ki konsyan zot bezwen spirityel.” Zot pa dan latristes dan sa sans ki zot pe konplent oubyen plennyen akoz zot pa satisfe avek sa ki zot annan. Zot tris akoz zot fer pese e osi akoz kondisyon sa lemonn enparfe. Akoz bann ki dan latristes i kapab ere? Parski zot demontre lafwa dan Bondye ek Kris e zot ganny rekonforte atraver sa bon relasyon ki zot annan avek Zeova.—Zan 3:36.
7. Ki mannyer nou devret santi anver lemonn Satan?
7 Eski endividyelman nou dan latristes akoz lenzistis ki partou kote dan lemonn Satan? Ki mannyer nou vreman santi anver sa ki sa lemonn i annan pour ofer? Zapot Zan ti ekrir: “Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa.” (1 Zan 2:16) Me si i arive nou santi ki nou spirityalite pe ganny enfliyanse par ‘lespri sa lemonn,’ setadir sa lafors ki domin bann imen ki elwannyen avek Bondye? Dan sa ka, sipliy Bondye dan lapriyer, etidye son Parol e rod led avek bann ansyen. Anmezir ki nou apros pli pros avek Zeova, nou pou ‘ganny sa rekonfor’ ki nou bezwen, malgre nenport kwa ki pe fer nou deprimen.—1 Kor. 2:12; Ps. 119:52; Zak 5:14, 15.
“Byennere bann ki dou[s]”!
8, 9. Ki savedir annan ladouser e akoz bann ki annan ladouser i ere?
8 “Byennere bann ki dou[s], akoz zot pou posed later.” (Mat. 5:5) “Ladouser” ouswa limilite pa donn okenn lide febles oubyen zantiy dan en sans ipokrit. (1 Tim. 6:11, NW) Si nou annan ladouser, nou pou demontre limilite par fer lavolonte Zeova e aksepte son gidans. Ladouser pou osi evidan dan lafason ki nou tret bann frer ek ser Kretyen ek lezot dimoun. Sa kalite limilite i an armoni avek konsey zapot Pol.—Lir Romen 12:17-19.
9 Akoz bann ki dous i ere? Zezi ki ti annan ladouser ti dir ki zot pou “posed later.” I Zeritye prensipal later. (Ps. 2:8; Mat. 11:29; Ebr. 2:8, 9) Parkont, bann ki “zeritye ansanm avek Kris” e ki annan ladouser i osi erit later. (Rom. 8:16, 17) Pandan ki Kris pou dirize dan son Rwayonm dan lesyel, bokou dimoun ki annan limilite pou ganny lavi eternel lo later kot zot pou rezwir.—Ps. 37:10, 11.
10. Ki mannyer mank ladouser i kapab annan lefe lo nou bann privilez dan servis ek nou relasyon avek lezot?
10 Parey Zezi, nou devret annan ladouser. Me si nou renonmen konman en dimoun ki agresif? Sa kalite latitid brit oubyen dir i kapab fer ki lezot pou evit nou. Si nou en frer ki ti a kontan ganny responsabilite dan kongregasyon, nou pa pou kalifye si nou annan sa kalite tre? (1 Tim. 3:1, 3) Pol ti dir Tit kontinyen rapel bann Kretyen lo zil Kret ki zot devret “evit tou kerel e montre zot zanmi e poli avek tou dimoun.” (Tit 3:1, 2) Pa demontre ladouser anver lezot i en benediksyon!
Zot lafen “lazistis”
11-13. (a) Ki savedir lafen e swaf lazistis? (b) Ki mannyer bann ki lafen e swaf lazistis pou “rasazye”?
11 “Byennere bann ki lafen e swaf lazistis, zot pou rasazye.” (Mat. 5:6) Sa “lazistis” ki Zezi ti annan antet i en kalite kot ou anvi fer sa ki byen par fer lavolonte Bondye e obeir son komannman. En psalmis ti dir ki i ti fatige telman i ti annan “en gran dezir” pour zizman drwat Bondye. (Ps. 119:20) Eski lazistis i sitan annan valer pour nou pour ki nou swaf e lafen li?
12 Zezi ti dir ki bann ki lafen e swaf lazistis pou ere akoz zot pou “rasazye.” Apre Lapannkot 33 N.L. ti annan bann levidans ki ti konmans “konvenk dimoun dan lemonn konsernan . . . lazistis ek zizman,” e sa ti posib atraver lespri sen Zeova. (Zan 16:8) Atraver lespri sen, Bondye ti enspir zonm pour ekrir Lekritir Grek Kretyen ki vreman itil pour “formen pour viv byen selon Bondye.” (2 Tim. 3:16) Lespri sen Bondye i osi permet nou “vin en dimoun konpletman nouvo kree dan resanblans Bondye e . . . zis.” (Efe. 4:24) Pa i rekonfortan pour konnen ki bann ki repantir e rod pardon pour zot pese lo baz sakrifis Zezi i kapab ganny konsidere drwat par lafason zot viv devan Bondye?—Lir Romen 3:23, 24.
13 Si nou annan lespwar pour viv lo later nou lafen ek swaf lazistis pou konpletman ganny satisfer kan nou pou ganny lavi eternel lo later kot nou pou rezwir anba bann kondisyon ki drwat. Antretan, annou reste determinen pour viv an armoni avek bann standar Zeova. Zezi ti dir nou kontinyen “rod plito Rwayonm Bondye ek son lazistis.” (Mat. 6:33) Si nou fer sa nou pou annan en kantite travay pour nou fer dan servis Bondye e nou pou santi nou ere dan nou leker.—1 Kor. 15:58.
“Byennere bann ki pran pitye”
14, 15. Ki mannyer nou kapab demontre mizerikord e akoz bann ki “demontre mizerikord” i ere?
14 “Byennere bann ki pran pitye pour lezot, akoz Bondye pou pran pitye pour zot.” (Mat. 5:7) “Bann ki pran pitye” i ganny pouse par konpasyon ek mizerikord. Atraver mirak, Zezi ti soulaz bokou dimoun akoz i ti pran pitye pour zot. (Mat. 14:14) Pran pitye oubyen mizerikord i ganny demontre kan bann dimoun i pardonn bann ki fer fot kont zot, zis parey Zeova i pardonn avek mizerikord bann dimoun ki repantir. (Egz. 34:6, 7; Ps. 103:10) Nou kapab demontre mizerikord dan sa fason e atraver nou bann bon parol ek aksyon ki anmenn soulazman pour bann ki dan bezwen. En bon fason nou kapab demontre mizerikord i par partaz laverite ki dan Labib avek lezot. Pouse par pitye pour en lafoul, Zezi ti “konmans ansenny zot bokou keksoz.”—Mark 6:34.
15 Nou annan tou rezon pour dakor avek parol Zezi: “Byennere bann ki pran pitye pour lezot, akoz Bondye pou pran pitye pour zot.” Si nou pran pitye e tret lezot avek mizerikord, i tre probab ki zot osi zot pou azir dan en bon fason anver nou. Kan Bondye pou ziz nou, i kapab ki i pou ziz nou dan en bon fason si nou’n demontre mizerikord anver lezot. (Zak 2:13) Ganny pardonnen pese ek lavi eternel i zis pour bann ki demontre mizerikord anver lezot.—Mat. 6:15.
Akoz “bann ki annan leker pir” i ere?
16. Ki savedir “annan leker pir” e ki mannyer bann ki annan sa kalite i “[v]war Bondye”?
16 “Byennere bann ki annan leker pir, akoz zot pou [v]war Bondye.” (Mat. 5:8) Si nou “annan leker pir,” nou relasyon, dezir ek motivasyon pou montre ki nou pir. Nou pou demontre “lanmour ki sorti dan en leker pir.” (1 Tim. 1:5) Vi ki nou prop spirityelman, nou pou “[v]war Bondye.” Sa pa neseserman vedir ki nou pou vwar Zeova avek nou de lizye, akoz “napa okenn zonm ki kapab vwar [Bondye] e kontinyen reste vivan.” (Egz. 33:20) Vi ki i ti reflekte personnalite Bondye dan en fason parfe, Zezi ti kapab dir: “Sa ki’n [v]war mwan in osi [v]war mon Papa.” (Zan 14:7-9) Konman bann adorater Zeova lo later, nou kapab “[v]war Bondye” par obzerv bann keksoz ki i fer pour nou. (Zob 42:5) Pour bann Kretyen swazir zot pou finalman vwar Bondye kan zot ganny resisite konman bann lespri e aktyelman vwar zot Papa ki dan lesyel.—1 Zan 3:2.
17. Ki lefe annan en leker pir pou annan lo nou?
17 Vi ki en leker pir i prop moralman e spirityelman, i pa konsantre lo bann keksoz ki enpir dan lizye Zeova. (1 Kron. 28:9; Iza. 52:11) Si nou annan en leker pir, sa ki nou dir e fer pou ranpli avek bann keksoz pir e pou napa nanryen ipokrit dan nou servis pour Zeova.
“Bann ki fer lape” i vin garson Bondye
18, 19. Ki mannyer “bann ki fer lape” i konport zot?
18 “Byennere bann ki fer lape, akoz zot pou ganny apele bann garson Bondye.” (Mat. 5:9) “Bann ki fer lape” i ganny idantifye par sa ki zot pou fer e sa ki zot pa pou fer. Si nou sa kalite dimoun ki Zezi ti annan antet, nou anpe e nou “pa rann mal pour mal” avek personn. O kontrer, nou “touzour fer dibyen kanmarad.”—1 Tesa. 5:15.
19 Sa mo Grek ki’n ganny tradwir “fer lape” dan Matye 5:9 pa zis pe refer avek en dimoun ki kontan lape, me enn ki “fer lape.” Pour nou parmi bann ki fer lape, nou devret determinen pour toultan promot lape. Bann ki fer lape pa fer okenn keksoz ki kapab “kre divizyon ant bann zanmi.” (Prov. 16:28) Konman bann ki fer lape, nou pran bann bon pa pour “fer tou zefor posib pour fer lape avek tou dimoun.”—Ebr. 12:14.
20. Lekel konmela ki “bann garson Bondye” e lekel osi ki pou vin zanfan Bondye?
20 Bann ki fer lape i ere akoz “zot pou ganny apele bann garson Bondye.” Bann Kretyen swazir fidel in ganny adopte par Zeova e zot “bann garson Bondye.” Zot deza annan en relasyon pros avek Zeova konman son zanfan akoz zot annan lafwa dan Kris e avek tou zot leker zot ador sa “Bondye lanmour ek lape.” (2 Kor. 13:11; Zan 1:12) Me ki pour dir lo “lezot mouton” Zezi ki fer lape? Zot pou annan Zezi konman zot “Papa Eternel” pandan sa mil an ki i pou dirize konman Lerwa e alafen son renny i pou soumet son lekor avek Zeova e zot pou vin bann zanfan Bondye dan en fason konplet.—Zan 10:16, NW; Iza. 9:6; Rom. 8:21; 1 Kor. 15:27, 28.
21. Ki mannyer nou pou azir si nou “viv par lespri”?
21 Si nou pe “viv par lespri,” lape pou enn parmi nou bann kalite ki lezot pou fasilman remarke. Nou pa pou “pran lakoler avek kanmarad” oubyen “provok . . . kanmarad.” (Gal. 5:22-26; New International Version) O kontrer nou vreman anvi “viv anpe avek tou dimoun.”—Rom. 12:18.
Ere kan nou ganny persekite!
22-24. (a) Ki rezon bann ki ganny persekite pour lazistis i annan pour zot ere? (b) Ki nou pou egzaminen dan sa de prosen lartik letid?
22 “Byennere bann ki ganny persekite pour lazistis zot pou ganny Rwayonm Lesyel.” (Mat. 5:10) Pour azout avek sa nevyenm parol boner, Zezi ti dir: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip. Rezoui[r] e santi zot ere akoz zot annan en gran rekonpans dan lesyel. Parski koumsa menm zot bann zanset ti persekit bann profet avan zot.”—Mat. 5:11, 12.
23 Parey bann profet Bondye dan lepase, bann Kretyen i ekspekte ki zot pou ganny reprose, persekite e ki dimoun pou koz manti e an mal lo zot e sa i tou “pour lazistis.” Parkont si nou fidelman andir sa bann kalite tes, nou pou trouv satisfaksyon pour fer plezir e onor Zeova. (1 Pyer 2:19-21) Nou soufrans pa kapab diminyen nou plezir pour servi Zeova la konmela e dan lavenir. I pa kapab diminyen nou lazwa pour dirize ansanm avek Kris dan Rwayonm ki dan lesyel, ouswa lazwa ki nou pou annan pour ganny lavi eternel lo later konman en sitwayen anba son gouvernman. Sa bann benediksyon i donn levidans faver, labonte ek zenerozite Bondye.
24 I annan plis ankor pour aprann avek sa Sermon lo Montanny. Diferan leson pou ganny diskite dan sa de lezot lartik letid ki swiv. Annou vwar ki mannyer nou kapab aplik parol Zezi Kri.
Ki ou pou reponn?
• Akoz “bann ki konsyan zot bezwen spirityel” i ere?
• Ki rezon “bann ki dou[s]” i annan pour zot ere?
• Akoz bann Kretyen i ere menm si zot ganny persekite?
• Lekel parmi bann parol Zezi lo boner ki’n enpresyonn ou?
[Kestyon]
[Portre lo paz 5]
Sa nef parol Zezi lo boner i benefisye nou ozordi zis parey dan lepase
[Portre lo paz 7]
En bon fason pour demontre mizerikord i par partaz laverite ki dan Labib avek lezot