Zot kontinyen “swiv Lanyo”
Zot kontinyen “swiv Lanyo”
“Zot swiv Lanyo partou kot i ale.”—REV. 14:4.
1. Ki mannyer bann vre disip Zezi ti santi lefet ki i ti demann zot pour swiv li?
I TI’N pas apepre de-z-an edmi depi ki Zezi ti’n konmans son minister lo later. En zour pandan ki i “ti pe ansennyen dan sinagog Kapernaoum,” “bokou son bann disip” ti trouv son lansennyman sokan, zot “ti dekile e zot ti aret swiv li.” Ler Zezi ti demann son 12 zapot si zot osi zot pa oule ale, Simon Pyer ti reponn: “Senyer, kot lekel nou pou ale? Ou annan parol lavi eternel. Aprezan, nou, nou krwar e nou konnen ki ou[ ]menm ou sa Sen ki sorti kot Bondye.” (Zan 6:48, 59, 60, 66-69) Bann vre disip Zezi pa ti oule aret swiv li. Apre ki zot ti’n ganny swazir par lespri sen, zot ti kontinyen aksepte gidans Zezi.—Akt 16:7-10.
2. (a) Lekel “sa lesklav fidel e pridan” oubyen “sa serviter fidel”? (b) Ki mannyer sa lesklav in kit en bon legzanp lo konman pour “swiv Lanyo”?
2 Ki nou kapab dir konsernan bann Kretyen swazir dan nou letan? Dan son profesi konsernan sa “siny ki pou endik [son] prezans ek konklizyon sa sistenm,” Zezi ti refer avek son group disip lo later ki’n ganny swazir par lespri sen konman “sa lesklav fidel e pridan,” oubyen “sa serviter fidel.” (Mat. 24:3, 45, NW; Lik 12:42) Konman en group, sa lesklav in kit en tre bon legzanp lo konman pour “swiv Lanyo partou kot i ale.” (Lir Revelasyon 14:4, 5.) Bann dimoun ki form parti sa lesklav i reste pir lo kote spirityel setadir zot pa sali zot avek bann krwayans ek pratik “Gran Babilonn,” ki reprezant tou bann fo larelizyon. (Rev. 17:5) Dan zot labous pa “sorti okenn” fo lansennyman e zot reste “san defo” dan sa lemonn Satan. (Zan 15:19) Byento, bann Kretyen swazir ki ankor lo later “pou . . . swiv” Lanyo ziska dan lesyel.—Zan 13:36.
3. Akoz i enportan pour nou annan konfyans dan sa lesklav?
3 Zezi in met sa lesklav fidel e pridan ansarz “tou lezot serviter,” setadir sak dimoun ki form parti sa lesklav, e sa lesklav i “donn zot manze kan i ler.” I’n osi met sa lesklav ansarz “tou son byen.” (Mat. 24:45-47) Sa bann “byen” i enkli sa “gran lafoul” “lezot mouton” ki pe ogmante. (Rev. 7:9; Zan 10:16, NW) Pa sak Kretyen swazir ek ‘lezot mouton’ i devret annan konfyans dan sa lesklav ki’n ganny swazir pour ansarz zot? I annan en kantite rezon akoz nou merit annan konfyans dan sa lesklav. De rezon pli enportan i akoz: (1) Zeova i annan konfyans dan sa lesklav. (2) Zezi osi i annan konfyans dan sa lesklav. Annou vwar bann laprev ki Zeova ek Zezi i annan konfyans total dan sa lesklav fidel e pridan.
Zeova i annan konfyans dan sa lesklav
4. Akoz nou kapab annan konfyans dan sa manze spirityel ki nou gannyen sorti kot sa lesklav fidel e pridan?
4 Annou vwar kwa ki permet sa lesklav fidel e pridan donn nou manze spirityel ki nou bezwen kan i ler. Zeova i dir: “Mon pou fer ou annan bon zizman e mon pou enstrir ou dan sa semen ki ou devret pran. Mon lizye pou lo ou pour konsey ou.” (Ps. 32:8) Wi, Zeova i gid sa lesklav. Alor nou kapab annan konfyans total dan konprenezon ek bon zizman ki sa lesklav i annan lo Lekritir e dan gidans ki i donn nou baze lo Labib.
5. Kwa ki montre ki lespri sen Bondye pe gid sa lesklav?
5 Zeova i osi donn sa lesklav son lespri sen. Menm si lespri sen Zeova i envizib, son lefe lo bann dimoun ki resevwar li pa envizib. Zis mazin sa ki sa lesklav fidel e pridan in kapab akonplir. I’n donn en temwannyaz dan lemonn antye lo Zeova, son Garson ek son Rwayonm. Bann adorater Zeova pe anons sa mesaz Rwayonm avek devouman dan plis ki 230 pei ek zil. Eski sa pa i donn en laprev remarkab ki lespri sen Bondye pe gid sa lesklav? (Lir Akt 1:8.) Sa lesklav i bezwen pran bann desizyon vreman enportan, pour donn pep Zeova dan lemonn antye manze spirityel kan i ler. Kan sa lesklav i pran sa bann desizyon e i fer sir ki i ganny met an aplikasyon, i demontre lanmour, ladouser ek lezot laspe sa fri lespri.—Gal. 5:22, 23.
6, 7. Ziska ki degre Zeova i fer konfyans sa lesklav?
6 Pour konpran ziska ki degre Zeova i annan konfyans dan sa lesklav fidel, reflesir lo sa ki i ti promet avek bann dimoun ki form parti sa lesklav. Zapot Pol ti ekrir: “Tronpet pou soufle e bann mor pou resisite imortel, e nou pou ganny transformen. Annefe, fodre ki sa lekor mortel i vin imortel, e sa ki devre[t] pouri i a vin en natir ki enposib pouri.” (1 Kor. 15:52, 53) Ler bann disip Kris ki’n ganny swazir, ki servi Bondye fidelman i mor avek en lekor imen zot pa zis resisite konman bann lanz, me zot ganny lavi imortel setadir zot pou viv pour touzour e zot pa pou kapab ganny detrir. Deplis, zot ganny en lekor ki pa kapab pouri e zot aparaman kapab depan lo zot menm pour viv. Revelasyon 4:4 i dir ki sa bann ki’n fini ganny resisite pe asize lo bann tronn avek kouronn annor lo zot latet. Sa bann Kretyen swazir pe esper zot laglwar dan Rwayonm Bondye. Me i annan ankor plis laprev ki Bondye i annan konfyans dan sa bann Kretyen swazir.
7 Revelasyon 19:7, 8 i dir: “Maryaz Lanyo in arive, e son Nouvel[ ]Marye in prepar li; i’n ganny akorde pour abiy dan linenn fen klate e pir. Linenn fen i, annefe, bann [a]ksyon lazistis bann sen.” Zeova in swazir sa bann Kretyen pour vin sa fitir madanm pour son Garson. En lekor ki pa kapab pouri, en lekor imortel, laglwar dan Rwayonm Bondye e zot “Maryaz [avek] Lanyo,” pa sa bann kado i vreman ekstraordiner! Sa i bann laprev ki donn nou lasirans ki Bondye i annan konfyans dan bann Kretyen swazir, ki kontinyen “swiv Lanyo partou kot i ale.”
Zezi i annan konfyans dan sa lesklav
8. Ki mannyer Zezi i montre ki i annan konfyans dan bann Kretyen swazir?
8 Ki laprev nou annan ki montre ki Zezi i annan konfyans total dan son bann disip ki’n ganny swazir par lespri sen? Sa zour swar avan son lanmor, Zezi ti fer en promes avek son 11 zapot fidel. “Zot bann ki’n reste fidel anver mwan dan tou mon difikilte ek soufrans. Parey mon Papa in donn mwan pouvwar pour gouvern son Rwayonm, mwan osi, mon donn zot menm pouvwar; pour ki zot osi zot a manze e bwar atab avek mwan dan mon Rwayonm, e zot ava asiz lo tronn pour ziz douz tribi Izrael.” (Lik 22:28-30) Sa lalyans ki Zezi ti fer avek sa 11 zapot i osi aplik pour tou sa 144,000 Kretyen swazir. (Lik 12:32; Rev. 5:9, 10; 14:1) Eski Zezi ti pou fer en lalyans avek son bann disip avek lentansyon pour partaz son pouvwar avek zot si i ti napa konfyans dan zot?
9. Kwa ki enkli parmi ‘tou bann byen Kris’?
9 Deplis, Zezi Kri ti met sa lesklav fidel e pridan ansarz “tou son byen” setadir tou sa ki annan pour fer avek lentere Rwayonm lo later. (Mat. 24:47) Serten parmi sa bann byen i enkli biro prensipal Temwen Zeova, bann biro brans dan diferan pei, bann Lasal lasanble ek Lasal Rwayonm dan lemonn antye, ensi ki sa travay predikasyon e fer disip. Eski ou ti pou demann en dimoun pour gard e servi ou bann keksoz valer si ou ti napa konfyans dan li?
10. Kwa ki montre ki Zezi Kri i avek bann Kretyen swazir?
10 En pe letan avan ki i ti mont dan lesyel, Zezi ki ti’n resisite ti aparet avek son bann disip fidel e i ti fer en promes avek zot, an dizan: “Konnen ki mwan mon avek zot tou le zour, ziska [“konklizyon sa sistenm,” NW].” (Mat. 28:20) Eski i’n gard son promes? Pandan sa 15 dernyen lannen ki’n pase, lakantite kongregasyon Temwen Zeova dan lemonn in ogmante sorti 70,000 in ariv plis ki 100,000 setadir en ogmantasyon plis ki 40 poursan. Ki nou pou dir konsernan bann nouvo disip? Apepre 4.5 milyon disip ti batize sa 15 dernyen lannen ki’n pase, sa i fer en mwayenn plis ki 800 batenm par zour. Sa ogmantasyon remarkab i montre klerman ki Kris pe diriz bann Kretyen swazir dan bann renyon kongregasyon e pe siport zot dan sa travay pour fer disip.
Sa lesklav i fidel e pridan
11, 12. Ki mannyer sa lesklav in montre ki i fidel e pridan?
11 Vi ki Zeova ek Zezi i annan konfyans total dan sa lesklav fidel e pridan, pa nou osi nou devret fer parey? Apre tou, sa lesklav in montre li fidel dan sa travay ki i’n gannyen pour fer. Par egzanp, Latour Veyer in ganny pibliye pandan sa 130 an. Bann renyon ek bann lasanble Temwen Zeova i kontinyen batir nou lo plan spirityel.
12 Sa lesklav fidel i osi pridan. Anfet, i montre ki i modes, i pa taye pour azir avan ki i ganny gidans sorti kot Zeova e i pa ni tarde pour azir ler i byen konpran gidans ki i gannyen sorti kot Bondye konsernan en sityasyon. Par egzanp, bann sef relizye i soutir oubyen aksepte bann move kondwit egois bann dimoun dan sa lemonn konman en keksoz normal, sa lesklav i donn bann lavertisman pour nou pa tonm dan bann pyez sa move lemonn Satan. Sa lesklav i kapab fourni nou avek bann lavertisman saz ki vin zis atan, akoz Zeova ek Zezi pe beni li. Alor nou merit annan konfyans total dan sa lesklav. Me ki mannyer nou kapab demontre ki nou annan konfyans dan sa lesklav fidel e pridan?
“Al avek” bann Kretyen swazir anmezir ki zot swiv Lanyo
13. Dapre profesi Zekarya, ki mannyer nou kapab montre ki nou annan konfyans dan sa lesklav fidel e pridan?
13 Liv Zekarya i koz lo “dis zonm” ki apros “en zonm ki en Zwif” e dir: “Nou pou al avek zot.” (Lir Zekarya 8:23.) Vi ki dan sa menm verse, sa “zonm ki en Zwif” i ganny idantifye par sa mo “zot,” sa zonm pe reprezant en group dimoun. Dan nou letan, sa zonm pe reprezant sa pti group Kretyen swazir ki ankor lo later, ki form parti “Izrael Bondye.” (Gal. 6:16, NW) Sa “dis zonm sorti dan tou langaz bann nasyon” i reprezant sa gran lafoul lezot mouton. Zis parey sa bann Kretyen swazir i swiv Zezi partou kot i ale, sa gran lafoul i “al avek” oubyen swiv sa lesklav fidel e pridan. Bann dimoun ki form parti sa gran lafoul pa devret zanmen onte pour fer konnen ki zot asosye avek sa bann “ki Bondye in apele.” (Ebr. 3:1) Zezi pa ti onte pour apel sa bann Kretyen swazir “son bann frer.”—Ebr. 2:11.
14. Ki mannyer nou kapab fidelman siport bann frer swazir Kris?
14 Ler nou fidelman donn sipor bann frer Zezi Kri, pour li sa i konmsi nou pe donn li sipor. (Lir Matye 25:40.) Alor dan ki fason bann ki annan sa lespwar pour viv lo later i kapab donn sipor bann frer swazir Kris? Premyerman, ler nou pe ed zot dan sa travay predikasyon. (Mat. 24:14; Zan 14:12) Menm si lakantite Kretyen swazir lo later in diminyen pandan sa dizenn lannen ki’n pase, lakantite dimoun ki form parti lezot mouton in ogmante. Ler sa bann ki annan sa lespwar pour viv lo later i partisip dan travay predikasyon e pran servis pionye ordiner kan zot kapab, zot ed bann Kretyen swazir pour akonplir sa travay fer disip. (Mat. 28:19, 20) Deplis, zot annan sa posibilite pour donn zot sipor dan sa travay par kontribye finansyerman dan diferan fason.
15. Ki mannyer en Kretyen i devret reazir ler i ganny sa manze spirityel ki vin zis atan sorti kot sa lesklav ek bann desizyon ki sa lesklav i pran an rapor avek lorganizasyon?
15 Konman en Kretyen, ki mannyer nou konsider sa manze spirityel ki sa lesklav fidel e pridan i fourni nou atraver bann piblikasyon baze lo Labib, bann renyon ek lasanble ki nou ganny zis atan? Eski nou annan lapresyasyon ek rekonesans pour sa manze spirityel ki nou gannyen? Eski nou pare pour aplik sa ki nou aprann? Ki mannyer nou reazir anver bann desizyon ki sa lesklav in pran an rapor avek lorganizasyon? Ler nou volonterman obeir gidans ki nou gannyen nou montre ki nou annan lafwa dan laranzman ki Zeova i fer.—Zak 3:17.
16. Akoz tou Kretyen i devret ekout bann frer Kris?
16 Zezi ti dir: “Mon bann mouton i ekout mon lavwa, mon konn zot e zot swiv mwan.” (Zan 10:27) Sa i leka pour bann Kretyen swazir. Be ki nou pou dir konsernan bann ki “al avek” zot? Zot bezwen ekout Zezi. Zot osi bezwen ekout son bann frer. Apre tou, se zot ki’n ganny konfye sa responsabilite an premye pour pran ka avek bezwen spirityel pep Bondye. Me ki savedir ekout lavwa bann frer Kris?
17. Kwa ki enplike ler nou dir nou pe ekout sa lesklav?
17 Ozordi sa lesklav fidel e pridan i ganny reprezante par Konsey Direkter ki diriz e organiz travay predikasyon dan lemonn antye. Sa bann manm Konsey Direkter i bann ansyen eksperyanse ki’n ganny swazir par lespri sen. Sa lekspresyon “bann dirizan” parmi nou i aplik espesyalman pour zot. (Ebr. 13:7) Sa bann sirveyan ki’n ganny swazir pe pran swen avek apepre 7,000,000 proklanmater Rwayonm dan lemonn antye dan plis ki 100,000 kongregasyon i annan bokou pour fer “dan travay Senyer.” (1 Kor. 15:58) Nou ekout sa lesklav si nou donn tou nou sipor son Konsey Direkter.
Sa ki ekout sa lesklav i ganny beni
18, 19. (a) Ki mannyer sa bann ki ekout sa lesklav fidel e pridan i ganny beni? (b) Ki nou devret determinen pour fer?
18 Depi ki sa lesklav fidel e pridan in ganny apwente, i’n “anmenn en kantite ver ladrwatir.” (Dan. 12:3) Parmi i annan sa bann ki annan sa lespwar pour sirviv destriksyon sa move lemonn. Pa i en benediksyon pour ganny konsidere drwat devan Bondye!
19 Byento ler sa “lavil sent, Nouvel[ ]Zerizalenm” avek son 144,000 manm i “desann sorti dan lesyel kot Bondye . . . dekore parey en nouvel[ ]marye ki’n abiye pour son msye,” ki sa bann ki’n ekout lavwa sa lesklav pou eksperyanse? Labib i dir: “I pou vin zot Bondye.” E “I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Rev. 21:2-4) Alors, annou fer tou nou posib pour ekout Kris ek son bann frer swazir ki diny konfyans.
Ki ou’n aprann?
• Ki laprev nou annan ki montre ki Zeova i annan konfyans dan sa lesklav fidel e pridan?
• Ki mannyer nou konnen ki Zezi Kri i annan konfyans total dan sa lesklav?
• Akoz nou merit annan konfyans dan sa lesklav?
• Ki mannyer nou demontre ki nou annan konfyans dan sa lesklav?
[Kestyon]
[Portre lo paz 19]
Eski ou konnen lekel ki Zeova in swazir pour vin sa madanm senbolik son Garson.
[Portre lo paz 20]
Zezi Kri in konfye “tou son byen” avek sa lesklav fidel e pridan
[Portre lo paz 21]
Ler nou partisip dan sa travay predikasyon, nou pe donn nou sipor bann Kretyen swazir