Bann ki drwat pou loue Bondye pour touzour
Bann ki drwat pou loue Bondye pour touzour
“Sa enn ki drwat pa pou ganny oubliye . . . Son ladrwatir i reste pour touzour.”—PS. 112:6, 9.
1. (a) Ki lavenir merveye bann ki Bondye i konsider drwat pe espere? (b) Ki kestyon ki ganny souleve?
PA TOU bann ki ganny konsidere drwat par Bondye pe esper en lavenir merveye! Zot pou kontan pour aprann plis lo bann zoli kalite Zeova pour touzour. Zot anvi loue Zeova avek tou zot leker anmezir zot aprann plis lo bann travay kreasyon Bondye. “Ladrwatir” i en kalite vreman enportan pour kapab eksperyans sa lavenir briyan e se sanmenm ki Psonm 112 i met lanfaz lo la. Me ki mannyer Zeova, sa Bondye sen e drwat i kapab konsider bann imen enparfe konman drwat? Malgre tou zefor ki nou fer pour fer sa ki drwat, nou fer bann fot, menm parfwa bann fot ki serye.—Rom. 3:23; Zak 3:2.
2. Ki sa de mirak ki Zeova ti fer avek lanmour?
2 Avek lanmour Zeova ti donn en solisyon parfe. Ki mannyer? Premyerman, i ti fer en mirak par transfer lavi son Garson byenneme ki ti dan lesyel dan matris en vyerz pour li kapab ne konman en imen parfe. (Lik 1:30-35) Dezyenmman, apre ki Zezi ti’n ganny met amor par son bann lennmi, Zeova ti fer en lot mirak ekstraordiner. Bondye ti resisit Zezi konman en lespri.—1 Pyer 3:18.
3. Akoz Bondye ti vreman kontan pour rekonpans son Garson avek lavi dan lesyel?
3 Zeova ti rekonpans Zezi avek en keksoz ki son Garson ti napa avan ki i ti vin lo later e sa i lavi ki pa kapab ganny detrir, dan lesyel. (Ebr. 7:15-17, 28) Zeova ti vreman kontan pour fer sa parski Zezi ti’n reste fidel dan en fason parfe malgre i ti pas atraver bann tes difisil. Alor, Zezi ti donn son Papa sa pli bon larepons e enn ki konplet pour mansonz Satan konmkwa imen i servi Bondye pour bann rezon egois e non pa akoz zot lanmour senser pour li.—Prov. 27:11.
4. (a) Ler i ti retourn dan lesyel, ki Zezi ti fer pour nou e ki ti reaksyon Zeova? (b) Ki mannyer ou santi anver sa ki Zeova ek Zezi in fer pour ou?
4 Dan lesyel, Zezi ti fer plis ki sa. Avek valer “son prop disan,” i ti “prezant limenm devan Bondye pour nou.” Nou Papa lanmour ki dan lesyel ti zantiman aksepte lofrann presye Zezi konman “en sakrifis ki permet nou ganny pardon nou pese.” Alor, avek en konsyans ki’n ganny “pirifye” nou kapab ofer en servis sakre avek nou “Bondye vivan.” Pa sa i donn nou tou rezon pour repet sa premye parol dan Psonm 112 ki dir: “Loue Ya, zot lepep”!—Ebr. 9:12-14, 24; 1 Zan 2:2.
5. (a) Ki nou devret fer pour kontinyen ganny konsidere drwat par Bondye? (b) Dan ki fason Psonm 111 ek Psonm 112 in ganny organize?
5 Pour kontinyen ganny konsidere drwat par Bondye, nou devret kontinyen demontre lafwa dan disan Zezi ki’n ganny verse pour nou. Nou pa devret les en zour pase san ki nou remersye Zeova pour kontan nou sa kantite. (Zan 3:16) Nou devret osi kontinyen etidye Parol Bondye e fer tou sa ki nou kapab pour viv an armoni avek sa mesaz ki ladan. Dan Psonm 112 i annan bann bon konsey pour tou bann dimoun ki anvi gard en konsyans kler devan Bondye. Sa psonm i konplemant Psonm 111. Zot tou le de zot konmans avek sa parol: “Loue Ya, zot lepep!” ouswa “Alelouya!” e zot swiv par 22 laliny. Sak laliny i konmans avek en let parmi sa 22 let alfabet dan langaz Ebre. *
En baz pour boner
6. Ki mannyer sa “zonm” ki annan lakrent pour Bondye ki ganny dekrir dan Psonm 112 i ganny beni?
6 “Ere sa zonm ki annan lakrent pour Zeova, ki pran bokou plezir dan son bann komannman. Son desandans pou vin pwisan lo later. Tandis ki zenerasyon bann zonm drwat, pou ganny beni.” (Ps. 112:1, 2) Remarke ki o konmansman, sa psalmis i mansyonn en sel “zonm” e dan dezyenm parti verse 2 i sanze e servi “bann zonm drwat” ki endik pliryel. Sa i montre ki sa Psonm 112 i kapab pe refer avek en group ki annan plizyer dimoun. I enteresan pour note ki zapot Pol ti ganny enspire pour aplik Psonm 112:9 avek bann Kretyen dan premye syek. (Lir 2 Korentyen 9:8, 9.) Pa sa psonm pe vreman dekrir ki mannyer bann ki swiv Zezi ozordi i kapab ere!
7. Akoz bann serviter Bondye i merit annan en lakrent apropriye pour li e ki mannyer ou devret santi anver komannman Bondye?
7 Parey i ganny endike dan Psonm 112:1, bann vre Kretyen i ganny bokou lazwa anmezir ki zot viv dan en fason ki montre ki zot “annan lakrent pour Zeova.” En lakrent apropriye ki zot annan pour pa depler li i ed zot pour reziste lespri sa lemonn Satan. Zot “pran bokou plezir” pour etidye Parol Bondye e obeir son bann komannman. Sa i osi enplik sa lord pour pres sa bon nouvel Rwayonm partou lo later. Zot fer bokou zefor pour fer disip avek bann dimoun sorti dan tou nasyon anmezir ki zot averti bann move dimoun konsernan zour zizman Bondye.—Ezek. 3:17, 18; Mat. 28:19, 20.
8. (a) Ki mannyer pep devoue Bondye ozordi in ganny rekonpanse pour zot devouman? (b) Ki benediksyon ki pe esper bann ki annan lespwar pour viv lo later?
8 Vi ki zot pe obeir sa lord, ozordi i annan apepre set milyon serviter Bondye lo later. Lekel ki pa pou dakor ki son pep in vin “pwisan lo later”? (Zan 10:16; Rev. 7:9, 14) Pa zot pou vreman ganny “beni” kan Bondye pou akonplir son plan! Konman en group, bann ki annan lespwar pour viv lo later pou ganny proteze kan sa “gran ladetres” ki pe vini pou arive. Zot pou form “en nouvo later kot pou annan lazistis.” Avek letan, bann ki sirviv Armagedon “pou ganny beni” menm pour touzour. Zot pou pare pour akey plizyer milyon dimoun ki pou resisite. Pa sa i en lespwar eksitan! Finalman, bann ki pran “bokou plezir” dan bann komannman Bondye pou ariv ziska perfeksyon e zot pou rezwir pour touzour “laliberte ek laglwar bann zanfan Bondye.”—2 Pyer 3:13; Rom. 8:21.
Servi larises avek lasazes
9, 10. Ki mannyer bann vre Kretyen in servi zot larises spirityel e ki mannyer zot ladrwatir pou reste pour touzour?
9 “Bann keksoz ki annan valer ek larises i dan son lakaz; e son ladrwatir i reste pour touzour. I’n aparet dan fernwanr konman en lalimyer pour bann zonm drwat. I annan konpasyon ek mizerikord e i drwat.” (Ps. 112:3, 4) Dan letan lontan, serten serviter Bondye ti renonmen pour zot larises materyel. De lot kote, bann ki Bondye i aprouve, zot vin ris, menm si sa pa dan en sans materyel. An realite, leksperyans i montre ki laplipar dimoun ki abes zot devan Bondye i kapab pov e lezot dimoun pa kontan zot, zis parey i ti leka dan letan Zezi. (Lik 4:18; 7:22; Zan 7:49) Me, ki swa en dimoun i annan bokou ouswa ptigin materyelman, i posib pour li vin ris spirityelman.—Mat. 6:20; 1 Tim. 6:18, 19; lir Zak 2:5.
10 Bann Kretyen swazir ansanm avek lezot mouton, pa gard zot larises spirityel zis pour zot. O kontrer zot “aparet” dan lemonn fernwanr Satan “konman en lalimyer pour bann zonm drwat.” Zot fer sa par ed lezot pour benefisye avek bann trezor spirityel ki lasazes ek konnesans lo Bondye i anmennen. Bann ki opoz nou in esey aret sa travay predikasyon Rwayonm, me zot pa’n reisi. O kontrer, rezilta sa bon travay pou “reste pour touzour.” Bann serviter Bondye i kapab annan lasirans ki zot pou viv eternelman e “reste pour touzour” si zot kontinyen viv en lavi drwat.
11, 12. Dan ki fason pep Bondye i servi bann keksoz materyel ki zot annan?
11 Pep Bondye, setadir bann Kretyen swazir ek bann ki form parti “gran lafoul” in prouve ki zot zenere an rapor avek bann keksoz materyel. Psonm 112:9 i dir: “I pa’n tike pour li partaze, i’n donn bann pov.” Bann vre Kretyen ozordi i souvan kontribye materyelman pour lezot frer ek ser Kretyen e menm pour zot prosen ki dan bezwen. Zot menm servi zot resours materyel pour siport bann travay sekour ki ganny fer ler i annan dezas. Parey Zezi ti endike ki i ti pou leka, sa i osi anmenn bokou lazwa.—Lir Akt 20:35; 2 Korentyen 9:7.
12 Deplis, mazin sa kantite larzan ki ganny servi pour pibliy sa magazin dan plis ki 172 langaz, ki bokou parmi i bann langaz ki bann pep ase pov i koze. Reflesir osi lo lefet ki sa magazin i disponib dan diferan langaz siny pour bann dimoun sourd ensi ki an Bray pour bann ki aveg.
I annan konpasyon e i zis
13. Lekel ki’n kit sa meyer legzanp lo donn avek konpasyon e ki mannyer nou kapab imit zot legzanp?
13 “Sa zonm ki annan konpasyon e ki prete, i bon.” (Ps. 112:5) Petet ou’n deza remarke ki bann dimoun ki ed lezot pa touzour annan konpasyon. Serten i donnen zis pour montre ki zot annan plis ki lezot ouswa zot pa ni menm kontan pour donnen. I pa gou pour ganny led avek en dimoun ki fer ou santi ou pli enferyer ouswa ki fer ou santi ki ou en latet fermal ouswa en fardo. Me de lot kote, pa i vreman gou pour ganny led avek en dimoun ki annan konpasyon. Zeova i sa legzanp ekstraordiner en Bondye ki annan konpasyon e ki donn avek lazwa. (1 Tim. 1:11, NW; Zak 1:5, 17) Zezi Kri ti parfetman imit legzanp konpasyon ki son Papa i annan. (Mark 1:40-42) Alor, pour ganny konsidere drwat devan Bondye, nou bezwen donn avek lazwa e avek konpasyon, sirtou dan predikasyon kan nou ofer led spirityel nou prosen.
14. Dan ki fason nou kapab ‘okip nou bann zafer avek lazistis’?
14 “I okip son bann zafer avek lazistis.” (Ps. 112:5) Parey ti’n ganny predir, sa serviter fidel i pran swen avek bann byen son Met, an armoni avek lazistis Zeova. (Lir Lik 12:42-44.) Sa i ganny demontre atraver sa gidans baze lo Labib ki bann ansyen ki parfwa bezwen pran ka avek bann pese grav dan kongregasyon i gannyen. Lafason ki sa lesklav i pran ka avek keksoz i demontre lazistis e i evidan ki zot gidans i sorti dan Labib an rapor avek lafason ki tou bann kongregasyon, lakaz misyonner ek Betel i devret fonksyonnen. Pa zis bann ansyen ki devret demontre lazistis, lezot Kretyen osi i devret demontre li dan lafason ki zot tret kanmarad ek bann ki pa krwayan, menm dan bann tranzaksyon biznes.—Lir Mika 6:8, 11. *
Benediksyon pour bann ki drwat
15, 16. (a) Ki lefe move nouvel sa lemonn i annan lo bann dimoun ki drwat? (b) Ki bann serviter Bondye i determinen pour kontinyen fer?
15 “Wi, i pa pou zanmen drive. Sa enn ki drwat pa pou ganny oubliye pour en letan endefini. I pa pou ni menm per move nouvel. Son leker i ferm, i depan lo Zeova. Son leker i kalm, i pa pou per, ziska ler i get son bann adverser.” (Ps. 112:6-8) Zanmen oparavan dan listwar, i’n deza annan sitan move nouvel, par egzanp lager, terorism, nouvo maladi ek bann maladi ki pe revin ankor, krim, lapovrete ek polisyon ki detrir lanvironnman. Bann ki Bondye i konsider drwat pa kapab sap lefe sa bann move nouvel, me lafreyer pa fer zot bes lebra. O kontrer, zot leker i “ferm” e “kalm” pandan ki zot get lavenir avek konfyans vi ki zot konnen ki nouvo lemonn Bondye ki drwat i pros. Si dezas i arive, zot pli kapab fer fas avek sityasyon akoz zot depan lo sipor Zeova. I pa zanmen les son bann serviter ki drwat “drive,” i donn zot led ek lafors pour andire.—Fili. 4:13.
16 Bann serviter drwat Bondye i osi bezwen siport laenn ek mansonz ki zot bann opozan i fannen, me sa pa’n reisi e i pa pou zanmen reisi fer bann vre Kretyen reste trankil. O kontrer, bann serviter Bondye i kontinyen reste ferm e solid dan sa travay ki Zeova in donn zot pour pres sa bon nouvel Rwayonm e fer disip. San dout, bann ki drwat pou ganny persekite plis ankor anmezir ki lafen i aprose. Sa laenn pou ariv lo son pik, ler Satan dan son rol konman Gog sorti Magog pou lans son latak dan lemonn antye. Apre sa, finalman nou pou ‘get nou adverser’ ler zot pou konpletman ganny zot defet. Sa pou vreman en leksperyans, nou pou kapab vwar non Zeova ganny sanktifye konpletman!—Ezek. 38:18, 22, 23.
“Ganny met anler dan laglwar”
17. Ki mannyer sa enn ki drwat pou “ganny met anler dan laglwar”?
17 Pa i pou en lazwa pour loue Zeova dan linite, san ganny opoze avek Dyab ek son lemonn. Tou bann ki kontinyen ganny konsidere drwat par Bondye pou eksperyans sa lazwa pour touzour. Zot pa pou onte ni ganny defet akoz Zeova i osi promet ki “korn” sa enn ki drwat pou “ganny met anler dan laglwar.” (Ps. 112:9) Serviter drwat Zeova pou rezwir ler i pou vwar tou bann ki kont souvrennte Zeova ganny defet.
18. Ki mannyer parol dan konklizyon Psonm 112 pou ganny akonplir?
18 “Sa enn ki move pou vwar e sirman i pou irite. I pou grens son ledan e i pou vreman disparet. Dezir bann ki move pou fini lanmenm.” (Ps. 112:10) Tou bann ki kontinyen opoz pep Bondye pou byento “disparet” dan zot zalouzi ek laenn. Zot dezir pour vwar en lafen avek nou travay pou fini ansanm avek zot pandan sa “gran ladetres” ki pe vini.—Mat. 24:21, NW.
19. Ki lasirans nou kapab annan?
19 Eski ou pou parmi bann sirvivan zwaye sa gran laviktwar? Oubyen si i arive ki ou mor akoz maladi ouswa lavyeyes avan lafen lemonn Satan, eski ou pou parmi sa bann “dimoun bon” ki pou resisite? (Akt 24:15) Larepons i kapab wi si ou kontinyen annan lafwa dan sakrifis Zezi e imit Zeova zis parey bann ki ganny reprezante par sa “zonm” drwat dan Psonm 112. (Lir Efezyen 5:1, 2.) Zeova pou fer sir ki sa bann ki drwat “pa pou ganny oubliye,” ni zot bon aksyon pa pou ganny inyore. Zeova pou rapel zot e i pou kontan zot pour touzour.—Ps. 112:3, 6, 9.
[Not anba lo paz]
^ par. 5 Striktir ek konteni sa de psonm i montre ki zot konplemant kanmarad. Bann kalite Bondye ki ganny loue dan Psonm 111 i pareyman ganny loue par sa “zonm” ki annan lakrent pour Bondye ki’n ekrir Psonm 112 zis parey ou kapab remarke kan ou konpar Psonm 111:3, 4 ek Psonm 112:3, 4.
^ par. 14 Mika 6:8, 11: “I’n dir ou, O zonm, sa ki bon. Ki Zeova pe demann ou an retour apard ki demontre lazistis, kontan labonte, e mars dan en fason modes avek ou Bondye? Eski mon kapab pir avek en fo balans e avek en sak pwa tronper?”
Kestyon pour refleksyon
• Ki serten rezon nou annan pour kriy “Alelouya”?
• Ki devlopman dan nou letan ki fer bann vre Kretyen ere?
• An rapor avek donnen ki kalite dimoun Zeova i kontan?
[Kestyon]
[Portre lo paz 25]
Pour kontinyen ganny konsidere drwat devan Bondye nou bezwen annan lafwa dan disan Zezi ki’n ganny verse
[Portre lo paz 26]
Kontribisyon ki ganny donnen volonterman i ede dan travay sekour, e pour distribye bann piblikasyon baze lo Labib