Annou apresye Zezi sa pli gran David e sa pli gran Salomon
Annou apresye Zezi sa pli gran David e sa pli gran Salomon
“Isi i annan enn ki pli enportan ki Salomon.”—MAT. 12:42.
1, 2. Akoz dapre pwennvi imen, i ti kapab paret drol ki Samyel ti ganny demande pour swazir David pour vin lerwa?
LER profet Samyel ti vwar David, i ti en garson ki vey mouton me i pa ti parey en fitir lerwa. Deplis, Betleenm sa lavil kot i ti reste ti en pti lavil san gran lenportans. I ti ganny dekrir konman enn bann pli pti lavil Zida. (Mik. 5:2) Toudmenm, sa zenn garson ki ti paret napa bokou lenportans, sorti dan en pti lavil, ti ganny swazir pour vin lerwa Izrael ler profet Samyel ti devid delwil lo son latet.
2 Samyel ti vin kot lakour sa zonm fidel, Zese, pour swazir sa enn ki ti pou vin prosen lerwa sa pei. David, pli zenn garson Zese pa ti sa premye garson ki son papa ti prezant Samyel pour li swazir. Anfet, i pa ti ni dezyenm oubyen trwazyenm swa. David ki ti dernyen dan sa wit garson Zese pa ti ni menm la ler Samyel ti vin kot li. Me toudmenm, se swa Zeova ki ti konte e i ti’n swazir David.—1 Sam. 16:1-10.
3. (a) Kwa ki Zeova i vwar pli enportan ler i egzamin en dimoun? (b) Osito ki David ti ganny swazir konman lerwa, ki ti arive?
3 Zeova ti vwar sa ki Samyel pa ti kapab vwar. Bondye ti kapab vwar kondisyon leker David, e sa ti fer li plezir. I pa senpleman laparans ki konte pour Bondye me i sa ki en dimoun i vreman ete anndan. (Lir 1 Samyel 16:7.) Alor ler Samyel ti konpran ki Zeova pa ti’n swazir enn sa set pli gran garson Zese, i ti fer kriy zot pti frer ki ti deor pe vey mouton. Labib i dir: “[Zese] ti demande pour fer [David] vini. I ti en zoli garson ankor byen zenn, avek zoli lizye. Epi Zeova ti dir: ‘Leve, devid delwil lo li, akoz se li menm!’ E Samyel ti pran son korn delwil e ti devid delwil lo li devan son bann frer. E lespri Zeova ti konmans azir lo David apartir sa zour.”—1 Sam. 16:12, 13.
David ti reprezant Kris
4, 5. (a) Mansyonn serten keksoz parey ant David ek Zezi. (b) Akoz nou kapab dir Zezi i sa pli gran David?
4 Parey David, Zezi ti ne Betleenm, apepre 1,100-z-an pli tar. Pour bokou dimoun, Zezi osi ti napa laparans en lerwa. I pa ti parey sa kalite lerwa ki bokou ti pe espere an Izrael. Pourtan parey David, se li ki Zeova ti swazir e kontan. * (Lik 3:22) Dans ka Zezi osi, ‘lespri Zeova ti konmans azir lo li.’
5 Pa se tou, i annan lezot keksoz parey ant David ek Zezi. Par egzanp, David ti ganny trai par son konseye Aitofel e Zezi par son zapot Zida Iskaryot. (Ps. 41:9; Zan 13:18) Tou le de ti annan bokou devouman pour landrwa ladorasyon Zeova. (Ps. 27:4; 69:9; Zan 2:17) Zezi ti osi en zeritye David. Avan nesans Zezi, en lanz ti dir son manman: “Bondye pou donn li tronn son papa, David.” (Lik 1:32; Mat. 1:1) Toudmenm, vi ki tou bann promes lo Mesi i ganny akonplir atraver Zezi, i bokou pli gran ki David. I sa pli gran David, sa Lerwa ek Mesi ki dimoun ti espere pour bokou letan.—Zan 7:42.
Annou swiv Lerwa ki osi en berze
6. Dan ki fason David ti en bon berze?
6 Zezi i osi en berze. Kwa ki fer en dimoun vin en bon berze? En bon berze i fidelman pran swen, nouri, e vey lo son troupo avek kouraz. (Ps. 23:2-4) Ankor byen zenn, David ti en berze, e i ti pran byen swen avek bann mouton son papa. I ti kouraze e i ti riske son lavi pour protez son mouton kan i ti ganny atake par en lyon ek en lours.—1 Sam. 17:34, 35.
7. (a) Kwa ki ti prepar David pour pran son responsabilite konman lerwa? (b) Akoz Zezi i sa Bon Berze?
7 Sa bann lannen ki David ti pase pe pran swen avek son bann mouton dan lakanpanny e dan bann montanny ti prepar li pour sa gro responsabilite ek travay pour pran swen avek nasyon Izrael. * (Ps. 78:70, 71) Zezi osi in vin en model konman en berze. I ganny lafors ek gidans avek Zeova pour pran swen parey en berze avek sa “pti troupo” ek ‘lezot mouton.’ (Lik 12:32; Zan 10:16) Dan sa fason, Zezi i demontre ki i sa Bon Berze. I konn sitan byen son troupo ki i kapab kriy sak mouton par son non. I telman kontan son mouton ki ler i ti lo later i ti pare pour fer bann sakrifis pour zot byennet. (Zan 10:3, 11, 14, 15) Konman sa Bon Berze, Zezi ti fer sa ki David pa ti pou’n zanmen kapab fer. Son sakrifis ti fer li posib pour limanite ganny delivre dan lanmor. Napa nanryen ki pou kapab anpes li pran swen e anmenn sa “pti troupo” ziska lavi imortel dan lesyel. I pou osi gid son bann ‘lezot mouton’ ver lavi eternel dan sa nouvo lemonn drwat kot pou nepli annan dimoun ki parey lelou feros.—Lir Zan 10:27-29.
Annou swiv sa Lerwa ki ranport laviktwar
8. Akoz nou kapab dir ki David ti en lerwa ki ranport laviktwar?
8 Konman lerwa, David ti en gran gerye ki ti protez sa pei ki ti pour pep Bondye e “Zeova ti kontinyen sov David partou kot i ti ale.” Anba lotorite David, bann frontyer nasyon Izrael ti arive ziska larivyer Lezip ek larivyer Efrat. (2 Sam. 8:1-14) Gras a lafors Zeova, i ti vin en dirizan tre pwisan. Labib i dir: “David ti vin renonmen dan tou bann pei, e Zeova li menm ti fer bann nasyon per li.”—1 Kron. 14:17.
9. Eksplike ki mannyer fitir Lerwa Zezi ti ranport laviktwar?
9 Parey Lerwa David, Zezi pa ti per ler i ti lo later. Konman fitir Lerwa, i ti demontre son lotorite lo bann demon par liber bann viktim ki ti anba zot kontrol. (Mark 5:2, 6-13; Lik 4:36) Menm Satan son pli gran lennmi napa kontrol lo li. Avek sipor Zeova, Zezi ti ranport laviktwar lo lemonn ki dan pouvwar Satan.—Zan 14:30; 16:33; 1 Zan 5:19.
10, 11. Ki rol Zezi i zwe konman Lerwa ek Gerye dan lesyel?
10 Apepre 60 an apre lanmor ek rezireksyon Zezi dan lesyel, zapot Zan ti ganny en vizyon profetik kot i ti vwar Zezi dan Son rol konman Lerwa ek Gerye dan lesyel. Zan ti ekrir: “Mon ti [v]war en seval blan. Sa ki ti pe mont li ti annan en fles dan son lanmen, e zot ti donn li en kouronn; i ti ale konman en venker e pour ganny laviktwar.” (Rev. 6:2) Sa enn lo seval blan i Zezi. I ti ganny en “kouronn” an 1914 kan i ti vin Lerwa dan lesyel. Apre sa, “i ti ale konman en venker.” Wi, parey David, Zezi i en lerwa ki ranport laviktwar. I pa ti pas bokou letan apre ki i ti’n vin Lerwa dan Rwayonm Bondye pour li ranport laviktwar dan en lager kont Satan ek son bann demon e zet zot lo later. (Rev. 12:7-9) Sa pou kontinyen ziska ler i “ganny laviktwar” total kan i pou konpletman detrir move lemonn Satan.—Lir Revelasyon 19:11, 19-21.
11 Parkont, parey David, Zezi i en lerwa ki annan konpasyon, e i pou protez sa “gran lafoul” atraver Armagedon. (Rev. 7:9, 14) Deplis, anba dominasyon Zezi ek son bann zeritye, sa 144,000 ki’n ganny resisite, i pou annan en ‘rezireksyon bann dimoun bon konman move.’ (Akt 24:15) Bann ki pou ganny resisite lo later pou annan sa lespwar pour viv pour touzour. Pa sa i en zoli lavenir pour zot! Alor annou determinen pour kontinyen “fer sa ki byen,” e nou pou vivan ler later pou’n ranpli avek bann dimoun drwat e ere ki viv anba dominasyon sa Gran David.—Ps. 37:27-29.
Lapriyer Salomon pour ganny lasazes i ganny ekoute
12. Ki lapriyer Salomon ti fer?
12 Garson David, Salomon ti osi reprezant Zezi. * Ler Salomon ti vin lerwa, Zeova ti aparet avek li dan en rev e I ti dir li ki i pou donn li nenport keksoz ki i demande. Salomon ti’n kapab demann plis larises, pouvwar oubyen pour viv pli lontan. Olye fer sa, i pa ti egois e i ti demann Zeova: “Aprezan, donn mwan lasazes ek konnesans pour ki mon a kapab byen diriz sa pep, akoz lekel ki pou kapab ziz ou gran pep?” (2 Kron. 1:7-10) Zeova ti reponn lapriyer Salomon.—Lir 2 Kronik 1:11, 12.
13. Akoz ti napa en lot dimoun ki ti annan menm lasazes avek Salomon, e kote i ti ganny sa lasazes?
13 Osi lontan ki Salomon ti fidel avek Zeova, i ti napa en lot dimoun dan son letan ki ti koz bann parol saz parey li. Salomon ti dir “trwa mil proverb.” (1 Rwa. 4:30, 32, 34) Bokou parmi ti ganny met an ekrir e dimoun ki anvi ganny lasazes i ankor kontan sa bann proverb en kantite. Larenn Seba ti vwayaz apepre 2,400 kilomet pour teste lasazes Salomon par demann li bann “kestyon difisil.” Parol Salomon ek larises son rwayonm ti enpresyonn li. (1 Rwa. 10:1-9) Labib i montre kote Salomon ti ganny son lasazes an dizan: “Tou dimoun lo later ti anvi vwar Salomon pour zot antann son lasazes ki Bondye ti’n met dan son leker.”—1 Rwa. 10:24.
Annou swiv sa Lerwa saz
14. Akoz nou kapab dir ki Zezi Kri i sa “enn ki pli enportan ki Salomon”?
14 I ti annan zis en imen ki ti kapab annan en pli gran lasazes ki Salomon. Sa ti Zezi Kri ki ti dir lo li menm ki i annan “enn ki pli enportan ki Salomon.” (Mat. 12:42) Zezi ti koz bann “parol lavi eternel.” (Zan 6:68) Par egzanp, dan Sermon lo Montanny, Zezi ti elabor lo bann prensip serten proverb Salomon. Salomon ti koz lo diferan keksoz ki fer en serviter Zeova ere. (Prov. 3:13; 8:32, 33; 14:21; 16:20) Zezi ti demontre ki vre boner i annan pour fer avek ladorasyon Zeova ek realizasyon bann promes Bondye. I ti dir: “Ere bann ki konsyan zot bezwen spirityel akoz rwayonm lesyel i pour zot.” (Mat. 5:3, NW) Bann ki met an pratik bann prensip dan lansennyman Zezi i vin pli pros avek Zeova, “sours lavi.” (Ps. 36:9; Prov. 22:11; Mat. 5:8) Kris i reprezant “lasazes Bondye.” (1 Kor. 1:24, 30) Konman Lerwa ek Mesi, Zezi Kri i annan “lespri lasazes.”—Iza. 11:2.
15. Ki mannyer nou kapab benefisye avek lasazes ki sorti kot Bondye?
15 Pour nou ki pe swiv sa pli Gran Salomon, ki mannyer nou kapab benefisye avek lasazes ki sorti kot Bondye? Vi ki lasazes Zeova i dan son Parol, nou bezwen fer zefor pour rod lasazes par etidye Labib seryezman, spesyalman bann parol Zezi e par medit lo sa ki nou lir. (Prov. 2:1-5) Deplis, nou bezwen kontinyen demann Bondye lasazes. Parol Bondye i donn nou lasirans ki nou bann lapriyer senser pour ganny led Bondye pou ganny reponn. (Zak 1:5) Avek led lespri sen, nou pou trouv lasazes presye ki annan dan Parol Bondye ki kapab ed nou fer fas avek bann defi e ed nou fer bann desizyon saz. (Lik 11:13) Labib i dir ki Salomon ti ganny apele “sa enn ki rasanble dimoun” pour “ansenny lepep avek konnesans kontinyelman.” (Ekle. 12:9, 10) Sef kongregasyon Kretyen, Zezi, i osi rasanble son pep. (Zan 10:16; Kol. 1:18) Pour sa rezon, i tre byen si nou asiste bann renyon kongregasyon kot nou ganny ‘ansennyen kontinyelman.’
16. Ki similarite i annan ant Salomon ek Zezi?
16 Salomon ti en lerwa tre aktif. I ti organiz bann progranm konstriksyon nasyonal, i ti siperviz konstriksyon pale, semen, sistenm delo, ek diferan lavil ki ti ganny servi konman stor ouswa landrwa pour bann saret ek kavalye. (1 Rwa. 9:17-19) Rwayonm Izrael an antye ti benefisye avek sa bann konstriksyon. Zezi osi i en konstrikter. I ti konstri son kongregasyon lo “sa ros.” (Mat. 16:18) I pou osi siperviz travay konstriksyon ki pou ganny akonplir dan sa nouvo lemonn.—Iza. 65:21, 22.
Annou swiv Lerwa Lape
17. (a) Kwa ki ti vreman remarkab pandan renny Salomon? (b) Ki Salomon pa ti kapab fer?
17 Sa non Salomon i sorti dan en mo ki vedir “lape.” Lerwa Salomon ti Lerwa dan lavil Zerizalenm en non ki vedir “ki annan de lape.” Pandan son renny 40 an, i ti annan en lape remarkab dan nasyon Izrael. Labib i dir konsernan sa letan: “Zida ek Izrael ti kontinyen reste an sekirite, tou dimoun anba son prop pye rezen ek pye fig, depi Dann ziska Ber-Seba dan letan Salomon.” (1 Rwa. 4:25) Me menm si Salomon ti vreman saz, i pa ti kapab tir konpletman maladi, pese ek lanmor. Parkont, sa Gran Salomon pou delivre bann ki aksepte Rwayonm Bondye avek tou sa la.—Lir Romen 8:19-21.
18. Ki benediksyon nou eksperyanse dan kongregasyon Kretyen?
18 Menm dan kongregasyon Kretyen ozordi, nou annan lape. Pa nou eksperyans en vre paradi spirityel. Nou anpe avek Bondye ek nou kanmarad. Remark sa ki Izai ti profetize lo sa bann kondisyon ki nou pe viv ladan: “Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.” (Iza. 2:3, 4) Ler nou viv an armoni avek lespri sen Bondye, nou kontribye pour anbelir sa paradi spirityel.
19, 20. Akoz nou devret dan lazwa?
19 Parkont, lavenir pou pli meyer ankor. Bann imen obeisan pou eksperyans en lape bokou pli siperyer anba dominasyon Zezi, zot pou ptitapti “ganny libere . . . dan lesklavaz” pese e vin finalman parfe. (Rom. 8:21) Apre ki zot in pas sa tes final alafen sa Renny Mil An, “bann dimoun ki annan limilite pou posed later, e zot pou sirman trouv bokou plezir dan labondans lape.” (Ps. 37:11; Rev. 20:7-10) I evidan ki renny Kris Zezi pou bokou pli siperyer ki Salomon dan diferan fason ki nou pa ni menm kapab mazinen!
20 Parey bann Izraelit ti dan lazwa anba gidans Moiz, David ek Salomon, nou osi nou pou eksperyans plis lazwa anba dominasyon Kris. (1 Rwa. 8:66) Pa nou rekonesan ki Zeova in donn nou son sel Garson ki sa pli Gran Moiz, David ek Salomon!
[Not anba lo paz]
^ par. 4 Sa non David i probableman vedir “Byenneme.” Zour son batenm e osi pandan transfigirasyon, Zeova ti koze depi dan lesyel e ti kriy Zezi “sa mon Garson byenneme.”—Mat. 3:17; 17:5.
^ par. 7 An menm tan, David ti parey en pti mouton ki annan konfyans dan son berze. I ti rod proteksyon ek gidans avek sa Gran Berze, Zeova. I ti dir avek konfyans: “Zeova i mon Berze. Mon pa pou mank nanryen.” (Ps. 23:1) Zan Batis ti idantifye Zezi konman “Lanyo Bondye.”—Zan 1:29.
^ par. 12 I enteresan pour note ki dezyenm non Salomon ti Yedidya, ki vedir “Byenneme Ya.”—2 Sam. 12:24, 25.
Eski ou kapab eksplike?
• Dan ki sans Zezi i sa pli Gran David?
• Dan ki sans Zezi i sa pli Gran Salomon?
• Kwa ki ou apresye dan Zezi konman sa pli Gran David ek Salomon?
[Kestyon]
[Portre lo paz 31]
Lasazes Bondye ki Salomon ti annan i reprezant lasazes sa pli Gran Salomon
[Portre lo paz 32]
Dominasyon Zezi pou bokou pli siperyer ki pour David ek Salomon dan diferan fason ki nou pa ni menm kapab mazinen!