En moman pour swazir

“Bondye ti kree zonm dan son resanblans, dan resanblans Bondye i ti kree li. I ti kree zonm ek fanm.”—Zenez 1:27.

SA I en parol ki nou byen familye avek. I trouve lo bann premye paz dan Labib e i fer resorti enn parmi bann keksoz merveye ki Bondye in ‘fer zoli dan son letan.’ Sa ti arive kan i ti kree sa premye koup imen, Adan ek Ev. (Eklezyast 3:11) Konman zot Kreater, Zeova ti dir zot: “Fer zanfan e vin bokou, ranpli later e domin li. Annan kontrol lo bann pwason dan lanmer ek bann kreatir ki anvole dan lesyel ek tou sa ki vivan ki pe marse lo later.”—Zenez 1:28.

Dan sa parol ki i ti dir avek sa premye koup imen, Bondye ti fer zot konn son plan. Zot ti pou fer zanfan e pran swen avek later pour fer later antye vin en paradi kot zot ek zot bann zanfan ti pou reste. Bondye pa ti deside davans konbyen letan ki zot ti pou viv e zour spesifik ki zot ti pou mor. O kontrer, Bondye ti donn zot en lavenir merveye. Si zot ti’n fer en bon swa e kontinyen fer lavolonte Bondye zot ti pou’n kapab ganny sa vre lape ek lazwa pour touzour.

Zot pa ti fer en bon swa e sa in fer ki tou imen i vyeir e mor. Annefe, patrias Zob ti rekonnet: “Zonm, ki fanm in donn nesans, i viv en ptigin letan e son lavi i ranpli avek problenm.” (Zob 14:1) Kwa ki ti’n al mal?

Labib i eksplike: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in komet pese.” (Romen 5:12) Byensir, sa “sel zonm” ti Adan. I ti volonterman swazir pour dezobeir sa komann senp e kler ki Bondye ti’n donn li. (Zenez 2:17) Kan i ti fer sa swa, Adan ti perdi sa loportinite ki i ti annan pour viv dan en paradi lo later pour touzour. Sa ti osi fer son bann desandans perdi en leritaz presye e i ti pas malediksyon pese ek lanmor avek zot. I paret ki ti napa okenn lespwar? Eski vreman ti napa okenn lespwar?

En letan pour renouvle tou keksoz

Plizyer milye lannen pli tar, en psalmis ti ganny enspire pour ekrir: “Bann dimoun drwat pou posed later e zot pou reste lo la pour touzour.” (Psonm 37:29) Pour donn lasirans ki sa promes ki i ti fer dan Zarden Edenn pou ganny akonplir, Parol Bondye i dekrir dan en fason merveye sa ki Bondye pou fer byento: “I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” Apre Bondye li menm i dir: “Lala mon refer tou keksoz a-nef.”—Revelasyon 21:4, 5.

Vi ki i annan en letan fikse pour tou keksoz, kestyon ki nou kapab demande i: “Kan ki sa letan pour renouvle tou keksoz pou arive pour sa bann promes merveye ki Bondye in fer vin vre?” Bann Temwen Zeova ki’n pibliy sa magazin, pe fer zefor pour fer dimoun konnen ki nou pe viv dan sa letan ki Labib i apel “bann dernyen zour” e sa letan kot Bondye pou pran aksyon pour “refer tou keksoz a-nef” i pros. (2 Timote 3:1) Nou ankouraz ou pour egzamin sa ki Labib i dir e aprann konsernan sa lavenir merveye ki kapab vin pour ou. Nou osi ankouraz ou pour aksepte sa lenvitasyon: “Rod Zeova zot lepep kan i ankor kapab ganny trouve. Kriy li kan i ankor pre.” (Izai 55:6) Ou lavi ek ou lavenir pa’n ganny destinen me i dan ou lanmen!

[Portre lo paz 8]

“Lala mon refer tou keksoz a-nef”