Zob ti onor non Zeova
Zob ti onor non Zeova
“Ki non Zeova i kontinyen ganny beni.”—ZOB 1:21.
1. Lekel ki ti ekrir liv Zob e kan?
MOIZ ti annan apepre 40 an kan i ti sove Lezip e al reste Madyann pour sov lakoler Faraon. (Akt 7:23) Pandan letan ki i ti reste laba, i tre probab ki i ti tann koz konsernan leprev Zob, ki pa ti reste tro lwen dan pei Ouz. Plizyer lannen pli tar, kan Moiz ek nasyon Izrael ti pros avek Ouz ver lafen zot vwayaz dan dezer, Moiz ti’n kapab aprann keksoz konsernan bann dernyen lannen Zob. Dapre tradisyon Zwif, Moiz ti ekrir liv Zob en pe letan apre lanmor Zob.
2. Dan ki fason liv Zob i en lankourazman pour bann serviter Zeova dan nou letan?
2 Liv Zob i ranforsi lafwa bokou serviter Bondye dan nou letan. Dan ki fason? Sa resi i ed nou konpran bann levennman vreman enportan ki ti arive dan lesyel e met lanfaz lo sa kestyon prensipal ki ti ganny souleve lo drwa Bondye konman souvren iniversel. Sa resi lo Zob i aprofondi nou konnesans lo ki lentegrite i enplike e ed nou konpran akoz parler Zeova i permet ki son bann serviter i soufer. Deplis, liv Zob i idantifye Satan oubyen Dyab konman adverser prensipal Zeova e lennmi bann imen. Sa liv i osi montre ki bann imen enparfe parey Zob i kapab reste fidel avek Zeova malgre bann tes vreman difisil. Annou egzamin detrwa levennman ki ganny dekrir dan liv Zob.
Zob ti ganny teste avek Satan
3. Ki nou konnen lo Zob e akoz i ti en target pour Satan?
3 Zob ti en zonm ris e i ti annan en kantite lenfliyans lo lezot. I ti en patrias ki ti annan bann bon valer moral. I evidan ki i ti ganny byen respekte konman en konseye ki ti ed bann dimoun ki ti dan bezwen. Pli enportan ankor, Zob ti annan lakrent pour Bondye. Zob i ganny dekrir konman en zonm ki ti “prouve ki i ti san repros e drwat, annan lakrent pour Bondye e ki rezet sa ki mal.” I ti sa devosyon ki Zob ti annan anver Bondye ki ti fer li vin en target pour Satan, pa son larises ek lenfliyans.—Zob 1:1; 29:7-16; 31:1.
4. Ki si sa lentegrite?
4 Lentrodiksyon sa resi lo Zob i dekrir en rasanbleman dan lesyel kot bann lanz ti’n pran pozisyon devan Zeova. Satan osi ti la e i ti akiz Zob. (Lir Zob 1:6-11.) Menm si Satan ti mansyonn posesyon Zob, i ti santre son latansyon lo lentegrite Zob. Sa mo “lentegrite” i donn sa lide en dimoun ki drwat, san repros e san defo. Parey i ganny servi dan Labib, lentegrite bann imen i endik en devosyon konplet avek tou zot leker zis pour Zeova tousel.
5. Ki Satan ti dir lo Zob?
5 Satan ti dir ki ladorasyon ki Zob ti ofer Bondye ti zis pour son prop lentere e non pa akoz i ti annan lentegrite. Satan ti osi pretann ki Zob ti pou reste fidel avek Zeova osi lontan ki Bondye ti kontinyen rekonpans li e protez li. Pour reponn lakizasyon Satan, Zeova ti les Satan atak sa zonm fidel. Konman rezilta, zis dan en zour Zob ti aprann ki son bann zannimo ti’n ganny vole oubyen touye, son bann serviter ti’n ganny touye e son dis zanfan ti’n perdi zot lavi. (Zob 1:13-19) Eski Zob ti les latak Satan fer li perdi son lentegrite? Sa resi enspire i dekrir reaksyon Zob anver son maler: “Zeova li menm in donnen, e Zeova li menm in pran. Ki non Zeova i kontinyen ganny beni.”—Zob 1:21.
6. (a) Ki ti arive pandan en lot rasanbleman dan lesyel? (b) Lekel Satan ti annan antet kan i ti kestyonn lentegrite Zob anver Zeova?
6 Pli tar, i ti annan en lot rasanbleman dan lesyel. Ankor enn fwa, Satan ti akiz Zob par dir: “Lapo pour lapo e tou sa ki en zonm i annan i pou donnen pour son lavi. Pour en sanzman, silvouple, anvoy ou lanmen e tous ziska son lezo ek son laser e ou a vwar si i pa pou modi ou dan ou figir.” Remarke, Satan pa ti akiz zis Zob. Par dir: “Tou sa ki en zonm i annan i pou donnen pour son lavi,” Dyab ti pe kestyonn lentegrite tou bann “zonm” ki ador Zeova e pa zis Zob. Alor, Bondye ti les Satan frap Zob avek en maladi vreman terib. (Zob 2:1-8) Me pa se tou leprev ki Zob ti gannyen.
Leson nou aprann avek latitid Zob
7. Dan ki fason madanm Zob ek son bann viziter ti met presyon lo Zob?
7 O konmansman, madanm Zob ti soufer menm katastrof avek son msye. Lanmor son bann zanfan e pert finansyel lafanmir ti’n kapab tap li en kantite. I ti bezwen dan lapenn pour vwar son msye soufer avek en maladi vreman terib. I ti dir Zob: “Eski ou ankor pe gard ou lentegrite? Modi Bondye e mor!” Apre sa, Elifaz, Bildad ek Tsofar ti arive, sa trwa zonm ti sipoze vin rekonfort Zob. Plito, zot ti servi bann fo rezonnman e montre ki zot ti bann “konsolater ki donn plis problenm.” Par egzanp, Bildad ti dir ki bann zanfan Zob ti’n fer sa ki mal e ki zot ti merite ganny sa ki ti’n ariv zot. Elifaz ti dir ki Zob ti pe ganny en pinisyon pour bann pese ki i ti’n komet dan lepase. I ti menm kestyonnen si bann ki gard zot lentegrite i annan okenn valer devan Bondye! (Zob 2:9, 11; 4:8; 8:4; 16:2; 22:2, 3) Anba sa bann gro presyon, Zob ti gard son lentegrite. I vre, i ti mal ler i ti “deklare ki i pli drwat plito ki Bondye.” (Zob 32:2) Kantmenm sa, i ti reste fidel dan tou son leprev.
8. Ki bon legzanp Eliou in kit pour bann konseye dan nou letan?
8 Answit, nou lir konsernan Eliou ki ti osi vin vizit Zob. Eliou ti premyerman ekout largiman ki Zob ek son trwa konpanyon ti prezant devan li. Menm si i ti pli zenn ki sa kat lezot zonm, Eliou ti demontre plis lasazes. I ti adres Zob avek respe par servi son non. Eliou ti felisit Zob akoz i ti pe viv en lavi drwat. Me i ti osi dir ki Zob ti pe konsantre tro bokou lo li menm pour montre ki i ti san defo. Apre sa, Eliou ti asir Zob ki servi Zeova fidelman i touzour vo lapenn. (Lir Zob 36:1, 11.) Pa sa i en bon legzanp pour tou bann ki bezwen donn konsey dan nou letan! Eliou ti demontre pasyans, i ti ekout atantivman, felisite ler i ti posib e donn bann konsey ankourazan.—Zob 32:6; 33:32.
9. Ki mannyer Zeova ti ed Zob?
9 Finalman, Zob ti ganny en vizit ekstraordiner! Sa resi i dir: “Zeova ti reponn Zob atraver en gro tanpet divan.” Par servi en seri kestyon, Zeova ti zantiman e seryezman ed Zob koriz son fason panse. Zob ti volonterman aksepte koreksyon e admet: “Mon’n vin en dimoun ki napa bokou lenportans . . . Mon vreman repantir dan lapousyer ek lasann.” Apre ki Zeova ti’n koz avek Zob, I ti eksprim Son lakoler avek sa trwa konpanyon parski zot pa ti’n koz “sa ki vre.” Zob ti bezwen priy pour zot. Apre sa, “Zeova li menm ti tir Zob dan sa sityasyon kan i ti priy pour son bann konpanyon e Zeova ti konmans donn an plis tou sa ki ti pour Zob, i ti double lakantite.”—Zob 38:1; 40:4; 42:6-10.
Ziska ki degre nou kontan Zeova?
10. Akoz Zeova pa ti inyor Satan ouswa detrir li?
10 Zeova i Kreater liniver e Souvren tou kreasyon. Akoz i pa ti zis inyor lakizasyon Dyab? Bondye ti konnen ki inyor Satan oubyen detrir li pa ti pou reponn sa kestyon ki ti’n ganny souleve. Dyab ti’n dir ki Zob, en serviter remarkab Zeova, pa ti pou reste fidel si i ti perdi son larises. Zob ti reste fidel malgre sa tes. Apre sa, Satan ti dir ki imen ti pou vir ledo avek Bondye si i soufer fizikman. Zob ti soufer me i pa ti perdi son lentegrite. Alor, Satan ti ganny prouve en manter dan ka sa zonm fidel menm si i ti enparfe. Me ki nou pou dir lo lezot adorater Bondye?
11. Ki mannyer Zezi ti donn en larepons konplet pour lakizasyon Satan?
11 Anfet, sak serviter Bondye ki gard son lentegrite anba nenport leprev ki Satan i anmenn lo li, i montre ki dan son ka personnel, lakizasyon sa lennmi ki napa okenn pitye, i fo. Zezi ti vin lo later e donn en larepons konplet pour lakizasyon Satan. Zezi ti en zonm parfe, zis parey nou premye papa Adan. Fidelite Zezi ziska lanmor i montre klerman ki Satan i en manter e son bann lakizasyon i fo.—Rev. 12:10.
12. Ki loportinite ek responsabilite sak serviter Zeova i annan?
12 Toudmenm, Satan i ankor pe kontinyen teste bann adorater Zeova. Nou tou nou annan sa loportinite ek responsabilite pour demontre atraver nou lentegrite ki nou servi Zeova akoz nou kontan li e pa pour bann rezon egois. Ki mannyer nou vwar sa responsabilite? Nou vwar li konman en privilez pour reste fidel avek Zeova. I osi rekonfort nou pour konnen ki Zeova i donn nou lafors pour andire e zis parey i ti fer dan ka Zob, I etablir limit pour bann leprev ki nou rankontre.—1 Kor. 10:13.
Satan, en adverser agresif e en aposta
13. Ki detay liv Zob i revele lo Satan?
13 Lekritir Ebre i donn detay lo move rol ki Satan i annan pour kestyonn Zeova e diriz bann imen ver en move semen. Dan Lekritir Grek Kretyen, nou trouv plis lenformasyon konsernan lopozisyon Satan anver Zeova e dan liv Revelasyon nou aprann konsernan souvrennte Zeova ki pou ganny zistifye e osi destriksyon final Satan. Liv Zob i agrandi nou konnesans lo latitid rebel Satan. Satan ti prezan dan sa rasanbleman, pa akoz i ti annan lentansyon loue Zeova. Dyab ti annan en latitid rize ek en move lentansyon. Apre ki i ti’n akiz Zob e ganny permisyon pour teste li, “Satan ti sorti devan Zeova.”—Zob 1:12; 2:7.
14. Ki ti latitid Satan anver Zob?
14 Alor, liv Zob i idantifye Satan konman en lennmi ki napa okenn pitye pour bann imen. En serten kantite letan ti pase ant sa rasanbleman dan Zob 1:6 ek sa enn ki ganny dekrir dan Zob 2:1, kot pandan sa moman Zob ti ganny teste dan en fason kriyel. Fidelite Zob ti donn Zeova sa sans pour dir avek Satan: “[Zob] i ankor pe reste ferm avek son lentegrite kantmenm ou’n pous mwan pour anval li san okenn rezon.” Me Satan pa ti admet ki son lakizasyon ti’n ganny prouve fo. O kontrer, i ti demande ki Zob i ganny ankor en lot tes sever. Sa i montre ki Dyab ti teste Zob ler i ti annan bokou e osi ler i ti napa bokou. I kler ki Satan napa okenn konpasyon pour bann ki dan bezwen ouswa pour viktim en maler. I ay bann dimoun ki annan lentegrite. (Zob 2:3-5) Toudmenm, fidelite Zob ti montre ki Satan i en manter.
15. Ki bann aposta dan nou letan i annan an komen avek Satan?
15 Satan ti premye kreatir pour vin aposta. Bann aposta dan nou letan i annan menm karakteristik avek Dyab. I kapab ki zot lespri in ganny anpwazonnen avek en latitid kontan kritike e zot fer sa anver bann manm dan kongregasyon, bann ansyen ouswa Konsey Direkter. Serten aposta i opoz litilizasyon non Bondye, Zeova. Zot pa enterese pour aprann lo Zeova ouswa servi li. Parey zot papa Satan, bann aposta i target bann dimoun ki annan lentegrite. (Zan 8:44) I pa drol alor ki bann serviter Zeova i evit tou kontak avek zot!—2 Zan 10, 11.
Zob ti onor non Zeova
16. Ki latitid Zob ti annan anver Zeova?
16 Zob ti servi e loue non Zeova. Menm ler i ti trouble avek nouvel konsernan lanmor son bann zanfan, Zob pa ti dir nanryen mal lo Bondye. Menm si Zob ti krwar Bondye ki ti’n fer li perdi tou keksoz, toudmenm i ti onor non Zeova. Dan enn son parol Zob ti dir: “Gete! Lakrent pour Zeova, sanmenm sa lasazes e detourn kont lemal, i konprenezon.”—Zob 28:28.
17. Kwa ki ti ed Zob gard son lentegrite?
17 Kwa ki ti ed Zob gard son lentegrite? I kler ki avan maler ti arive, i ti’n deza devlop en relasyon pros avek Zeova. Menm si nou napa okenn levidans ki montre ki Zob ti konnen ki Satan ti’n fer en lakizasyon kont Zeova, Zob ti determinen pour reste fidel. I ti dir: “Ziska mon lanmor mon pa pou perdi mon lentegrite!” (Zob 27:5) Ki mannyer Zob ti devlop sa relasyon pros? San dout, i ti vreman apresye sa ki i ti’n tande konsernan lafason ki Bondye ti azir avek son bann fanmir dan lwen Abraam, Izaak ek Zakob. Osi, par obzerv kreasyon, Zob ti kapab rekonnet plizyer kalite Zeova.—Lir Zob 12:7-9, 13, 16.
18. (a) Ki mannyer Zob ti demontre son devosyon pour Zeova? (b) Dan ki fason nou imit bon legzanp Zob?
18 Sa ki Zob ti aprann ti fer li devlop sa dezir pour fer plezir Zeova. Zob ti regilyerman ofer sakrifis zis an ka son fanmir ti’n kapab fer en keksoz ki pa ti fer plezir Bondye ouswa zot ti’n “modi Bondye dan zot leker.” (Zob 1:5) Menm ler i ti pe ganny teste dan en fason terib, Zob ti kontinyen dir bann parol pozitif lo Zeova. (Zob 10:12) Pa sa i en bon legzanp! Nou osi nou devret pran konnesans egzakt lo Zeova ek son plan. Konsernan bann aktivite spirityel, nou annan bann bon routin parey etidye Labib, asiste renyon, lapriyer ek predikasyon sa bon nouvel. Deplis nou fer tou sa ki dan nou pouvwar pour fer konnen non Zeova. Zis parey lentegrite Zob ti fer plezir Zeova, lentegrite bann serviter Bondye dan nou letan i fer leker Zeova rezwir. Sa size pou ganny diskite dan lot lartik.
Eski ou rapel?
• Akoz Zob ti atir latansyon Satan?
• Ki tes Zob ti gannyen e ki mannyer i ti reazir?
• Kwa ki pou ed nou gard nou lentegrite parey Zob?
• Ki nou aprann lo Satan dan liv Zob?
[Kestyon]
[Portre lo paz 12]
Dan ki sirkonstans ou lentegrite i kapab ganny teste?