2 Ganny en konnesans egzakt lo Bondye

“Lavi eternel . . . savedir ki zot konn ou konman sel vre Bondye, ek Zezi-Kri ki ou’n anvoye.”—Zan 17:2, 3.

KI SA DEFI? Serten dimoun i dir ki Bondye pa egziste. Lezot i krwar ki Bondye i en lafors pwisan ki napa santiman. Bann dimoun ki krwar i egziste, i ansenny bann lansennyman kontradiktwar lo sa ki Bondye i vreman ete e bann kalite ki i annan.

KI MANNYER OU KAPAB SIRMONT SA DEFI? En fason pour konn Bondye i kan nou obzerv bann keksoz ki i’n kree. Zapot Pol ti dir: “Depi ki [Bondye] in kre lemonn son bann kalite envizib, setadir, son pisans eternel ek son natir konman Bondye in ganny revele par bann keksoz ki in fer.” (Romen 1:20) Kan nou obzerv kreasyon atantivman, nou kapab aprann plis konsernan lasazes ek pouvwar ki nou Kreater i annan.—Psonm 104:24; Izai 40:26.

 Parkont, pour konn personnalite Bondye, sak dimoun i bezwen ouver Labib, Parol Bondye, e egzaminen pour li menm ki i dir. Pa les lezot dir ou ki pour krwar. O kontrer, swiv sa konsey Labib: “Pa swiv bann koutim sa monn konmela me les Bondye transform zot par en sanzman konplet dan zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2, nou ki’n met an italik.) Par egzanp, egzamin sa bann laverite swivan ki Labib i revele lo Bondye.

Bondye i annan en non. Non Bondye i orizinalman aparet plizyer milye fwa dan Labib antye. Plizyer tradiksyon i met sa non dan Psonm 83:18, ki dir: “Ki zonm i kapab konnen ki ou, ki ou tousel ou non i Zeova, ou pli o lo tou later.”—King James Version.

Zeova i annan santiman e aksyon bann imen i annan en lefe lo son santiman. Apre ki Zeova ti sov bann Izraelit dan lesklavaz Lezip, parfwa zot ti inyor son bon konsey. Zot ti rebele e sa ti fer li “tris.” Zot aksyon “ti fer soufer Sen Izrael.”—Psonm 78:40, 41.

Zeova i enterese avek sakenn de nou. Kan i ti pe koz avek son bann disip, Zezi ti dir: “Eski de pti sren pa i vann pour en sou? Me en sel pa tonm ater san lavolonte zot Papa, Me menm, bann bren seve lo zot latet in konte. Alor pa bezwen per, zot vo bokou plis ki en kantite sren!”—Matye 10:29-31.

Bondye pa prefer en ras oubyen en kiltir plis ki en lot. Zapot Pol ti dir avek bann Grek, Atenn, ki “apartir en sel zonm [Bondye in] kree tou bann nasyon dan lemonn e etabli zot lo later antye.” I’n osi dir ki Bondye “pa lwen avek sakenn parmi nou.” (Akt 17:26, 27) Zapot Pyer ti dir: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.

KI SA REKONPANS? Serten dimoun i “ranpli avek motivasyon pour Bondye, me zot motivasyon pa baze lo en vre konnesans.” (Romen 10:2) Si ou konnen ki Labib i vreman dir lo Bondye, ou pa pou ganny anbete e ou pou kapab “apros avek Bondye.”—Zak 4:8.

Pour plis lenformasyon, vwar sapit 1, “Laverite lo Bondye” dan liv Ki Labib i vreman dir? *

[Not anba lo paz 6]

[Portre lo paz 6]

En fason pour konn Bondye i kan nou obzerv bann keksoz ki i’n kree