Demontre devouman pour lakaz Zeova
Demontre devouman pour lakaz Zeova
“Lanmour [oubyen “devouman,” NW] pour ou lakaz, pou brile dan mwan.”—ZAN 2:17.
1, 2. Ki Zezi ti fer kot tanp lannen 30 N.L., e akoz?
MAZIN sa senn dan ou lespri. I letan Lapak lannen 30 N.L. Sis mwan pli boner, Zezi ti’n konmans son minister lo later. Aprezan, i pran son semen pour al Zerizalenm. Laba kot tanp dan Lakour bann nasyon etranze, Zezi i vwar ‘bann vander bef, mouton ek pizon, ek bann sanzer larzan ki pe asiz la kot zot latab.’ I lev anler en fwet ki’n ganny fer avek lakord, i pous bann zannimo deor e bann marsan i swiv zot par deryer. Zezi i osi vid larzan bann sanzer larzan e savir zot latab. I ordonn bann ki pe vann pizon pour pran sa ki zot annan e ale.—Zan 2:13-16.
2 Bann aksyon Zezi i montre ki i annan en gran lentere pour tanp. I ordonnen: “Arete fer lakaz mon Papa en bazar.” Anmezir ki zot get tou sa ki pe pase, bann disip Zezi i rapel sa parol ki psalmis David ti’n ekrir plizyer syek avan ki dir: “Lanmour [oubyen “devouman,” NW] pour ou lakaz pou brile dan mwan.”—Zan 2:16, 17; Ps. 69:9.
3. (a) Ki si sa devouman? (b) Ki kestyon nou kapab demann nou lekor?
3 Devouman ek konsern pour lakaz son Papa ki ti pous Zezi pour azir dan sa fason. Sa mo Grek ki’n ganny tradwir devouman i vedir “en gran dezir ek lentere pour fer en keksoz.” Dan sa venteentyenm syek ki nou pe viv ladan, plis ki set milyon Kretyen i demontre en gran konsern pour lakaz Bondye. Personnelman nou kapab demande: ‘Ki mannyer mon kapab ogmant mon devouman pour lakaz Zeova?’ Pour ed nou reponn sa, annou premyerman egzaminen kwa sa lakaz Zeova ozordi. Apre nou pou egzamin legzanp bann zonm fidel dan Labib ki ti demontre devouman pour lakaz Zeova. Zot legzanp in ganny ekrir “pour nou lansennyman” e i kapab motiv nou pour annan en pli gran devouman ankor.—Rom. 15:4.
Lakaz Bondye dan letan lontan e konmela
4. Sa tanp ki Salomon ti konstrir ti ganny servi pour kwa?
4 Dan ansyen Izrael, tanp Zerizalenm ti lakaz Bondye. Byensir, Zeova pa ti reste laba literalman. I ti dir: “Lesyel i mon tronn e later i en stoul pour mon lipye. Alor, kote sa lakaz ki zot kapab batir pour mwan i ete e kote sa landrwa pour mwan repoze i ete?” (Iza. 66:1) Toudmenm, sa tanp ki ti ganny konstrir pandan renny Salomon ti ganny servi konman sant ladorasyon pour Zeova, kot bann lapriyer ti ganny ofer.—1 Rwa. 8:27-30.
5. Ki ladorasyon kot tanp Salomon i reprezante pour nou letan?
5 Ozordi lakaz Zeova pa en batiman Zerizalenm oubyen en lot landrwa. O kontrer, i sa laranzman ki’n ganny fer pour nou kapab apros li pour ador li lo baz sakrifis Kris. Tou bann serviter Bondye ki fidel lo later i ini ansanm pour ador Zeova dan sa tanp senbolik.—Iza. 60:4, 8, 13; Akt 17:24; Ebr. 8:5; 9:24.
6. Lekel bann lerwa Zida ki ti demontre en devouman remarkab pour vre ladorasyon?
6 Apre ki Izrael ti’n ganny divize lannen 997 A.N.L., 4 parmi sa 19 lerwa ki ti renny lo Zida dan rwayonm sid ti demontre en devouman remarkab pour vre ladorasyon. Sa ti Aza, Yeosafat, Izkiya ek Yosiya. Ki leson enportan nou kapab aprann avek zot legzanp?
Servis avek en leker konplet i anmenn benediksyon
7, 8. (a) Ki kalite servis Zeova i beni? (b) Ki legzanp lavertisman nou kapab aprann avek Lerwa Aza?
7 Pandan renny Lerwa Aza, Zeova ti demann bann profet pour gid Son pep pour reste fidel avek li. Par egzanp, Labib i dir nou ki Aza ti ekout profet Azarya, garson Obed. (Lir 2 Kronik 15:1-8. *) Sanzman Aza ti fer pep Zida ini e en gran group dimoun sorti dan rwayonm Izrael ti zwenn ansanm dan en gran rasanbleman Zerizalenm. Ansanm zot ti eksprim zot determinasyon pour ador Zeova fidelman. Nou lir: “Alor, avek en lavwa byen for zot ti fer serman avek Zeova e dan lazwa zot ti kriye, avek tronpet e avek korn. Zida an antye ti kontan lo sa ki zot ti’n fer serman parski zot ti’n fer sa serman avek tou zot leker, e zot ti’n rod li avek en satisfaksyon konplet lo zot par e li i ti les zot retrouv li; e Zeova ti kontinyen donn zot repo partou kote.” (2 Kron. 15:9-15) Pareyman, Zeova pou sirman beni nou si nou servi li avek tou nou leker.—Mark 12:30.
8 Malerezman, pli tar Aza ti rezet koreksyon ki i ti gannyen avek Anani en vizyoner. (2 Kron. 16:7-10) Ki mannyer nou reazir ler Zeova i donn nou konsey ek gidans atraver bann ansyen dan kongregasyon? Eski nou pare pour pran aker zot konsey baze lo Lekritir e evite tonm dan sa latrap pour rezet konsey?
9. Ki menas Yeosafat ek Zida ti fer fas avek e ki mannyer zot ti reazir?
9 Yeosafat ti renny konman lerwa lo Zida pandan dizyenm syek A.N.L. Ansanm avek Zida an antye, zot ti fer fas avek bann menas sorti kot larme Amonn, Moab ek bann zabitan dan bann montanny Seir ki ti’n ralye ansanm. Menm si i ti per, ki sa lerwa ti fer? Ansanm avek son bann zonm, ensi ki zot madanm ek zanfan, zot ti rasanble kot lakaz Zeova pour zot priye. (Lir 2 Kronik 20:3-6. *) Anliny avek parol ki Salomon ti’n dir pli boner kot dedikasyon tanp, Yeosafat ti sipliy Zeova: “O nou Bondye, eski ou pa pou egzekit zizman lo zot? Akoz nou napa lafors dan nou kont sa gran lafoul ki pe vin kont nou; e nou menm nou pa konnen ki nou pou fer, me nou lizye i ver ou.” (2 Kron. 20:12, 13) Apre ki Yeosafat ti’n priye “dan milye kongregasyon,” lespri sen Zeova ti pous Yaazyel, en Levit, pour dir bann parol rekonfortan ki ti donn lepep konfyans.—Lir 2 Kronik 20:14-17. *
10. (a) Ki mannyer Yeosafat ek Zida ti ganny lenstriksyon? (b) Ki mannyer nou kapab montre ki nou apresye lenstriksyon ki Zeova i donn nou ozordi?
10 Wi, sa letan, Yeosafat ek rwayonm Zida ti ganny bann lenstriksyon avek Zeova atraver Yaazyel. Ozordi, nou ganny rekonfor ek lenstriksyon atraver lesklav fidel e pridan. Sirman, nou touzour anvi korpere e demontre respe pour bann ansyen dan kongregasyon, ki travay dir pour pran swen avek nou e ki enplimant bann lenstriksyon sorti kot “lesklav fidel e pridan.”—Mat. 24:45, NW; 1 Tesa. 5:12, 13.
11, 12. Ki leson nou kapab aprann avek sa ki ti ariv Yeosafat ek Zida?
11 Zis parey Yeosafat ek son pep ti rasanble ansanm pour rod gidans Zeova, annou pa neglize pour asiste regilyerman bann renyon kongregasyon ansanm avek nou bann frer ek ser Kretyen. Si parfwa nou vwar nou dan bann sityasyon difisil kot nou pa ni konnen ki pour fer, annou swiv bon legzanp ki Yeosafat ek pep Zida in kite e tourn ver Zeova dan lapriyer avek en konfyans total dan Li. (Prov. 3:5, 6; Fili. 4:6, 7) Menm si nou lwen avek lezot, nou lapriyer avek Zeova pou ini nou ansanm avek “tou [nou] bann frer dan lemonn antye.”—1 Pyer 5:9.
12 Yeosafat ek son pep ti swiv lenstriksyon ki Bondye ti donn zot atraver Yaazyel. Avek ki rezilta? Zot ti ranport laviktwar dan sa batay e zot ti retourn Zerizalenm “avek lazwa” e “avek lenstriman lakord, larp ek tronpet kot lakaz Zeova.” (2 Kron. 20:27, 28) Pareyman, nou respekte bann lenstriksyon ki Zeova i donn nou atraver bann ki i servi e zwenn ansanm avek zot pour loue li.
Pran byen swen avek landrwa kot nou rasanble
13. Ki travay Izkiya ti konmans fer o konmansman son renny?
13 Dan premye mwan son renny, Izkiya ti demontre son devouman pour ladorasyon Zeova par reouver tanp e repar li. I ti rasanble bann pret ek Levit pour netway lakaz Bondye. Zot ti fer sa dan 16 zour. (Lir 2 Kronik 29:16-18. *) Sa zefor i fer nou rapel sa travay pour pran swen ek reparasyon ki ganny fer pour kit nou landrwa kot nou rasanble dan en bon leta ki reflekte nou devouman pour ador Zeova. Eski pa ou’n deza tann bann leksperyans kot bann dimoun in enpresyonnen par devouman bann frer ek ser ki partisip dan sa travay? Wi, zot zefor i anmenn en kantite louanz pour Zeova.
14, 15. Ki travay ki pe anmenn en kantite louanz pour Zeova ozordi? Donn legzanp.
14 Dan en lavil dan nor Langleter, en zonm pa ti dakor avek travay renovasyon ki ti devret ganny fer lo en Lasal Rwayonm ki baliz avek son propriyete. Bann frer laba ti reazir zantiman. Apre ki zot ti’n remarke ki sa miray ki ant Lasal Rwayonm ek propriyete sa vwazen ti demann reparasyon, bann frer ti ofer pour fer sa travay gratwitman. Zot ti travay dir e anfet, zot ti rekonstrir miray preski an antye. Zot ti fer sa travay sitan byen ki sa vwazen ti sanz son latitid. Aprezan, i ede pour zet en koudey lo propriyete Lasal Rwayonm.
15 Pep Zeova i partisip dan en travay konstriksyon mondyal. Bann volonter lokalman i pare pour zwenn ansanm avek bann serviter enternasyonal aplentan pour konstrir bann Lasal Rwayonm, Lasal Lasanble ek Betel. Sam i en enzenyer byen talante dan sofaz ek erkonn. Ansanm avek son madanm Ruth, zot in vwayaz dan plizyer pei dan Lerop ek Lafrik pour ede lo bann proze konstriksyon. Nenport landrwa zot ale, zot kontan pour al prese ansanm avek manm bann kongregasyon lokal. Sam i eksplike kwa ki ti pous li pour partisip dan en tel proze enternasyonal: “Lankourazman avek bann ki’n servi dan Betel, swa isi ouswa dan pei deor. Zot devouman ek lazwa ti vreman pous mwan pour pran sa servis.”
Obeir lenstriksyon Bondye
16, 17. Dan ki aktivite spesyal pep Bondye ti eksite pour partisip ladan e avek ki rezilta?
16 Apard reparasyon tanp, Izkiya ti remet an plas selebrasyon Lapak tou le-z-an ki Zeova ti’n donn lord pour fer. (Lir 2 Kronik 30:1, 4, 5. *) Izkiya ek bann zabitan Zerizalenm ti envit nasyon an antye, menm bann nasyon dan rwayonm nor pour asiste. Bann mesaze ti al partou avek bann let lenvitasyon.—2 Kron. 30:6-9.
17 Tou resaman, nou’n partisip dan en travay preski parey. Nou’n servi bann zoli lenvitasyon byen enprimen pour envit bann dimoun dan nou teritwar pour zwenn ansanm avek nou pour komemor Repa Senyer ki en lord sorti kot Zezi. (Lik 22:19, 20) Nou ti ganny lenstriksyon dan Renyon Servis e nou’n partisip avek devouman dan sa travay. Pa Zeova in vreman beni nou zefor! Lannen pase, apepre set milyon nou an tou ti distribye bann lenvitasyon e en total 17,790,631 dimoun ti asiste!
18. Akoz devouman pour vre ladorasyon i vreman enportan pour ou?
18 Sa parol ti ganny dir lo Izkiya: “I ti met son konfyans dan Zeova Bondye Izrael; e apre li ti napa personn parey li parmi bann lerwa Zida, menm parmi bann ki ti la avan li. I ti reste atase avek Zeova. I pa ti aret swiv li, i ti kontinyen obeir son bann komannman, sa bann ki Zeova ti’n konmann Moiz.” (2 Rwa. 18:5, 6) Annou swiv son legzanp. Nou devouman pour lakaz Bondye pou ed nou “reste atase avek Zeova” avek lespwar pour ganny lavi eternel antet.—Det. 30:16.
Swiv lenstriksyon deswit
19. Ki zefor an plis ki ganny mete pandan letan Memoryal?
19 Ler Yosiya ti lerwa, li osi i ti fer laranzman pour ki Lapak i ganny selebre e i ti fer bann gran preparasyon pour sa levennman. (2 Rwa. 23:21-23; 2 Kron. 35:1-19) Nou osi nou fer sir ki nou byen prepare pour nou bann zour lasanble distrik, rezyonal e spesyal, ensi ki pour Memoryal. Bann frer ek ser dan serten pei i menm riske zot lavi pour rasanble ansanm pour komemor lanmor Kris. Bann ansyen devoue i fer sir ki personn dan kongregasyon pa ganny neglize. Bann ki aze e andikape i resevwar led pour zot prezan pour sa lokazyon.
20. (a) Ki ti arive pandan renny Lerwa Yosiya e ki mannyer i ti reazir? (b) Ki leson nou anvi pran aker?
20 Pandan travay restorasyon ki Lerwa Yosiya ti organize, Gran Pret Ilkiya ti “trouv liv lalwa Zeova ki Moiz ti’n ekrir.” I ti donn sekreter lerwa ki ti apel Safann e li an retour i ti konmans lir sa ki ladan avek Yosiya. (Lir 2 Kronik 34:14-18. *) Ki lefe sa ti annan? Deswit lerwa ti desir son lenz dan sagrinasyon e i ti donn lord bann zonm pour koz avek Zeova. Atraver Oulda, en madanm ki ti en profet, Bondye ti pas en mesaz ki ti kondann serten pratik relizye ki ti pe ganny fer Zida. Me, bon zefor ki Yosiya ti pe fer pour retir bann ladorasyon zidol ti ganny remarke e i ti ganny laprouvasyon Zeova menm si i ti annan bann maler ki ti’n ganny predir lo sa nasyon an antye. (2 Kron. 34:19-28) Ki nou kapab aprann avek sa? Sirman nou annan sa menm dezir avek Yosiya. Nou anvi byen reazir deswit anver lenstriksyon Zeova e pran aker bann legzanp lavertisman konsernan sa ki kapab arive si nou les bann aposta ek zot enfidelite enterfer avek nou ladorasyon. Nou kapab asire ki Zeova pou not avek laprouvasyon nou devouman pour vre ladorasyon, zis parey i ti fer dan ka Yosiya.
21, 22. (a) Akoz nou devret demontre devouman pour lakaz Zeova? (b) Ki nou pou egzaminen dan lot lartik?
21 Aza, Yeosafat, Izkiya ek Yosiya, sa kat lerwa Zida in kit bann bon legzanp pour nou an rapor avek devouman pour lakaz Bondye ek ladorasyon. Pareyman, nou devouman i devret pous nou pour annan konfyans dan Zeova e fer tou pour son ladorasyon. I sirman saz e i en sours lazwa pour obeir lenstriksyon sorti kot Bondye e byen aksepte sa swen ranpli avek lanmour ek koreksyon ki nou gannyen atraver kongregasyon ek bann ansyen.
22 Lot lartik pou atir nou latansyon lo devouman pour predikasyon e i pou ankouraz bann zenn pour servi zot Papa lanmour avek devouman. Nou pou osi egzaminen ki mannyer nou kapab evit enn parmi bann pli move lenfliyans Satan. Anmezir nou swiv sa bann rapel sorti kot Zeova, nou pou swiv legzanp Zezi, Garson Zeova, ki konsernan li ti ganny dir: “En gran devouman pour ou lakaz i brile dan mwan.”—Ps. 69:9; 119:111, 129; 1 Pyer 2:21.
[Not anba lo paz]
^ par. 7 2 Kronik 15:8: “Osito ki Aza ti tann sa bann parol ek profesi Obed sa profet, i ti pran kouraz e konmans fer disparet tou bann keksoz repinyan antye dan Zida ek Benzamen, ensi ki dan bann lavil ki i ti’n kaptire dan rezyon montanny Efraim e kontinyen konstrir lotel Zeova ki ti devan larantre [lakaz] Zeova.”
^ par. 9 2 Kronik 20:3, 4: “Alor Yeosafat ti per e i ti tourn son figir pour rod Zeova. I ti dir Zida antye zennen. Finalman bann ki ti Zida ti rasanble pour demann Zeova kestyon. Wi, dimoun sorti dan tou bann lavil Zida ti vini pour koz avek Zeova.”
^ par. 9 2 Kronik 20:15: “Alor i ti dir: ‘Ekout byen, tou Zida, bann zabitan Zerizalenm ensi ki Lerwa Yeosafat! La sa ki Zeova in dir zot, “Pa bezwen per e pa les lafreyer pran zot akoz sa gran lafoul, parski sa batay i pa pour zot, me i pour Bondye.”’”
^ par. 13 2 Kronik 29:16-18: “Bann pret ti antre anndan dan lakaz Zeova pour pirifye li e dan lakour lakaz Zeova zot ti retir tou lenpirte ki ti annan dan tanp Zeova. Apre bann Levit ti pran sa bann lenpirte e al anmenn zot an deor kot vale toransyel Kidronn. Alor zot ti konmans sa sanktifikasyon, premye zour premye mwan, e lo wityenm zour sa mwan, zot ti ariv devan larantre lakaz Zeova; pour ki zot sanktifye lakaz Zeova dan wit zour e lo sezyenm zour premye mwan zot ti fini. Apre sa, zot ti al anndan kot lerwa Izkiya e dir: ‘Nou’n pirifye lakaz Zeova an antye, lotel pour bann lofrann brile e tou son bann lekipman, latab avek dipen ki’n ganny mete enn lo lot ek tou son bann lekipman.’”
^ par. 16 2 Kronik 30:1, 4, 5: “Alor Izkiya ti anvoy bann mesaze dan Izrael ek Zida an antye; i ti menm ekrir let pour Efraim ek Manase, pour ki zot vin kot lakaz Zeova Zerizalenm, pour selebre Lapak pour Zeova, Bondye Izrael. Tou keksoz ti bon devan lizye lerwa e devan lizye tou ki ti’n rasanble. Alor zot ti deside pour fer pase en lapel atraver Izrael an antye, depi Ber-Seba ziska Dann, pour vini e selebre lapak Zerizalenm pour Zeova Bondye Izrael; akoz i pa ti en gran lafoul ki ti’n fer li dapre sa ki’n ganny ekrir.”
^ par. 20 2 Kronik 34:14-18: “Me pandan ki zot ti pe tir larzan ki ti’n ganny anmennen kot lakaz Zeova, Ilkiya ki ti en pret, ti trouv liv lalwa Zeova ki Moiz ti’n ekrir. Alor, Ilkiya ti reponn e dir Safann sa sekreter: ‘Sa liv lalwa li menm mon’n trouve dan lakaz Zeova.’ Apre sa Ilkiya ti donn Safann sa liv. Alor Safann ti anmenn sa liv kot lerwa e reponn lerwa ankor an dizan: ‘Tou sa ki’n ganny konfye dan lanmen ou bann serviter, zot pe deza fer. Zot ti devid larzan ki ti dan lakaz Zeova e donn bann zonm ki’n ganny apwente ek bann ki ti pe travay.’ Apre sa, Safann sa sekreter ti enform lerwa an dizan: ‘Pret Ilkiya in donn mwan en liv.’ E Safann ti konmans lir en bout devan lerwa.”
Eski ou rapel?
• Ki kalite servis Zeova i beni e akoz?
• Ki mannyer nou kapab demontre konfyans dan Zeova?
• Ki mannyer devouman i kapab ed nou pour obeir lenstriksyon sorti kot Bondye?
[Kestyon]
[Portre lo paz 15]
Ki mannyer Aza, Yeosafat, Izkiya ek Yosiya ti demontre devouman pour lakaz Zeova?