Reste devoue pour fer bann bon keksoz!
Reste devoue pour fer bann bon keksoz!
“Zezi-Kri, annefe, i’n donn son prop lavi pour nou, pour delivre nou dan tou mal e pirifye nou konman en pep ki apartenir a li, en pep zele pour fer dibyen.”—TIT 2:14.
1. Ki ti arive kot tanp kan Zezi ti arive le 10 Nizan lannen 33 N.L.?
I LE 10 Nizan, lannen 33 N.L., zis detrwa zour avan selebrasyon Lapak. En kantite adorater byen eksite in rasanble kot tanp Zerizalenm. Ki pou pase ler Zezi i arive? Matye, Mark ek Lik, trwa ekriven Levanzil i montre ki pour en dezyenm fwa Zezi i pous bann ki pe fer komers kot tanp. I savir latab bann ki pe sanz larzan ek sez bann ki pe vann pizon. (Mat. 21:12; Mark 11:15; Lik 19:45) Devouman Zezi pa ti’n afeblir depi ki i ti’n pran menm aksyon trwa-z-an pli boner.—Zan 2:13-17.
2, 3. Ki mannyer nou konnen ki Zezi pa ti devoue zis pour pirifye tanp?
2 Sa resi dan Matye i montre ki dan sa lokazyon Zezi pa ti zis devoue pour pirifye tanp. I ti osi geri sa ki ti aveg e bwate ki ti apros li laba. (Mat. 21:14) Sa ki Lik ti ekrir i refer avek lezot travay ki Zezi ti fer. “Toulezour Zezi ti vin ansennyen dan Tanp.” (Lik 19:47; 20:1) Alor, i kler ki Zezi ti osi devoue dan son minister an piblik.
3 Pli tar zapot Pol ti ekrir Tit e eksplik li ki Zezi ti’n “donn son prop lavi pour nou, pour delivre nou dan tou mal e pirifye nou konman en pep ki apartenir a li, en pep zele pour fer dibyen.” (Tit 2:14) Denozour, dan ki fason nou kapab “zele” oubyen devoue pour fer bann bon keksoz? Ki mannyer legzanp bann bon lerwa Zida i ankouraz nou?
Devoue pour prese e ansennyen
4, 5. Dan ki fason kat lerwa Zida ti montre ki zot ti devoue pour fer bann bon keksoz?
4 Zot tou le kat, Aza, Yeosafat, Izkiya ek Yosiya, ti fer plan e organiz bann kanpanny dan Zida pour elimin idolatri. Aza “ti retir bann lotel etranze ek bann oter e kas bann pilye sakre ek bann poto sakre.” (2 Kron. 14:3) Son devouman pour ladorasyon Zeova ti pous Yeosafat pour “retir bann oter ek poto sakre Zida.”—2 Kron. 17:6; 19:3. *
5 Apre sa set zour selebrasyon Lapak ki Izkiya ti organize Zerizalenm, “tou bann Izraelit ki ti laba ti al dan bann lavil Zida kot zot ti kas bann pilye sakre e fer tonbe bann poto sakre e detrir bann oter ek lotel dan Zida ek Benzamen an antye, e osi an Efraim ek Manase, ziska zot ti’n fini.” (2 Kron. 31:1) Yosiya ti vin lerwa kan i ti annan zis wit an. Lekritir i dir: “Pandan wityenm lannen son renny, menm ki i ti ankor en garson, i ti konmans rod Bondye David son zanset; e dan douzyenm lannen, i ti konmans retir bann oter, poto sakre, zidol skilpte ek stati dan Zida ek Zerizalenm.” (2 Kron. 34:3) Alor, tou le kat sa bann lerwa ti devoue pour fer bann bon keksoz.
6. Akoz nou minister i kapab ganny konpare avek kanpanny bann lerwa fidel Zida?
6 Pareyman ozordi nou partisip dan en travay ki ed bann dimoun pour libere avek fo lansennyman relizye, enkli bann pratik idolatri. Predikasyon kaz an kaz i permet nou zwenn tou sort kalite dimoun. (1 Tim. 2:4) En zenn fiy sorti Lazi i rapel ki mannyer son manman ti abitye fer bann lofrann devan plizyer zidol kot zot lakour. Apre ki i ti’n reflesir ki i pa posib pour tou sa bann zidol reprezant sa vre Bondye, sa fiy ti souvan priye pour li konnen lekel sa vre Bondye. Ler i ti al gete lekel ki ti’n tap laport kot li, i ti vwar de Temwen ki ti pare pour ed li aprann non personnel sa vre Bondye, Zeova. I ti vreman rekonesan pour aprann laverite lo bann zidol. Aprezan i pe demontre en devouman, ki merit felisitasyon, par partisip aktivman dan predikasyon e i pe ed lezot dimoun spirityelman.—Ps. 83:18; 115:4-8; 1 Zan 5:21.
7. Ki nou kapab fer pour imit sa bann ansenyan ki ti vwayaz atraver pei dan letan Yeosafat?
7 Kan nou partisip dan predikasyon kaz an kaz, eski nou kouver plennman nou teritwar? I enteresan pour note ki dan trwazyenm lannen son renny, Yeosafat ti anvoy rod senk prens, nef Levit ek de pret. I ti fer zot vwayaz dan tou bann lavil pour ansenny lepep lalwa Zeova. Zot kanpanny ti telman efikas ki bann dimoun dan lezot nasyon ti konmans annan lakrent pour Zeova. (Lir 2 Kronik 17:9, 10. *) Atraver bann vizit kot bann lakour dan diferan zour ek ler, nou kapab annan sa posibilite pour koz avek diferan dimoun kot en lakour.
8. Ki mannyer nou kapab fer plis dan predikasyon?
8 Bokou serviter Bondye dan nou letan in pare pour kit zot lakour volonterman e al servi kot i annan plis travay pour fer par bann Temwen devoue. Eski ou kapab fer parey? Serten parmi nou ki pa kapab al en lot landrwa i nobou esey pres avek bann dimoun dan nou rezyon ki koz en lot langaz. Vi ki i ti zwenn bokou dimoun diferan nasyonalite dan son teritwar, a laz 81 an Ron ti aprann dir enn de parol dan 32 langaz! Tou resaman i ti zwenn en koup Afriken lo semen e adres zot dan zot langaz natal, Yoruba. Zot ti demann Ron si i ti’n deza al Lafrik. Kan i ti reponn non, zot ti demann li ki mannyer i konn zot langaz. Sa ti donn li sa loportinite pour rann en bon temwannyaz. Zot ti pare pour aksepte serten magazin e kontan pour donn li zot ladres ki i ti pas avek en frer dan kongregasyon lokal pour ki sa koup ti pou kapab ganny en letid Labib.
9. Akoz i enportan pour lir dan Labib dan predikasyon? Donn en legzanp.
9 Bann ansenyan dan letan Yeosafat ki ti al partou dan pei ti annan “liv lalwa Zeova” avek zot. Dan lemonn antye, nou esey nou mye pour ansenny bann dimoun sa ki dan Labib, vi ki i Parol Bondye. Nou fer zefor spesyal pour montre lezot sa ki Labib i dir e nou servi li bokou dan nou minister. En met lakour ti eksplik Linda ki en Temwen, ki son msye ti’n ganny en latak e i ti bezwen son latansyon. Sa met lakour ti plere an dizan: “Mon pa konnen ki mon’n fer pour Bondye les sa ariv avek mwan.” Linda ti reponn: “Eski mon kapab asir ou en keksoz?” Apre sa, i ti lir sa parol dan Zak 1:13 e azoute: “Tou soufrans ki nou ek bann ki nou kontan i pas atraver, i pa en pinisyon sorti kot Bondye.” Apre sa, sa met lakour ti may Linda byen for. Linda i rekonnet: “Mon ti kapab rekonfort li par servi Labib. Parler bann verse ki nou lir dan Labib i sanmenm sa bann verse ki sa met lakour pa’n deza tande oparavan.” Apre sa konversasyon, en letid Labib regilye avek sa madanm ti konmanse.
Zenn ki servi Zeova avek devouman
10. Ki mannyer Yosiya i en bon legzanp pour bann zenn Kretyen ozordi?
10 Pour retourn lo legzanp Yosiya, nou remarke ki i ti pourswiv vre ladorasyon depi son zenes e kan i ti apepre 20-t-an i ti konmans sa gran kanpanny pour elimin idolatri. (Lir 2 Kronik 34:1-3. *) Bokou zenn ozordi i demontre menm devouman dan predikasyon.
11-13. Ki leson nou kapab aprann avek bann zenn ozordi ki pe servi Zeova avek devouman?
11 Hannah, ki reste Langleter ti annan 13 an e i ti pe aprann Franse kot lekol kan i ti tande ki en group ki koz Franse ti’n ganny formen dan en lavil pa tro lwen. Son papa ti dakor pour akonpanny li renyon laba. Aprezan i annan 18 an e Hannah pe rann temwannyaz an Franse avek bokou devouman konman en pionye ordiner. Eski ou osi ou kapab aprann en lot langaz e ed lezot dimoun pour aprann konn Zeova?
12 Rachel ti vreman kontan ler i ti get sa video Pursue Goals That Honor God. I ti fer komanter lo son fason panse avan ki i ti konmans servi Zeova an 1995. I ti dir: “Mon ti krwar mon ti pe fer byen dan laverite.” Apre i ti azoute: “Apre ki mon’n get sa dram, aprezan ki mon realize ki pour plizyer lannen mon ti pe zis fer bann keksoz debaz. Mon pou bezwen defann laverite, servi byen mon lespri e met bokou zefor dan mon servis ek letid personnel.” Konmela Rachel i remarke ki i pe servi Zeova avek plis devouman. Ki i’n eksperyanse finalman? I dir: “Mon relasyon avek Zeova in vin pli for. Mon lapriyer i fer plis sans, mon letid i pli oprofon e pli satisfezan e bann resi dan Labib i pli reel pour mwan. Konman rezilta, mon kontan prediksyon en kantite e mon ganny vre satisfaksyon ler mon vwar ki parol Zeova i rekonfort lezot.”
13 Luke i en zenn ki ti ganny ankouraze par en lot film, Young People Ask—What Will I Do With My Life? Apre ki i ti’n get sa film, Luke ti ekrir: “Mon santi mwan motive pour reegzamin sa ki mon pou fer avek mon lavi.” I ti admet: “Dan lepase, mon’n ganny bokou presyon pour premyerman rod sekirite finansyel atraver letid avanse e apre sa pour konsantre lo bann lobzektif spirityel. Sa kalite fason panse pa pou ed ou pour progrese spirityelman; o kontrer i afeblir ou.” Zenn frer ek ser, akoz ou pa egzamin byen ou lekor pour vwar si ou pa kapab servi sa ki ou’n aprann lekol pour fer plis dan minister, parey Hannah ti fer? Akoz ou pa imit legzanp Rachel par pourswiv avek devouman bann lobzektif ki vreman onor Bondye? Swiv legzanp Luke, evit bann danze ki kapab en latrap pour bokou zenn.
Ekout lavertisman avek devouman
14. Ki kalite ladorasyon Zeova i aksepte e akoz i vreman en defi pour fer li ozordi?
14 Pep Zeova i bezwen pir pour ki zot ladorasyon i akseptab devan li. Izai ti averti: “Ale, ale, sorti laba, pa tous nanryen enpir, sorti parmi li [Babilonn], gard zot lekor pir, zot ki pe anmenn bann lekipman dan lakaz Zeova.” (Iza. 52:11) Plizyer lannen avan ki Izai ti ekrir sa parol, Aza ki ti en bon lerwa ti organiz en kanpanny avek devouman pour retir limoralite Zida. (Lir 1 Lerwa 15:11-13. *) Plizyer syek pli tar, zapot Pol ti dir Tit ki par Zezi, son bann disip ti’n ganny pirifye pour ki zot kapab vin en “pep ki apartenir a li, en pep zele pour fer dibyen.” (Tit 2:14) Dan sa lemonn koronpi ozordi, i vreman difisil sirtou pour bann zenn reste pir moralman. Par egzanp, tou serviter Bondye, zenn konman vye, i bezwen lite pour evite ganny kontaminen par pornografi ki ganny ekspoze lo bann bord piblisite, lo lekran televizyon, dan bann film e sirtou lo Internet.
15. Kwa ki kapab ed nou pour devlop laenn pour sa ki mal?
15 Si nou devoue pour ekout lavertisman Zeova, sa i kapab ed nou pour devlop laenn pour sa ki mal. (Ps. 97:10; Rom. 12:9) En Kretyen ti dekrir pornografi konman “en lema vreman pwisan” e nou, nou bezwen rezet net son lafors ki kapab ris nou. Pour retir metal ki’n kole avek en lema, en dimoun pou bezwen annan en lafors ki pli for ki sa ki pe atir sa de keksoz ansanm. Pareyman, i demann bokou zefor pour evite ganny atire par pornografi. Ler nou konpran ki kantite move lefe pornografi i kapab annan lo nou, sa pou ed nou devlop laenn pour li. En frer ti fer en kantite zefor pour aret son labitid pour vizit bann sit pornografi lo Internet. I ti met son konpiter dan en landrwa kot lezot manm son fanmir ti pou kapab vwar. I ti osi determinen personnelman pour li pirifye son lekor e devoue pour fer bann bon keksoz. I ti menm pran en lot pa. Vi ki i ti bezwen servi Internet pour son biznes, i ti fer en rezolisyon pour ganny akse avek, zis ler son madanm ti avek li.
Valer en bon kondwit
16, 17. Ki lefe nou bon kondwit i kapab annan lo bann ki pe obzerv nou? Donn en legzanp.
16 Pa bann zenn garson ek fiy ki dan servis pour Zeova i vreman annan en bon kondwit! Pa sa i enpresyonn bann ki pe obzerve! (Lir 1 Pyer 2:12.) En dimoun ki ti vizit Betel Lonn ti sanz son pwennvi lo Temwen Zeova apre ki i ti’n travay en zour pour fer servis lo bann masin enprimen laba. Son madanm ki ti pe etidye Labib avek bann Temwen lokalman ti remarke ki son msye ti’n sanz son latitid. Oparavan i pa ti oule ki bann Temwen i vin kot son lakour. Me ler i ti retournen sorti travay kot Betel, sa zonm ti byen kontan sa bon tretman ki i ti’n gannyen laba ki i ti fer bann bon komanter. I ti dir ki personn pa servi bann move parol. Tou dimoun ti pasyan e latmosfer li menm ti enn ki anpe. I ti sirtou enpresyonnen ki bann zenn frer ek ser ti pe travay volonterman avek devouman san ganny en lapey pour zot letan ek lenerzi ki zot ti pe depanse pour ede pibliy sa bon nouvel.
17 Pareyman, bann frer ek ser ki anploye pour pran swen avek zot fanmir i bann bon travayer. (Kol. 3:23, 24) Souvan zot pa perdi zot louvraz akoz zot anplwayer i apresye zot bon kondwit e pa anvi perdi zot konman bann anplwaye.
18. Ki mannyer nou kapab devoue pour fer bann bon keksoz?
18 Nou konfyans dan Zeova, nou lobeisans anver son lenstriksyon ek swen ki nou pran avek nou landrwa ladorasyon i parmi bann fason ki nou montre ki nou annan devouman pour lakaz Zeova. Deplis, nou anvi partisip plennman pour pres lo Rwayonm e fer disip. Ki swa nou zenn ouswa aze, si nou fer tou sa ki nou kapab pour annan en bon standar ki relye avek ladorasyon, nou pou ganny bokou byenfe e nou pou kontinyen ganny rekonnet konman en pep ki devoue pour fer bann bon keksoz.—Tit 2: 14.
[Not anba lo paz]
^ par. 4 I paret ki Aza ti retir oter bann adorater fo bondye, me pa pour bann adorater Zeova, ouswa i kapab ki bann oter ti reganny konstrir pli tar ver lafen renny Aza e son garson Yeosafat ti retir zot.—1 Rwa. 15:14; 2 Kron. 15:17.
^ par. 7 2 Kronik 17:9, 10: “Zot ti konmans ansennyen Zida e avek zot i ti annan liv lalwa Zeova; zot ti fer letour dan tou bann lavil Zida e zot ti ansennyen parmi lepep. E lafreyer pour Zeova ti vin lo tou bann rwayonm dan pei ki ti otour Zida e zot pa ti lager avek Yeosafat.”
^ par. 10 2 Kronik 34:1-3: “Yosiya ti annan wit an kan i ti konmans rennyen e pandan tranteen an i ti rennyen Zerizalenm. I ti konmans fer sa ki byen devan lizye Zeova e mars dan semen David son zanset e i pa ti al ni dan kote drwat ni dan kote gos. Pandan wityenm lannen son renny, menm ki i ti ankor en garson, i ti konmans rod Bondye David son zanset; e dan douzyenm lannen, i ti konmans retir bann oter, poto sakre, zidol skilpte ek stati dan Zida ek Zerizalenm.”
^ par. 14 1 Lerwa 15:11-13: “Aza ti konmans fer sa ki drwat devan lizye Zeova, parey son zanset David. I ti fer bann zonm ki ti prostitye dan tanp disparet dan pei e i ti retir tou bann zidol sal ki son bann zanset ti’n fer. I ti menm retir son granmanman Maaka konman en dimoun enportan, akoz i ti’n fer en zidol terib pour poto sakre; apre Aza ti fer tonbe e bril sa zidol terib dan vale toransyel Kidronn.”
Ki ou’n aprann atraver bann legzanp dan Labib e bann dan nou letan konsernan
• konman pour demontre devouman atraver predikasyon ek lansennyman?
• konman bann zenn Kretyen i kapab devoue pour fer bann bon keksoz?
• konman pour debaras nou avek bann move labitid?
[Kestyon]
[Portre lo paz 18]
Eski ou servi Labib regilyerman dan ou minister?
[Portre lo paz 20]
Aprann koz en lot langaz kot lekol i kapab ed ou fer plis dan minister