Reziser fidel ek son Konsey Direkter

“Lekel sa lesklav fidel e onnet , ki son met, pou met ansarz son lakour pour donn lezot zot rasyon manze kan i ler”?—LIK 12:42.

1, 2. Ki kestyon enportan Zezi ti demande ler i ti koz lo siny dernyen zour?

LER i ti pe donn diferan eleman sa siny bann dernyen zour, Zezi ti demann sa kestyon: “Lekel sa serviter fidel e saz ki son met in plas ansarz tou lezot serviter pour donn zot zot manze kan i ler?” Epi Zezi ti dir ki sa lesklav ti pou ganny rekonpanse pour son fidelite ler son Met ti pou met li ansarz tou son byen.—Mat. 24:45-47.

² Plizyer mwan avan sa, Zezi ti’n demann en kestyon preski parey. (Lir Lik 12:42-44.) Sa mo ki Zezi ti servi pour dekrir sa lesklav i osi kapab ganny tradwir reziser. Sa reziser ti pou responsab bann “lezot serviter” andotmo en group serviter. En reziser ti kapab responsab en lakour e i ti en administrater parlao lezot serviter. Selman, sa reziser i osi en serviter. Lekel sa lesklav oubyen reziser? Ki mannyer i fourni manze “kan i ler”? I tre  enportan ki nou rekonnet sa mwayen ki’n ganny met an plas pour partaz manze spirityel.

3. (a) Ki mannyer serten spesyalis Labib in esey eksplik parol Zezi konsernan sa lesklav? (b) Ki sennla sa reziser oubyen lesklav e osi sa bann “lezot serviter”?

³ Serten spesyalis Labib i souvan aplik parol Zezi avek bann ki annan responsabilite dan bann legliz Kretyen. Me Zezi, “Met” dan sa legzanp, pa ti dir ki i ti pou annan en kantite sa bann lesklav dan bann diferan legliz Kretyen. O kontrer, i ti senpleman mansyonn en reziser oubyen lesklav ki ti ganny met ansarz tou son byen. Parey sa magazin in souvan eksplike, sa reziser i reprezant sa “pti troupo” bann Kretyen swazir, konman en group. Dan Levanzil Lik, Zezi ti fek koz lo sa “pti troupo.” (Lik 12:32) Bann “lezot serviter” i fer referans avek bann Kretyen swazir osi me konman bann endividi. En kestyon enteresan ki nou anvi demande i, Eski sak manm sa lesklav i zwe en rol pour fourni manze spirityel kan i ler? Larepons pou evidan an mezir ki nou egzamin sa ki Labib i annan pour dir.

Serviter Zeova dan letan pase

4. Ki mannyer Zeova ti apel nasyon Izrael, e kwa ki enportan pour note konsernan sa nasyon?

⁴ Zeova ti koz lo son pep, nasyon Izrael, konman son serviter. “Zot mon bann temwen [plizyer dimoun], wi mon serviter [en dimoun] ki mon’n swazir.” (Iza. 43:10) Tou bann manm nasyon Izrael ti form parti sa serviter. Parkont, i enteresan pour remarke ki selman bann Levit ki pa ti pret ek bann pret ki ti responsab pour ansenny Lalwa avek nasyon Izrael.—2 Kron. 35:3; Mal. 2:7.

5. Dapre sa ki Zezi ti dir, ki sanzman enportan ti pou arive?

⁵ Eski nasyon Izrael ti sa lesklav ki Zezi ti koz lo la? Non. Nou konn sa akoz sa ki Zezi ti dir bann Zwif dan son letan: “Zot pou ganny arase Rwayonm Bondye, e [i pou] ganny donnen a en lot nasyon ki pou prodwi son fri.” (Mat. 21:43) I evidan ki i ti pou annan en sanzman. Zeova ti pou servi en nouvo nasyon. Toudmenm, parey sa “serviter” dan lepok Izrael, zis serten dimoun dan sa lesklav dan legzanp Zezi ki ti pou pran par dan lansennyman spirityel.

Sa lesklav fidel dan premye syek

6. Ki sa nouvo nasyon ki ti vin an egzistans zour Lapannkot lannen 33 N.L., e lekel ki ti form parti sa group?

⁶ Sa nouvo nasyon, “Izrael Bondye,” i sa group bann Izraelit spirityel. (Gal. 6:16, NW; Rom. 2:28, 29; 9:6) Sa nasyon ti vin an egzistans ler Bondye ti devers son lespri sen zour Lapannkot lannen 33 N.L. Apartir sa moman, tou bann Kretyen swazir ti form parti sa nasyon ki ti vin lesklav son Met, Zezi Kri. Sak manm sa nasyon ti ganny donnen sa misyon pour anons sa bon nouvel e fer bann dimoun vin disip Kris. (Mat. 28:19, 20) Me eski tou manm sa group ti pou enplike pour donn manze spirityel kan i ler? Annou gete sa ki Labib i annan pour dir?

7. O konmansman kwa ki ti travay prensipal bann zapot, e ki mannyer sa travay ti sanze apre?

⁷ Ler Zezi ti swazir son 12 zapot, zot travay prensipal ti pour anons sa bon nouvel avek lezot. (Lir Mark 3:13-15.) Sa travay i al byen avek sa mo Grek apostolos, ki sorti dan en verb ki vedir “ki’n ganny anvoye.” Parkont, avek letan, kongregasyon Kretyen ti pe al ganny etablir e rol en zapot ti vin “en fonksyon” pour sirvey kongregasyon.—Akt 1:20-26.

8, 9. (a) Ki ti responsabilite prensipal sa 12 zapot? (b) Lekel ankor ki ti ganny bann gro responsabilite ki ti ganny konfirmen par konsey direkter?

⁸ Ki ti responsabilite prensipal bann za pot? Nou kapab vwar larepons atraver sa ki ti arive apre sa zour Lapannkot lannen 33 N.L. En dispit ti leve akoz lafason ki manze ti ganny distribye tou le zour avek bann vev. Sa 12 zapot ti zwenn avek bann disip e ti dir zot: “I pa normal ki nou aret pres Parol Bondye pour nou okip bann zafer manze.” (Lir Akt 6:1-6.) Alors, bann zapot ti apwent bann zonm ki ti kalifye spirityelman pour pran ka avek sa “responsabilite” neseser pour ki bann zapot i kapab dedye tou zot letan dan “predikasyon.” Zeova ti beni sa laranzman akoz nou lir ki “Parol Bondye ti kontinyen fannen; lakantite bann ki ti krwar dan Zezi ti ogmant bokou dan Zerizalenm.” (Akt 6:7) Alor se bann zapot ki ti annan responsabilite prensipal pour ansennyen.—Akt 2:42.

⁹ Avek letan, lezot ti ganny bann gro responsabilite. Anba direksyon lespri sen, Pol ek Barnabas ti ganny anvoye konman misyonner par kongregasyon Antyos. Zot ti osi ganny rekonnet konman zapot menm si zot pa ti dan group sa 12 premye zapot. (Akt 13:1-3; 14:14; Gal. 1:19) Konsey direkter Zerizalenm ti konfirm sa desizyon. (Gal. 2:7-10) Pa tro lontan apre sa, Pol ti konmans zwe en rol pour donn nouritir spirityel. I ti ekrir son premye let enspire.

10. Dan premye syek, eski tou bann Kretyen swazir ti prepar manze spirityel? Eksplike.

¹⁰ Toudmenm, eski tou bann Kretyen swazir ti enplike pour diriz travay predikasyon e prepar manze spirityel? Non. Zapot Pol i dir nou: “Pa tou ki zapot. Pa tou ki profet, ou ansennyan. Pa tou ki annan pouvwar fer mirak.” (1 Kor. 12:29) Menm si tou bann Kretyen swazir ti partisip dan predikasyon, selman en pti gin zot, setadir wit zot, ki ti ekrir sa 27 liv Lekritir Grek Kretyen.

Lesklav fidel dan nou letan

11. Ki sa bann “byen” ki sa lesklav in ganny met ansarz lo la?

¹¹ Parol Zezi dan Matye 24:45 i montre klerman ki sa lesklav fidel e pridan ti pou ankor la pe fer son louvraz lo later dan letan lafen. Revelasyon 12:17 i mansyonn zot konman “leres” desandans sa madanm. Konman en group, sa bann Kretyen swazir ki ankor lo later in ganny met ansarz tou byen Kris isi lo later. Sa reziser fidel in ganny apwente pour pran swen avek bann “byen” son Met ek Lerwa. Sa bann byen i reprezant tou bann dimoun lo later ki aksepte Rwayonm Bondye e osi tou bann byen materyel ki ganny servi pour anons sa bon nouvel.

12, 13. Ki mannyer en Kretyen i konnen si i annan lespwar pour viv dan lesyel?

¹² Ki mannyer en Kretyen i konnen si i annan lespwar pour viv dan lesyel e i form parti bann Izraelit spirityel ki ankor lo later? Larepons i dan parol zapot Pol avek bann ki annan sa lespwar parey li pour al dan lesyel. I ti dir: “Tou sa ki les li ganny gide par Lespri Bondye, i bann garson Bondye. Parski zot pa’n resevwar en Lespri ki rann zot lesklav e ranpli zot ankor avek lafreyer, me zot in resevwar en Lespri ki fer zot vin garson Bondye e ki permet nou kriy: ‘Aba! Papa!’ Lespri limenm i konfirm sa ki dan nou lespri, ki nou zanfan Bondye. E si nou son bann zanfan, alor nou osi son bann zeritye: zeritye Bondye, e zeritye ansanm avek Kris, parski si nou soufer avek li, avek li, nou osi ganny glorifye.”—Rom. 8:14-17.

¹³ Anfet, sa bann dimoun i ganny swazir par lespri sen Bondye e zot resevwar en lenvitasyon oubyen zot in ganny “apele” pour al dan lesyel. (Ebr. 3:1) Sa lenvitasyon personnel i sorti kot Bondye. Zot pa per oubyen annan serten dout, zot aksepte deswit  pour ganny adopte konman garson Bondye. (Lir 1 Zan 2:20, 21.) Pa zot ki swazir zot lesperans, me se Zeova ki met son sele oubyen lespri sen lo zot.—2 Kor. 1:21, 22; 1 Pyer 1:3, 4.

En pwennvi apropriye

14. Ki mannyer bann Kretyen swazir i vwar zot lenvitasyon?

¹⁴ Ki mannyer sa bann Kretyen swazir i devret konsider zot lekor anmezir ki zot pe esper zot rekonpans dan lesyel? Zot realize ki menm si zot in resevwar en lenvitasyon ekstraordiner, sa i selman en lenvitasyon. Zot devret reste fidel ziska lanmor pour kapab resevwar zot rekonpans. Avek limilite, zot annan menm santiman avek zapot Pol ki ti dir: “Mon bann frer, mon pa dir ki mon’n ganny sa pri, me mon fer en sel keksoz: mon oubliy tou sa ki deryer mwan, e mon fer tou pour ganny sa ki par devan. Mon tay for pour mwan ariv lo bit, pour ganny sa pri, ki Bondye par Kris-Zezi, in apel nou pour resevwar lao.” (Fili. 3:13, 14) Bann Kretyen swazir ki ankor lo later i devret fer tou sa ki zot kapab pour ‘anmenn en lavi ki dapre sa ki Bondye i oule zot viv, ler i ti apel zot e zot bezwen montre limilite’ e annan “lafreyer ek reverans.”—Efe. 4:1, 2; Fili. 2:12; 1 Tesa. 2:12.

15. Ki mannyer lezot Kretyen i devret vwar en Kretyen ki pran lanblenm zour Memoryal, e konman bann Kretyen swazir zot menm i vwar zot prop lekor?

¹⁵ Parkont, ki mannyer lezot Kretyen i devret konsider en dimoun ki dir i’n resevwar lenvitasyon konman en Kretyen swazir e ki konmans pran lanblenm zour Memoryal? Nou pa devret ziz sa dimoun. Sa i ant li ek Zeova. (Rom. 14:12) Toudmenm, bann Kretyen ki’n vreman resevwar lenvitasyon pour al viv dan lesyel pa demann en latansyon spesyal. Zot pa krwar ki akoz zot in ganny swazir, sa i donn zot plis bon zizman ki menm serten manm byen eksperyanse ki form parti sa “gran lafoul.” (Rev. 7:9) Zot pa krwar ki zot neseserman annan plis lespri sen ki bann ki form parti ‘lezot mouton.’ (Zan 10:16) Zot pa ekspekte bann tretman spesyal. Menm si zot pran lan blenm, zot pa krwar ki zot parlao bann ansyen dan kongregasyon.

16-18. (a) Eski tou bann Kretyen swazir i enplike pour prepar bann nouvo laverite spirityel? Donn en legzanp. (b) Akoz i pa neseser pour Konsey Direkter kontakte tou bann ki dir in ganny swazir par lespri sen avan zot fer en desizyon?

¹⁶ Eski tou bann Kretyen swazir i form parti en group ki kominik avek kanmarad e ki travay ansanm pour revel bann nouvo laverite spirityel? Non. Menm si sa lesklav konman en group i responsab pour donn manze tou lezot Kretyen swazir, pa tou Kretyen swazir ki annan menm responsabilite oubyen travay. (Lir 1 Korentyen 12:14-18.) Parey nou ti vwar, dan premye syek, tou Kretyen swazir ti partisip dan sa travay predikasyon ki vreman enportan. Me selman en pti gin menm ki ti ganny servi pour ekrir bann liv dan Labib e pour diriz kongregasyon Kretyen.

¹⁷ Annou pran en legzanp: Parfwa Labib i dir ki kongregasyon i kapab donn serten di­siplin. (Mat. 18:17) An realite, se zis bann ansyen ki pran sa bann aksyon akoz zot reprezant kongregasyon. Bann ansyen pa pou kontakte tou manm kongregasyon pour demann zot ki zot panse avan zot pran zot desizyon. Zot pe desarz responsabilite ki zot in gannyen, zot pe azir e reprezant kongregasyon an antye.

¹⁸ Pareyman, en pti gin Kretyen swazir in annan sa responsabilite pour reprezant sa lesklav. Se zot ki form parti Konsey Direkter Temwen Zeova. Sa bann zonm ki’n ganny swazir par lespri sen pe diriz sa travay predikasyon ek lansennyman spirityel. Parey dan premye syek, sa Konsey Direkter i pa kontakte tou bann manm ki form parti sa lesklav avan zot fer en desizyon. (Lir Akt 16:4, 5.) Parkont, tou bann Kretyen swazir i partisip plennman dan predikasyon la konmela. Konman en group, lesklav fidel e pridan i en sel lekor, me konman bann endividi, zot annan diferan fonksyon ek responsabilite.—1 Kor. 12:19-26.

19, 20. Ki pwennvi ekilibre bann manm sa gran lafoul i devret annan lo sa lesklav fidel e pridan ek son Konsey Direkter?

¹⁹ Ki lefe sa bann lenformasyon i devret annan lo sa gran lafoul ki pe kontinyelman ogmante e ki annan sa lespwar pour viv lo later? Vi ki gran lafoul i form parti bann byen Lerwa, zot kontan pour korpere plennman avek tou bann desizyon ki Konsey Direkter ki reprezant lesklav fidel e pridan i fer. Bann manm sa gran lafoul i apresye sa manze spirityel ki ganny prepare anba direksyon Konsey Direkter. An menm tan, menm si zot respekte sa lesklav konman en group, bann manm gran lafoul i veye ki zot pa met lo en oter bann endividi ki dir zot form parti sa lesklav. Napa en Kretyen ki’n vreman resevwar sa lenvitasyon ki ti pou anvi oubyen ekspekte en tel tretman.—Akt 10:25, 26; 14:14, 15.

²⁰ Ki swa nou form parti sa bann “lezot serviter” setadir ki nou en Kretyen swazir ki ankor lo later, oubyen si nou form parti sa gran lafoul, annou determinen pour korpere plennman avek sa reziser fidel ek son Konsey Direkter. Annou kontinyen “veye” e montre nou fidel ziska lafen.—Mat. 24:13, 42.

Eski ou rapel?

• Lekel sa lesklav fidel e pridan e osi sa bann lezot serviter?

• Ki mannyer en dimoun i konnen si i annan lespwar pour al dan lesyel?

• Lekel ki annan sa responsabilite prensipal pour prepar bann nouvo manze spirityel?

• Ki mannyer en Kretyen swazir i devret vwar son prop lekor?

[Kestyon]

[Portre lo paz 28]

Ozordi, Konsey Direkter i reprezant lesklav fidel e pridan. I ti annan menm laranzman dan premye syek