Eski i annan en dimoun ki vreman enterese avek mwan?

Eski ou’n deza santi ou tousel kot ou pa kapab fer nanryen, e ou annan sa lenpresyon ki personn pa konpran sa problenm ki ou pe pas ladan? Menm si zot konn ou bann problenm, ou santi ki zot pa vreman enterese avek ou?

KAN nou ganny problenm dan nou lavi, nou annan lenpresyon ki nou pe pas dan movetan e ki i pa pou zanmen arete. Parfwa, nou menm kapab krwar ki sa ki nou pe pas ladan i telman difisil e enzis ki nou nepli kapab siporte. Sa i souvan leka ler nou soufer akoz en problenm emosyonnel, depresyon, maladi kronik, vin andikape akoz en aksidan, oubyen andir en sityasyon en pe parey. Petet nou santi ki nou pa kapab fer nanryen, ki nou napa okenn lespwar, e sa i fer nou demann nou lekor kote nou kapab ale pour ganny rekonfor. Eski i annan en dimoun ki vreman enterese avek nou?

“Bondye ki touzour donn konsolasyon” i enterese

Dan Labib Bondye i ganny dekrir konman en “Papa ki ranpli avek labonte, Bondye ki touzour donn konsolasyon.” (2 Korentyen 1:3) Bondye, ki apel Zeova, i konnen ki nou bezwen ganny konsole. Labib i servi sa mo “konsolasyon” dan diferan fason plis ki san fwa pour asir nou ki Bondye pa zis konpran sa ki nou pas ladan, me i osi annan sa dezir pour konsol nou. Vi ki nou konn sa, nou annan lasirans ki menm si i paret ki lezot pa arive konpran, vwar, oubyen pa enterese avek nou sityasyon, sa i pa leka pour Zeova.

I evidan dan Labib ki Zeova i pran swen avek sak dimoun endividyelman. Labib i dir: “Lizye Zeova i partou, pe sirvey bann ki move e bann ki bon.” (Proverb 15:3) Pareyman, dan Zob 34:21, nou lir: “I get fason ki zonm i konport zot, e i vwar tou zot lepa.” Zeova i vwar tou sa ki nou fer, ki swa nou fer sa ki bon oubyen move, e i konn byen nou sirkonstans, alor i kapab azir ler i vwar li i apropriye. Nou vwar sa dan bann parol ki sa vizyoner oubyen profet ki ti apel Anani ti dir Lerwa Aza ki ti sorti Zida: “An se ki konsern Zeova, son lizye pe ale vini partou lo later pour li montre son lafors an faver bann ki zot leker i tou pour li.”—2 Kronik 16:7, 9.

Zeova i vey lo nou pour en lot rezon ankor. Zezi i dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Zeova i telman enterese avek nou ki i pare pour rod dimoun ki montre dan zot leker ki zot vreman anvi konn li plis. Si sa i leka, i kapab azir dan en fason vreman ekstraordiner. Par egzanp, dan Repiblik Dominiken en madanm ti’n ganny admet lopital pour fer en loperasyon akoz i ti ganny kanser. I ti sipliy Bondye pour ed li trouv sa vre larelizyon. Zis en pti pe letan apre, son msye ti anmenn sa brosir ki annan pour tit, Sa ki Bondye i ekspekte nou fer * pour li. Son msye ti’n ganny sa brosir son bomaten avek bann Temwen Zeova ki ti pas kot li. Sa madanm ti lir  sa brosir e i ti realize ki sa ti larepons son lapriyer. I ti aksepte en letid Labib avek sa Temwen Zeova, e dan mwens ki sis mwan i ti dedye son lavi avek Bondye e i ti batize.

Dan liv Psonm, nou vwar en kantite lekspresyon tousan par bann psalmis Ebre, parey Lerwa David, ki dekrir swen ranpli avek lanmour ki Zeova i annan pour son bann serviter. Dan Psonm 56:8, nou vwar Lerwa David pe sipliy avek Bondye: “Met mon larm dan ou boutey lapo. Eski pa zot dan ou liv?” Parey sa konparezon i fer vwar, David ti konnen ki Zeova pa ti zis konnen ki i ti pe soufer me i ti osi konnen ki mannyer i ti santi emosyonnelman. Zeova ti konn douler David e i ti rapel sa ki David ti pas atraver emosyonnelman ki ti fer li plere. Vreman, nou Kreater pe vey lo tou bann dimoun ki fer bokou zefor pour fer son lavolonte, setadir “bann ki zot leker i tou pour li.”

En lot pasaz Labib ki dekrir sa swen ranpli avek lanmour ki Bondye i donnen i trouve dan Psonm 23. Sa verse i konmans par konpar Bondye avek en berze ki annan bokou lanmour: “Zeova i mon Berze. Mon pa pou mank nanryen.” En berze dan Mwayen Oriyan i pran swen avek sak mouton ki i annan, i menm donn sak mouton en non. Tou le zour i apel sak mouton pour vin kot li, i kares zot avek tandres, e i gete si zot pa’n ganny blese. Si i trouv okenn blesir, i pas delwil oubyen latizann lo la pour fer li geri pli vitman. Si sa mouton i malad, sa berze i fer li anval latizann e ed li reste debout akoz si i reste alonze i kapab mor. Sirman sa i en zoli deskripsyon ki montre ki mannyer Zeova i pran swen avek bann dimoun ki vin ver li pour ganny led.

 Lapriyer ek rezireksyon i laprev ki Bondye i enterese avek nou

Sa bann verse ek lezot zoli psonm dan Labib pa’n zis ganny ekrir pour nou lir e apresye zot. Zot montre nou ki mannyer bann serviter Zeova dan lepase ti devid zot leker avek Zeova pour fer li konnen ki zot bezwen son led e osi eksprim zot rekonnesans pour son gidans ek benediksyon. Sa ki zot ti eksprimen i montre klerman ki bann serviter Bondye dan lepase ti vreman krwar ki Bondye ti enterese avek zot. Ler nou lir e medit lo sa bann parol tousan i kapab ed nou pour santi parey lo Bondye. Lefet ki Bondye i donn nou sa posibilite pour koz avek li dan lapriyer, sa i en gran laprev ki i enterese avek nou.

Me parler, nou telman ganny afekte par en problenm ki nou pa ni menm konnen ki mannyer nou pou koz lo la dan lapriyer. Eski sa i anpes Zeova konn nou soufrans? Romen 8:26 i donn larepons: “De menm Lespri i vin an ed a tou nou febles. Nou pa konnen sa ki bon pour demande kan nou fer lapriyer. Me Lespri i pled pour nou avek bann soupir ki nou pa kapab eksprimen par parol.” Sa verse i fer nou konpran ki bann lapriyer enspire ki bann serviter Bondye in fer dan lepase i kapab reflekte nou santiman, alor Zeova ki “ekout lapriyer,” pou osi aksepte sa bann lapriyer konmsi i sorti kot nou.—Psonm 65:2.

Lespwar rezireksyon i en lot laprev konvenkan ki Bondye i enterese avek sak dimoun endividyelman. Zezi Kri ti dir: “Ler pe arive kan tou bann mor ki dan tonbo pou tann son lavwa [Zezi], e zot pou sorti.” (Zan 5:28, 29) Sa mo Grek ki ganny servi dan sa verse pa pe senpleman koz lo “latonm” oubyen “tonbo” me i ganny tradwir konman “latonm souvenir.” I donn sa lide ki Bondye i gard an memwar ki mannyer sa dimoun ki’n mor ti ete tou dilon son lavi.

Zis mazinen, pour resisit en dimoun, Bondye i bezwen konn tou detay lo li, enkli son resanblans, son bann tre ki i’n erite e ki i’n devlope ek tou son bann souvenir! (Mark 10:27) Sa dimoun pa ganny oubliye dan memwar Bondye menm apre ki plizyer milye lannen in pase. (Zob 14:13-15; Lik 20:38) Alor, sa bilyon dimoun ki’n mor i dan memwar Zeova, e i rapel tou detay lo zot. Pa sa i en laprev konvenkan ki Bondye i enterese avek nou endividyelman!

Zeova i sa Enn ki rekonpans nou

Ki nou bezwen fer pour benefisye avek lentere ranpli avek lanmour ek swen ki sorti kot Bondye? Premyerman, nou bezwen montre ki nou annan konfyans, demontre lobeisans ek lafwa dan li. Zapot Pol ti fer resorti relasyon ki i annan ant lafwa ek swen ki nou gannyen avek Bondye. I ti ekrir: “San lafwa personn pa kapab fer plezir Bondye. Sa ki apros kot Bondye i devre krwar ki i egziste e ki i rekonpans tou bann ki rod li.”—Ebre 11:6.

Remarke ki sa kalite lafwa ki fer plezir Bondye i annan de laspe. Premyerman, nou bezwen “krwar ki i egziste,” setadir nou bezwen krwar ki Bondye i reel e ki i nou Sef Siprenm, ki merit nou lobeisans ek ladorasyon. Dezyenmman, nou bezwen krwar ki i sa enn ki “rekonpans tou bann ki rod li.” Vre lafwa i enplik krwar ki Bondye i enterese avek byennet tou bann ki fer bokou zefor pour fer son lavolonte e ki i rekonpans zot. Par etidye Parol Bondye e asosye avek bann ki obeir li, ou osi ou kapab arive devlop sa kalite lafwa, ki pou fer ou merite ganny sa rekonpans ek swen ranpli avek lanmour sorti kot Bondye.

En kantite dimoun ozordi i krwar ki Bondye pa enterese dan bann zafer imen. Me parey nou’n vwar, Labib i klerman montre ki Bondye i vreman enterese avek bann ki demontre vre lafwa dan li. Menm si lavi ozordi i souvan ranpli avek soufrans, lenkyetid, dezapwentman, ek sagrinasyon, nou pa devret dezespere. Zeova i vreman enterese avek nou. Anfet, avek lanmour i envit nou pour tourn ver li pour ganny led. En psalmis i dir: “Larg ou fardo lo Zeova li menm, e li i pou soutenir ou. Zanmen i pou les sa enn ki drwat drive.”—Psonm 55:22.

[Not anba lo paz 26]

[Box/​Picture on page 29]

Bann verse ki pou fortifye ou lafwa dan lamour Bondye

“An sa ki konsern Zeova, son lizye pe ale vini partou lo later pour li montre son lafors an faver bann ki zot leker i tou pour li.”—2 KRONIK 16:9

“Met mon larm dan ou boutey lapo. Eski pa zot dan ou liv?”—PSONM 56:8

“Zeova i mon Berze. Mon pa pou mank nanryen.”—PSONM 23:1

“Ou ki ekout lapriyer, tou kalite dimoun pou vin ver ou.”—PSONM 65:2

“Ou pou apel mwan, e mon pou reponn ou. Ou pou vreman anvi vwar travay ou lanmen.”—ZOB 14:15

“Sa ki apros kot Bondye i devre krwar ki i egziste e ki i rekonpans tou bann ki rod li.”—EBRE 11:6

“Larg ou fardo lo Zeova li menm, e li i pou soutenir ou. Zanmen i pou les sa enn ki drwat drive.”—PSONM 55:22