Imit Zezi, pres avek lardyes

“Nou ti annan kouraz . . . pour anons zot Levanzil Bondye.”—1 TESA. 2:2.

1. Akoz sa bon nouvel lo Rwayonm i atiran?

PA I vreman gou pour tann bann bon nouvel! Sa pli bon nouvel parmi tou lezot, i sa bon nouvel lo Rwayonm Bondye. Sa bon nouvel i asir nou ki i pou annan en lafen avek soufrans, maladi, douler, latristes ek lanmor. I donn lespwar pour lavi eternel, i revel plan Bondye e montre nou konman nou kapab annan en relasyon ranpli avek lanmour avek li. Petet ou krwar ki tou dimoun ti pou kontan pour tann sa nouvel ki Zezi ti partaz avek limanite. Me malerezman, sa i pa leka.

2. Ki Zezi ti oule dir kan i ti dir i’n vin pour koz divizyon dan fanmir?

² Zezi ti dir son bann disip: “Pa krwar ki mon’n vin anmenn lape lo later. Mon pa’n vin anmenn lape, me lepe. Mon’n vin met en garson kont son papa, en fiy kont son manman; en belfiy kont son belmer; Ou lennmi pou trouv parmi manm ou prop fanmir.” (Mat. 10:34-36) Olye aksepte sa bon nouvel avek gran ker, laplipar dimoun i rezet li. Serten i menm vin lennmi sa bann ki ansenny sa bon nouvel, menm si i en fanmir pros.

3. Ki nou bezwen pour akonplir nou travay predikasyon?

³ Nou anons menm mesaz ki Zezi e bann dimoun ki tann li ozordi i azir parey bokou dan letan Zezi. Nou ekspekte sa. Zezi ti dir son bann disip: “Okenn serviter pa pli gran  ki son met. Si zot in persekit mwan, zot osi, zot pou ganny persekite.” (Zan 15:20) Dan bokou pei nou pa ganny persekite direkteman, me i annan bann dimoun ki pa kontan nou ouswa zot pa enterese avek sa mesaz. Alors, nou bezwen annan lafwa ek kouraz pour nou andire oubyen persevere dan nou travay pour pres sa bon nouvel avek lardyes.—Lir 2 Pyer 1:5-8.

4. Akoz Pol ti bezwen pran kouraz pour prese?

⁴ Petet parfwa ou vwar li difisil pour partisip dan minister, ouswa serten laspe ladan i kapab paret difisil pour fer. Si wi, ou pa tousel. Zapot Pol ti en predikater ki ti annan en bon konnesans lo laverite, i ti annan lardyes e i pa ti per, me kantmenm sa, i ti annan bann moman kot i ti vwar li difisil pour prese. I ti ekrir bann Kretyen Tesalonik: “Malgre ki nou ti soufer e ganny maltrete dan lavil Filip avan nou ti ariv kot zot, parey zot konnen nou ti annan [oubyen pran] kouraz dan nou Bondye pour anons zot Levanzil Bondye devan gran lopozisyon.” (1 Tesa. 2:2) Dan lavil Filip, lotorite ti’n bat Pol ek son konpanyon Silas, zet zot dan prizon e met zot lipye dan blok dibwa. (Akt 16:16-24) Kantmenm sa, Pol ek Silas ti pran kouraz oubyen annan plis lardyes pour kontinyen prese. Ki mannyer nou kapab fer parey? Pour reponn sa kestyon, annou egzaminen kwa ki ti ed bann serviter Bondye dan letan lontan pour koz avek lardyes lo laverite konsernan Zeova e annou aprann ki mannyer nou kapab imit zot legzanp.

Lardyes i neseser pour fer fas avek laenn

5. Akoz bann ki’n fidel avek Zeova in bezwen annan kouraz oubyen lardyes?

⁵ Zezi Kri ti sirman sa pli bon legzanp kouraz ek lardyes. Kantmenm sa, depi o konmansman listwar imen, tou bann serviter ki’n fidel avek Zeova in touzour bezwen annan lardyes. Akoz? Apre sa rebelyon Edenn, Zeova ti predir ki i ti pou annan en laenn ant bann ki servi Bondye ek bann ki servi Satan. (Zen. 3:15) Sa laenn ti deswit vin evidan kan Abel, en zonm drwat, ti ganny touye par son frer. Pli tar, en lot zonm fidel ki ti apel Enok e ki ti viv avan Deliz ti sibir menm zafer. I ti profetize ki Bondye ti pou vini ansanm avek plizyer dizenn milye lanz sen pour egzekit zizman lo bann ki ti napa respe pour Bondye. (Zid 14, 15) Sirman sa pa ti en mesaz ki bann dimoun ti anvi tande. Zot ti ay Enok e menm ti’n kapab touy li si Zeova pa ti’n akoursi son lavi. Pa Enok ti vreman annan kouraz!—Zen. 5:21-24.

6. Akoz Moiz ti bezwen annan lardyes pour koz avek Faraon?

⁶ Mazin osi lardyes ki Moiz ti annan pour al koz avek Faraon, en dirizan ki ti ganny vwar non pa konman en reprezantan bann bondye, me konman en bondye li menm, setadir konman garson bondye soley ki ti apel Ra. I kapab ki parey lezot Faraon, i ti ador son prop lekor. Sa ki Faraon ti dir ti ganny konsidere konman lalwa, sa ki i ti dir sanmenm. Faraon ti pwisan, arogan, antete e napa personn ki ti annan drwa dir li ki pour fer. Menm si i pa ti ganny envite e i ti ganny mal resevwar, se devan sanmenm sa zonm, ki en berze ki ti annan limilite apele Moiz ti pe kontinyen ale. Ki Moiz ti predir? Bann fleo terib. Ki i ti demande? Permisyon pour ki plizyer milyon lesklav Faraon i kit sa pei! Eski Moiz ti bezwen kontinyen demontre kouraz? Definitivman!—Nom. 12:3; Ebr. 11:27.

7, 8. (a) Ki leprev bann zonm fidel dan letan lontan ti fer fas avek? (b) Kwa ki ti ed bann dimoun avan lepok bann Kretyen pour annan kouraz pour siport e promot vre ladorasyon?

⁷ Pandan bann syek ki ti swiv, bann profet ek lezot serviter ki ti fidel avek Bondye ti kontinyen pran bann pozisyon ki ti demontre kouraz pour vre ladorasyon. Lemonn Sa tan pa ti tret zot byen. Pol ti dir: “Serten ti ganny touye avek kou-d-ros, lezot ti ganny sye an de, oubyen ganny touye par lepe. Zot ti eran, sorti en landrwa pour al dan en lot, kouver zis avek en lapo mouton ou lapo kabri, pov, persekite, e maltrete.” (Ebr. 11:37) Kwa ki ti ed sa bann serviter fidel Bondye pour tenir ferm? Dan detrwa verse pli boner, sa zapot ti dir kwa ki ti donn Abel, Abraam, Sara ek lezot serviter lafors pour andire. I ti dir: “San ki zot i’n resevwar sa bann keksoz ki zot in ganny promet, me [avek lafwa] zot in war de lwen e zot in rezoui [oubyen “akeyir zot,” not dan NW].” (Ebr. 11:13) San dout, bann profet parey Eliya, Zeremi ek lezot serviter fidel ki ti siport vre ladorasyon avek lardyes avan lepok bann Kretyen, ti pareyman ganny led pour andire par gard zot regar fikse lo promes Zeova.—Tit 1:2.

⁸ Sa bann serviter fidel avan lepok bann Kretyen ti pe esper en lavenir atiran e briyan. Apre ki zot resisite, zot pou finalman vin parfe e “ganny libere . . . avek pouvwar destrikter ki pe gard [zot] dan lesklavaz,” e sa pou ganny fer atraver servis Zezi konman Gran Pret ek sa 144,000 lezot pret. (Rom. 8:21) Deplis, Zeremi ek lezot serviter kouraze dan lepase ti pran kouraz akoz sa lasirans ki Zeova ti’n promet Zeremi: “Zot pou sirman lager kont ou, me zot pa pou reisi parski ‘Mon avek ou pour delivre ou,’ se sa ki Zeova i deklare.” (Zer. 1:19) Ozordi, kan nou reflesir lo bann promes Zeova pour nou lavenir e lefet ki i’n asir nou proteksyon spirityel, pareyman nou ganny plis lafors.—Prov. 2:7; lir 2 Korentyen 4:17, 18.

Lanmour ti motiv Zezi pour pres avek lardyes

9, 10. Dan ki fason Zezi ti demontre kouraz oubyen lardyes devan (a) bann sef relizye, (b) en group solda, (c) gran pret, (d) Pilat?

⁹ Zezi, nou Legzanp, ti demontre lardyes dan diferan fason. Par egzanp, menm si bann ki ti annan bokou pouvwar ek lenfliyans ti ay li, Zezi pa ti sanz sa mesaz ki Zeova ti anvi bann dimoun i konnen. San okenn lafreyer, i ti ekspoz move latitid bann sef relizye ki ti krwar zot tro zis ensi ki zot bann fo lansennyman. Zezi ti fran e kler kan i ti kondann sa bann zonm. Dan en lokazyon, i ti dir: “Maler! profeser Lalwa ek bann Farizyen ipokrit! Zot parey bann latonm blansi ki paret zoli an-deor, me ki anndan i plen avek bann zosman dimoun mor ek tou kalite lapouritir. Zot osi, andeor zot paret bon devan dimoun, me anndan zot ranpli avek lipokrizi ek pese.”—Mat. 23:27, 28.

¹⁰ Dan zarden Zetsemane, kan en group solda ti vin rod li, avek kouraz Zezi ti idantifye son lekor avek zot. (Zan 18:3-8) Pli tar i ti ganny anmennen devan bann Sannedren e ganny kestyonnen avek gran pret. Menm si i ti konnen ki gran pret ti pe rod en preteks pour touy li, san okenn lafreyer Zezi ti dir ki li menm li Kris e Garson Bondye. I ti azoute ki zot ti pou vwar li “asiz lo kote drwat Bondye Toupisan e pe vini avek nyaz dan lesyel.” (Mark 14:53, 57-65) Pa tro bokou letan apre,  Zezi ki ti’n ganny anmare, ti debout devan Pilat, sa enn ki ti’n kapab liber li. Me Zezi ti reste trankil, i pa ti reponn sa bann lakizasyon ki ti pe ganny fer kont li. (Mark 15:1-5) Tou sa la ti demann bokou kouraz.

11. Ki mannyer lardyes i relye avek lanmour?

¹¹ Me Zezi ti koze avek Pilat, i ti dir: “Mon’n ne e mon’n vin dan lemonn pour servi temwen pour laverite.” (Zan 18:37) Zeova ti’n donn Zezi sa misyon pour pres sa bon nouvel e i ti en plezir pour Zezi fer sa, akoz i ti kontan son Papa ki dan lesyel. (Lik 4:18, 19) Zezi ti osi annan lanmour pour bann dimoun. I ti konnen ki zot lavi pa ti fasil. Pareyman, nou rann temwannyaz avek lardyes e san okenn lafreyer, akoz nou profon lanmour pour Zeova ek nou prosen.—Mat. 22:36-40.

Lespri sen i donn lafors pour pres avek lardyes

12. Kwa ki ti fer bann premye Kretyen zwaye?

¹² Dan bann semenn ki ti swiv apre lanmor Zezi, bann disip ti annan tou rezon pour zot rezwir akoz Zeova ti pe atir lezot dimoun pour zwenn ansanm avek zot. Dan zis en zour, apepre 3,000 Zwif ek bann ki ti’n konverti dan larelizyon Zwif sorti dan plizyer pei ki ti’n vin Zerizalenm pour selebre Lapannkot ti batize! Sirman tou dimoun Zerizalenm ti pe koz lo sa levennman! Labib i dir: “Tou dimoun ti ranpli avek lafreyer: ti annan bokou mirak ek siny ki bann zapot ti fer.”—Akt 2:41, 43.

13. Akoz bann frer ti priye pour ganny kouraz e avek ki rezilta?

¹³ Lakoler ti fer bann sef relizye aret Pyer ek Zan, fer zot pas lannwit an detansyon e ordonn zot pour aret koz lo Zezi. Apre ki zot ti’n ganny large, tou le de ti raport avek lezot frer sa ki ti’n arive. Zot tou zot ti priy lo sa lopozisyon ki zot ti’n gannyen e demann Zeova pour “permet [son] bann serviter anons [son] mesaz avek lasirans san okenn lafreyer.” Avek ki rezilta? “Zot tou zot ti ranpli avek Sent-Espri e zot ti konmans anons mesaz Bondye san okenn lafreyer.”—Akt 4:24-31.

14. Ki mannyer lespri sen i ed nou dan predikasyon?

¹⁴ Remarke ki lespri sen pwisan Zeova ki ti ed sa bann disip pour koz parol Bondye avek lardyes. Sa kouraz pour koz lo laverite avek lezot, menm avek bann ki opoz nou mesaz, pa depan lo nou. Zeova i kapab e i pou donn nou son lespri sen, si nou demann li. Avek led Zeova, nou osi nou kapab annan sa lardyes neseser pour fer fas avek bann lopozisyon fidelman.—Lir Psonm 138:3. *

Kretyen ozordi i pres avek lardyes

15. Ki mannyer laverite i diviz bann dimoun ozordi?

¹⁵ Parey dan lepase, dan nou letan, laverite i ankor pe separ bann dimoun. Serten i aksepte, tandis ki lezot, zot pa ni konpran, ni annan respe pour nou form ladorasyon. Serten i kritik nou, sikann nou ouswa menm ay nou, zis parey Zezi ti predir. (Mat. 10:22) Parler, atraver medya nou vin target bann fo lenformasyon ouswa propagann. (Ps. 109:1-3) Me dan lemonn antye, pep Zeova pe anons sa bon nouvel avek lardyes.

16. Ki leksperyans ki montre ki lardyes i kapab sanz pwennvi bann ki nou pres avek?

¹⁶ Nou lardyes i kapab fer bann dimoun sanz zot latitid anver sa mesaz Rwayonm. En ser Kyrgyzstan ti dir: “En fwa dan predikasyon, en met lakour ti dir mwan: ‘Mon krwar dan Bondye me pa dan Bondye bann Kretyen. Si ou vin ankor kot sa baro, mon pou larg mon lisyen lo ou!’ Par deryer li ti annan en gro bulldog dan lasenn. Me pan dan sa kanpanny pour distribye Nouvel Rwayonm No. 37 avek tit ‘Lafen fo larelizyon i pros!,’ mon ti deside pour retourn kot sa menm lakaz avek lespwar ki mon kapab zwenn en lot manm fanmir sa msye. Me parkont, sanmenm sa zonm ki ti ouver laport. Deswit mon ti priy Zeova e dir: ‘Bonzour, mon rapel nou konversasyon trwa zour pase e mon osi rapel ou lisyen. Me mon pa ti pou kapab pa pas kot ou akoz zis parey ou, mon krwar dan sa sel vre Bondye. Byento Bondye pou pini bann larelizyon ki dezonnor li. Ou pou kapab aprann plis lo la si ou lir sa.’ Mon ti sirprann ki sa zonm ti aksepte sa Nouvel Rwayonm. Apre sa, mon ti al kot en lot lakaz. Detrwa minit pli tar, sa zonm ti vin zwenn mwan an tayan avek sa Nouvel Rwayonm dan son lanmen. I ti dir: ‘Mon’n fini lir, ki mon pou bezwen fer pour pa sibir lakoler Bondye?’” En letid ti konmanse avek sa zonm e i ti konmans asiste bann renyon.

17. Ki mannyer lardyes en ser ti ankouraz en etidyan Labib ki ti annan lafreyer?

¹⁷ Nou lardyes i osi kapab ankouraz lezot pour zot annan lardyes. En ser Larisi ti pe vwayaze dan en bis kan i ti ofer en pasaze en magazin. Ler i ti vwar sa, en zonm ti leve lo son sit, ras sa magazin dan lanmen sa ser, kraz kraz li e balans li ater. Byen for i ti zour sa ser, demann li son ladres e dir li aret pres dan sa vilaz. Sa ser ti priy ­Zeova pour ganny led e rapel parol Zezi: “Pa per bann ki touy lekor.” (Mat. 10:28) Byen kalm, i ti debout e dir sa zonm: “Mon pa pou donn ou mon ladres e mon pou kontinyen pres dan sa vilaz.” Apre sa, i ti debarke dan bis. San ki sa ser ti konnen, enn son etidyan Labib ti dan sanmenm sa bis. Sa madanm ti’n les lafreyer pour zonm anpes li asiste renyon. Parkont, apre ki i ti’n obzerv lardyes ki nou ser ti annan, sa etidyan Labib ti deside ki i pou konmans asiste bann renyon.

18. Kwa ki pou ed ou pour pres avek lardyes parey Zezi?

¹⁸ Dan sa lemonn ki elwannyen avek Bondye, i demann lardyes pour prese parey Zezi. Kwa ki pou ed ou fer sa? Mazin lavenir. Gard ou lanmour pour Bondye ek ou prosen byen for. Priy Zeova pour ganny kouraz. Touzour mazinen ki ou pa zanmen tousel, akoz Zezi i avek ou. (Mat. 28:20) Lespri sen pou donn ou lafors. Zeova pou beni ou e siport ou. Alor, annou touzour annan kouraz e dir: “[Zeova] i mon sekour, mon pa per personn. Ki dimoun i kapab fer mwan?”—Ebr. 13:6.

[Not anba lo paz 24]

Ki ou pou reponn?

• Akoz bann serviter Zeova i bezwen annan lardyes?

• Konsernan lardyes, ki nou aprann avek . . .

bann zonm fidel ki ti viv avan Kris?

Zezi Kri?

bann premye Kretyen?

bann Kretyen dan nou letan?

[Study Questions]

[Portre lo paz 23]

San okenn lafreyer Zezi ti denons bann sef relizye

[Portre lo paz 25]

Zeova i donn nou kouraz pour prese