Korperasyon i favoriz progre spirityel

I ENPORTAN pour en dimoun annan en leta lespri korperasyon si i anvi ed son fanmir konsantre lo bann keksoz spirityel. Kan Zeova ti kree sa premye koup, i ti met lanfaz lo sa nesesite pour zot de korpere. Ev ti pou travay avek Adan konman son “led.” (Zen. 2:18) Dan en maryaz, msye ek madanm i devret travay ansanm pour siport kanmarad. (Ekle. 4:9-12) Pour ki bann paran ek zanfan i akonplir rol ki Zeova i donn zot, i neseser ki i annan korperasyon antre zot.

Ador Bondye an fanmir

Barry ek Heidi i annan senk zanfan. Zot vwar ki korpere pour fer letid Labib an fanmir i ed zot fer progre spirityel. Barry i dir: “Tanzantan mon donn bann zanfan bann pti devwar pour fer an rapor avek nou letid fanmir. Mon kapab demann zot pour prepar serten komanter baze lo bann lartik dan Awake! Nou fer bann pti legzersis konsernan sa ki nou pou al dir dan predikasyon pour ki sak zanfan i pare avek en prezantasyon.” Heidi i azoute “Nou tou nou annan en lalis lobzektif spirityel ki nou anvi atenn, e tanzantan nou revwar sa bann lobzektif pandan letid an fanmir pour vwar ki progre nou pe fer.” Sa koup i osi vwar ki ler zot met dekote bann zour spesifik pour pa get televizyon i donn loportinite lafanmir antye pour lir dan trankilite.

Renyon kongregasyon

Mike ek Denise in elve kat zanfan. Ki mannyer zot fanmir in benefisye lefet ki zot korpere antre zot? Mike i dir: “Parfwa, menm sa pli bon plan pa ti marse, me nou ti vwar ki korperasyon ti ed nou pour ariv renyon aler.” Denise i eksplike: “Ler bann zanfan ti pe grandi, sakenn ti annan son travay pour fer kot lakour. Nou fiy Kim, ti ede pour kwi manze e aranz latab.” Zot garson Michael i rapel: “Dan Mardi swar nou ti annan renyon kongregasyon kot nou. Alors nou ti netway sa bout kot renyon ti pour ganny fer, pas aspirater, e aranz bann sez.” En lot garson, Mathew, i dir: “Dadi ti fer sir ki i ti antre boner sorti travay bann zour renyon pour fer sir nou pare pour renyon.” Ki rezilta sa ti anmennen?

Tou sa zefor i vo lapenn

Mike i rakonte: “An 1987, nou de Denise nou ti konmans servi konman pionye. Sa letan, trwa parmi nou bann zanfan ti ankor kot lakour. De parmi zot ti osi vin pionye e lezot in travay lo bann proze konstriksyon pour Betel. Sa ki’n osi kontribye pour anmenn lazwa dan nou fanmir se ki nou’n kapab ed 40 dimoun pour dedye zot lavi avek Zeova e batize. Nou ti osi annan sa privilez pour travay konman en fanmir lo bann proze konstriksyon, menm dan lezot pei.”

Byensir, tou sa zefor pour korpere konman en fanmir i vo lapenn. Eski ou vwar lezot fason ki ou kapab korpere ant kanmarad dan ou fanmir? Ou kapab asire ki ler ou annan en leta lespri korperasyon sa pou ed ou fanmir fer plis progre spirityel.

[Picture on page 29]

Fer bann pti legzersis i ede pour progrese dan predikasyon