Rod bann trezor ki’n ganny kasyet dan li
Rod bann trezor ki’n ganny kasyet dan li
“Dan [li] in [ganny] kasyet tou bann trezor lasazes ek konnesans.”—KOL. 2:3.
1, 2. (a) Ki bann lobze ki ti ganny dekouver an 1922, e ki’n arive avek zot? (b) Ki Parol Bondye i envit sak dimoun pour fer?
BANN trezor kasyet ki ganny dekouver i souvan ganny konsidere konman bann nouvel vreman enportan. Par egzanp, an 1922 apre plizyer dizenn lannen ki en arkeolog Britanik Howard Carter ti’n travay dir dan bann kondisyon difisil i ti dekouver bann keksoz enpresyonan. I ti trouv latonm Lerwa Tutankhamen preski entak, e ladan i ti annan apepre 5,000 lobze.
2 Menn si sa dekouvert ti enpresyonan, tou sa bann keksoz rar ki ti ganny trouve in finalman al swa dan bann mize oubyen dimoun in aste. Petet zot annan serten valer dan domenn listwar oubyen domenn artistik, me zot annan en ptigin oubyen napa ditou lefe lo nou lavi tou le zour. Parkont, Parol Bondye i envit nou pour rod bann trezor ki annan en lefe lo nou. Sa lenvitasyon i ganny ofer avek tou dimoun, e rekonpans ki sa i anmennen i annan plis valer ki okenn trezor materyel.—Lir Proverb 2:1-6. *
3. Ki mannyer sa bann trezor ki Zeova i ankouraz son bann adorater pour rode i anmenn byenfe?
3 Annou egzaminen ki valer sa bann trezor ki Zeova i ankouraz son bann adorater pour rode i annan. Enn parmi i “lakrent pour Zeova,” ki kapab vin en proteksyon e prezerv nou dan bann letan difisil. (Ps. 19:9) Rod sa “vre konnesans egzakt lo Bondye” i sa pli gran loner ki en imen i kapab annan, setadir en relasyon personnel avek Bondye. Bann trezor tel parey lasazes sorti kot Bondye, konnesans ek disernman, pou kapab ed nou reisi fer fas avek bann problenm ki nou rankontre dan nou lavi sak zour. (Prov. 9:10, 11) Ki mannyer ou kapab trouv sa bann trezor presye?
Rod bann trezor spirityel
4. Ki gidans nou gannyen pour trouv sa bann trezor spirityel?
4 Kontrerman avek bann arkeolog ek lezot serser ki souvan pe rod trezor partou, nou, nou konnen egzakteman kote nou kapab trouv sa bann trezor spirityel. Parol Bondye ki parey en map, i montre nou egzakteman kote nou pou kapab trouv bann trezor ki Bondye in promet nou. Ler i ti pe koz konsernan Kris, zapot Pol ti ekrir: “Dan [li] in [ganny] kasyet tou bann trezor lasazes ek konnesans.” (Kol. 2:3) Anmezir ki nou lir sa bann parol, nou kapab demann nou lekor: ‘Akoz nou devret rod sa bann trezor? Ki mannyer zot in ganny “kasyet” dan Kris? E ki mannyer nou kapab trouv zot?’ Pour trouv larepons sa bann kestyon, annou port plis latansyon lo sa ki zapot Pol ti dir?
5. Akoz zapot Pol ti ekrir lo bann trezor spirityel?
5 Zapot Pol ti ekrir sa bann parol pour son bann frer ek ser Kolos. I ti dir zot ki i ti pe lite pour zot, afen ki ‘zot leker i kapab ranpli avek kouraz, pour ki zot kapab reste ini dan lanmour.’ (Lir Kolosyen 2:1, 2.) Akoz i ti telman enkyet? I evidan ki zapot Pol ti konsyan ki petet son bann frer ti’n ganny enfliyanse avek serten parmi zot bann frer ki ti pe promot serten filozofi Grek oubyen ki ti pe ensiste ki zot kontinyen swiv Lalwa Moiz. I ti severman averti son bann frer: “Fer atansyon ki zot pa tonm dan pyez personn avek zot bann fo largiman [ek] filozofi, ki pa baze lo Kris, me lasazes imen, e ki fonde lo tradisyon zonm, ek bann [keksoz] lemonn.”—Kol. 2:8.
6. Akoz nou devret pran aker konsey zapot Pol?
6 Ozordi, nou fer fas avek menm kalite lenfliyans sorti kot Satan ek sa move lemonn. Bann filozofi sa lemonn, enkli sa krwayans kot serten dimoun i krwar ki Bondye pa egziste e ki dimoun i sorti dan zannimo in afekte moral, lobzektif ek fason viv bann dimoun. Fo larelizyon in zwe en gran rol dan selebrasyon bann lafet popiler. Bann lendistri ki fer bann divertisman i ankouraz bann dimoun pour satisfer zot move dezir e laplipar keksoz ki annan lo Internet i vreman en danze, pour zenn konman vye. Ler nou souvan ekspoze avek bann move keksoz lo Internet ek lezot move tandans sa lemonn, sa i kapab fasilman afekte fason ki nou santi ek nou latitid anver gidans ki Zeova i donnen, e diminyen nou determinasyon pour anmas en solid trezor pour ganny sa vre lavi. (Lir 1 Timote 6:17-19.) I kler alor ki nou bezwen byen konpran sinifikasyon sa parol ki zapot Pol ti dir, e pran son konsey aker si nou pa oule tonm dan pyez Satan.
7. Dapre zapot Pol ki sa de keksoz ki ti pou ed bann Kolosyen?
7 Annou revwar bann parol ki zapot Pol ti dir avek bann Kolosyen. Nou remarke ki apre ki i ti mansyonn sa ki ti pe trakas li, answit i ti met lanfaz lo de keksoz ki ti pou kapab ed zot ganny kouraz e pour reste ini dan lanmour. Premyerman, i ti mansyonn ‘lasirans konplet zot konpreansyon.’ Zot ti bezwen vreman konvenki ki zot ti annan en bon konprenezon lo Lekritir, pour annan en lafwa solid. (Ebr. 11:1) Apre i ti mansyonn konnesans egzakt sa sen sekre Bondye. Zot ti bezwen ganny plis ki en konnesans debaz lo laverite e ganny en bon konprenezon lo bann keksoz o profon lo Bondye. (Ebr. 5:13, 14) Pa sa ti vreman en bon konsey pour bann Kolosyen e osi pour nou ozordi! Me ki mannyer nou kapab ganny sa kalite lasirans ek konnesans egzakt? Zapot Pol ti donn larepons par sa parol byen profon ki i ti dir lo Zezi: “Dan li in [ganny] kasyet tou bann trezor lasazes ek konnesans.”
Bann trezor in ganny “kasyet” dan Kris
8. Eksplike ki sa lekspresyon “kasyet” dan Kris i vedir.
8 Ler Labib i dir ki tou trezor lasazes ek konnesans in ganny “kasyet” dan Kris, sa pa vedir ki personn pa kapab ganny akse avek sa trezor. Sa i plito vedir, ki pour trouv sa bann trezor nou bezwen fer en kantite zefor, e nou bezwen diriz nou latansyon lo Zezi Kri. Sa lide i an armoni avek sa ki Zezi ti dir konsernan li menm: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:6) Wi, pour ganny konnesans lo Bondye, nou bezwen led ek gidans ki Zezi i donnen.
9. Ki rol ki’n ganny konfye avek Zezi?
9 Zezi pa zis sa “semen” me i ti dir ki i “laverite ek lavi.” Sa i endike ki i plis ki zis sa mwayen pour apros avek son Papa. Zezi ti osi zwe bann rol ki vreman enportan pour ki nou konpran Labib e ganny lavi eternel. Vreman, bann trezor spirityel ki napa son parey in ganny kasyet dan Zezi. Bann etidyan Labib pe esper avek enpasyans pour dekouver sa bann trezor. Annou egzamin serten sa bann trezor ki relye direkteman avek nou lespwar pour lavenir ek nou relasyon avek Bondye.
10. Ki nou kapab aprann lo Zezi dapre Kolosyen 1:19 ek 2:9?
10 “Dan son garson i annan natir son divinite.” (Kol. 1:19; 2:9) Lefet ki i’n viv dan lesyel avek son Papa pour bokou bokou letan, Zezi i konn pli byen ki nenport ki lo personnalite ek lavolonte Bondye. Ler i ti lo later, Zezi ti ansenny lezot sa ki son Papa ti ansenny li e i ti reflekte bann kalite ki Son Papa ti ed li devlope dan lafason ki i ti azir. I pour sa rezon akoz Zezi ti kapab dir: “Sa ki’n war mwan in osi war mon Papa.” (Zan 14:9) Tou lasazes ek konnesans Bondye in ganny kasyet oubyen i ganny trouve dan Kris, e sa pli meyer fason pour aprann konsernan Zeova, i ler nou aprann tou sa ki nou kapab lo Zezi.
11. Ki lyen i annan ant Zezi ek bann profesi Labib?
11 “Rann temwannyaz konsernan Zezi, se sa ki’n fer annan profesi.” (Rev. 19:10, NW) Sa bann parol i endike ki Zezi ti sa personnaz pli enportan dan lakonplisman en kantite profesi Labib. Depi sa premye profesi dan Zenez 3:15, ziska sa bann vizyon ekstraordiner dan liv Revelasyon, nou kapab byen konpran bann profesi Labib selman si nou pran an konsiderasyon rol Zezi an rapor avek sa Rwayonm kot i pour dirize. Sa i eksplike akoz i difisil pour bann dimoun ki pa aksepte Zezi konman sa Mesi promiz, pour konpran sa kantite profesi dan Lekritir Ebre. Sa i osi fer nou konpran akoz bann dimoun ki pa apresye Lekritir Ebre ki ranpli avek bann profesi lo Mesi, i vwar Zezi zis konman en zonm enportan. Konnesans lo Zezi i donn pep Bondye sa mwayen pour konpran bann profesi Labib ki pa ankor ganny akonplir.—2 Kor. 1:20.
12, 13. (a) Dan ki fason Zezi i “lalimyer lemonn”? (b) Lefet ki bann disip Kris in ganny libere dan fernwanr spirityel, ki zot devret fer?
12 “Mwanmenm lalimyer lemonn.” (Lir Zan 8:12; 9:5.) Byen lontan avan Zezi ti ne lo later, profet Izai ti predir: “Sa pep ki ti pe mars dan teneb in vwar en gran lalimyer. Me bann ki pe reste dan pei gran fernwanr, lalimyer in klere lo zot.” (Iza. 9:2) Zapot Matye ti eksplike ki Zezi ti akonplir sa profesi kan I ti konmans prese kot i ti dir: “Sanz zot lavi, akoz Rwayonm Lesyel i pros!” (Mat. 4:16, 17) Minister Zezi ti anmenn lalimyer spirityel pour en kantite dimoun e liber zot avek bann fo lansennyman relizye. “Mon’n vin dan lemonn konman lalimyer pour ki tou sa ki krwar dan mwan i pa reste dan fernwanr.”—Zan 1:3-5; 12:46.
13 En kantite letan pli tar, zapot Pol ti dir avek son bann frer ek ser Kretyen: “Lontan zot ti viv dan fernwanr, me aprezan, zot in vin lalimyer dan Senyer. Alor, mars konman zanfan lalimyer.” (Efe. 5:8) Vi ki bann Kretyen in ganny libere dan fernwanr spirityel, zot oblize mars konman zanfan lalimyer. Sa i an armoni avek sa ki Zezi ti dir son bann disip dan Sermon lo Montanny: “Zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.” (Mat. 5:16) Eski ou telman apresye sa bann trezor spirityel ki ou’n dekouver dan Zezi, ki i donn ou lanvi pour koz lo la avek lezot oubyen par annan en bon kondwit?
14, 15. (a) Ki mannyer mouton ek lezot zannimo ti ganny enplike dan vre ladorasyon dan letan Labib? (b) Akoz Zezi i en trezor ki pa kapab ganny konpare dan son rol konman “Lanyo Bondye”?
14 Zezi i “Lanyo Bondye.” (Zan 1:29, 36) Tou dilon Labib, mouton i zwe en rol enportan pour ki pese bann imen i ganny pardonnen e pour zot kapab apros avek Bondye. Par egzanp, apre ki Abraam ti demontre ki i ti pare pour ofer son garson Izaak, i ti ganny demande pour pa fer Izaak ditor. Dan plas sakrifye Izaak i ti ganny donnen en mal mouton pour ofer konman sakrifis. (Zen. 22:12, 13) Ler bann Izraelit ti ganny delivre Lezip, la osi mouton ti zwe en rol enportan dan selebrasyon “lapak Zeova.” (Egz. 12:1-13) Deplis, Lalwa Moiz ti permet bann Zwif pour ofer diferan kalite sakrifis zannimo, enkli mouton ek kabri.—Egz. 29:38-42; Lev. 5:6, 7.
15 Napa okenn sakrifis setadir napa en sakrifis ki imen in ofer ki’n kapab liber bann dimoun pour touzour avek pese ek lanmor. (Ebr. 10:1-4) De lot kote Zezi i “Lanyo Bondye ki efas pese lemonn.” (Nou ki’n met an italik.) Zis sa fe tousel i montre ki Zezi i sa trezor ki annan plis valer ki okenn trezor ki’n deza ganny dekouver. Alor, i ti a byen si nou pran letan pour etidye o profon konsernan sa ranson e demontre lafwa dan sa zoli laranzman. Par fer sa, nou annan lespwar pour ganny en gran benediksyon ek rekonpans. Sa “pti troupo” pou resevwar laglwar ek loner dan lesyel e ‘lezot mouton’ pou ganny lavi eternel dan Paradi lo later.—Lik 12:32; Zan 6:40, 47; 10:16.
16, 17. Akoz i enportan pour nou konpran rol Zezi konman “sa enn ki linysater nou lafwa e sa enn ki anmenn li ziska perfeksyon?”
16 Zezi i “sa enn ki linisyater nou lafwa e ki anmenn li ziska perfeksyon.” (Lir Ebre 12:1, 2.) Dan Ebre sapit 11, nou trouv sa diskisyon pwisan ki zapot Pol ti fer lo lafwa. Sa sapit i eksplik an bref ki si sa lafwa e osi donn en lalis dimoun ki ti annan en lafwa egzanpler, tel parey Noe, Abraam, Sara, ek Rahab. Avek tousala antet, zapot Pol ti ankouraz son bann frer ek ser Kretyen pour “gard [zot] regar fikse lo Zezi, sa enn ki linisyater nou lafwa, e ki anmenn li ziska perfeksyon.” Akoz?
17 Kantmenm sa bann dimoun ki’n ganny mansyonnen dan Ebre sapit 11 ti annan lafwa dan promes Bondye, zot pa ti konn tou detay ki mannyer Bondye ti pou akonplir son promes atraver sa Mesi ek sa Rwayonm. Dan sa ka, zot lafwa pa ti konplet. Anfet, menm bann dimoun ki ti ganny servi par Zeova pour ekrir sa kantite profesi lo Mesi pa ti vreman konpran lenportans sa ki zot ti ekrir. (1 Pyer 1:10-12) Se zis atraver Zezi ki nou lafwa i kapab vin parfe oubyen konplet. Pa i vreman enportan ki nou byen konpran e rekonnet rol Zezi konman “sa enn ki linisyater nou lafwa, e ki anmenn li ziska perfeksyon”!
Kontinyen rode
18, 19. (a) Nonm lezot trezor spirityel ki’n ganny kasyet dan Kris. (b) Akoz nou devret kontinyen port nou latansyon lo Zezi pour ganny bann trezor spirityel?
18 Nou’n fek konsider zis detrwa rol presye ki Zezi i annan dan plan Bondye pour sov limanite. I annan ankor lezot trezor spirityel ki’n ganny kasyet dan Kris. Si nou rod zot, sa pou donn nou lazwa e anmenn en kantite byenfe. Par egzanp, zapot Pyer ti apel Zezi “sa enn ki donn lavi” ek “zetwal granmaten” ki leve. (Akt 3:15; 5:31; 2 Pyer 1:19) Labib i aplik sa term “Amenn” avek Zezi. (Rev. 3:14) Eski ou konpran sinifikasyon ek lenportans sa bann rol? Parey Zezi ti dir, “rode zot a trouve.”—Mat. 7:7.
19 Napa en lot dimoun apard Zezi ki’n annan en lavi sitan ranpli avek sinifikasyon e ki relye etrwatman avek nou byennet eternel. Dan li i annan bann trezor spirityel ki nenport dimoun ki rode i fasilman kapab ganny akse avek. Fotespere ou trouv lazwa e retir bokou byenfe pour dekouver sa bann trezor “ki’n [ganny] kasyet dan li.”
[Not anba lo paz]
^ par. 2 Proverb 2:1-6: “Mon garson, si ou resevwar mon bann parol e apresye mon bann komannman, pour port latansyon lo lasazes avek ou zorey, afen ki ou a ouver ou leker ver disernman; si, an plis ki sa, ou kriy lentelizans li menm e ou fer tann ou lavwa ver disernman li menm, si ou kontinyen rod li konmsi larzan, e ou kontinyen resers li konmsi ou pe resers en trezor kasyet, dan sa ka, ou pou konpran lakrent Zeova, e ou pou trouv konnesans Bondye. Parski Zeova i donn lasazes; dan son labous i annan konnesans ek disernman.”
Eski ou rapel?
• Ki kalite trezor bann Kretyen i ganny ankouraze pour rode?
• Akoz konsey zapot Pol pour bann Kolosyen i osi apropriye pour nou ozordi?
• Nonm e eksplik serten trezor spirityel ki’n ganny “kasyet” dan Kris.
[Kestyon]
[Portre lo paz 10]
Labib i parey en map ki gid nou ver bann larises ki’n ganny “kasyet” dan Kris