Konman ou kapab konpran Labib

Demann loter Labib pour ed ou

Ninfa ki reste Itali ti dir: “I ti annan en letan ki mon ti lir Labib avan al dormi. Mon ti fer sa akoz mon ti realize ki Labib i Parol Bondye e menm si mon pa ti kontan lir, mon ti anvi konnen kwa ki Bondye in dir dan Labib. Mon ti annan sa lentansyon pour lir Labib an antye. O konmansman mon ti vwar li fasil, me kan mon ti ariv lo serten pasaz ki mon ti vwar difisil, mon ti aret lir.”

ESKI ou’n eksperyans menm keksoz parey Ninfa? Bokou dimoun i kapab pas atraver sa menm leksperyans. An tou le ka, parey nou’n vwar dan lartik presedan, Zeova, Loter Labib, i anvi ou konpran son Parol. Alor, ki mannyer ou pou kapab konpran Labib? Premye keksoz pour fer se demann Bondye son led.

Bann zapot Zezi ti ganny konsidere konman bann zonm “senp san gran ledikasyon” akoz zot pa ti’n asiste lekol formasyon relizye kot bann gran profeser lalwa ti ansennyen. (Akt 4:13) Me de lot kote, Zezi ti asir son bann zapot ki zot ti pou kapab konpran Parol Bondye. Ki mannyer sa ? Zezi ti eksplike: “Me Konseyer, Lespri-sen ki mon Papa pou anvoye an mon non, pou ansenny zot tou keksoz.” (Zan 14:26) Bondye ti servi lespri sen, oubyen son lafors aktif, pour kree later ek tou sa ki vivan lo la. (Zenez 1:2) I ti osi servi sa lafors pour enspir apepre 40 ekriven pour rikord son bann panse dan Labib. (2 Pyer 1:20, 21) Sa menm lespri sen i disponib pour ed tou sa ki anvi konpran Labib.

Ki mannyer ou kapab resevwar lespri sen Bondye? Ou bezwen demann avek lafwa. Annefe, petet ou pou bezwen persiste dan ou demann. Zezi ti dir: “[Kontinyen] demande e zot a gannyen. Si, zot, . . . zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li.” (Lik 11:9, 13) Avek zenerozite Zeova pou donn lespri sen tou bann ki demann avek senserite. Sa lafors aktif pou kapab ed ou konpran sinifikasyon sa bann parol enspire ki’n ganny ekrir dan Labib sitan lontan. Lespri sen i osi kapab donn ou sa lasazes ki ou bezwen, pour konnen konman pour aplik sa mesaz pwisan dan ou lavi, ki trouve dan Labib.—Ebre 4:12; Zak 1:5, 6.

Alor, sak fwa ki ou pran letan pour lir Labib, priy Bondye e demann li son lespri sen pour ed ou konpran son Parol.