Eski ou kapab konpran Labib?

“Nou fanmir ti abitye lir Labib tou le Dimans. Mon pa ti tro vwar li gou. Mon ti konnen ki Labib i Parol Bondye, me preski tou sa ki mon ti lir ti difisil pour mwan konpran.”—Steven, Langleter.

“A laz 17 an mon ti esey lir Labib. Mon ti vwar li difisil pour konpran, alor mon ti arete.”—Valvanera, Lespanny.

“Mon’n deza lir Labib enn fwa, akoz konman en Katolik mon ti santi ki mon ti bezwen fer li. I ti pran mwan trwa-z-an pour lir Labib an antye! Me mon pa ti konpran preski nanryen ditou.”—Jo-Anne, Lostrali.

LABIB i ankor sa liv pli popiler dan lemonn. I pe kontinyen ganny vann plis ki tou lezot liv, plis dimoun i ganny akse avek, i dan plis langaz e dan plizyer format parey kaset, CD ek DVD plis ki oparavan. Kantmenm sa, bokou dimoun ki annan en Labib i vwar li difisil pour konpran sa liv. Eski ou osi ou santi parey?

Eski Bondye i anvi nou konpran son Parol?

Labib i dir: “Tou Lekritir i enspire par Bondye.” (2 Timote 3:16) Wi, se Bondye ki apel Zeova ki Loter Labib. Alors, eski i anvi nou konpran son Parol? Oubyen, eski i’n fer li sitan difisil pour ki zis serten dimoun privilezye, tel parey bann sef relizye ek bann spesyalis Labib ki kapab konpran Labib?

Annou konsider sa bann verse swivan ki sorti dan Labib:

“Sa komannman ki mon’n donn ou ozordi i pa tro difisil pour ou, ni tro lwen.” —Deterononm 30:11.

“Kan ou parol i ganny devwale i donn laklerte, i fer sa ki napa leksperyans konpran.”—Psonm 119:130.

“Dan sa menm moman Lespri-Sen ti ranpli Zezi avek lazwa e i ti dir, ‘Mon Papa, Senyer lesyel ek later, mon rann ou glwar akoz ou’n kasyet sa bann keksoz avek bann malen ek bann entelizan e ou’n revel zot avek bann pti zanfan.’”—Lik 10:21.

Definitivman Loter Labib i anvi ou konpran son Parol! Me selman, i ankor annan dimoun senser ki vwar sa liv difisil pour konpran. Kwa ki kapab ede? Sa bann lartik ki swiv i donn trwa sizesyon ki kapab ed ou konpran Labib.