Lavi eternel i en lespwar sorti kot Bondye
Lavi eternel i en lespwar sorti kot Bondye
“Lemonn antye in ganny kondannen pour vin en nanryen ditou . . . me avek en lespwar.”—ROM. 8:20, 21.
1, 2. (a) Akoz lespwar pour ganny lavi eternel lo later i enportan pour nou? (b) Akoz bokou dimoun i annan dout konsernan lavi eternel lo later?
PETET ou rapel sa lazwa ki ou ti resanti sa premye fwa ki ou ti aprann ki tre byento dimoun pou nepli vin vye e mor, me zot pou viv pour touzour lo later. (Zan 17:2, 3; Rev. 21:3, 4) I tre probab ou’n kontan pour partaz sa lespwar ki dan Labib avek lezot. Apre tou, lespwar pour ganny lavi eternel i en laspe vreman enportan dan sa bon nouvel ki nou anonse. I annan lefe lo lafason ki nou vwar lavi.
2 An zeneral, bann larelizyon Kretyen in inyor sa lespwar konsernan lavi eternel lo later. Labib i ansennyen ki nanm i mor, tandis ki lamazorite larelizyon i ansenny bann doktrin ki pa baze lo Labib, par dir ki zonm i annan en nanm imortel ki kontinyen viv dan lesyel apre lanmor. (Ezek. 18:20) Sa i fer alor ki bokou dimoun i annan dout konsernan lavi eternel lo later. Petet nou kapab demande: Eski Labib i siport sa lespwar? Si wi, kan ki Bondye ti revel li pour premye fwa avek bann imen?
“Kondannen pour vin en nanryen ditou . . . me avek en lespwar”
3. Ki mannyer plan Bondye pour bann imen ti evidan depi o konmansman listwar imen?
3 Depi o konmansman listwar imen, plan Zeova pour bann imen ti evidan. Bondye ti montre klerman ki Adan ti pou viv pour touzour si i ti obeisan. (Zen. 2:9, 17; 3:22) San dout, bann premye desandans Adan ti aprann konman imen in fer pour vin enparfe e sa ti ganny konfirmen par bann levidans ki ti aparan. I ti enposib pour reantre dan zarden Edenn akoz son larantre ti’n bloke. Bann dimoun ti alor vin vye e mor. (Zen. 3:23, 24) Avek letan ki ti pase, lakantite letan ki imen ti viv ti diminyen. Adan ti viv pour 930 an. Sem, en sirvivan Deliz, ti viv zis pour 600-z-an e son garson Arpaksad ti viv pour 438 an. Tera, papa Abraam, ti viv pour 205 an. Abraam ti viv pour 175 an, son garson Izaak ti viv 180-z-an e Zakob ti viv pour 147 an. (Zen. 5:5; 11:10-13, 32; 25:7; 35:28; 47:28) Dwatet bokou dimoun ti’n realize ki lakantite letan ki dimoun ti viv ti pe diminyen e sa ti vedir ki zot ti’n perdi sa loportinite pour ganny lavi eternel. Toudmenm, eski zot ti kapab annan lespwar pour reganny lavi eternel?
4. Akoz bann zonm fidel dan letan lontan ti annan rezon pour krwar ki Bondye ti pou redonn sa benediksyon ki Adan ti’n perdi?
4 Parol Bondye i dir: “Lemonn antye [bann imen] in ganny kondannen pour vin en nanryen ditou . . . me avek en lespwar.” (Rom. 8:20, 21) Ki lespwar? Sa premye profesi dan Labib ti endike ki en “desandans” ti pou ‘kraz latet sa serpan.’ (Lir Zenez 3:1-5, 15. *) Sa Desandans ti donn bann imen fidel en lespwar ki Bondye pa ti pou abandonn sa plan ki i ti annan pour zot. Atraver sa lespwar, bann zonm parey Abel ek Noe ti annan tou rezon pour krwar ki Bondye ti pou redonn sa benediksyon ki Adan ti’n perdi. Sa bann zonm ti’n kapab konpran ki versman disan ti pou enplike pour sa ‘desandans ganny kraze lo talon.’—Zen. 4:4; 8:20; Ebr. 11:4.
5. Kwa ki montre ki Abraam ti annan lafwa dan rezireksyon?
5 Mazin Abraam. Ler i ti pe ganny teste, Abraam ti pare pour “ofer Izaak . . . son sel Garson an sakrifis.” (Ebr. 11:17) Akoz i ti pare pour fer sa? (Lir Ebre 11:19) I ti krwar dan rezireksyon! Abraam ti annan rezon pour krwar dan rezireksyon. Apre tou, Zeova ti’n redonn Abraam abilite pour fer zanfan e ti’n fer li posib pour li ek son madanm Sara kapab ganny en garson, menm dan zot vye zour. (Zen. 18:10-14; 21:1-3; Rom. 4:19-21) Abraam ti osi annan parol Zeova. Bondye ti’n dir li: “Sa ki pou ganny apele ou desandans pou sorti atraver Izaak.” (Zen. 21:12) Alor, Abraam ti annan bann bon rezon pour ekspekte ki Bondye ti pou resisit Izaak.
6, 7. (a) Ki lalyans Zeova ti fer avek Abraam? (b) Ki mannyer sa promes ki Zeova ti fer avek Abraam i donn bann imen lespwar?
6 Lefet ki Abraam ti annan en lafwa vreman remarkab, Zeova ti fer en lalyans avek li konsernan son “desandans.” (Lir Zenez 22:18. *) Zezi Kri ti parti prensipal sa “desandans.” (Gal. 3:16) Zeova ti’n dir Abraam ki son “desandans” ti pou vin bokou “parey zetwal dan lesyel e parey gren disab o bor lanmer,” andotmo en sif ki Abraam pa ti konnen. (Zen. 22:17) Parkont, pli tar sa sif ti ganny revele. Zezi Kri ansanm avek sa 144,000 ki pou diriz avek li dan son Rwayonm, zot form sa “desandans.” (Gal. 3:29; Rev. 7:4; 14:1) Rwayonm Bondye kot Kris i dirize konman lerwa pou ganny servi pour ki “tou nasyon lo later pou . . . ganny beni.”
7 I pa ti posib pour Abraam konpran tou sa ki sa lalyans ki Zeova ti’n fer avek li ti sinifye. Labib i dir toudmenm ki “Abraam ti pe esper sa lavil avek fondasyon solid.” (Ebr. 11:10) Sa lavil i Rwayonm Bondye. Pour ganny bann benediksyon anba sa Rwayonm, Abraam ti pou bezwen reviv ankor. I pou posib pour li ganny lavi eternel atraver rezireksyon. Pareyman, i pou posib pour bann dimoun ki sirviv Armagedon ouswa bann ki pou resisite, ganny lavi eternel.—Rev. 7:9, 14; 20:12-14.
“Lespri . . . in pous mwan”
8, 9. Akoz liv Zob pa zis en resi lo leprev en sel zonm?
8 Ant sa letan ki Zozef, aryer pti zanfan Abraam ek letan ki profet Moiz ti pe viv, i ti annan en zonm ki ti apel Zob. Liv Zob ki dan Labib, ki tre probab ti ganny ekrir par Moiz, i eksplike akoz Zeova ti permet Zob soufer e ki mannyer zafer ti fini pour li. Parkont, liv Zob pa zis en resi konsernan leprev en sel zonm; i santre lo bann kestyon ki vreman enportan pour bann imen ek lanz. Sa liv i fer nou konpran ki Zeova i egzers son souvrennte dan en fason drwat. I osi montre ki lentegrite ek lespwar tou serviter Bondye lo later konsernan lavi eternel, i enplike dan sa kestyon ki ti ganny souleve dan zarden Edenn. Menm si Zob pa ti konpran sa kestyon, i pa ti les son trwa konpanyon fer li krwar ki i pa ti’n reisi gard son lentegrite. (Zob 27:5) Sa i devret ranforsi nou lafwa e ed nou realize ki nou kapab gard nou lentegrite e siport souvrennte Zeova.
9 Apre ki sa trwa swadizan konsolater ti’n fini koze, “Eliou garson Barakel en Bouzit ti reponn.” Kwa ki ti pous li pour koze? I ti dir: “Mon’n ranpli avek mo.” “Lespri dan mwan in pous mwan.” (Zob 32:5, 6, 18) Menm si sa ki Eliou ti dir anba lenspirasyon ti ganny akonplir kan leprev Zob ti terminen, son parol i osi annan en pli gran sinifikasyon pour lezot. I donn lespwar tou bann dimoun ki gard zot lentegrite.
10. Kwa ki montre ki mesaz ki Zeova i pas avek en dimoun i parfwa aplik pour bann imen an zeneral?
10 Parfwa Zeova i pas en mesaz avek en dimoun, ki osi aplik pour tou bann imen an zeneral. Nou kapab vwar sa dan sa profesi Danyel ki enplik rev lerwa Babilonn, Neboukadnetsar, konsernan en gro pye dibwa ki ti ganny koupe. (Dan. 4:10-27) I vre ki lakonplisman sa rev ti annan pour fer avek Neboukadnetsar, me i ti pe osi montre ki i ti pou annan en pli gran lakonplisman. I ti pe endike ki dominasyon Bondye lo later ti pou ganny egzerse atraver en rwayonm sorti dan laliny desandans Lerwa David, e i ti pou reganny manifeste apre en peryod letan 2,520 lannen ki ti konmans an 607 A.N.L. * Souvrennte Bondye lo later ti konmans reganny egzerse apre ki Zezi Kri ti ganny plase konman Lerwa dan lesyel an 1914. Zis mazinen konman dominasyon Rwayonm Bondye pou byento akonplir lespwar bann imen obeisan!
“Pa les li desann dan trou!”
11. Ki parol Eliou ti endike lo Bondye?
11 Pour reponn Zob, Eliou ti koz lo “en mesaze, en portparol, enn dan mil, pour fer zonm konn son ladrwatir.” Me si sa mesaze “i enplor Bondye pour ki i kapab pran plezir dan li”? Eliou ti dir: “Alor, i [Bondye] pou donn li son faver e dir, ‘Pa les li desann dan trou! Mon’n trouv en ranson! Ki son laser i vin pli fre ki dan son zenes; ki i reganny viger bann zour son zenes.’” (Zob 33:23-26) Sa bann parol i montre ki Bondye ti vreman pare pour aksepte “en ranson” delapar bann imen ki repantir.—Zob 33:24.
12. Ki lespwar parol Eliou i donn bann imen an zeneral?
12 I tre probab ki Eliou pa ti totalman konpran sinifikasyon sa parol ki i ti’n ganny enspire pour dir konsernan sa ranson, zis parey bann profet pa ti konpran tou sa ki zot ti ekrir. (Dan. 12:8; 1 Pyer 1:10-12) Kantmenm sa, parol Eliou ti donn lespwar ki en zour Bondye ti pou aksepte en ranson e liber bann imen avek sa prosesis kot imen i vin vye e mor. Parol Eliou ti donn en lespwar merveye pour lavi eternel. Liv Zob osi i montre ki i pou annan en rezireksyon.—Zob 14:14, 15.
13. Ki parol Eliou i vedir pour bann Kretyen?
13 Ozordi, parol Eliou i kontinyen annan valer pour plizyer milyon Kretyen ki annan lespwar pour sirviv destriksyon sa lemonn ki nou pe viv ladan konmela. Bann dimoun aze parmi bann sirvivan pou retourn zenn ankor. (Rev. 7:9, 10, 14-17) Deplis, lespwar pour retrouv bann dimoun ki pou resisite e ki pou’n revin zenn i kontinyen reste en plezir pour bann dimoun fidel. Byensir, pour bann Kretyen swazir ganny lavi imortel dan lesyel e pour ‘lezot mouton’ Zezi ganny lavi eternel lo later, tou i depan lo si zot annan lafwa dan sakrifis Kris.—Zan 10:16; Rom. 6:23.
Lanmor pou ganny retire lo later
14. Kwa ki montre ki en keksoz pli gran ki Lalwa Moiz ti neseser pour bann Izraelit annan sa lespwar pour ganny lavi eternel?
14 Desandans Abraam ti vin en nasyon endepandan kan zot ti antre dan en lalyans avek Bondye. Kan Zeova ti pe donn zot Lalwa, i ti dir: “Zot devret gard mon bann lalwa ek mon bann zizman, si en zonm i fer sa, i devret osi viv gras a zot.” (Lev. 18:5) Me vi ki zot pa ti kapab viv an armoni avek standar parfe konsernan Lalwa, bann Izraelit ti ganny kondannen par Lalwa e zot ti pou bezwen ganny libere avek sa kondannasyon.—Gal. 3:13.
15. Konsernan ki benediksyon David ti ganny enspire pour ekrir lo la?
15 Apre Moiz, Zeova ti enspir lezot ekriven Labib pour koz lo lespwar lavi eternel. (Ps. 21:4; 37:29) Par egzanp, pour konklir en psonm, psalmis David ti koz konsernan bann vre adorater Bondye ki pou reini kot montanny Siyon avek sa bann parol: “Zeova in donn lord ki son benediksyon pou laba, wi lavi pour en letan endefini.”—Ps. 133:3.
16. Atraver Izai, ki Zeova ti promet konsernan lavenir “later antye”?
16 Zeova ti enspir Izai pour profetiz konsernan lavi eternel lo later. (Lir Izai 25:7, 8. *) Parey en keksoz ki anvlop oubyen touf en lot, konparab avek en blennket, pese ek lanmor i parey en fardo lour lo limanite. Zeova i asir son pep ki pese ek lanmor pou ganny eliminen, oubyen retire, “lo later antye.”
17. Ki rol profetik Mesi i annan ki fer li posib pour ganny lavi eternel?
17 Egzamin osi sa prosedir ki ganny spesifye dan Lalwa Moiz konsernan kabri pour Azazel. En fwa par an, Zour Propisyasyon, gran pret ‘ti plas tou le de son lanmen lo latet en kabri vivan e konfes avek li fot bann Izraelit e i ti met zot lo latet sa kabri e sa kabri ti anmenn tou zot fot avek li dan en pei dezer.’ (Lev. 16:7-10, 21, 22) Izai ti predir larive sa Mesi ki ti pou zwe en rol parey e anmenn “maladi,” “douler” e “menm pese bokou dimoun.” Sa ti pou alor fer li posib pour ganny lavi eternel.—Lir Izai 53:4-6, 12. *
18, 19. Ki lespwar ki ganny fer resorti dan Izai 26:19 ek Danyel 12:13?
18 Atraver Izai, Zeova ti dir son pep: “Ou bann mor pou viv. En kadav pour mwan, zot pou leve. Leve e kriye avek lazwa, zot ki reste dan lapousyer! Parski ou laroze i parey laroze bann mov, e menm bann ki napa lafors dan lanmor, later pou donn zot nesans.” (Iza. 26:19) Lekritir Ebre i montre klerman ki i annan en lespwar pour rezireksyon ek lavi eternel lo later. Par egzanp, kan Danyel ti pros 100-t-an, Zeova ti asir li: “Ou pou repoze, me ou pou debout pour ganny ou par alafen bann zour.”—Dan. 12:13.
19 Akoz lespwar ki i ti annan dan rezireksyon, Mart ti kapab dir Zezi sa parol konsernan son frer ki ti’n mor: “Mon konnen ki i pou resisite zour larezireksyon.” (Zan 11:24) Eski lansennyman Zezi ek lekritir enspire son bann disip in sanz sa lespwar? Eski lavi eternel lo later i ankor sa lespwar ki Zeova i ofer limanite? Nou pou egzamin larepons sa bann kestyon dan lot lartik.
[Not anba lo paz]
^ par. 4 Zenez 3:15: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.”
^ par. 6 Zenez 22:18: “Atraver ou desandans tou nasyon lo later pou sirman ganny beni, parski ou’n ekout mwan.”
^ par. 10 Vwar sapit 6 dan liv Pay Attention to Daniel’s Prophecy!, pibliye par Temwen Zeova.
^ par. 16 Izai 25:7, 8: “Wi, dan sa montanny i pou anval sa vwal ki pe kouver bann nasyon ek sa latwal ki pe anvlop tou bann nasyon. I pou anval lanmor pour touzour, e Souvren Senyer Zeova pou sirman eswiy larm lo tou figir. E bann repros kont son pep i pou retire lo later antye akoz Zeova li menm in dir.”
^ par. 17 Izai 53:4-6, 12: “Vreman i’n anmenn nou maladi ek nou soufrans. Me nou, nou’n mepriz li e konsider li konmsi Bondye ti’n frap li. I ti ganny perse pour nou lofans; I ti ganny kraze pour nou bann fot. Pinisyon ki ti sipoze anmenn lape pour nou i’n vin lo li, e akoz son bann blesir nou’n ganny geri. Parey bann mouton nou tou nou ti bann dimoun eran, sakenn ti pe mars dan son prop semen; e Zeova li menm in fer ki nou tou nou larg nou fot lo sa enn. Se pour sa rezon ki mon pou donn li en par parmi plizyer e i pou al avek sa ki reste parmi bann ki pwisan parski i’n ofer son lavi pour mor e i’n ganny konte parmi bann ki komet lofans e li menm in anmenn pese bokou dimoun e i’n konmans entervenir pour bann ki komet lofans.”
Eski ou kapab eksplike?
• Lo baz ki lespwar bann imen ti ganny “kondannen pour vin en nanryen ditou”?
• Kwa ki montre ki Abraam ti annan lespwar dan rezireksyon?
• Ki lespwar parol ki Eliou ti dir Zob i donn bann imen?
• Ki mannyer Lekritir Ebre i met lanfaz lo lespwar rezireksyon ek lavi eternel lo later?
[Kestyon]
[Portre lo paz 11]
Parol ki Eliou ti dir Zob i donn lespwar ki zonm pou ganny libere avek sa prosesis ki fer imen vin vye e mor
[Portre lo paz 12]
Danyel ti ganny sa lasirans ki ‘i ti pou debout pour ganny son par alafen bann zour’