Gard sa menm latitid ki Kris ti annan
Gard sa menm latitid ki Kris ti annan
“Annan sa menm latitid ki Kris ti annan.”—ROM. 15:5, NW.
1. Akoz nou devret fer zefor pour adopte menm latitid ki Kris?
“ZEZI KRI ti dir: “Vin kot mwan. . . Aksepte mon legzanp akoz mon dou e mon annan limilite dan mon leker e zot a ganny repo.” (Mat. 11:28, 29) Sa lenvitasyon ranpli avek lanmour i eksprim byen latitid ki Zezi ti annan. Napa okenn imen ki kapab donn en pli bon legzanp pour swiv. Kantmenm i ti Garson Bondye e annan bokou pwisans ek lotorite, Zezi ti montre ki i ti konpran santiman bann dimoun ki ti sirtou dan bezwen e i ti tret zot avek tandres.
2. Ki sa senk laspe nou pou egzaminen konsernan latitid Zezi?
2 Dan sa lartik ek sa de lezot ki pou swiv, nou pou vwar ki mannyer nou kapab devlop e gard menm latitid ki Zezi ti annan e ki mannyer pour reflekte “Lespri Kris” dan nou lavi. (1 Kor. 2:16) Nou pou konsantre lo senk laspe: Ladouser ek limilite Zezi, son labonte, son lobeisans anver Bondye, son kouraz ek son lanmour ki pa zanmen sanze.
Aprann avek Zezi ki mannyer pour demontre ladouser
3. (a) Ki sa leson lo limilite Zezi ti ansenny son bann disip? (b) Ki mannyer Zezi ti reazir ler i ti rekonnet febles son bann disip?
3 Zezi, Garson parfe Bondye, ti volonterman vin lo later pour fer lavolonte son Papa parmi bann dimoun enparfe e peser. Serten parmi sa bann dimoun ti pou touy li pli tar. Me, Zezi ti touzour gard son lazwa e annan kontrol lo son lekor. (1 Pyer 2:21-23) Ler nou “gard nou regar fikse” lo legzanp Zezi, sa i kapab ed nou pour azir parey li ler defo ek lenperfeksyon lezot i afekte nou. (Ebr. 12:2) Zezi ti envit son bann disip pour vin anba son zoug, setadir aksepte son legzanp oubyen aprann avek li. (Mat. 11:29) Ki zot ti pou kapab aprann? En keksoz ki zot ti kapab aprann se ki Zezi ti dou e i annan pasyans avek son bann disip malgre zot defo. Sa zour swar avan son lanmor, Zezi ti lav lipye son bann disip e par fer sa i ti pe ansenny zot pour “annan limilite dan zot leker,” en leson ki zot pa ti pou zanmen bliye. (Lir Zan 13:14-17.) Pli tar, ler Pyer, Zak ek Zan pa ti reisi “veye,” dan en fason zantiy, Zezi ti fer zot vwar ki i ti’n rekonnet zot febles. I ti demande: “Simon ou dormi? . . . Veye e priye pour zot pa tonm dan tantasyon. Lespri i for me laser i feb.”—Mark 14:32-38.
4, 5. Ki mannyer legzanp Zezi i kapab ed nou pour byen reazir anver defo lezot?
4 Ki mannyer nou reazir si enn parmi nou bann frer ek ser i annan sa tandans pour fer konpetisyon, ofans vitman, oubyen tarde pour aplik konsey sorti kot bann ansyen ouswa “lesklav fidel e pridan.” (Mat. 24:45-47, NW) Petet nou vwar li normal pour aksepte defo bann dimoun dan sa lemonn Satan, me ler nou bann frer ek ser ki annan sa bann lenperfeksyon sa i kapab fer nou perdi pasyans. Si lenperfeksyon lezot i kapab fasilman fatig nou, nou bezwen demann nou lekor, ‘Ki mannyer mon kapab pli byen reflekte “Lespri Kris”?’ Pa bliye ki Zezi pa ti ankoler avek son bann disip, menm si i ti evidan ki a en serten degre zot ti feb spirityelman.
5 Annou egzamin legzanp zapot Pyer. Ler Zezi ti envit Pyer pour sorti dan bato e mars lo delo pour vin kot Li, se sanmenm ki Pyer ti fer pour en pti pe letan. Me ler Pyer ti remark divan, i ti konmans koule. Eski Zezi ti ankoler avek li, e dir li: “I bon pou ou! Fotespere ou’n aprann en leson.” Non! “Deswit Zezi ti anvoy lanmen, atrap li e ti dir avek li, ‘Zonm lafwa feb! akoz ou’n doute?’” (Mat. 14:28-31) Si zanmen i arive ki nou fer fas avek en frer ki annan en lafwa feb, eski nou pou kapab anvoy nou lanmen dan en sans senbolik e ed li pour ganny plis lafwa? Sa i sirman en legzanp ki montre nou klerman ki Zezi ti demontre ladouser anver Pyer.
6. Ki leson Zezi ti ansenny son bann zapot konsernan vin enportan?
6 Pyer avek lezot zapot ti toultan pe dispit pour rode lekel ki ti pli enportan parmi zot. Zak ek Zan ti anvi asiz enn lo kote drwat Zezi e lot lo son kote gos dan son Rwayonm. Kan Pyer ek lezot zapot ti tann sa, zot ti ankoler. Zezi ti konnen ki posibleman zot ti’n devlop sa latitid akoz sa sosyete ki zot ti grandi ladan. Zezi ti apel zot, e i ti dir: “Zot konnen ki bann ki konmann bann nasyon i domin lo zot konman met, e bann ki sef i fer santi zot lotorite. Me i pa devret koumsa parmi zot. O kontrer si enn parmi zot i oule vin enportan i bezwen vin zot serviter. E sa ki oule vin premye parmi zot i bezwen vin lesklav zot tou.” Apre Zezi ti sit son prop legzanp: “Dan sa menm fason ki Fis-de-Lonm pa’n vin pour ganny servi, me pour servi e donn son lavi konman pri pour liberasyon bokou dimoun.”—Mat. 20:20-28.
7. Ki mannyer sakenn ant nou i kapab kontribye pour promot linite dan kongregasyon?
7 Ler nou reflesir lo limilite ki Zezi ti annan, i kapab ed nou pour azir konman sa enn ki “pli pti” parmi nou bann frer. (Lik 9:46-48) Par fer sa nou pou promot linite. Parey en Papa ki annan en gran fanmir, Zeova i anvi ki son bann zanfan i “reste ansanm dan linite,” e annan en bon relasyon antre zot. (Ps. 133:1) Zezi ti priy avek son Papa pour ki tou vre Kretyen i ini, pour ki “lemonn i a konnen ki se ou ki’n anvoy mwan, e ki ou [“kontan zot parey ou,” NW] kontan mwan.” (Zan 17:23) Alor, linite ki annan antre nou i idantifye nou konman bann disip Kris. Pour annan sa kalite linite, nou bezwen vwar lenperfeksyon lezot parey Zezi ti vwar. Zezi ti pare pour pardonnen e i ti ansenny lezot ki zis ler nou pare pour pardonnen ki nou kapab ganny pardonnen.—Lir Matye 6:14, 15.
8. Ki nou kapab aprann avek legzanp bann ki pe servi Bondye depi lontan?
8 Nou osi nou kapab aprann bokou par imit lafwa sa bann ki pe imit legzanp Kris depi lontan. Parey Zezi, sa bann serviter i souvan montre ki zot konpran lenperfeksyon lezot. Zot in aprann ki demontre konpasyon parey Zezi ti demontre, pa zis ed zot pour “siport febles bann ki feb,” me osi pour promot linite. Deplis, i ankouraz kongregasyon antye pour reflekte latitid ki Kris ti annan. Zot oule menm keksoz pour zot bann frer ek ser parey zapot Pol ti oule pour bann Kretyen Ronm: “Ki Bondye, ki donn pasyans ek konsolasyon, [“i fer zot annan sa menm latitid ki Kris ti annan,” NW], pour ki zot tou ansanm, avek en sel lavwa, zot rann glwar Bondye, Papa nou Senyer Zezi-Kri.” (Rom. 15:1, 5, 6) Wi, nou ladorasyon dan linite i anmenn loner pour Zeova.
9. Akoz nou bezwen lespri sen pour nou kapab imit legzanp Zezi?
9 Zezi ti relye “limilite” avek ladouser, ki form parti fri lespri sen Bondye. Alor, apar ki zis etidye legzanp Zezi, nou bezwen lespri sen Zeova, pour ki nou kapab byen imit son legzanp. Nou devret priye pour ganny lespri sen Bondye e fer bokou zefor pour devlop son fri setadir, “lanmour, lazwa, lape, pasyans, labonte, [“lafwa,” NW], ladouser, kontrol lo son prop lekor.” (Gal. 5:22, 23) Par swiv legzanp limilite ek ladouser ki Zezi in kite, nou pou fer plezir nou Papa Zeova dan lesyel.
Zezi ti tret lezot avek labonte
10. Ki mannyer Zezi ti demontre labonte?
10 Labonte osi, i form parti fri lespri. Zezi ti touzour tret lezot avek labonte. Tou bann dimoun ki ti senserman rod Zezi ti vwar ki “i ti byen akey zot.” (Lir Lik 9:11) Ki nou kapab aprann atraver labonte ki Zezi ti demontre? En dimoun bon i amikal, zantiy, konpran lezot, e annan konsiderasyon pour zot. Zezi ti sa kalite dimoun. I ti pran pitye pour bann dimoun akoz “zot ti fatige e dekouraze parey bann mouton ki napa berze.”—Mat. 9:35, 36.
11, 12. (a) Dekrir en sityasyon kot Zezi ti demontre konpasyon. (b) Ki nou kapab aprann avek sa legzanp ki nou fek vwar?
11 Zezi pa ti zis pran pitye e annan konpasyon pour bann dimoun me i ti osi fer sa ki i kapab pour ed zot. Annou vwar en legzanp. I ti annan en madanm ki ti pe soufer pour 12 an avek en lemorazi. I ti konnen dapre Lalwa Moiz ki li menm akoz son sityasyon i ti enpir e si en dimoun ti tous li sa dimoun osi ti pou vin enpir. (Lev. 15:25-27) Kantmenm sa, repitasyon ki Zezi ti annan e fason ki i ti tret lezot ti’n bezwen fer li annan sa lasirans ki i ti kapab e ti pou geri li. I ti kontinyen dir dan li menm: “Si zis mon arive tous son lenz mon pou geri.” I ti pran kouraz, i ti tous lenz Zezi e deswit i ti santi ki i ti’n ganny geri.
12 Zezi ti santi ki en dimoun ti’n tous li, i ti vire pour gete lekel. Sa madanm, ti per pangar i ganny reprimande akoz i ti’n kas Lalwa, an tranblan i ti tonb o bor son lipye e ti dir tou laverite. Eski Zezi ti reprimann sa pov madanm ki ti pe soufer? Ditou! O kontrer i ti reasir li an dizan: “Ma fiy ou lafwa in sov ou, al anpe.” (Mark 5:25-34) Pa sa madanm ti’n bezwen santi li ganny rekonforte par sa bann parol telman zantiy!
13. (a) Ki mannyer latitid Zezi ti diferan avek latitid bann Farizyen? (b) Ki mannyer Zezi ti tret bann zanfan?
13 Kontrerman avek bann Farizyen ki ti annan leker dir, Kris pa ti zanmen servi son lotorite pour met plis fardo lo lezot. (Mat. 23:4) O kontrer, avek labonte ek pasyans i ti ansenny lezot ki mannyer Zeova i azir. Zezi ti annan bokou lafeksyon pour son bann disip, i ti toultan demontre lanmour ek labonte anver zot, i ti en vre zanmi. (Prov. 17:17; Zan 15:11-15) Menm bann zanfan ti santi zot alez avek Zezi, sirman li osi i ti santi li alez avek zot. I pa ti zanmen tro okipe pour aret sa ki i ti pe fer pour pas letan avek bann pti manrmay. Vi ki bann disip Zezi ti ankor annan sa leta lespri, lekel ki pli enportan parmi zot parey bann sef relizye otour zot, en fwa zot ti esey anpes bann dimoun anmenn zot bann pti zanfan kot Zezi pour ki i tous zot. Zezi pa ti kontan ler son bann disip ti fer sa. I ti dir zot: “Les bann zanfan vin kot mwan, pa anpes zot, akoz Rwayonm Bondye i pour sa ki resanble zot.” Apre i ti servi bann zanfan pour donn en leson enportan, i ti dir: “An verite mon dir zot, sa ki pa resevwar Rwayonm Bondye parey en zanfan pa pou zanmen antre dan Rwayonm.”—Mark 10:13-15.
14. Ki byenfe bann zanfan i gannyen ler lezot i demontre lentere senser anver zot?
14 Pour en pti moman, zis mazinen ki mannyer serten sa bann zanfan ti pou santi plizyer lannen plitar ler zot in vin adilt, zot ti pou rapel lafason ki Zezi Kri ti ‘pran zot dan son lebra e beni zot.’ (Mark 10:16) Bann zanfan ozordi osi pou rapel avek lapresyasyon lafason ki bann ansyen ek lezot in demontre en lentere senser anver zot. Pli enportan ankor, bann zanfan dan kongregasyon ki lezot i demontre lentere dan zot depi ki zot ankor byen zenn i aprann ki lespri Zeova i lo son pep.
Demontre labonte dan en lemonn kot napa labonte
15. Akoz nou pa devret sirprann menm si bokou dimoun pa pe demontre labonte ozordi?
15 Bokou dimoun ozordi i santi ki zot napa letan pour demontre labonte anver lezot. Alor sak zour, kot lekol, dan travay, ler pe vwayaze, e dan predikasyon pep Zeova i bezwen fer fas avek leta lespri sa lemonn. En tel latitid i kapab dezapwent nou, me nou pa devret sirprann ki bann latitid koumsa i egziste. Zeova ti enspir zapot Pol pour averti nou ki lavi dan sa “bann dernyen zour” ti pou fer bann vre Kretyen antre an kontak avek bann dimoun “egois, . . . [ki] pour annan leker dir.”—2 Tim. 3:1-3.
16. Ki mannyer nou kapab demontre labonte dan kongregasyon parey Kris?
16 De lot kote, latmosfer parmi bann vre Kretyen i rekonfortan konpare avek sa lemonn kot napa labonte. Ler nou imit Zezi, nou tou nou kapab kontribye pour ki i annan sa bon latmosfer. Ki mannyer nou kapab fer sa? Deza i annan en kantite frer ek ser dan kongregasyon ki bezwen nou led ek lankourazman akoz zot pe fer fas avek en problenm lasante oubyen lezot sityasyon difisil. Dan bann “dernyen zour” sa bann problenm koumsa i kapab ogmante, me i pa fer premye fwa ki dimoun i fer fas avek sa kalite problenm. Dan letan Labib, bann Kretyen ti soufer avek menm kalite problenm. Pareyman led ki ti ganny donnen avek sa bann Kretyen dan sa letan i osi apropriye dan nou letan. Par egzanp zapot Pol ti ankouraz bann Kretyen pour “koz dan en fason konsolan avek bann ki dan depresyon e ed bann ki feb.” (1 Tesa. 5:14) Sa i enplik demontre labonte parey Kris.
17, 18. Nonm serten fason konman nou kapab imit labonte ki Zezi ti annan.
17 Bann Kretyen i annan sa responsabilite pour ‘ed bann frer ek ser avek labonte,’ pour tret zot parey Zezi ti pou tret zot, par demontre en lanmour ek lentere senser pour sa bann ki petet nou konnen depi en kantite lannen e bann ki petet nou pa’n zanmen deza zwenn oparavan. (3 Zan 5-8) Parey Zezi ti pran linisyativ pour demontre konpasyon anver lezot, nou osi nou devret toultan rekonfort kanmarad.—Iza. 32:2; Mat. 11:28-30.
18 Sakenn parmi nou i kapab demontre labonte dan en fason pratik par montre lezot ki nou senserman enterese avek zot e konpran zot problenm. Olye ki zis annan lafeksyon pour nou bann frer ek ser nou devret rod diferan fason ek loportinite pour ed zot. Pol ti ankouraz bann Kretyen an dizan: “Annan en gran lafeksyon pour kanmarad parey bann frer.” I ti osi azoute “setaki montre plis respe pour kanmarad.” (Rom. 12:10) Sa i vedir swiv legzanp Kris par tret lezot avek douser ek labonte e par aprann pour demontre “en lanmour senser.” (2 Kor. 6:6) Zapot Pol ti dekrir en tel lanmour Kretyen dan sa fason: “Lanmour i pasyan, e i bon; lanmour pa zalou ou vant son prop lekor.” (1 Kor. 13:4) Plito ki gard rankin anver nou bann frer ek ser, nou kapab swiv sa konsey: “Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.”—Efe. 4:32.
19. Ki bon rezilta nou gannyen ler nou demontre labonte parey Zezi?
19 Kan nou toultan fer zefor pour devlop e demontre labonte parey Zezi dan nenport sityasyon ki nou fer fas avek, nou ganny en kantite benediksyon. Lespri Zeova pou kapab byen travay lo kongregasyon, pour ed nou devlop fri lespri. An plis ki sa, ler nou swiv legzanp ki Zezi in kite e ed lezot pour fer parey, nou pou kontinyen annan lazwa ek linite dan nou ladorasyon ki fer plezir Bondye. Alors, annou kontinyen fer zefor pour reflekte ladouser ek labonte Zezi dan lafason ki nou azir anver lezot.
Eski ou kapab eksplike?
• Ki mannyer Zezi ti demontre ki i ti ‘dou e annan limilite dan son leker’?
• Ki mannyer Zezi ti demontre labonte?
• Nonm serten fason konman nou kapab demontre ladouser ek labonte parey Zezi dan sa lemonn enparfe.
[Kestyon]
[Portre lo paz 11]
Ler lafwa en frer i diminyen parey dan ka Pyer, eski nou pou pare pour ed li?
[Portre lo paz 13]
Ki mannyer ou kapab ede pour ki kongregasyon i vin en landrwa kot i annan labonte?