Lanmour Kris i motiv nou pour kontan lezot
Lanmour Kris i motiv nou pour kontan lezot
“Zezi . . . ti’n touzour kontan bann dimoun ki ti pour li dan lemonn, e i’n kontan zot ziska lafen.”—ZAN 13:1.
1, 2. (a) Ki mannyer lafason ki Zezi ti demontre lanmour ti vreman remarkab? (b) Ki laspe lo lanmour nou pou diskite dan sa lartik?
ZEZI in kit en legzanp parfe lo lanmour. Tou keksoz konsernan li, setadir son parol, son konportman, son lansennyman, e lefet ki i ti mor konman en sakrifis, tousala ti demontre son lanmour. Ziska lafen son lavi lo later, Zezi ti demontre lanmour anver sa bann ki i ti zwenn, sirtou anver son bann disip.
2 Par demontre lanmour dan en fason remarkab, Zezi in kit en tre bon legzanp pour son bann disip swiv. Sa i osi motiv nou pour demontre menm kalite lanmour anver nou bann frer ek ser spirityel e osi anver lezot. Dan sa lartik, nou pou vwar sa ki bann ansyen dan kongregasyon i kapab aprann avek Zezi konsernan lafason pour demontre lanmour anver bann ki fer fot menm bann fot grav. Nou pou osi diskit lo fason ki lanmour Zezi i motiv bann Kretyen pour ed zot bann frer ek ser dan bann moman difisil, ler i annan dezas natirel e letan zot malad.
3. Malgre ki Pyer ti fer en fot grav, ki mannyer Zezi ti tret li?
3 Sa zour swar avan lanmor Zezi, enn son prop zapot, Pyer ti renye li trwa fwa. (Mark 14:66-72) Parkont, enn fwa ki Pyer ti retournen parey Zezi ti’n predir, i ti pardonn li. Zezi ti konfye Pyer avek bann gro responsabilite. (Lik 22:32; Akt 2:14; 8:14-17; 10:44, 45) Ki nou aprann konsernan latitid ki Zezi ti annan anver bann dimoun ki fer fot grav?
Demontre menm latitid ki Kris anver bann dimoun ki fer fot
4. Dan ki sityasyon bann ansyen i sirtou bezwen demontre latitid ki Kris ti annan?
4 Enn parmi sa kantite sityasyon ki anmenn bokou sagren, kot nou bezwen annan menm latitid ki Kris, i ler en dimoun dan lafanmir oubyen dan kongregasyon i fer en fot grav. Malerezman, anmezir ki dernyen zour lemonn Satan pe ariv ver son lafen, leta lespri sa lemonn lo pwennvi moral pe degrade deplizanpli. Move latitid bann dimoun dan sa lemonn kot zot pa enterese si sa ki zot fer i byen ouswa mal i kapab fer zenn konman vye perdi zot determinasyon pour mars lo sa semen etrwat. Dan premye syek, serten ti bezwen ganny ekskli dan kongregasyon, e lezot ti ganny reprimande. I parey ozordi. (1 Kor. 5:11-13; 1 Tim. 5:20) Parkont, ler bann ansyen ki pran ka avek sa bann sityasyon i demontre lanmour parey Kris, sa i annan en gran lefe lo sa dimoun ki’n fer sa ki mal.
5. Ki mannyer bann ansyen i devret imit latitid ki Kris ti annan anver bann ki komet sa ki mal?
5 Parey Zezi, bann ansyen i bezwen toultan soutenir standar drwat Zeova. Par fer sa zot pou reflekte ladouser, labonte ek lanmour Zeova. Ler en dimoun ki senserman repantir i annan “leker brize” ek “lespri fatige” akoz fot ki i’n fer, petet i pa pou difisil pour bann ansyen “redres li avek en lespri ladouser.” (Ps. 34:18; Gal. 6:1) Me ki mannyer zot devret tret en dimoun ki refize obeir e montre zis en pti remordkonsyans oubyen ki san okenn remordkonsyans?
6. Ki bann ansyen i bezwen evite fer ler zot pe tret en ka kot en dimoun in fer sa ki mal e akoz?
6 Kan en dimoun ki’n fer sa ki mal i rezet konsey baze lo Labib oubyen esey blanm lezot pour fot ki i’n fer, sa i kapab fer bann ansyen e lezot ankoler. Lefet ki zot okouran domaz ki’n ganny fer par sa dimoun, zot kapab annan sa lanvi pour eksprim zot prop santiman konsernan son fason azir ek latitid. Parkont, lakoler i fer ditor e pa reflekte “Lespri Kris.” (1 Kor. 2:16; Lir Zak 1:19, 20.) Zezi ti averti tre klerman serten dimoun dan son letan, me i pa ti zanmen koz dan en fason dir oubyen avek lentasyon pour ofans lezot. (1 Pyer 2:23) O kontrer, i ti kit laport ouver pour ki bann peser i repantir e reganny faver Zeova. Byensir, enn bann rezon prensipal ki Zezi in vin dan lemonn ti “pour sov bann peser.”—1 Tim. 1:15.
7, 8. Ler en dimoun pe pas devan en komite disiplin kwa ki devret gid bann ansyen?
7 Ki mannyer legzanp Zezi i devret annan en lefe lo nou latitid dan ka kot en dimoun i bezwen ganny korize? Rapel byen ki bann dispozisyon an rapor avek komite disiplin dan kongregasyon ki trouve dan Labib, i protez troupo e i kapab motiv sa enn ki’n ganny disiplinen akoz i’n fer sa ki mal, repantir. (2 Kor. 2:6-8) I tris ki serten pa repantir e zot bezwen ganny ekskli, me i ankourazan pour konnen ki i annan bokou parmi bann ki’n ganny ekskli ki retourn ver Zeova ek kongregasyon plitar. Ler bann ansyen i demontre menm latitid ki Kris, zot ede pour fer li pli fasil pour sa dimoun sanz son latitid e pou finalman retournen. Plitar, serten parmi sa bann dimoun ki ti komet sa ki mal dan lepase pou nepli rapel tou bann verse ki bann ansyen ti montre zot, me zot pou sertennman rapel ki bann ansyen ti respekte zot dinyite e tret zot avek lanmour.
8 Alor bann ansyen i bezwen demontre “fri Lespri,” espesyalman lanmour parey Kris menm dan bann sityasyon kot i vreman difisil. (Gal. 5:22, 23) Zot pa devret taye pour ekskli en dimoun ki’n komet sa ki mal. Zot bezwen montre ki zot anvi ki sa enn ki’n fer fot i retourn kot Zeova. Alor, ler en dimoun ki fer fot i sanz son latitid, parey i leka pour bokou, i kapab vreman demontre rekonesans anver Zeova ek “bann kado zonm” ki’n fer li pli fasil pour li retourn dan kongregasyon.—Efe. 4:8, 11, 12.
Demontre lanmour Kretyen dan letan lafen
9. Donn en legzanp kot Zezi ti demontre lanmour anver son bann disip dan en fason pratik.
9 Lik i rakont en levennman remarkab kot Zezi ti demontre lanmour dan en fason pratik. Vi ki i ti konnen ki avek letan bann solda Romen ti pou anserkle lavil Zerizalenm e anpes okenn dimoun sove, avek lanmour, Zezi ti averti son bann disip: “Kan zot a war Zerizalenm antoure par bann larme, zot a konnen ki son destriksyon i pros.” Ki zot ti devret fer? Byen boner Zezi ti donn bann lenstriksyon kler e spesifik. “Alor, ki bann ki dan Zide i sov dan montanny, e ki bann ki dan lavil i sorti, e pa les bann ki dan lakanpanny antre dan lavil, akoz sa pou en bann zour vanzans, pour akonplir tou sa ki’n ekrir.” (Lik 21:20-22) Apre ki bann larme Romen ti antour lavil Zerizalenm lannen 66 N.L., bann serviter obeisan ti swiv sa bann lenstriksyon.
10, 11. Ki mannyer ler nou egzamin fason ki bann premye Kretyen ti sove pour kit Zerizalenm sa i kapab ed nou prepar nou pour “gran ladetres”?
10 Ler bann Kretyen ti sove pour kit Zerizalenm, zot ti bezwen demontre lanmour anver kanmarad parey Kris ti demontre anver zot. Zot ti sirman partaz nenport keksoz ki zot ti annan avek kanmarad. Me profesi Zezi ti annan en pli gran lakonplisman ki destriksyon sa ansyen lavil. I ti predir: “Sa pou en lepok [“gran ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Mat. 24:17, 18, 21) Avan e pandan sa “gran ladetres” ki pou arive byento, i kapab ki nou osi nou pou fer fas avek leprev oubyen mank serten keksoz lo plan materyel. Si nou annan menm latitid ki Kris, sa pou ed nou pour andire.
11 A sa moman nou pou bezwen swiv legzanp Zezi e demontre lanmour senser. An rapor avek sa, zapot Pol ti donn sa konsey: “Sakenn antre nou i devre esey fer plezir son prosen pour fer li vin pli for dan lafwa. Kris li pa ti esey rod sa ki ti fer li plezir . . . Ki Bondye, ki donn pasyans ek konsolasyon, [“i fer zot annan sa menm latitid ki Kris ti annan,” NW].”—Rom. 15:2, 3, 5.
12. Ki kalite lanmour nou bezwen devlope ozordi, e akoz?
12 Lanmour ki Zezi ti demontre anver Pyer, ti motiv li pour ankouraz bann Kretyen pour aprann “kontan zot bann frer senserman” e pour demontre ‘lobeisans pour laverite.’ Zot ti devret “kontan kanmarad bokou avek tou zot leker.” (1 Pyer 1:22) Ozordi, plis ki zanmen oparavan, nou bezwen devlop bann kalite parey Kris ti annan. Tou pep Bondye pe deza fer fas avek plis presyon. Personn pa devret met son konfyans dan okenn lorganizasyon dan sa lemonn, zis parey bann problenm tou resaman avek sistenm finans i klerman demontre. (Lir 1 Zan 2:15-17.) Plito, anmezir ki lafen sa sistenm i vin pli pros, nou bezwen apros pli pre avek Zeova ek nou bann frer ek ser dan kongregasyon, par devlop en lanmitye senser. Pol ti donn sa konsey: “Annan en gran lafeksyon pour kanmarad parey bann frer, e setaki montre plis respe pour kanmarad.” (Rom. 12:10) Zapot Pyer ti met plis lanfaz lo sa pwen, kan i ti dir: “Avan tou, zot devre annan en gran lanmour pour kanmarad parski lanmour i kouver en kantite pese.”—1 Pyer 4:8.
13-15. Ki mannyer serten frer ti demontre lanmour parey Kris apre bann dezas?
13 Temwen Zeova dan lemonn antye i ganny rekonnet par lanmour ki zot demontre parey Kris. Annou vwar legzanp bann Temwen ki ti volonter pour ede apre bann tanpet ek siklonn ti’n devaste en kantite landrwa dan sid Letazini an 2005. Motive par legzanp Zezi, i ti annan plis ki 20,000 volonter ki ti pare pour al ed zot bann frer ek ser ki ti bezwen led, parmi zot ti annan en kantite ki ti pe reste dan bann lakaz konfortab e annan en travay stab.
14 Dan en rezyon, lanmer ti mont apepre 10 met oter e kouver en zistans 80 kilomet. Ler delo ti desann, en tyer lakaz ek lezot batiman ti’n totalman andomaze. Bann Temwen sorti dan plizyer pei ki ti volonterman pare pour ede ti servi zot konpetans, zouti ensi ki lezot kalite materyo konstriksyon. Zot ti pare pour fer nenport travay ki ti neseser. De ser sorti dan menm fanmir ki vev, ti sarz zot bann bagaz dan en pikep e zot ti dray plis ki 3,000 kilomet pour al ede. Enn ant sa de ser in reste dan sa rezyon e pe kontinyen ed komite led sekour dan sa landrwa. I pe servi konman en pionye ordiner.
15 Plis ki 5,600 lakaz bann frer ek ser in ganny rekonstrir oubyen repare. Ki mannyer bann Temwen Zeova dan sa landrwa ti santi konsernan sa lanmour remarkab ki ti ganny demontre anver zot? En ser ki son lakaz ti ganny konpletman detrir ti bezwen al reste dan en pti karavann avek en twa ki ti koule e avek en stov ladan ki ti’n kase. Bann frer ti konstrir en lakaz senp me konfortab pour li. Ler i ti pe debout devan son lakaz nef e byen prop, i ti plere akoz i ti rekonesan anver Zeova ek son bann frer. Dan plizyer lezot ka, bann frer ek ser dan sa rezyon ki ti’n deplase e ki ti pe reste tanporerman dan en lot landrwa ti kontinyen reste dan sa menm landrwa pour en an ouswa plis kantmenm zot lakaz ti’n fini ganny rekonstrir. Akoz? Pour permet bann frer ek ser ki ti pe ede pour travay sekour ganny landrwa reste. Pa sa i en bon legzanp ki demontre latitid ki Kris ti annan!
Demontre latitid ki Kris ti annan anver bann malad
16, 17. Dan ki fason nou kapab reflekte latitid Kris anver bann malad?
16 Napa vreman bokou nou ki’n deza eksperyans en gran dezas natirel. Me preski nou tou nou bezwen fer fas avek problenm lasante, swa nou prop problenm lasante oubyen sa ki pour nou fanmir. Latitid ki Kris ti annan anver bann ki ti malad i servi konman en legzanp pour nou. Son lanmour ti motiv li pour pran pitye pour zot. Kan en lafoul ti anmenn bann dimoun ki ti malad kot li, “i ti geri tou bann ki ti malad.”—Mat. 8:16; 14:14.
17 Ozordi, bann Kretyen napa sa pouvwar pour geri, me parey Zezi zot demontre konpasyon anver bann ki malad. Ki mannyer zot demontre sa? Konman en levidans, bann ansyen i demontre ki zot annan latitid Kris par fer bann laranzman pour ed bann malad dan kongregasyon e fer sir ki sa led i ganny fourni, premyerman par swiv sa ki ganny mansyonnen dan Matye 25:39, 40. * (Lir.)
18. Ki mannyer de ser ti demontre lanmour senser anver en lot ser e avek ki rezilta?
18 Byensir, pa bezwen ki en dimoun i en ansyen pour fer dibyen lezot. Annou vwar legzanp Charlene ki ti annan 44 an, ki ti ganny kanser. I ti ganny dir ki i ti reste li 10 zour pour viv. Ler Sharon ek Nicolette de ser dan kongregasyon ti rekonnet ki i ti bezwen led e zot ti vwar ki kantite son msye ki ti byen devoue ti pe depanse fizikman e emosyonnelman pour son madanm, zot ti volonterman pare pour ed li tou dilon sa bann dernyen zour ki ti reste li pour viv. Charlene ti arive viv pour sis semenn olye dis zour, me sa de ser ti demontre zot lanmour anver li ziska lafen son lavi. Sharon i dir: “I difisil ler ou konnen ki en dimoun pa pour zanmen byen. Me, Zeova ti donn nou lafors. Sa leksperyans ti fer nou vin pli pros avek Zeova e avek kanmarad.” Msye Charlene i dir: “Mon pou toultan rapel ki mannyer sa de ser tre zantiy ti ed nou avek labonte. Zot motivasyon senser ek zot latitid pozitif ti fer sa dernyen leprev pli fasil pour mon madanm Charlene ki ti fidel e sa ti donn mwan lafors e soulaz mwan emosyonnelman, en keksoz ki mon ti vreman bezwen. Mon pou touzour rekonesan anver zot. Zot sakrifis ti fortifye mon lafwa dan Zeova e mon lanmour pour tou lasosyasyon bann frer.”
19, 20. (a) Ki sa senk laspe ki nou’n egzaminen an rapor avek latitid Kris? (b) Ki ou determinen pour fer?
19 Dan sa seri trwa lartik, nou’n konsider senk laspe konsernan latitid ki Zezi ti annan e ki mannyer nou kapab adopte son fason panse ek fason azir. Parey Zezi annou vin ‘dou e annan limilite dan nou leker.’ (Mat. 11:29) Fotespere nou osi nou fer zefor pour tret lezot avek labonte, menm kan zot lenperfeksyon ek febles i vin aparan. Avek kouraz annou obeir tou bann lalwa Zeova menm dan leprev.
20 Finalman, annou demontre lanmour parey Kris anver tou nou bann frer ek ser, parey Kris ti fer, “ziska lafen.” Sa kalite lanmour i idantifye nou konman bann vre disip Zezi. (Zan 13:1, 34, 35) Wi, annou “persevere dan lanmour pour kanmarad konman frer.” (Ebr. 13:1) Pa ezite! Servi ou lavi pour loue Zeova e pour ed lezot! Zeova pou beni ou bann zefor senser.
[Not anba lo paz 23]
^ par. 17 Vwar sa lartik “Do More Than Say: ‘Keep Warm and Well Fed’” dan Latour Veyer le 15 Oktob 1986 (Angle/Franse).
Eski ou kapab eksplike?
• Ki mannyer bann ansyen i kapab demontre latitid Kris anver bann ki’n fer sa ki mal?
• Akoz i sitan enportan pour imit lanmour Kris dan letan lafen?
• Ki mannyer nou kapab reflekte latitid Kris anver bann ki malad?
[Kestyon]
[Portre lo paz 19]
Bann ansyen i anvi ki bann ki’n fer sa ki mal i retourn kot Zeova
[Portre lo paz 21]
Ki mannyer bann Kretyen ki ti pe kit Zerizalenm ti reflekte latitid Kris?
[Portre lo paz 22]
Temwen Zeova i ganny rekonnet pour demontre lanmour parey Kris