Ador Bondye an fanmir i enportan pour kapab sirviv!

ZIS mazinen ki degre efreyan sa “gran zour Bondye Toupwisan” pou ete! (Rev. 16:14) Par servi bann lekspresyon senp e kler profet Mika ti ekrir: “Bann montanny pou fonn . . . , e bann plato pou fann an de, parey lasir dan dife, parey delo ki pe ganny vide sorti lo en landrwa apik.” (Mik. 1:4) Ki rezilta katastrofik sa bann ki pa pe servi Zeova pou sibir? Parol Bondye i dir: “Sa bann ki Zeova i touye pou depi en bout later ziska en lot bout later.”—Zer. 25:33.

Anliny avek sa kalite lavertisman, bann sef lafanmir, ki bokou parmi i bann paran tousel, i devret demann zot lekor sa kestyon konsernan zot zanfan ki ase gran pour rezonnen: ‘Eski zot pou sirviv Armagedon?’ Labib i asir nou ki zot pou kapab, si zot reste eveye e for spirityelman dapre zot laz.—Mat. 24:21.

Lenportans en letan pour ador Bondye an fanmir

Konman paran, fer sir ou fer tou sa ki ou kapab pour elve ou zanfan dan “ledikasyon ek lenstriksyon Senyer.” (Efe. 6:4) I vreman vreman enportan pour etidye Labib avek ou zanfan. Nou anvi nou zanfan i parey bann Kretyen Filip ki Pol ti felisite pour lapenn zot ti volonterman obeir Zeova. I ti ekrir: “Mon bann byenneme, parey ki zot in touzour obei mwan ler mon ti avek zot, i pli enportan pour obei mwan aprezan ki mon absan. Travay pour zot delivrans avek lafreyer ek reverans.”—Fili. 2:12.

Ler ou pa la, eski ou zanfan i obeir lalwa Zeova? Ler zot kot lekol? Ki mannyer ou kapab ed ou zanfan pour annan konfyans ki bann lalwa Zeova i saz, pour ki zot ganny gide par sa bann lalwa, menm kan ou pa avek zot?

Letid an fanmir i kapab zwe en gran rol pour batir lafwa ou zanfan dan sa domenn. Aprezan annou diskit lo trwa laspe enportan ki pou fer ou Letid an Fanmir en sikse.

Fer li regilyerman

Labib i montre ki bann lanz i ganny envite dan prezans Bondye dan en letan ki i’n fikse. (Zob 1:6) Fer parey avek ou zanfan. Swazir en zour ek ler fiks pour Letid an Fanmir e apre swiv sa progranm. An plis ki sa, fikse en lot letan apar, an ka en levennman san ekspekte i arive.

Anmezir letan i pase, pa fer ou letid an fanmir zis ler ou ganny letan. Rapel ki ou zanfan i ou letid Labib pli enportan. Me Satan ti pou kontan zot vin son viktim. (1 Pyer 5:8) Si, olye servi sa zour pour ador Bondye an fanmir ou pas li devan televizyon ouswa ou fer lezot aktivite ki pa enportan, Satan pou ranport laviktwar lo ou.—Efe. 5:15, 16; 6:12; Fili. 1:10.

I devret pratik

Sa zour ki’n ganny swazir pour ador Bondye an fanmir i devret plis ki zis en letan pour ranpli latet ou zanfan avek konnesans. Fer bokou zefor pour fer li pratik. Ki mannyer? Parler, swazir bann topik ki relye avek bann sityasyon ki ou zanfan pou fer fas avek dan bann zour ouswa semenn ki pe vini. Par egzanp, akoz ou pa enkli bann sesyon pour egzers bann prezantasyon pour predikasyon? Zanfan i kontan fer bann keksoz ki  zot fer byen. Ler zot egzers bann prezantasyon e mazin lo diferan fason pour sirmont lobzeksyon, sa pou ed zot annan plis konfidans ler zot partisip dan plizyer form predikasyon.—2 Tim. 2:15.

Ou osi kapab enkli bann demonstrasyon ki pou ed ou zanfan fer fas avek presyon sorti kot lezot zenn. Sapit 15 dan liv Questions Young People Ask—Answers That Work, Volim 2, i kapab ganny servi pour konmans en diskisyon an fanmir. Sa “Peer Pressure Planner” lo paz 132 ek 133 i donn serten sizesyon e osi donn ou zanfan loportinite pour eksprim son lekor. I annan en fraz anba lo paz 133 ki ankouraz bann zenn pour repet zot larepons avek enn zot paran ouswa en zanmi matir. De tanzantan, akoz ou pa fer sa bann repetisyon form parti ou Letid an Fanmir?

Letid an fanmir i donn loportinite paran pour met lanfaz lo byenfe bann lobzektif spirityel. An rapor avek sa, dan sapit 38 dan liv Young People Ask, Volim 2, i annan bann bon lenformasyon lo sa size. Ler pe diskit sa sapit, ed ou zanfan pour apresye ki servi zot lavi pour Zeova i sa pli meyer swa ki egziste. Ed ou zanfan pour annan sa dezir pour fer pionye, servi dan Betel, asiste Lekol Formasyon Ministeryel ouswa pourswiv lezot form servis a plen tan.

En parol lavertisman: Avek bon lentansyon antet, serten paran i konsantre tro bokou lo sa ki zot ti a kontan zot zanfan i vini e sa i fer ki zot tant pour neglize rekonnet sa ki zot zanfan pe deza fer. Byensir, i byen pour ankouraz ou zanfan pour etablir bann bon lobzektif parey servi dan Betel e travay konman misyonner. Me kan ou fer sa, fer atansyon ki ou pa pe irit ou zanfan avek ou bann ekspektasyon akoz sa i kapab fer li dekouraze. (Kol. 3:21) Touzour mazinen ki ou garson ouswa fiy i devret aprann kontan Zeova avek son leker e pa zis akoz ou’n dir li i devret kontan Bondye. (Mat. 22:37) Alor, rod bann fason pour felisit ou zanfan pour sa ki i pe fer byen e lit kont sa tandans pour tir lizye lo sa ki i pa pe fer. Devlop lapresyasyon pour tou sa ki Zeova in fer. Apre sa, les leker ou zanfan reazir anver labonte Zeova.

Fer li gou

Trwazyenm laspe enportan ki pou fer sa zour pour ador Bondye an fanmir reisi se pour fer li gou. Konman ou kapab fer sa? Petet dan serten moman ou kapab ekout en dram odyo ouswa gete e diskit lo en video ki Temwen Zeova in prodwir. Ouswa ou kapab lir en porsyon Labib ansanm e donn sak manm fanmir son bout spesifik pour lir.

Dan Latour Veyer ek Awake! i annan diferan lartik ki aparet tou le mwan ki kapab ganny servi pour konmans en diskisyon an fanmir. Par egzanp, ou kapab servi sa porsyon ki demann kestyon lopinyon lo paz 31 dan sak Awake! Tou le de mwan, dan Latour Veyer (Angle/Franse) i annan en pti devwar  ki annan pour tit “For Our Young People.” Vi ki i aparet tou le de mwan, sa mwan ki sa seri pa aparet i annan en lot ki ranplas li e sa i en seri pour bann pli zenn zanfan avek tit “Ansenny ou zanfan.”

Bann lartik dan seri “Young People Ask” ki ganny trouve dan Awake! i espesyalman enteres paran bann adolesan, parey sa liv Young People Ask, Volim 2. Kan pe servi sa liv, pa oubliy sa bwat ki alafen sak sapit ki demann bann kestyon lo pwennvi. Sa bwat i plis ki en revizyon. Kestyon dan sa bwat i kapab ganny servi konman size pour diskisyon an fanmir.

Me toudmenm fer atansyon ki ou pa fer ou letid an fanmir vin en moman pour bonbard ou zanfan avek kestyon. Par egzanp, pa esey fors ou zanfan pour lir aotvwa sa ki i’n ekrir lo bann paz “My Journal” ouswa dan lezot landrwa kot sa zanfan in ganny demande pour ekrir son panse dan sa liv. Lo paz 3 i annan en not pour bann paran ki montre ki pour bann adolesan ekrir dan zot liv onnetman, paran pa devret fouy dan zot liv san zot permisyon. Petet, pli tar zot pou pare pour koz avek ou lo sa ki zot in ekrir.

Si ou letid an fanmir i regilye, pratik e gou, Zeova pou beni ou zefor en kantite. Sa letan spesyal avek lafanmir pou kontribye pour ki bann ki ou kontan i reste for e aktif spirityelman.

[Bwat lo paz 31]

Kreativite

“Kan nou etidye avek nou de zenn fiy, mon msye ek mwan, nou diskit lo bann lenformasyon pour prepar en renyon kongregasyon e apre sa nou fer nou zanfan fer en desen ki rezim sa leson. Parler nou met an senn bann resi dan Labib ouswa fer repetisyon bann prezantasyon pour predikasyon. Nou adapte letid avek zot laz, fer li enteresan, pozitif e gou.”—J.M., Leta-z-ini.

“Pour ed garson en madanm ki mon etidye Labib avek pour konpran ki mannyer i ti ete pour lir bann roulo dan letan lontan, nou ti enprim liv Izai apre ki nou ti’n retir tou nimero sapit ek verse. Nou ti kol sa bann paz ansanm e apre atas en tib lo tou le de bout. Apre sa, sa pti garson ti esey fer sa ki Zezi ti fer dan sinagog dan Nazaret. Sa resi dan Lik 4:16-21 i rakonte ki Zezi ti ouver roulo dan Izai e trouv sa pasaz ki i ti pe rode. (Iza. 61:1, 2) Par kont, kan sa garson ti esey fer parey, i ti vwar li difisil pour trouv Izai 61 dan sa gran roulo ki ti napa nimero sapit ek verse. Enpresyonnen avek abilite ki Zezi ti annan pour servi byen roulo, sa garson ti dir: ‘Zezi ti ekstraordiner!’”—Y.T., Zapon.

[Portre lo paz 30]

Bann sesyon legzersis i kapab ed ou zanfan fer fas avek presyon lezot zenn

[Portre lo paz 31]

Fer bokou zefor pour ki sa letan ki ou ador Bondye an fanmir i gou