Eski lapovrete i vedir pa ganny laprouvasyon Bondye?

BONDYE ti dir bann Izraelit: “Napa personn parmi ou ki devret pov.” Sa ti akoz dan lalwa ki i ti donn zot, provizyon ti ganny fer pour pran swen avek bann pov e menm pour kennsel bann det. (Deterononm 15:1-4, 7-10) Alor, i pa ti devret annan okenn dimoun pov parmi bann Izraelit, parski Zeova ti’n promet pour beni zot. Me pour zot ganny benediksyon tou ti depan lo si zot ti obeir Lalwa e sa ti en keksoz ki zot pa ti reisi fer.

Me sa pa ti vedir ki bann ki ti annan en ptigin keksoz materyel ti ganny mwens laprouvasyon Bondye ki bann ki ti annan bokou. Bokou serviter fidel Bondye ti pov materyelman. Profet Amos ti en senp berze e ti fer travay labourer kan i ti annan sa demann. (Amos 1:1; 7:14) Dan letan profet Eliya, kan en lafanmin ti tap Izrael, Eliya ti bezwen depan lo lospitalite en vev ki ti pov. Eliya ek sa vev ti ganny soutenir ziska lafen sa lafamin par en ptigin lafarin ek delwil ki, par en mirak, Zeova ti anpes fini. Ni Eliya e ni sa vev pa ti vin ris, me Zeova ti fourni zot zis avek sa ki zot ti bezwen pour viv.—1 Lerwa 17:8-16.

Bann levennman san ekspekte i kapab fer en dimoun vin pov en sel kou. Maladi ek aksidan i kapab tanporerman oubyen dan en fason permanan anpes en dimoun travay, e lanmor i kapab les deryer bann vev ek orfelen. Me sa bann move sirkonstans pa vedir ki sa dimoun in perdi laprouvasyon Bondye. Sa resi lo Rit ek Naomi i en legzanp ankourazan lo swen ranpli avek lanmour ki Zeova i demontre pour bann ki dan bezwen. Menm si, Rit ek Naomi ti’n vin vreman pov akoz lanmor zot mari, Zeova ti beni zot e i ti fer provizyon pour zot ganny zot bezwen neseser.—Rit 1:1-6; 2:2-12; 4:13-17.

Alor i kler ki lapovrete i pa en siny ki Bondye pa aprouv nou. Bann ki fidel avek Zeova i kapab annan konfyans dan parol Lerwa David: “Mon ti en zenn onm, mon’n menm vin vye, e pourtan mon pa’n vwar okenn dimoun drwat ganny abandonnen konpletman, ni menm son desandans pe rod dipen.”—Psonm 37:25.

[Portre lo paz 8]

Menm si Rit ek Naomi ti pov Bondye ti beni zot e avek lanmour i ti pran swen avek zot