Eski larzan i sours vre boner?

SONIA ti ne Lespanny. Ler i ti ankor ptipti i ti asiste bann renyon Temwen Zeova avek son manman. Me ler i ti’n gran i ti al reste Lonn, Langleter, kot i ti finalman ganny en plas travay konman en envestiser dan lendistri finans.

Sonia ti kontan son travay. I ti pe fer bokou larzan e i ti envestir bann gran sonm larzan pour son bann kliyan. I ti en travay eksitan e Sonia ti fer byen son travay. Regilyerman i ti travay 18 erdtan par zour e parfwa i ti dormi zis pour de ou trwa-z-erdtan. Son travay ti son lavi. Me en sel kou son lavi ti sanze dan en fason trazik. Sonia ti ganny en latak sever petet akoz sa lavi ranpli avek presyon ki i ti pe anmennen. I ti annan zis trant an.

Sonia ti paralize lo en kote e bann dokter pa ti asire ki i ti pou reganny son abilite pour koze. Imedyatman son manman ti al Langleter pour pran swen avek li. Dek ki Sonia ti’n rekonmans marse, son manman ti dir li: “Mon pe al renyon e ou pou bezwen vin avek mwan akoz mon pa pou kapab les ou tousel.” Sonia ti dakor pour al avek li. Ki ti rezilta?

“Mon ti santi ki tou sa ki mon ti tande ti vre.” Sonia ti rapel: “I ti ekstraordiner, mon ti kontan pour aksepte en letid avek enn parmi sa kantite dimoun ki ti akey mwan sa premye fwa ki mon ti al Lasal Rwayonm. Bann dimoun ki mon ti konnen avan ti’n aret vizit mwan, me mon bann nouvo zanmi ti demontre lanmour ek lafeksyon pour mwan.”

Gradyelman, Sonia ti reganny son abilite pour koze, e vitman i ti osi fer progre lo plan spirityel. Dan mwens ki enn an, i ti batize. Bokou parmi son bann zanmi ti bann minis Kretyen a plen tan e i ti kapab vwar konman zot ti annan lazwa. Sonia ti reflesir: “Mwan osi mon anvi vin koumsa, mon anvi donn Zeova tou mon meyer!” Aprezan, Sonia pe travay konman en serviter a plen tan.

Ki Sonia in aprann atraver son leksperyans? “Kantmenm mon ti pe ganny en kantite larzan, mon ti anba bokou presyon e vi ki mon ti kapab perdi sa travay nenport ler, sa ti fer mwan enkyet e malere. Mon’n realize ki sa ki pli enportan dan lavi, se annan en bon relasyon avek mon Papa ki dan lesyel, Zeova. Aprezan mon vreman ere.”

Zapot Pol ti ekrir: “Lanmour larzan i rasin tou lemal. Serten dimoun, pour posed larzan in egare lwen avek lafwa e zot in met zot lekor dan en kantite tourman.” (1 Timote 6:10) Par son leksperyans, Sonia in kapab konfirm laverite sa parol.