Eski ou’n met letan dekote pour etidye Labib?

LANNEN pase, Konsey Direkter ti anons en azisteman dan renyon kongregasyon, kot sa ti pou permet annan plis letan pour etidye Labib e fer bann diskisyon an fanmir. Si ou en sef lafanmir, fer sir ki en letid an fanmir ki regilye, serye e oprofon i ganny fer avek ou madanm ek zanfan. Bann koup marye ki napa zanfan pou anvi servi sa letan pour etidye Labib ansanm. Bann frer ek ser selibater ki napa responsabilite familyal pou kapab byen servi sa letan pour fer letid personnel.

Bokou dimoun in eksprim zot lapresyasyon pour sa dispozisyon ki’n ganny pran pour annan en zour pour ador Bondye an fanmir. Par egzanp, Kevin, en ansyen ti ekrir: “Sa mo ‘mersi’ pa ase for pour eksprim santiman nou tou dan kongregasyon. Antre nou ansyen, nou’n diskit lo konman nou servi sa sware lib pour fer egzakteman sa ki Konsey Direkter in demann nou pour fer e sa se pour etidye avek nou fanmir.”

Jodi ki son msye i en ansyen ti ekrir: “Nou annan trwa fiy ki aze 15, 11 ek 2-z-an. Tou resaman nou’n asosye avek en kongregasyon ki servi langaz siny. I pran bokou letan ek zefor pour prepar tou renyon. Aprezan avek sa laranzman, nou annan en sware an plis ki permet nou konsantre lo ador Bondye an fanmir.”

John ek JoAnn i en koup marye ki pe servi konman pionye ordiner. Zot ti ekrir: “Nou letid fanmir ti souvan iregilye akoz nou ti bezwen rod en plas pour li dan nou progranm aktivite kongregasyon byen sarze. Sa nouvo laranzman i en kado sorti kot Zeova ki rafresi nou spirityelman si nou servi sa letan dan sa fason ki nou devret.”

Tony, en frer selibater dan son vennsenk an i met letan dekote tou le Mardi swar pour fer son letid personnel. I servi lezot zour dan lasemenn pour prepar renyon kongregasyon. Me Tony i dir: “Mon enpasyan pour Mardi arive.” Akoz? Tony i eksplike: “Sa sware i mon letan spesyal avek Zeova. Pour apepre de-z-erdtan, mon etidye bann pwen ki ranforsi mon relasyon avek Zeova. Lefet ki mon annan plis letan, mon pas bokou letan lo bann verse Labib ki mon lir.” Ki rezilta? “Konsey Zeova in tous oprofon dan mon leker plis ki oparavan.” Eski i kapab donn en legzanp? “Dan liv Insight mon ti lir lo lanmitye ant David ek Yonatann. Mon’n aprann bokou lo leta lespri sakrifis ki Yonatann ti annan. Son legzanp in ed mwan pour vwar pli klerman ki savedir vin en bon zanmi. Mon vreman enpasyan pour dekouver lezot ankor sa bann kalite pyer presye tou le Mardi swar!”

San dout, tou serviter Zeova pou benefisye en kantite ler zot servi byen sa letan an plis ki disponib pour etidye Labib seryezman e oprofon, endividyelman ouswa an fanmir.