Kestyon lekter

Ki Proverb 24:27 i ansennyen?

Pour konsey en zenn onm, ekriven Proverb ti dir: “Prepar ou travay an deor, e prepar li pour ou menm dan plantasyon. Apre ou devret osi batir ou lakour.” Ki pwen sa proverb ki’n ganny enspire pe fer resorti? I pe montre ki en zonm i devret prepar byen avan i marye e konmans son prop fanmir. I devret rekonnet responsabilite ki vin avek sa kalite langazman.

Dan lepase, parfwa leksplikasyon ki ti ganny donnen pour sa verse ti pe montre ki en msye e papa pa devret zis travay, me i devret batir oubyen ankouraz son fanmir, par egzanp atraver bann lenstriksyon spirityel. Menm si sa panse i vre e baze lo Labib, aparaman i pa sa pwen kle ki sa verse pe fer resorti. Akoz non? Egzamin de rezon.

Premyerman, sa verse pa pe koz lo batir dan sans pour ankouraz en fanmir ki deza egziste. O kontrer, sa lide i literalman vedir batir en lakaz. Sa mo ki’n ganny tradwir “batir” i osi kapab senbolik, avek lide pour konstrir, oubyen form en fanmir, andotmo i enplik maryaz e fer zanfan.

Dezyenmman, sa verse i met lanfaz lo fer keksoz dan lord, konmsi i pe dir: “Premyerman ou fer sa, apre ou fer sa.” Alor, eski sa proverb pe dir ki lezot responsabilite i pas avan bann responsabilite spirityel? Definitivman non!

Dan letan lontan, si en zonm ti anvi “batir [son] lakour” ouswa marye pour form en fanmir, i ti pou bezwen demann son lekor: ‘Eski mon pare pour pran swen e siport en madanm e okenn zanfan ki nou kapab annan pli tar?’ Avan form en fanmir, i ti annan travay pour li fer, i ti pou bezwen okip son plantasyon. Dan en fason kler e direk Today’s English Version in tradwir sa verse koumsa: “Pa batir ou lakaz e etablir en lakour, ziska ki ou plantasyon in pare, e ou asire ki ou pou ganny en reveni.” Eski sa menm prensip i aplikab ozordi?

Wi. En zonm ki anvi marye i bezwen prepar li byen pour sa responsabilite. Si i fit fizikman, i pou bezwen travay. Byensir, travay dir ki en zonm i fer pour pran swen avek son fanmir pa devret zis pour fourni bann keksoz materyel. Parol Bondye i montre ki en zonm ki pa pran swen avek bezwen fizik, emosyonnel e spirityel son fanmir i pli pir ki en non krwayan! (1 Tim. 5:8) Alor, ler pe prepar pour maryaz ek lavi fanmir, en zenn onm i devret demann son lekor sa bann kestyon: ‘Eski mon vreman pare pour pran swen avek en fanmir materyelman? Eski mon pare pour vin sef lakour dan domenn spirityel? Eski mon pou pran mon responsabilite pour kondwir en letid Labib regilye avek mon madanm ek zanfan?’ Parol Bondye i sirman met lanfaz lo sa bann responsabilite enportan.—Det. 6:6-8; Efe. 6:4.

Anfet, en zenn onm ki pe rod en madanm i devret reflesir byen lo sa prensip ki ganny trouve dan Proverb 24:27. Pareyman, i byen pour en zenn madanm demann son lekor si i pare pour bann responsabilite ki en madanm marye e manman i annan. En zenn koup i kapab demann zot lekor preski menm kestyon kan zot pe mazin fer zanfan. (Lik 14:28) Si pep Bondye i aplik sa bann gidans enspire, sa i kapab ed zot pour evite ganny bokou latet fermal e pour rezwir en lavi fanmir satisfezan.

[Ekstre lo paz 10]

Ki kestyon lo maryaz en zenn onm i devret demann son lekor?