Les zot ganny pouse par lespri
Les zot ganny pouse par lespri
“Pa fer pares, me travay avek lenerzi. Pouse par Lespri, servi Senyer avek en leker ranpli avek lantouzyas.”—ROM. 12:11.
1. Akoz bann Izraelit ti fer sakrifis zannimo ek lezot lofrann?
ZEOVA i apresye sakrifis ki son bann serviter i fer volonterman pour eksprim zot lanmour pour li ek zot soumisyon anver son lavolonte. Dan letan ansyen, i ti aksepte diferan kalite sakrifis zannimo ek lezot lofrann osi. Bann Izraelit ti fer sa bann sakrifis ek lofrann dapre Lalwa Moiz, pour ki zot pese i ganny pardonnen e pour eksprim zot remersiman. Dan kongregasyon Kretyen, Zeova pa demann nou pour ofer sa bann kalite sakrifis. Me, dan douzyenm sapit son let pour bann Kretyen Ronm, zapot Pol i montre ki Bondye i ankor pe ekspekte nou ofer bann sakrifis. Annou vwar ki mannyer.
En sakrifis vivan
2. Konman Kretyen, ki kalite lavi nou devret anmennen e ki sa i enplike?
2 Lir Romen 12:1, 2. O konmansman son let, Pol ti klerman demontre ki bann Kretyen swazir, ki swa Zwif oubyen bann ki sorti dan lezot nasyon, ti ganny konsidere drwat devan Bondye akoz zot lafwa, me pa akoz sa ki zot ti fer. (Rom. 1:16; 3:20-24) Dan sapit 12, Pol i eksplike ki bann Kretyen i devret montre zot rekonnesans par viv en lavi sakrifis. Pour atenn sa bi, nou bezwen sanz konpletman nou fason panse. Akoz lenperfeksyon ki nou’n erite, nou anba “lalwa pese ek lanmor.” (Rom. 8:2) Alor, nou bezwen ganny transformen afen “ki [nou] leker ek [nou] lespri i konpletman sanze,” setadir ki nou konpletman sanz tandans ki nou annan. (Efe. 4:23) Nou kapab arive fer sa kalite sanzman zis avek led Bondye ek son lespri sen. Sa i osi demann en gran zefor lo nou par, ki nou servi “nou kapasite pour rezonnen.” Sa i vedir ki nou bezwen fer nou mye pour “pa swiv bann koutim sa monn konmela,” ki’n perdi tou sans moral, son bann divertisman degradan, ek move fason panse.—Efe. 2:1-3.
3. Akoz nou partisip dan bann aktivite Kretyen?
3 Pol i osi envit nou pour servi nou “kapasite pour rezonnen” pour prouv avek nou menm “sa ki bon, sa ki fer [Bondye] plezir, sa ki parfe.” Akoz nou lir Labib sak zour, medit lo sa ki nou lir, priye, asiste renyon e pres sa bon nouvel Rwayonm? Eski sa i akoz bann ansyen dan kongregasyon i demann nou pour fer li? I vre ki nou rekonesan anver bann ansyen ki ed nou gras a sa bann rapel. Me nou partisip dan sa bann aktivite akoz nou ganny motive par lespri sen Bondye pour demontre ki nou kontan Zeova avek tou nou leker. Deplis, personnelman nou konvenki ki i lavolonte Bondye ki nou fer sa bann aktivite. (Zeka. 4:6; Efe. 5:10) Nou realize ki viv nou lavi konman en vre Kretyen, i anmenn bokou lazwa ek satisfaksyon e sa i fer plezir Bondye.
Diferan don
4, 5. Ki mannyer bann ansyen i devret servi zot bann don?
4 Lir Romen 12:6-8, 11. Pol i eksplike ki “nou posed bann diferan don dapre lagras ki Bondye in akord sakenn antre nou.” Serten sa bann don ki Pol i mansyonnen i sa don pour ankouraz lezot, e pour dirize, sa i konsern sirtou bann ansyen ki seryezman ganny demande pour diriz “byen” oubyen avek devouman.
5 Pol i dir ki bann ansyen i devret montre sa menm devouman konman ansennyan e ler zot akonplir zot “servis” oubyen minister. I paret ki sa konteks isi pe endike ki Pol pe refer avek “servis” ki ganny akonplir dan kongregasyon, oubyen sa “sel lekor.” (Rom. 12:4, 5) Sa servis i parey sa enn ki ganny mansyonnen dan Akt 6:4, kot sa zapot i dir: “Nou ava kapab kontinyen donn tou nou letan pour lapriyer e par predikasyon.” Ki sa servis i enplike? Bann ansyen i servi zot bann don pour batir bann frer ek ser dan kongregasyon. Zot montre ki zot “annan lespri servis” ler zot donn kongregasyon gidans ek lenstriksyon baze lo Parol Bondye avek devouman, par fer lapriyer avan etidye, fer resers, ansennyen e pran swen avek kongregasyon. Bann sirveyan i devret byen servi zot bann don e pran swen avek sa troupo “avek lazwa.”—Rom. 12:7, 8;1 Pyer 5:1-3.
6. Ki mannyer nou kapab swiv sa konsey dan Romen 12:11, ki teks tenm sa lartik?
6 Pol i osi azoute: “Pa fer pares, me travay avek lenerzi. Pouse par Lespri, servi Senyer avek en leker ranpli avek lantouzyas.” Si nou remarke ki nou mank lantouzyasm dan nou servis, nou bezwen sanz nou labitid etidye, fer bann lapriyer pli profon e priy pli souvan pour ganny lespri sen Zeova. Sa pou kapab ed nou pour pa perdi nou devouman e an menm tan pour renouvle li. (Lik 11:9, 13; Rev. 2:4; 3:14, 15, 19) Lespri sen ti donn bann premye Kretyen lafors pour koz lo “bann mervey Bondye.” (Akt 2:4, 11) Pareyman, i kapab ed nou pour annan plis devouman dan sa servis e pour les nou ganny “pouse par Lespri.”
Limilite ek modesti
7. Akoz nou devret fer nou servis avek limilite ek modesti?
7 Lir Romen 12:3, 16. Nou kapab annan bann don akoz Zeova ki’n fer li posib par mwayen son “lagras” oubyen labonte ekstraordiner. Pol ti dir dan en lot verse: “Nou kapasite i sorti kot Bondye.” (2 Kor. 3:5) Alor, nou pa devret rann glwar nou prop lekor. Nou devret rekonnet avek limilite ki okenn rezilta nou kapab gannyen dan nou servis i akoz benediksyon Bondye me pa akoz nou prop konpetans. (1 Kor. 3:6, 7) Lo menm laliny avek sa lide, Pol i dir: “Mon dir avek zot tou: pa bezwen ki zot ganny en tro gran lopinyon lo zot menm.” I neseser ki nou annan respe pour nou prop lekor e trouv lazwa ek satisfaksyon dan nou servis pour Zeova. Me, ler nou modes, oubyen konsyan nou limit, sa pou anpes nou vin en dimoun antete. Plito nou anvi vin en dimoun “rezonnab.”
8. Ki mannyer nou kapab evite “annan en tro gran lopinyon lo [nou] menm”?
8 I ti pou bet pour vant nou lekor akoz sa ki nou’n akonplir. “Bondye ki fer pouse.” (1 Kor. 3:7) Pol i dir ki sak dimoun dan kongregasyon i annan ‘lafwa dapre sa ki Bondye in donn zot.’ Olye santi nou siperyer, nou devret rekonnet sa ki lezot pe akonplir dapre lafwa ki zot annan. Pol i azoute: “Viv an akor avek tou zot kanmarad.” Dan en lot let, sa zapot i dir nou pa fer “nanryen par lespri [dispit] e vantar, me avek limilite konsider lezot pli enportan ki ou.” (Fili. 2:3) I demann vre limilite ek bokou zefor pour rekonnet ki sak frer ek ser i pli siperyer ki nou dan en fason oubyen en lot. Limilite pou anpes nou “annan en tro gran lopinyon lo [nou] menm.” I vre ki bann privilez spesyal i kapab atir latansyon lo serten parmi nou, me tou dimoun pou vreman kontan pour akonplir bann “pti-pti” keksoz setadir bann louvraz senp ki souvan lezot pa remarke.—1 Pyer 5:5.
Nou linite Kretyen
9. Akoz Pol i konpar bann Kretyen ki’n ganny swazir par lespri sen konman bann parti en lekor?
9 Lir Romen 12:4, 5, 9, 10. Pol i konpar bann Kretyen swazir avek bann parti en lekor ki pe servi dan linite anba lotorite Kris ki zot Sef. (Kol. 1:18) I rapel sa bann Kretyen ki’n ganny swazir par lespri sen, ki en lekor i annan en kantite parti avek diferan fonksyon e ki ‘malgre ki i annan bokou zot, zot form en sel lekor avek Kris.’ Pareyman, Pol ti ankouraz bann Kretyen swazir Efez: “Avek lanmour, nou devre grandi dan tou fason an Kris, nou sef. Kontrole par li, tou bann diferan parti lekor i byen rasanble ansanm, e lekor antye i tenir ansanm par bann zwentir ki i posede. Alor kan sak parti i travay konman fodre, lekor antye i grandi e devlope par lanmour.”—Efe. 4:15, 16.
10. Lotorite lekel ‘lezot mouton’ i devret rekonnet?
10 Menm si ‘lezot mouton’ pa fer parti sa group ki form en sel lekor avek Kris, zot kapab aprann en kantite avek sa legzanp. (Zan 10:16) Pol i dir ki Zeova “in plas tou keksoz anba lipye Kris e i’n etablir li konman pli gran sef lo tou keksoz [kongregasyon].” (Efe. 1:22) Ozordi, lezot mouton i form parti “tou keksoz” ki tonm anba lotorite ki Zeova in konfye avek son Garson. Zot osi form parti bann “byen” ki Kris in konfye avek son “lesklav fidel e pridan.” (Mat. 24:45-47, NW) Alor sa bann ki annan lespwar pour viv lo later i rekonnet Kris konman zot Sef e zot soumet avek sa lesklav fidel e pridan, son Konsey Direkter ek bann zonm ki’n ganny apwente konman sirveyan oubyen ansyen dan kongregasyon. (Ebr. 13:7, 17) Sa i kontribye pour promot linite Kretyen.
11. Lo kwa nou linite i baze e ki lezot konsey Pol ti donnen?
11 Sa kalite linite i baze lo lanmour, ki “soud tou keksoz parfetman ansanm dan larmoni.” (Kol. 3:14) Dan Romen sapit 12, Pol i met lanfaz lo sa kalite lanmour, i dir ki nou lanmour i devret “san lipokrizi” e “parey bann frer” nou devret “annan en gran lanmour pour kanmarad.” Sa i fer ki nou pou annan respe pour kanmarad. Sa zapot i dir: “Setaki montre plis respe pour kanmarad.” Byensir demontre vre lanmour pa vedir ki nou fer desizyon selman dapre nou santiman. Nou devret fer tou nou posib pour gard kongregasyon pir. Ler i ti pe donn sa konsey lo lanmour, Pol ti azoute: “Deteste sa ki mal e reste atase avek sa ki byen.”
Pratik lospitalite
12. Konsernan lospitalite, ki nou kapab aprann avek bann Kretyen dan ansyen Masedwann?
12 Lir Romen 12:13. Nou lanmour pour nou bann frer ek ser pou motiv nou pour “donn led bann sen ki dan bezwen” e dapre sa ki nou kapab. Menm si nou napa bokou, nou kapab partaz sa ki nou annan. Ler i ti ekrir bann Kretyen Masedwann, Pol ti dir: “Malgre bann leprev serye par lasoufrans ki bann krwayan in pas ladan, zot lazwa ti si gran ki zot i’n montre zot byen zenere, menm ki zot pov. Mon deklare ki zot in donn tou sa ki zot kapab, menm plis ki zot posibilite; par zot menm, zot in sipliy nou pour donn zot privilez pour partisip dan led pour bann sen [dan Zide].” (2 Kor. 8:2-4) Menm si zot menm zot ti pov, sa bann Kretyen Masedwann ti vreman zenere. Zot ti konsider li konman en privilez pour ed zot bann frer Zide, ki ti dan bezwen.
13. Ki savedir “pratik lospitalite”?
13 Sa lekspresyon “pratik lospitalite” in ganny tradwir apartir en lekspresyon Grek ki enplik pran linisyativ. The New Jerusalem Bible i tradwir sa lekspresyon koumsa “rod loportinite pour demontre lospitalite.” Parfwa lospitalite i ganny demontre par envit en dimoun pour en repa, e ler i ganny motive par lanmour, sa i vreman byen. Me si nou pran linisyativ nou pou trouv en kantite fason pour demontre lospitalite. Par egzanp, si nou mwayen oubyen lasante pa permet nou envit lezot pour en repa, nou kapab envit zot pour pran en tas dite, delo limon oubyen pour bwar lezot keksoz, sa i osi en fason pour demontre lospitalite.
14. (a) Sa mo Grek ki’n ganny tradwir “lospitalite” i sorti dan ki mo? (b) Ki mannyer nou kapab demontre lentere anver bann etranze dan predikasyon?
14 Lospitalite i enplik plis ki sa. I annan pour fer avek nou latitid. Sa mo Grek ki’n ganny tradwir lospitalite i sorti dan de mo ki vedir “lanmour” ek “etranze.” Ki santiman nou annan pour bann etranze? Bann Kretyen ki fer zefor pour aprann en lot langaz pour pres sa bon nouvel avek bann etranze ki’n vin reste dan teritwar zot kongregasyon i kapab vreman ganny konsidere parmi bann ki pe pratik lospitalite. Byensir en kantite parmi nou napa sa posibilite pour aprann en lot langaz akoz nou sirkonstans. Kantmenm sa, nou tou nou kapab ed bann etranze par byen servi sa pti liv Good News for People of All Nations, ki annan en mesaz Labib dan plizyer langaz. Eski ou’n ganny bon rezilta par servi sa pti liv dan predikasyon?
Santi sa ki lezot pe santi
15. Ki mannyer Zezi ti donn legzanp an rapor avek sa konsey dan Romen 12:15?
15 Lir Romen 12:15. Dan sa verse, Pol i konsey nou pour demontre menm santiman. Nou bezwen aprann pour konpran e demontre menm santiman ki lezot, ki swa lazwa oubyen sagrinasyon. Si nou les nou ganny pouse par lespri, i pou evidan si nou santi sa ki en lot i santi, ki swa nou zwaye parey li oubyen nou demontre konpasyon akoz son sityasyon. Ler 70 disip Kris ti retournen ranpli avek lazwa apre en kanpanny predikasyon e ti rakont rezilta zot travay, “Lespri-Sen ti ranpli Zezi avek lazwa.” (Lik 10:17-21) Li osi i ti zwaye. De lot kote, ler son zanmi Lazar ti mor Zezi ti ‘pler avek bann dimoun ki ti pe plere.’—Zan 11:32-35.
16. Ki mannyer nou kapab demontre ki nou santi sa ki lezot i santi, e sirtou lekel ki bezwen fer sa?
16 Nou anvi swiv legzanp Zezi, pour demontre menm santiman ki lezot. Ler en konpanyon Kretyen i dan lazwa nou anvi zwaye parey li. Pareyman, nou devret santi soufrans ek sagrinasyon nou bann frer ek ser. Souvan, nou kapab soulaz bann ki pe soufer emosyonnelman si nou pran letan pour ekout zot e met nou dan zot plas. Petet parler nou remarke, ki nou leker i telman touse ki nou menm plere akoz nou vreman santi parey sa ki sa dimoun i santi. (1 Pyer 1:22) Bann ansyen ki devret sirtou swiv sa konsey ki Pol ti donnen an rapor avek demontre menm santiman.
17. Ki nou’n aprann ziska prezan dan Romen sapit 12 e ki nou pou egzaminen dan lot lartik?
17 Sa bann verse ki nou’n egzaminen ziska prezan dan Romen sapit 12 in donn nou bann konsey ki nou kapab aplike dan nou lavi konman Kretyen e dan nou relasyon avek nou bann frer ek ser. Dan sa lot lartik, nou pou egzamin lezot verse dan sa sapit, ki montre ki mannyer nou devret vwar e tret bann dimoun an deor kongregasyon, enkli bann ki opoz e persekit nou.
Revizyon
• Ki mannyer nou demontre ki nou ganny “pouse par Lespri”?
• Akoz nou devret servi Bondye avek limilite ek modesti?
• Dan ki fason nou kapab demontre menm santiman ek konpasyon ki nou bann frer ek ser dan lafwa?
[Kestyon]
[Portre lo paz 12]
Akoz nou partisip dan bann aktivite Kretyen?
[Portre lo paz 14]
Ki mannyer sak frer ek ser i kapab ed bann etranze aprann konsernan sa Rwayonm?