Reste bon zanmi menm dan en lemonn kot napa lanmour
Reste bon zanmi menm dan en lemonn kot napa lanmour
“Alor la mon konmannman ki mon donn zot: kontan kanmarad.”—ZAN 15:17.
1. Akoz bann Kretyen dan premye syek ti bezwen reste bann bon zanmi?
PANDAN son dernyen lannwit ki i ti pase lo later, Zezi ti ankouraz son bann disip fidel pour reste zanmi avek kanmarad. Pli boner sa zour swar, i ti dir zot ki sa lanmour ki zot ti demontre pour kanmarad ti pou idantifye zot konman son bann disip. (Zan 13:35) Bann zapot ti pou bezwen reste bann bon zanmi pour zot kapab andir bann leprev ki zot ti pou pas ladan plitar e pour akonplir sa travay ki Zezi ti pou konfye zot byento. Bann Kretyen dan premye syek ti sertennman ganny rekonnet pour zot devosyon senser anver Bondye e anver kanmarad.
2. (a) Ki nou determinen pour fer e akoz? (b) Ki kestyon nou pou egzaminen?
2 Ozordi, pa i en gran plezir pour asosye avek en lorganizasyon mondyal ki son bann manm i swiv sa model ki bann Kretyen dan premye syek in kite! Nou determinen pour obeir komannman Zezi pour demontre lanmour senser pour kanmarad. Par kont, dan sa bann dernyen zour, lamazorite dimoun pa fidel e zot annan leker dir. (2 Tim. 3:1-3) Souvandfwa lanmitye ki egziste antre zot pa senser oubyen i baze lo lentere egois. Pour gard nou lidantite konman bann vre Kretyen, nou bezwen pa les sa kalite latitid afekte nou. Annou alor egzamin sa bann kestyon swivan: Ki sa baz pour annan bann bon lanmitye? Ki mannyer nou kapab fer bann bon zanmi? Kan ki i kapab neseser pour met en lafen avek en lanmitye? Ki mannyer nou kapab mentenir bann lanmitye ki annan bon lenfliyans lo nou?
Ki sa baz pour annan bann bon lanmitye?
3, 4. Ki sa baz ki fer lanmitye vin pli solid e akoz?
3 Se lanmour pour Zeova ki fer lanmitye vin pli solid. Lerwa Salomon ti ekrir: “Si en dimoun i pli for ki enn ki tousel, de ansanm pou kapab reziste kont li. En lakord ki’n tres an trwa pa fasil pour kas an de.” (Ekle. 4:12) Kan Zeova i sa trwazyenm lakord dan en lanmitye, sa lanmitye pou dire.
4 I vre, menm bann ki pa kontan Zeova i osi kapab devlop bann lanmitye ki anmenn satisfaksyon. Me kan bann endividi i zwenn ansanm, ini par sa lanmour ki zot annan pour Bondye, zot lanmitye pou solid. Si i annan en malantandi ant bann vre zanmi, zot pou tret kanmarad dan en fason ki fer plezir Zeova. Si bann ki opoz Bondye i esey kree divizyon, sa bann lennmi i arive dekouver ki lanmitye parmi bann vre Kretyen i solid. Tou dilon listwar, bann serviter Zeova in prouve ki zot pare pour mor olye trai kanmarad.—Lir 1 Zan 3:16.
5. Akoz sa lanmitye ant Rit ek Naomi ti dire?
5 San dout, lanmitye ki kapab anmenn plis satisfaksyon pour nou i lanmitye avek bann ki kontan Zeova. Egzamin legzanp Rit ek Naomi. Parmi bann lanmitye pli agreab ki’n ganny rikorde dan Labib i sa lanmitye ki sa de madanm ti devlope. Akoz zot lanmitye ti dire? Rit ti fer resorti sa rezon kan i ti dir avek Naomi: “Ou pep pou vin mon pep, e ou Bondye mon Bondye. . . . Ki Zeova i fer parey avek mwan e i azout ankor avek si okenn keksoz zis lanmor ki devret separ mwan avek ou.” (Rit 1:16, 17) I evidan ki Rit ek Naomi ti annan en gran lanmour pour Bondye e zot ti les sa lanmour enfliyans lafason ki zot ti tret kanmarad. An retour, tou le de sa de madanm ti ganny beni avek Zeova.
Ki mannyer pour fer zanmi?
6-8. (a) Pour devlop bann lanmitye ki dire, kwa ki enplike? (b) Ki mannyer ou kapab pran linisyativ pour fer zanmi?
6 Sa legzanp ki Rit ek Naomi in kite i montre ki bann bon lanmitye pa devlop par azar. Se zot lanmour pour Zeova ki ti baz zot lanmitye. Me bann lanmitye ki dire i sa rezilta apre en kantite zefor ek sakrifis. Menm bann serviter Zeova ki dan menm fanmir i bezwen fer zefor pour devlop en bon lanmitye. Alor, ki mannyer, nou kapab fer bann bon zanmi?
7 Pran linisyativ. Zapot Pol ti ankouraz son bann zanmi dan kongregasyon Ronm pour “pratik lospitalite.” (Rom. 12:13) Pour swiv en prosedir, nou bezwen swiv detrwa letap enn apre lot. Pareyman, pour demontre lospitalite i enkli fer plizyer pti zes detanzaot. Personn pa kapab demontre lospitalite dan ou plas. (Lir Proverb 3:27.) En fason ki ou kapab demontre lospitalite i par fer zefor pour envit diferan dimoun dan kongregasyon pour manz en pti repa avek ou. Eski ou kapab fer li en labitid pour demontre lospitalite anver lezot dan ou kongregasyon?
8 En lot fason ki ou kapab pran linisyativ pour fer zanmi i par envit diferan proklanmater pour pres avek ou dan predikasyon. Kan ou devan laport en dimoun e ou tann ou konpanyon pe eksprim sa lanmour ki i annan pour Zeova o fon son leker, natirelman ou pou anvi vin pli pros avek li.
9, 10. Ki legzanp Pol in kite e ki mannyer nou kapab imit li?
9 Ouver gran zot leker pour demontre lafeksyon. (Lir 2 Korentyen 6:12, 13.) Eski ou’n deza santi ki napa preski personn ki ou kapab fer zanmi avek dan kongregasyon? Si wi, eski i kapab ki ou pa pe byen gete lekel ki ti kapab vin ou zanmi? Zapot Pol in kit en bon legzanp lo lafason pour ouver gran nou leker pour demontre lafeksyon. I ti annan en moman kot i ti panse ki i pa ti pou zanmen kapab devlop bann bon lanmitye avek bann non Zwif. Me toudmenm, i ti vin en “zapot pour bann pep non-Zwif.”—Rom. 11:13.
10 Deplis, Pol pa ti fer zanmi zis avek bann ki ti dan son laz. Par egzanp, li ek Timote menm si zot laz ti diferan e zot ti sorti dan diferan lanvironnman, zot ti vin de bon zanmi. Ozordi, bokou zenn i seri lanmitye ki zot in devlope avek bann aze dan kongregasyon. Vanessa ki dan son 20 ekek i dir: “Mon annan en zanmi ki mon vreman kontan, i dan son 50 tan an montan. Mon kapab dir li tou sa ki mon kapab dir avek bann zanmi dan mon laz e i enterese avek mwan en kantite.” Ki mannyer sa kalite lanmitye in devlope? Vanessa i dir: “Mon ti bezwen fer zefor pour mwan devlop sa lanmitye. Mon pa ti zis asize espere ki i vin kot mwan.” Eski ou pare pour fer zefor pour devlop lanmitye avek bann ki pa dan ou laz? Zeova pou sirman rekonpans ou pour ou zefor.
11. Ki nou kapab aprann avek legzanp Yonatann ek David?
11 Fodre ou fidel. Salomon ti ekrir: “En vre konpanyon i kontan ou toultan, e i en frer ki’n ne pour letan ladetres.” (Prov. 17:17) Kan Salomon ti pe ekrir sa parol, i kapab ki i ti pe mazin sa lanmitye ki ti egziste ant son Papa David ek Yonatann. (1 Sam. 18:1) Lerwa Sail ti anvi ki son garson Yonatann i erit tronn Izrael. Me Yonatann ti aksepte lefet ki Zeova ti’n swazir pour donn sa privilez avek David. Konpare avek Sail, Yonatann li i pa ti zalou David. I pa ti ankoler akoz David ti ganny sa privilez e i pa ti ni menm krwar bann mansonz ki Sail ti pe fannen lo David. (1 Sam. 20:24-34) Eski nou parey Yonatann? Kan nou bann zanmi i ganny privilez dan kongregasyon eski nou kontan pour zot? Kan zot pas dan difikilte, eski nou rekonfort zot e donn zot sipor? Si nou tann bann rimer lo en zanmi ki kapab fer li ditor, eski deswit nou pou krwar sa rimer? Oubyen nou pou fidelman defann nou zanmi parey Yonatann?
Kan i neseser pour met en lafen avek en lanmitye
12-14. Ki defi serten etidyan i rankontre e ki mannyer nou kapab ed zot?
12 Kan en etidyan Labib i konmans fer sanzman dan son lavi, kot i konsern lanmitye, i kapab vin en vre defi pour li. I kapab ki i apresye konpanni serten zanmi ki pa viv annakor avek bann standar moral dan Labib. Dan lepase, petet i ti souvan pas letan avek zot. Alor, aprezan i vwar ki sa ki son bann zanmi i fer i kapab annan en move lenfliyans lo li e i santi sa nesesite pour aret frekant zot. (1 Kor. 15:33) Toudmenm, i kapab santi ki si i aret frekant zot i pa fidel avek zot.
13 Si ou en etidyan Labib ki pe pas dan sa sityasyon, i byen pour rapel ki en vre zanmi pou kontan ki ou pe esey amelyor ou lavi. Petet i pou menm anvi zwenn ansanm avek ou pour aprann konn Zeova. De lot kote, bann ki fer krwar zot ou bann zanmi pou “kritik” ou akoz ou nepli partisip avek zot “dan sa bann move fason viv.” (1 Pyer 4:3, 4) An realite, i zot ki pa fidel avek ou.
14 Kan bann etidyan Labib i ganny rezete par zot bann zanmi ki napa lanmour pour Bondye, bann manm kongregasyon i kapab ranplas sa bann zanmi ki zot in perdi. (Gal. 6:10) Eski personnelman ou konn bann etidyan Labib ki pe asiste renyon? Eski detanzaot ou pas letan avek zot pour ankouraz zot?
15, 16. (a) Ki mannyer nou devret reazir si en zanmi i aret servi Zeova? (b) Ki mannyer nou kapab prouv nou lanmour pour Bondye?
15 Me, si en zanmi dan kongregasyon i deside abandonn Zeova e petet i pou menm bezwen ganny ekskli dan kongregasyon? Sa sityasyon i kapab vreman fermal. Kan i ti pe dekrir lafason i ti santi kan en zanmi pros ti aret servi Zeova, en ser ti dir: “Mon ti santi mwan dezespere. Mon ti krwar mon zanmi ti ferm dan laverite, me sa pa ti leka. Mon ti demann mon lekor si i ti pe servi Zeova zis pour fer plezir son fanmir. Apre mon ti rekonmans analiz mon prop rezon pour servi Zeova.” Eski mon ti pe servi Zeova avek sa bon motivasyon? Ki mannyer sa ser ti fer fas avek sa sityasyon? I dir: “Mon ti larg mon fardo lo Zeova. Mon determinen pour montre Zeova ki mon kontan li pour sa ki i ete me pa akoz i donn mwan bann zanmi dan son lorganizasyon.”
16 Nou pa ekspekte pour reste zanmi avek Bondye si nou pran kote avek bann ki swazir pour vin zanmi avek sa lemonn. Disip Zak ti ekrir: “Pa zot konnen ki lanmour pour lemonn i fer vin lennmi Bondye? Sa ki oule fer zanmi avek lemonn i vin lennmi Bondye.” (Zak 4:4) Nou kapab prouv nou lanmour pour Bondye kan nou annan konfyans ki si nou fidel avek Li, i pou ed nou fer fas si i arive nou perdi en zanmi. (Lir Psonm 18:25.) Sa ser ki’n ganny mansyonnen pli boner i tir sa konklizyon: “Mon’n aprann ki nou pa kapab fors en dimoun pour kontan Zeova oubyen kontan nou. Apre tou, sa i en desizyon personnel.” Alor, ki nou kapab fer pour mentenir bann lanmitye ki annan bon lenfliyans lo nou avek bann ki reste dan kongregasyon?
Mentenir bann bon lanmitye
17. Ki mannyer bann bon zanmi i koz avek kanmarad?
17 Bon kominikasyon i fer en lanmitye vivan. Anmezir ki ou lir bann resi dan Labib ki koz lo Rit ek Naomi, David ek Yonatann e Pol ek Timote ou pou remarke ki bann bon zanmi i koz fasilman me avek respe avek kanmarad. Konsernan lafason ki nou devret kominik avek kanmarad, Pol ti ekrir: “Ki zot parol i touzour agreab e enteresan.” Pol ti pe refer spesifikman avek lafason nou devret koz avek bann “non-krwaryan,” setadir bann ki pa nou frer oubyen ser Kretyen. (Kol. 4:5, 6) Sirman si nou devret koz avek respe avek bann non krwayan, konbyen plis nou devret koz avek respe avek nou bann zanmi dan kongregasyon!
18, 19. Ki mannyer nou devret vwar nenport konsey nou gannyen avek en zanmi dan kongregasyon e ki legzanp ki bann ansyen Efez in kite pour nou?
18 Bann bon zanmi i kontan pour konn lopinyon kanmarad, alor zot bezwen kominik dan en fason amikal e fran antre zot. Lerwa Salomon ki ti saz ti ekrir: “Delwil ek lansan se sa ki fer leker kontan, i agreab parey ladouser en zanmi ki donn konsey avek tou son nanm.” (Prov. 27:9) Eski koumsa menm ki ou vwar en konsey ki ou gannyen avek en zanmi? (Lir Psonm 141:5.) Si en zanmi i eksprim son konsern an rapor avek serten fason ki ou pe azir, ki mannyer ou pou reazir? Eski ou pran sa konsey konman en laprev son lanmour pour ou oubyen eski ou ofanse?
19 Zapot Pol ti annan en relasyon pros avek bann ansyen dan kongregasyon Efez. I tre probab ki i ti konn serten sa bann zonm kan zot ti fek vin bann krwayan. Pandan son dernyen rankont avek zot, i ti donn zot detrwa konsey fran. Ki mannyer zot ti reazir? Bann zanmi Pol pa ti ofanse. O kontrer, zot ti apresye sa lentere ki i ti annan dan zot e zot ti menm plere kan zot ti mazinen ki zot pa ti pou vwar li ankor.—Akt 20:17, 29, 30, 36-38.
20. Ki en zanmi ki ranpli avek lanmour pour fer?
20 Bann bon zanmi pa zis kontan pour ganny bon konsey me zot osi donn sa bann kalite konsey. Byensir, nou bezwen konnen kan pour “okip [nou] avek [nou] prop zafer.” (1 Tesa. 4:11) Nou bezwen osi rekonnet ki sakenn de nou pour “rann kont devan Bondye pour son prop lekor.” (Rom. 14:12) Me kan i neseser, en zanmi ki ranpli avek lanmour pou zantiman fer son zanmi rapel bann standar Zeova. (1 Kor. 7:39) Par egzanp, ki ou pou fer si ou remarke en zanmi ki pa’n marye pe konmans frekant en non krwayan? Eski ou pa pou fer li konn ou konsern akoz ou per pangar zot lanmitye i a kase? Ouswa, si ou zanmi pa antren ou konsey, ki ou pou fer? En bon zanmi pou rod led bann berze ki ranpli avek lanmour pour ed en zanmi ki’n fer en move desizyon. Pour fer sa i demann kouraz. Me napa okenn keksoz ki pou kapab afekte en lanmitye ki fonde lo lanmour pour Zeova pour touzour.
21. Ki nou tou nou pou arive fer parfwa, me akoz i esansyel ki nou mentenir bann lanmitye solid dan kongregasyon?
21 Lir Kolosyen 3:13, 14. Parfwa, nou pou “ofans” nou zanmi e i pou osi arive ki zot pou fer oubyen dir keksoz ki pou ofans nou. Zak ti ekrir: “Nou [tou nou] komet lerer dan plizyer mannyer.” (Zak 3:2) Par kont, sa ki pou determinen ki kalite lanmitye nou annan i pa lakantite fwa ki nou ofans kanmarad me si nou konpletman pardonn kanmarad kan nou mal azir anver kanmarad. Pour nou batir bann lanmitye solid, pa i esansyel ki nou annan bann konversasyon fran e nou pardonn kanmarad volonterman! Si nou demontre sa kalite lanmour, i pou vin en “lanmour ki soud tou keksoz parfetman ansanm dan larmoni.”
Ki ou pou reponn?
• Ki mannyer nou kapab fer bann bon zanmi?
• Kan ki i kapab neseser pour met en lafen avek en lanmitye?
• Ki nou bezwen fer pour mentenir bann lanmitye solid?
[Kestyon]
[Portre lo paz 25]
Sa lanmitye solid ki ti egziste ant Rit ek Naomi, ki ti son baz?
[Portre lo paz 26]
Eski ou demontre lospitalite detanzaot?