“Viv anpe avek tou dimoun”

“Fer tou sa ki depann lo ou pour viv anpe avek tou dimoun.”—ROM. 12:18.

1, 2. (a) Ki lavertisman Zezi ti donn son bann disip? (b) Kote nou kapab trouv konsey lo ki mannyer pour azir ler nou fer fas avek lopozisyon?

ZEZI ti averti son bann disip ki zot ti pou rankontre lopozisyon avek bann nasyon dan lemonn e sa swar avan son lanmor, i ti eksplike akoz. I ti dir avek son bann zapot: “Si zot, zot ti fer parti lemonn, lemonn ti pou kontan son byen. Me parski, zot pa fer parti lemonn, parski mon’n swazir zot e mon’n retir zot dan lemonn, sanmenm rezon akoz ki i ay zot.”—Zan 15:19, nou ki’n met an italik.

² Zapot Pol ti konnen dapre leksperyans ki i ti’n pas ladan ki parol Zezi ti vre. Dan son dezyenm let pour son zenn konpanyon Timote, Pol ti ekrir: “Ou, ou’n swiv byen mon bann lansennyman, mon kondwit, mon bann laspirasyon, mon lafwa, mon pasyans, mon lanmour, mon perseverans, mon bann persekisyon, ek mon bann soufrans.” Apre Pol ti azoute: “Dayer tou sa ki  oule viv en lavi fidel dan Kris Zezi pou ganny persekite.” (2 Tim. 3:10-12) Dan douzyenm sapit sa let ki i ti ekrir bann Kretyen Ronm, Pol ti donn sa konsey saz lo ki mannyer zot devret azir ler zot fer fas avek lopozisyon. Son parol i kapab gid nou pandan sa letan lafen.

“Fer sa ki byen”

3, 4. Ki mannyer sa konsey dan Romen 12:17 i kapab ganny aplike (a) dan en lakour kot tou dimoun napa menm krwayans? (b) dan nou relasyon avek lezot?

³ Lir Romen 12:17. Pol ti eksplike ki ler nou fer fas avek lopozisyon, nou pa devret rann laparey. I sirtou enportan pour swiv sa konsey dan en lakour kot tou dimoun napa menm krwayans. En Kretyen pou reziste sa tantasyon pour servi bann parol blesan oubyen tret son konzwen dan en move fason zis akoz lot in azir koumsa avek li. I pa vo lapenn “rann mal pour mal” akoz i pa anmenn okenn byenfe. O kontrer, en latitid koumsa i zis kapab fer sityasyon vin pli pir.

⁴ Pol i donn en meyer sizesyon: “Fer tou ou posib pour fer sa ki byen devan tou dimoun.” Kot en lakour, en madanm i kapab evite ki i annan okenn diskisyon si i demontre vre labonte anver son msye menm apre ki i’n fer en remark dezagreab konsernan son krwayans. (Prov. 31:12) Carlos, ki aprezan dan Betel, i rakonte ki mannyer son manman ti sirmont sa gran lopozisyon sorti kot son papa par annan en bon latitid e pran byen swen avek son lakour. “I ti ankouraz nou son bann zanfan pour toultan respekte nou papa. I ti ensiste ki mon zwe petank avek li, menm si i pa ti mon zwe prefere. Me sa ti fer li santi li byen.” Avek letan i ti konmans etidye Labib e i ti batize. An sa ki konsern fer “sa ki byen devan tou dimoun,” Temwen Zeova i souvan ed lezot kan i annan en dezas e sa i fer ki lezot i aret annan en move pwennvi lo zot.

Fer disparet lopozisyon avek “labrez”

5, 6. (a) Dan ki sans “labrez” i devret ganny mete lo latet en lennmi? (b) Rakont en leksperyans lokal ki montre ki mannyer ler nou aplik sa konsey dan Romen 12:20 sa i anmenn bon rezilta.

⁵ Lir Romen 12:20. * Kan i ti pe swazir sa parol dan sa verse, Pol ti san dout annan antet sa parol ki nou lir dan Proverb 25:21, 22: “Si sa enn ki ay ou i lafen, donn li dipen pour manze; e si i swaf, donn li delo pour bwar. Akoz ou pe anmas labrez lo son latet, e Zeova pou rekonpans ou.” Par sa konsey dan Romen sapit 12, Pol pa ti pe dir ki sa legzanp lo labrez ti vedir pini oubyen fer onte sa lennmi. Plito, sa proverb e osi sa parol ki  Pol ti dir avek bann Romen i paret pe refer avek en vye metod ki ti ganny servi pour tir salte dan metal. Charles Bridges, en profeser Angle dan diznevyenm syek, ti fer sa remark: “Met labrez otour sa metal byen dir, anba e lo la; pa zis met li parlao dife, me met labrez lo la. Napa bokou leker ki telman dir ki pa kapab fonn anba pouvwar pasyans, lentere ki lezot i demontre ek en gran lanmour.”

⁶ Parey “labrez,” bann aksyon ki demontre labonte i kapab fer bann opozan sanz zot latitid e petet fer zot aret opoz bann serviter Bondye. Bann aksyon ki demontre labonte i kapab fer dimoun annan en pli bon latitid anver pep Zeova e sa mesaz ki zot prese. Zapot Pyer ti ekrir: “Zot devre annan bonn kondwit parmi bann payen pour ki ler zot ganny akize pour mal fer, bann payen a rekonnet zot bonn aksyon e rann glwar Bondye zour i pou vini.”—1 Pyer 2:12.

“Viv anpe avek tou dimoun”

7. Ki sa lape ki Kris i kit avek son bann disip, e ki sa i devret motiv nou pour fer?

⁷ Lir Romen 12:18. Pandan sa dernyen swar ki Zezi ti pas avek son bann zapot, i ti dir zot: “Mon kit lape avek zot, mon donn zot mon lape.” (Zan 14:27) Sa lape ki Kris i kit avek son bann disip i sa lape lespri ki zot eksperyanse ler zot santi ki zot annan laprouvasyon Zeova ek son Garson byenneme ki kontan zot. Sa lape lespri i devret motiv nou pour viv anpe avek lezot. Bann vre Kretyen i bann dimoun ki kontan lape e promot lape.—Mat. 5:9.

8. Ki mannyer nou kapab promot lape kot lakour e dan kongregasyon?

⁸ En fason pour promot lape dan fanmir i par regle bann dezakor oplivit posib olye les bann sityasyon deteryore. (Prov. 15:18; Efe. 4:26) Sa i osi aplikab dan kongregasyon. Zapot Pyer ti relye lape avek en dimoun ki kontrol byen son lalang. (1 Pyer 3:10, 11) Zak osi, apre ki i ti’n donn sa konsey ferm lo konman pour byen servi lalang e nesesite pour evite annan zalouzi ek lanbisyon egois, ti ekrir: “Lasazes ki sorti dan lesyel i premyerman pir, answit i kontan lape, i modere, pare pour met dakor, i ranpli avek pitye ek bon laksyon, san fer preferans e san lipokrizi. Fri lazistis i ganny senmen dan lape par bann ki viv dan lespri lape.”—Zak 3:17, 18.

9. Kan nou pe fer zefor pour “viv anpe avek tou dimoun,” ki nou devret gard antet?

⁹ Dapre sa ki i ti dir dan Romen 12:18, Pol pa ti zis dir ki nou bezwen promot lape dan fanmir e dan kongregasyon. I ti dir ki nou devret “viv anpe avek tou dimoun.” (Nou ki’n met an italik.) Sa i osi enkli nou vwazen, koleg travay, kanmarad lekol ek di moun ki nou zwenn ler nou pe prese. Me, zapot Pol ti osi azoute: “Fer tou sa ki depann lo ou.” Sa i vedir ki nou fer tou sa ki nou kapab, ki rezonnab lo nou kote “pour viv anpe avek tou dimoun” me san ki nou fer konpromi avek bann prensip drwat Bondye.

Zeova ki pou fer vanzans

10, 11. Dan ki sans nou “les lakoler Bondye azir,” e akoz i apropriye pour fer sa?

¹⁰ Lir Romen 12:19. Nou bezwen annan “pasyans” oubyen kontrol lo nou lekor e azir “avek douser” menm anver “bann ki opoz” nou travay ek mesaz, sa i osi enkli bann ki persekit nou. (2 Tim. 2:23-25) Pol ti konsey bann Kretyen pour pa revanze zot menm me pour “les lakoler Bondye azir.” I kler ki Pol pa ti pe ankouraz nou pour tir nou lakoler, me o kontrer pour les lakoler Bondye azir. Konman Kretyen nou konnen ki i pa nou ki pou revanze. En psalmis ti ekrir: “Met lakoler dekote e rezet firer; pa bezwen ankoler zis pour fer sa ki mal.” (Ps. 37:8) Salomon ti donn sa konsey: “Pa dir: ‘Mon pou rann lemal!’ Met ou lespwar dan Zeova, e i pou sov ou.”—Prov. 20:22.

¹¹ Si bann lennmi i fer nou ditor, i pli meyer pour les Zeova pini zot si i apropriye pour fer li e kan i vwar li apropriye pour fer li. Pour montre ki i ti annan antet lakoler Zeova, Pol ti azoute: “I dir dan Lekritir: ‘Mwan ki pou fer vanzans, Mwan ki pou fer peye.’” (Konpar Deterononm 32:35.) Si nou esey revanze nou menm nou pou pe azir avek larogans, par fer nou menm sa ki zis Zeova i annan dwa fer. Deplis, nou ti pou montre ki nou napa lafwa dan promes Zeova ki dir: “Mon ki pou fer peye.”

12. Kan ki Zeova pou demontre son lakoler e ki mannyer?

¹² Pli boner dan son let pour bann Romen, Pol ti dir: “Bondye i montre son lakoler depi lesyel pour tou bann pese ek bann lenzistis ki zonm lo later i fer, e par kwa zonm i anpes laverite prodwi rezilta.” (Rom. 1:18) Zeova pou demontre son lakoler ki pou ganny revele depi lesyel par mwayen son Garson dan letan “gran ladetres.” (Rev. 7:14, NW) Sa pou “prouve ki zizman Bondye i zis,” parey Pol ti eksplike dan en lot let enspire: “Bondye i zis. I pou repey par soufrans bann ki fer zot soufer, e pour zot ki pe soufer, i pou donn zot repo, ensi ki nou osi. I pou fer sa kan Senyer Zezi pou paret dan lesyel avek son bann lanz pwisan, avek laflanm dife, pour tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.”—2 Tesa. 1:5-8.

Domin lemal par sa ki byen

13, 14. (a) Akoz nou pa sirprann ler nou rankontre lopozisyon? (b) Ki mannyer nou kapab beni bann ki persekit nou?

¹³ Lir Romen 12:14, 21. Avek konfyans total nou kapab avek lasirans konsantre tou nou zefor lo sa travay ki Zeova in donn nou pour fer, setadir anons “sa Bonn Nouvel Rwayonm . . . partou dan lemonn.” (Mat. 24:14) Nou konnen ki sa aktivite Kretyen pou provok lakoler nou bann lennmi, akoz Zezi ti averti nou: “Tou dimoun pou ay zot akoz mwan.” (Mat. 24:9) Alors, nou pa sirprann oubyen dekouraze ler nou fer fas avek lopozisyon. Zapot Pyer ti ekrir: “Mon bann byenneme pa bezwen etonnen par bann gran soufrans ki zot pe pas ladan pour teste zot, konmsi sa ki pe ariv zot ti bann keksoz ekstraordiner. O kontrer, zot devre rezoui ki zot pe partisip dan soufrans Kris.”—1 Pyer 4:12, 13.

¹⁴ Olye resanti laenn anver bann ki persekit nou, nou esey ansenny zot Parol Bondye, akoz nou realize ki petet serten parmi zot pe azir dan linyorans. (2 Kor. 4:4) Nou fer zefor pour swiv konsey Pol: “Beni bann ki persekit zot; beni pa modi.” (Rom. 12:14)  En fason pour beni bann lennmi i par priy pour zot. Zezi ti dir dan son Sermon lo Montanny: “Kontan zot bann lennmi, fer dibyen bann ki ay zot, beni bann ki modi zot, priy pour bann ki ensilte zot.” (Lik 6:27, 28) Zapot Pol ti konnen dapre son prop leksperyans ki en dimoun ki persekit nou i kapab vin en disip fidel Kris e en serviter Zeova ki devoue. (Gal. 1:13-16, 23) Dan en lot let, Pol ti dir: “Ler nou ganny ensilte, nou beni, ler nou ganny persekite, nou siporte. Ler dimoun i kalomni nou, nou reponn avek bon parol.”—1 Kor. 4:12, 13.

15. Ki sa meyer fason pour domin lemal par sa ki byen?

¹⁵ Alors, en vre Kretyen pou aplik sa dernyen verse dan Romen sapit 12: “Pa les lemal domin zot, me o kontrer zot domin lemal par sa ki byen.” Satan oubyen Dyab i lorizin lemal. (Zan 8:44; 1 Zan 5:19) Dan sa revelasyon ki ti ganny donnen avek zapot Zan, Zezi ti dir ki son bann frer swazir “in ganny laviktwar lo [Satan] akoz disan Lanyo e akoz parol mesaz ki zot in anonse.” (Rev. 12:11) Sa i montre ki sa meyer fason pour ganny laviktwar lo Satan ek lenfliyans lemal ki i pe egzerse lo sa lemonn i par fer sa ki byen, partisip dan sa travay predikasyon, e anons sa bon nouvel Rwayonm.

Ki ou lesperans i gard ou dan lazwa

16, 17. Ki nou’n aprann dan Romen sapit 12 konsernan (a) ki mannyer nou devret viv nou lavi? (b) ki mannyer nou devret azir dan kongregasyon? (c) ki mannyer nou devret tret bann opoz nou?

¹⁶ Par egzamin an bref sa douzyenm sapit let Pol pour bann Kretyen Ronm in rapel nou en kantite keksoz. Nou’n aprann ki konman bann serviter ki’n dedye nou lavi avek Zeova, nou devret pare pour fer sakrifis. Motive par lespri sen Bondye, nou volonterman fer sakrifis akoz nou kapasite pour rezonnen i konvenk nou ki sa i lavolonte Bondye. Nou les nou ganny pouse par lespri sen e servi nou bann diferan don avek devouman. Nou fer nou servis avek limilite e dan en fason modes, par fer nou mye pour prezerv nou linite Kretyen. Nou pratik lospitalite e demontre ki nou konpran lezot.

¹⁷ Romen sapit 12 i osi donn nou en kantite konsey lo konman nou devret azir ler nou fer fas avek lopozisyon. Nou pa devret rann laparey. Nou devret esey sirmont lopozisyon par azir avek labonte. Otan ki posib, nou devret fer zefor pour viv anpe avek tou dimoun, san ki nou kas bann prensip Labib. Sa i aplik dan fanmir, dan kongregasyon, avek nou vwazen, kot travay, kot lekol, e ler nou pe prese. Menm ler nou fer fas avek persekisyon direk, nou fer nou mye pour domin lemal par sa ki byen, par gard antet ki Zeova ki pou revanze.

18. Ki sa trwa konsey Romen 12:12 i donnen?

¹⁸ Lir Romen 12:12. Pol i donn trwa lezot konsey serye, an plis ki sa konsey saz e pratik. Vi ki nou pa pou zanmen kapab fer tou sa bann keksoz san led Zeova, sa zapot i konsey nou pour “priye tou letan.” Sa pou ed nou swiv sa lot konsey ‘pour ganny bokou pasyans dan soufrans.’ Finalman, nou bezwen gard nou lespri fikse lo sa lavenir ki Zeova in promet nou e sa ‘lesperans ki gard nou dan lazwa,’ setadir lavi eternel swa dan lesyel oubyen lo later.

[Not anba lo paz]

Revizyon

• Ki mannyer nou devret azir ler nou fer fas avek lopozisyon?

• Dan ki domenn nou devret fer zefor pour promot lape e ki mannyer?

• Akoz nou pa devret esey revanze nou menm?

[Kestyon]

[Portre lo paz 16]

Ler nou ed lezot dan en fason pratik sa i kapab fer zot arete annan move pwennvi lo nou

[Portre lo paz 17]

Eski ou fer zefor pour vin en dimoun ki promot lape dan kongregasyon?