“Zot mon bann zanmi”
“Zot mon bann zanmi”
“Zot mon bann zanmi, si zot obei mon konmannman.”—ZAN 15:14.
1, 2. (a) Ki diferan lanvironnman zanmi Zezi ti sorti ladan? (b) Akoz i enportan ki nou vin zanmi Zezi?
SA BANN zonm ki ti pe asize ansanm avek Zezi anler dan sa lasanm ti sorti dan bann lanvironnman diferan. Sa de frer, Pyer ek Andre avan sa ti bann peser. Matye oparavan ti en kolekter taks, en travay ki bann Zwif pa ti apresye ditou. I tre probab ki serten, parey Zak ek Zan, ti’n konn Zezi depi lanfans. Lezot, parey Natanael, petet ti’n konn li zis pour detrwa lannen. (Zan 1:43-50) Me kantmenm sa, tou sa ki ti la prezan Zerizalenm sa zour swar pour selebre Lapak, sa moman vreman enportan, ti konvenki ki Zezi ti sa Mesi ki ti’n ganny promet, Garson sa Bondye vivan. (Zan 6:68, 69) I ti’n bezwen vreman tous zot en kantite pour tann li dir avek zot: “Mon apel zot zanmi, akoz mon’n dir zot tou sa ki mon Papa in dir mwan.”—Zan 15:15.
2 Sa parol ki Zezi ti dir avek son bann zapot fidel i an prensip aplik pour tou bann Kretyen swazir ozordi e osi pour zot bann konpanyon “lezot mouton.” (Zan 10:16, NW) Menm si nou tou nou sorti dan bann lanvironnman diferan, nou kapab ganny sa privilez pour vin zanmi Zezi. Nou lanmitye avek li i vreman enportan, akoz si nou zanmi avek Zezi sa i fer nou vin zanmi avek Zeova osi. Annefe, i enposib pour apros avek Zeova si premyerman nou pa apros avek Kris. (Lir Zan 14:6, 21.) Ki nou devret fer alor, pour vin e reste zanmi Zezi? Avan ki nou diskit sa size enportan, annou egzamin legzanp Zezi li menm konsernan vin en bon zanmi e vwar ki nou kapab aprann avek lafason ki son bann disip ti reazir anver sa lanmitye ki i ti annan pour zot.
Legzanp Zezi konman en bon zanmi
3. Ki repitasyon Zezi ti annan?
3 Lerwa Salomon ki ti saz ti ekrir: “Sa enn ki ris i annan bokou zanmi.” (Prov. 14:20) Sa obzervasyon i rezim sa tandans ki bann imen enparfe i annan. Sa i sa tandans pour fer zanmi avek bann ki zot kapab gannyen an retour olye avek bann ki zot menm zot kapab donnen. Zezi ti napa sa kalite febles. I pa ti les ran sosyal oubyen lakantite larzan ki en dimoun ti annan enfliyans li. I vre ki Zezi ti annan lanmour pour en zonm ris e i ti envit sa zonm pour swiv li. Par kont, Zezi ti dir li vann tou sa ki i ti annan e donn avek bann pov. (Mark 10:17-22; Lik 18:18, 23) Zezi pa ti renonmen konman en dimoun ki ti frekant bann dimoun ris e enportan me konman en dimoun ki ti fer zanmi avek bann dimoun senp ek bann ki ti ganny meprize.—Mat. 11:19.
4. Akoz nou kapab dir ki bann zanmi Zezi ti annan defo?
4 Sirman, bann zanmi Zezi ti bann dimoun ki ti annan defo. Detanzaot Pyer ti manke pour vwar keksoz dapre pwennvi Bondye. (Mat. 16:21-23) Zak ek Zan ti pe demontre en leta lespri anbisye kan zot ti demande ki Zezi i donn zot en plas enportan dan son Rwayonm. Lafason ki zot ti azir ti fer lezot zapot vreman ankoler e zot ti kontinyen annan bann largiman konsernan lekel ki pli enportan. Toudmenm, avek pasyans Zezi ti esey koriz fason panse son bann zanmi e i pa ti fasilman pran lakoler avek zot.—Mat. 20:20-28.
5, 6. (a) Akoz Zezi ti reste zanmi avek laplipar son bann zapot? (b) Akoz Zezi ti met en lafen avek sa lanmitye ki i ti annan avek Zida?
5 Zezi pa ti reste zanmi avek bann imen enparfe akoz i ti lesefer oubyen akoz i pa ti rekonnet zot lenperfeksyon. O kontrer, i ti swazir pour konsantre lo bann bon kalite ek motivasyon ki zot ti annan. Par egzanp, olye donn Zezi sipor dan sa moman pli difisil ki i ti pe al pas atraver, Pyer, Zak ek Zan ti tonm dormi. I toutafe normal ki Zezi ti dezapwente avek zot. Me kantmenm sa, i ti remarke ki zot ti annan bon lentansyon e i ti dir: “Lespri i dispoze, me laser i feb.”—Mat. 26:41.
6 Me i ti tou lekontrer avek Zida Iskaryot, Zezi ti met en lafen avek zot lanmitye. Menm si Zida ti kontinyen fer krwar ki i ti zanmi avek li, Zezi ti remarke ki sa zanmi ki ti pros avek li o konmansman, ti’n les li devlop en move leker. Lefet ki Zida ti’n vin zanmi avek lemonn i ti’n fer li vin en lennmi Bondye. (Zak 4:4) Se pour sa rezon ki Zezi ti’n fini fer li ale ler I ti konfirm Son lanmitye avek sa 11 zapot fidel ki ti reste.—Zan 13:21-35.
7, 8. Ki mannyer Zezi ti demontre son lanmour pour son bann zanmi?
7 Zezi pa ti konsantre lo fot ki son bann zanmi fidel ti fer e i ti fer tou pour zot byennet. Par egzanp, i ti priye pour son Papa protez zot kan zot ti pou pas dan leprev. (Lir Zan 17:11.) Zezi ti rekonnet ki zot ti annan limit. (Mark 6:30-32) I pa ti zis enterese pour dir zot sa ki i ti panse me i ti osi enterese pour ekout zot e konpran sa ki zot ti panse e santi.—Mat. 16:13-16; 17:24-26.
8 Zezi ti viv e mor pour son bann disip. I vre ki i ti konnen i bezwen donn son lavi konman en baz pour siport standar lazistis son Papa. (Mat. 26:27, 28; Ebr. 9:22, 28) Me Zezi ti donn son lavi pour li demontre son lanmour. Zezi ti dir: “Pli gran lanmour ki en dimoun i kapab posede: se donn son lavi pour son bann zanmi.”—Zan 15:13.
Ki mannyer bann disip ti reazir anver sa lanmitye ki Zezi ti demontre anver zot?
9, 10. Ki mannyer dimoun ti reazir anver Zezi lefet ki i ti zenere avek zot?
9 An sa ki konsern donn son letan, lafeksyon ek resours, Zezi ti zenere. Sa ti fer ki dimoun ti santi zot atire anver li e zot ti kontan pour donn li an retour. (Lik 8:1-3) Baze lo leksperyans personnel ki i ti’n gannyen, Zezi ti kapab dir: “Donnen e ou osi ou a gannyen. Zot a vid dan ou sak en bon mezir, byen ranpli, foule e deborde. Mezir ki ou servi avek lezot se sanmenm mezir ki pou ganny servi avek ou.”—Lik 6:38.
10 Byensir, i ti annan serten ki ti esey frekant Zezi zis pour sa ki zot ti kapab gannyen avek li. Sa bann dimoun ki ti pe fer krwar zot ti zanmi Zezi ti abandonn li kan zot pa ti arive konpran en keksoz ki i ti dir. Olye met zot konfyans dan li ler zot pa ti konpran sa ki i ti dir, deswit zot ti tonm lo en move konklizyon e abandonn li. Me i ti tou lekontrer avek son bann zapot, zot ti fidel. Zot lanmitye avek Kris ti souvan ganny teste, me zot ti fer zot mye pour donn li zot sipor dan bo tan e dan move tan. (Lir Zan 6:26, 56, 60, 66-68.) Son dernyen zour swar lo later konman en imen, Zezi ti eksprimen ki kantite i ti apresye son bann zanmi an dizan: “Zot, zot bann ki’n reste fidel anver mwan dan tou mon difikilte ek soufrans.”—Lik 22:28.
11, 12. Ki mannyer Zezi ti reasir son bann disip son lanmitye avek zot e ki mannyer zot ti reazir?
11 Zis apre ki Zezi ti felisit son bann disip pour zot fidelite, sa bann zonm ti abandonn li. Senpleman, zot ti les lafreyer zonm vin pli for ki zot lanmour pour Kris. Ankor enn fwa, Zezi ti pardonn zot. Apre son lanmor ek rezireksyon i ti aparet avek zot e reasir zot son lanmitye avek zot. An plis ki sa i ti konfye zot avek sa travay pour fer dimoun sorti dan “tou pep” vin son bann disip e pour vin son bann temwen “ziska tou bann landrwa pli elwannyen lo later.” (Mat. 28:19; Akt 1:8) Ki mannyer bann disip ti reazir?
12 Bann disip Zezi ti fer tou sa ki zot ti kapab pour propaz sa mesaz Rwayonm. Pa bokou letan apre, avek sipor lespri sen Zeova, zot ti ranpli Zerizalenm avek zot lansennyman. (Akt 5:27-29) Ni menm menas lanmor pa ti pou kapab dekouraz zot pour obeir komannman Zezi pour fer disip. Zis dan lespas detrwa dizenn lannen apre ki zot ti’n ganny sa komannman, zapot Pol ti kapab ekrir ki sa bon nouvel ti’n ganny anonse “avek tou dimoun dan lemonn antye.” (Kol. 1:23) Sertennman, sa bann disip ti prouve ki zot ti apresye sa lanmitye ki zot ti annan avek Zezi!
13. Dan ki fason disip Zezi ti les son lansennyman annan lefe lo zot lavi?
13 Bann dimoun ki ti vin disip ti osi les lansennyman Zezi annan lefe lo zot lavi. Pour bokou zot, sa ti vedir fer bann gran sanzman dan zot fason azir ek personnalite. Serten nouvo disip avan sa ti bann omoseksyel, adilter, soular oubyen voler. (1 Kor. 6:9-11) Lezot ti’n bezwen sanz zot latitid anver bann dimoun ki sorti en diferan ras. (Akt 10:25-28) Me kantmenm sa, zot ti obeir Zezi. Zot ti debaras zot avek zot vye personnalite e adopte enn nouvo. (Efe. 4:20-24) Zot ti konn “Lespri Kris” pli byen, zot ti arive konpran e imit son fason panse ek son fason azir.—1 Kor. 2:16.
Lanmitye avek Kris ozordi
14. Ki Zezi ti promet pour fer pandan “konklizyon sa sistenm”?
14 Bokou parmi sa bann Kretyen dan premye syek ti’n konn Zezi personnelman oubyen ti’n vwar li apre son rezireksyon. Nou nou pa’n ganny sa privilez. Me alor, ki mannyer nou kapab vin zanmi Zezi? En fason i pour obeir gidans ki nou gannyen atraver lesklav fidel e pridan, enkli parmi i bann frer swazir Zezi ki ankor vivan lo later. Zezi ti promet ki pandan “konklizyon sa sistenm,” i ti pou met son lesklav ansarz “tou son byen.” (Mat. 24:3, NW, 45-47) Ozordi sa gran mazorite dimoun ki pe fer zefor pour vin zanmi Kris pa bann manm sa lesklav. Ki mannyer lafason zot reazir anver gidans ki zot gannyen avek sa lesklav fidel i annan en lefe lo zot lanmitye avek Kris?
15. Kwa ki pou determinen si en dimoun pou ganny klasifye konman en mouton oubyen en kabri?
15 Lir Matye 25:31- 40. Zezi i apel bann ki ti pou form sa lesklav konman son bann frer. Dan sa legzanp konsernan separasyon mouton ek kabri, Zezi ti klerman dir ki lafason nou tret son bann frer i konmsi nou pe azir dan sa fason anver li. An realite, i ti dir ki se lafason ki en dimoun i tret menm “bann pli pti parmi [son] bann frer” ki ti pou determinen si en dimoun i en mouton oubyen en kabri. Alor, sa fason prensipal ki bann ki annan sa lespwar pour viv lo later i demontre sa dezir pour vin zanmi Kris i kan zot donn zot sipor sa lesklav fidel.
16, 17. Ki mannyer nou kapab demontre nou lanmitye anver bann frer Zezi?
16 Si ou annan sa lespwar pour viv lo later anba Rwayonm Bondye, ki mannyer ou kapab demontre ou lanmitye anver bann frer Kris? Annou egzamin zis trwa fason. Premyerman, par partisip dan sa travay predikasyon avek tou ou leker. Kris ti donn son bann frer en komannman pour pres sa bon nouvel dan lemonn antye. (Mat. 24:14) Me, larestan bann frer Kris ki ankor lo later ozordi ti pou vwar li vreman difisil pour akonplir sa travay san led zot konpanyon lezot mouton. An realite, sak fwa ki bann manm lezot mouton i partisip dan sa travay predikasyon, zot ed bann frer Kris pour akonplir sa travay sakre ki zot in gannyen. Zis parey Kris i apresye ki zot demontre zot lanmitye dan sa fason, sa lesklav fidel e pridan i osi vreman apresye.
17 En dezyenm fason ki bann ki form parti lezot mouton i kapab ed bann frer Kris i kan zot siport sa travay predikasyon finansyerman. Zezi ti ankouraz son bann disip pour servi larises sa lemonn pour fer zanmi. (Lik 16:9) Sa pa vedir ki nou kapab aste lanmitye avek Zezi oubyen Zeova. Me o kontrer, kan nou servi nou bann keksoz materyel pour siport lentere Rwayonm, nou prouv nou lanmitye ek lanmour, pa zis an parol me osi par nou “laksyon” ek laverite. (1 Zan 3:16-18) Nou donn nou sipor dan sa fason, kan nou partisip dan sa travay predikasyon, kan nou fer donasyon pour konstrir e mentenir nou bann landrwa ladorasyon e osi kan nou fer kontribisyon pour sa travay predikasyon dan lemonn antye. Ki swa nou kontribye en pti gin oubyen bokou, Zeova ek Zezi i vreman apresye kan nou donn avek lazwa.—2 Kor. 9:7.
18. Akoz nou devret obeir gidans baze lo Labib ki bann ansyen dan kongregasyon i donn nou?
18 En trwazyenm fason ki nou tou nou prouve ki nou zanmi Zezi i kan nou korpere avek gidans ki bann ansyen dan kongregasyon i donn nou. Sa bann zonm in ganny apwente par lespri sen anba gidans Kris. (Efe. 5:23) Zapot Pol ti ekrir: “Obei zot bann dirizan e swiv zot lord.” (Ebr. 13:17) Parfwa, nou kapab vwar li en defi pour obeir bann gidans baze lo Labib ki bann ansyen lokalman i donn nou. I tre probab ki nou konn zot bann defo e sa i kapab fer nou vwar sa konsey dan en fason negatif. Kantmenm sa, Kris, Sef kongregasyon, i kontan pour servi sa bann zonm enparfe. Alor, lafason ki nou reazir anver zot lotorite i direkteman annan en lefe lo nou lanmitye avek Kris. Kan nou pa konsantre lo defo bann ansyen e avek lazwa nou swiv zot gidans, nou prouv nou lanmour pour Kris.
Kote nou kapab trouv bann vre zanmi
19, 20. Ki i posib pour nou trouve dan kongregasyon e ki nou pou egzaminen dan lot lartik?
19 Zezi i kontinyen pran swen avek nou pa zis atraver bann berze ranpli avek lanmour ki pe vey lo nou me i osi donn nou bann manman, frer ek ser spirityel dan kongregasyon. (Lir Mark 10:29, 30.) Kan ou ti fek konmans asosye avek lorganizasyon Zeova, ki mannyer ou bann fanmir ti reazir? Fotespere, zot ti donn ou sipor dan ou zefor pour apros avek Bondye ek Kris. Me par kont, Zezi ti averti ki parfwa ‘lennmi en dimoun pou trouv parmi manm son prop fanmir.’ (Mat. 10:36) Pa i rekonfortan pour konnen ki dan kongregasyon nou kapab trouv bann ki pli atase avek nou ki en frer parante!—Prov. 18:24.
20 Salitasyon Pol pour kongregasyon Ronm a lafen son let i montre nou ki i ti fer bokou zefor pour fer bann bon zanmi. (Rom. 16:8-16) Zapot Zan ti termin son trwazyenm let avek sa bann parol: “Fer tou nou bann zanmi salanm.” (3 Zan 14) I kler ki li osi i ti fer bann lanmitye ki ti dire. Ki mannyer nou kapab imit legzanp Zezi ek bann premye disip par batir e mentenir bann bon lanmitye avek nou bann frer ek ser Kretyen? Dan nou lot lartik nou pou egzamin larepons sa kestyon.
Ki ou pou reponn?
• Ki legzanp Zezi in kite konsernan vin en bon zanmi?
• Ki mannyer bann disip ti reazir anver sa lanmitye ki Zezi ti demontre anver zot?
• Ki mannyer nou kapab prouve ki nou zanmi avek Kris?
[Kestyon]
[Portre lo paz 21]
Zezi ti enterese avek sa ki son bann zanmi ti panse e avek zot santiman
[Portre lo paz 23]
Ki mannyer nou kapab demontre nou dezir pour vin zanmi Kris?