Katriyenm krwayans: BONDYE an trwa personn

Kote sa krwayans i sorti? “Aparaman sa doktrin lo Trinite in aparet ver lafen katriyenm syek. Dan en sans, sa i vre . . . Sa teori ki ‘Bondye i an trwa Personn’ pa ti’n ganny byen entegre, bann Kretyen pa ti ni vreman konpran oubyen krwar ladan avan lafen katriyenm syek.”—New Catholic Encyclopedia (1967), Volim 14, paz 299.

“Constantine ti tyermenn sa konsil ki ti ganny fer Nicaea le 20 Me, 325 [N.L.]. I ti gid sa deba byen vivan, e i ti propoz  . . sa teori ki montre relasyon ant Kris ek Bondye dan sa doktrin ki ti ganny adopte dan sa konsil, ki i ‘form en sel avek son Papa.’ Apard zis de levek, tou larestan ti aksepte sa doktrin akoz zot ti per lanperer, en kantite parmi zot ti fer sa kontreker.”—Encyclopædia Britannica (1970), Volim 6, paz 386.

Ki Labib i dir? “Etyenn li, ranpli avek Sent-Espri, ti lev son lizye e fikse dan lesyel. I ti war laglwar Bondye, ek Zezi pe debout lo kote drwat Bondye. I ti dir, ‘La mon war lesyel ouver, e Fis-de-Lonm pe debout lo kote drwat Bondye.’”—Akt 7:55, 56.

Ki sa vizyon i montre? Ranpli avek lespri sen Bondye, Etyenn ti vwar Zezi “pe debout lo kote drwat Bondye.” I kler alor ki Zezi pa ti vin Bondye apre son rezireksyon dan lesyel, me plito, en lespri diferan avek Bondye. I pa mansyonn en trwazyenm dimoun o bor Bondye dan sa resi. Malgre zefor ki’n ganny fer pour trouv bann pasaz dan Lekritir pour siport doktrin Trinite, pret Marie Émile Boismard ti ekrir dan son liv À l’aube du christianisme—La naissance des dogmes: “Sa deklarasyon ki Bondye i an trwa personn . . . pa ganny trouve okenn par dan Nouvo Testaman.”

Constantine ti promot sa doktrin pour met en lafen avek bann dezakor ki ti egziste dan legliz dan katriyenm syek. Me, finalman sa ti soulev en lot kestyon: Eski Mari sa madanm ki ti donn nesans Zezi, i “Manman Bondye?”

Konpar sa bann verse Labib: Matye 26:39; Zan 14:28; 1 Korentyen 15:27, 28; Kolosyen 1:15, 16

REALITE:

Sa doktrin lo Trinite in aparet ver lafen katriyenm syek