Les lezot vwar ou progre

“Pran byen a-ker sa responsabilite e met tou ou zefor ladan, pour ki tou dimoun i a war ou progre.”—1 TIM. 4:15.

1, 2. Ki nou konnen lo lavi Timote ek bann sanzman ki ti arive ler i ti apepre 20-t-an?

GALASI, en provens Ronm ki konmela i apel Latirki, ti landrwa kot Timote ti reste ler i ti ankor zanfan. Diran bann lannen apre lanmor Zezi, plizyer kongregasyon Kretyen ti ganny formen laba. Sa letan, Timote ki ti en zenn garson, son manman ek son granmanman, ti vin Kretyen. Zot ti osi vin bann manm aktif dan enn parmi sa bann kongregasyon. (2 Tim. 1:5; 3:14, 15) Sirman Timote ti kontan son lavi konman en zenn Kretyen dan en lanvironnman ki i ti’n abitye avek. Par kont, en sel kou keksoz ti konmans sanze.

² Tou ti konmans avek dezyenm vizit ki Pol ti fer dan sa landrwa. Sa letan, Timote ti petet annan 20-t-an par la ouswa en pti pe pli zenn. I tre probab ki pandan son vizit Lis, Pol ti pran not lo lefet ki “bann frer ki ti reste Lis ek Ikonyonm ti dir bokou dibyen lo [Timote].” (Akt 16:2) Aparaman Timote ti vreman matir spirityelman pour son laz. Apre sa, anba gidans lespri sen, Pol ek konsey ansyen dan sa landrwa ti poz lanmen lo Timote e prepar li pour bann travay spesyal dan kongregasyon.—1 Tim. 4:14; 2 Tim. 1:6.

3. Ki privilez ekstraordiner Timote ti gannyen dan servis?

³ Timote ti ganny en lenvitasyon ekstraordiner pour akonpanny zapot Pol lo son bann vwayaz. (Akt 16:3) Zis mazinen ki degre eksite e sirprann Timote ti’n kapab ete! Pour plizyer lannen ki ti pou vini, Timote ti pou vwayaz avek Pol, menm parfwa avek lezot e osi fer diferan travay delapar bann zapot ek ansyen. Pol ek Timote ti travay ansanm konman sirveyan e sa ti ed en kantite pour batir bann frer ek ser spirityelman. (Lir Akt 16:4, 5.) Pour sa rezon Timote ti byen renonmen parmi bokou Kretyen pour son progre spirityel. Apre ki i ti’n travay avek Timote pour apepre di-z-an, zapot Pol ti ekrir bann Filipyen: “Personn pa’n partaz mon gran preokipasyon parey [Timote], e pran sousi vreman pour zot byennet. . . . Zot konnen zot menm, ki mannyer Timote in montre son fidelite, ki mannyer in travay ansanm avek mwan konman en garson avek son papa dan servis levanzil.”—Fili. 2:20-22.

4. (a) Ki gro responsabilite Timote ti gannyen? (b) Ki kestyon ki kapab ganny demande an rapor avek parol Pol dan 1 Timote 4:15?

⁴ Letan ki Pol ti ekrir bann Filipyen, i ti’n donn Timote en gro responsabilite. Timote ti annan sa devwar pour apwent bann ansyen ek asistan ministeryel. (1 Tim. 3:1; 5:22) I kler ki Timote ti’n vin en sirveyan fidel e diny konfyans. Pourtan dan sanmenm sa let, Pol ti demann Timote pour les ‘tou dimoun  vwar son progre.’ (1 Tim. 4:15) Me pa Timote ti’n fini montre ki i ti’n progrese dan en fason eksepsyonnel? Alor, ki Pol ti oule dir par sa parol e ki byenfe nou kapab tire avek son konsey?

Demontre bann kalite spirityel

5, 6. Dan ki fason spirityalite kongregasyon Efez ti pe ganny menase e ki mannyer Timote ti protez kongregasyon?

⁵ Annou egzamin konteks 1 Timote 4:15. (Lir 1 Timote 4:11-16.) Avan ekrir sa parol, Pol ti’n al Masedwann, me i ti’n demann Timote pour reste Efez. Akoz? Serten dimoun dan sa lavil ti pe kree divizyon dan kongregasyon par entrodwir bann fo lansennyman. Timote ti devret protez kongregasyon e gard li pir spirityelman. Ki mannyer i ti pou fer sa? En fason se ki i ti devret kit en bon legzanp pour lezot.

⁶ Pol ti ekrir Timote: “Montre ou en legzanp pour bann krwayan dan ou fason koze, dan ou kondwit, dan ou lanmour, dan ou lafwa, e ou pirte.” Pol ti osi azoute: “Pran byen a-ker sa responsabilite e met tou ou zefor ladan, pour ki tou dimoun i a war ou progre.” (1 Tim. 4:12, 15) Sa progre ti relye avek bann kalite spirityel ki Timote ti annan, olye son responsabilite dan kongregasyon. Sa i sa kalite progre ki tou Kretyen i devret anvi lezot i vwar.

7. Ki tou dimoun dan kongregasyon i devret fer?

⁷ Parey dan letan Timote, ozordi osi i annan plizyer privilez dan kongregasyon. Serten i servi konman ansyen ouswa asistan ministeryel. Lezot i dan servis pionye. Lezot ankor i annan privilez pour servi konman sirveyan rezyonal e distrik, Betelit ouswa misyonner. Bann ansyen i partisip dan plizyer progranm lansennyman, parey sa ki ganny fer dan bann diferan lasanble. Par kont, tou Kretyen, zonm, madanm, ensi ki bann zenn i annan sa potansyel pour montre ki zot pe progrese spirityelman. (Mat. 5:16) Anfet, parey legzanp Timote i montre, menm bann Kretyen ki annan bann responsabilite spesyal dan kongregasyon i devret demontre zot bann kalite spirityel.

Vin en legzanp dan ou fason koze

8. Ki lefe nou parol i annan lo nou ladorasyon?

⁸ Timote ti devret kit en legzanp dan son fason koze. Ki mannyer nou kapab montre ki nou’n progrese dan sa domenn? Nou parol i revel en kantite lo nou. Zezi ti annan rezon kan i ti dir: “Labous i koz sa ki deborde dan leker.” (Mat. 12:34) Zak, demi frer Zezi osi ti rekonnet lefe ki nou parol i kapab annan lo nou ladorasyon. I ti ekrir: “En dimoun ki krwar i relizye, si i pa met en labrid avek son lalang, i pe anbet son lekor. Son larelizyon [oubyen “ladorasyon,” NW] i pa vo nanryen.”—Zak 1:26.

9. Dan ki fason nou devret en legzanp dan nou fason koze?

⁹ Lezot dan kongregasyon pou konnen ziska ki degre nou’n progrese spirityelman atraver nou fason koze. Anliny avek sa, olye fer bann konversasyon ki mank respe pour lezot, negatif, ki kritik ouswa fer ditor lezot, bann Kretyen matir pou fer bokou zefor pour koz dan en fason ki pou batir, rekonfort, konsol e ankouraz lezot. (Prov. 12:18; Efe. 4:29; 1 Tim. 6:3-5, 20) Si nou touzour pare pour koz lo nou krwayans avek lezot e defann standar Bondye ki tre o nivo, sa pou montre nou devosyon pour Bondye. (Rom. 1:15, 16) Bann dimoun ki annan sa bon kondisyon leker pou sirman remark lafason nou servi nou labous e zot kapab swiv nou legzanp.—Fili. 4:8, 9.

Vin en legzanp dan noun kondwit ek lapirte

10. Akoz lafwa san lipokrizi i enportan dan nou progre spirityel?

¹⁰ Pour en Kretyen vin en bon legzanp, i pa sifi zis pour li koz parol ankourazan. En di moun ki ipokrit i dir en bon keksoz me li menm i pa fer sa bon keksoz. Pol ti konn tre byen lipokrizi bann Farizyen e move lefe ki sa ti annan. Plis ki en fwa, i ti averti Timote kont sa kalite latitid ki mank senserite. (1 Tim. 1:5; 4:1, 2) Me Timote pa ti en ipokrit. Dan son dezyenm let pour Timote, Pol ti ekrir: “Mon rapel ou lafwa senser.” (2 Tim. 1:5) Kantmenm sa, Timote ti bezwen montre ki i ti vreman senser dan sa ki i ti pe fer. I ti devret vin en legzanp dan son kondwit.

11. Ki Pol ti ekrir Timote konsernan larises?

¹¹ Dan sa de let ki i ti ekrir Timote, Pol ti donn konsey lo plizyer laspe an rapor avek kondwit. Par egzanp, Timote ti devret evite tay deryer larises. Pol ti ekrir: “Lanmour larzan i rasin tou lemal. Serten dimoun, pour posed larzan in egare lwen avek lafwa e zot in met zot lekor dan en kantite tourman.” (1 Tim. 6:10) Lanmour pour larzan i en siny ki montre mank spirityalite. De lot kote, bann Kretyen ki kontant zot avek en lavi senp, setadir “annan manze ek lenz” i montre ki zot in progrese spirityelman.—1 Tim. 6:6-8; Fili. 4:11-13.

12. Ki mannyer nou kapab montre nou progre dan lavi tou le zour?

¹² Pol ti osi fer Timote konnen ki degre enportan i ti enportan pour bann madanm Kretyen “abiy zot byen desaman, respektab, dan en fason konvenab e senp.” (1 Tim. 2:9) Bann madanm ki dan zot fason sanze e pennyen, ensi ki dan lezot domenn dan lavi zot senp e rezonnab, zot kit bann bon legzanp pour lezot. (1 Tim. 3:11) Sa prensip i aplik pour bann zonm Kretyen osi. Pol ti konsey bann sirveyan pour ‘byen kontrol zot prop lemosyon, pour rezonnab e respektab.’ (1 Tim. 3:2) Ler nou demontre sa bann kalite dan sa ki nou fer tou le zour, lezot pou vwar nou progre.

13. Parey Timote, ki mannyer nou kapab vin en legzanp lapirte?

 ¹³ Timote ti devret osi vin en legzanp dan lapirte. Sa mo Grek ki Pol ti servi ti pe refer spesifikman avek lapirte dan domenm seksyel. Kondwit Timote sirtou anver bann madanm ti devret san okenn repros. I ti devret tret “bann vye madanm konman [son] manman, e bann zenn madanm konman [son] bann ser, avek bokou respe e avek pirte.” (1 Tim. 4:12; 5:2) Bondye i konn bann aksyon imoral ki kapab paret en sekre. Avek letan, lezot dimoun osi pou konnen. Me i osi vre ki bon travay ki en Kretyen i fer pa kapab ganny kasyet. (1 Tim. 5:24, 25) Tou dimoun dan kongregasyon i annan sa loportinite pour montre zot progre dan zot kondwit ek lapirte.

Lanmour ek lafwa i enportan

14. Ki mannyer Lekritir i met lanfaz lo lenportans pour annan lanmour antre nou?

¹⁴ En laspe enportan ki idantifye vre Kretyen i lanmour. Zezi ti dir son bann disip: “Dimoun pou war ki zot mon bann disip si zot kontan kanmarad.” (Zan 13:35) Ki mannyer nou demontre sa kalite lanmour? Parol Bondye i demann nou pour siport kanmarad “avek lanmour,” pour “vin bon, ranpli avek lafeksyon pour kanmarad; e pardonn kanmarad,” e osi pour demontre lospitalite anver lezot. (Efe. 4:2, 32; Ebr. 13:1, 2) Zapot Pol ti ekrir: “Annan en gran lafeksyon pour kanmarad parey bann frer.”—Rom. 12:10.

15. Akoz i enportan pour tou dimoun demontre lanmour, sirtou bann sirveyan?

¹⁵ Si Timote ti sever ouswa pa zantiy dan lafason i ti tret lezot Kretyen, sa ti pou annan en move lefe lo bann bon keksoz ki i ti’n fer konman en ansenyan ek sirveyan. (Lir 1 Korentyen 13:1-3.) De lot kote, lafeksyon senser ki Timote ti annan pour son bann frer, ansanm avek dibyen ek lospitalite ki i ti demontre, ti sirman donn plis laprev ki i ti’n progrese spirityelman. I byen alor ki dan son let pour Timote, zapot Pol ti mansyonnen spesifikman ki Timote ti devret en legzanp lanmour.

16. Akoz Timote ti devret annan en lafwa for?

¹⁶ Pandan son sezour Efez, lafwa Timote ti ganny teste. Serten ti pe promot bann doktrin ki pa ti an armoni avek lansennyman Kretyen. Lezot ti pe fann “bann fab” ouswa lenformasyon lo bann lide ki pa ti ede pour batir kongregasyon spirityelman. (Lir 1 Timote 1:3, 4.) Pol ti dekrir bann tel dimoun konman bann ki ti ‘gonfle avek lorgey e pa konn nanryen, ki ganny maladi diskisyon ek dispit lo mo.’ (1 Tim. 6:3, 4) Eski dan en fason ou en lot Timote ti pou menm reve pour reflesir lo sa move lansennyman ki ti pe propaze dan kongregasyon? Non, Pol ti ankouraz Timote pour “konbat sa bon konba dan lafwa” e evit “bann konversasyon vid e kontrer avek lafwa, ek bann fo largiman ki zot apel konnesans.” (1 Tim. 6:12, 20, 21) Napa okenn dout ki Timote ti swiv konsey saz Pol.—1 Kor. 10:12.

17. Ki mannyer nou lafwa i kapab ganny teste ozordi?

¹⁷ I enteresan pour note ki Timote ti ganny dir ki dan “dernyen tan, serten dimoun [ti] pou abandonn lafwa pour atas zot avek bann lespri tronper, e swiv bann lansennyman demon.” (1 Tim. 4:1) Tou dimoun dan kongregasyon, enkli sa bann ki annan responsabilite i devret parey Timote, zot lafwa i devret for e solid. Nou kapab  montre nou progre e vin en legzanp lafwa si nou pran en pozisyon ferm ek aksyon serye kont lapostazi.

Fer bokou zefor pour montre ou progre

18, 19. (a) Ki mannyer lezot i kapab vwar ou progre? (b) Ki nou pou diskite dan lot lartik?

¹⁸ I kler ki progre spirityel en vre Kretyen pa depan lo son laparans, abilite ouswa popilarite. I pa neseserman ganny demontre atraver kantite lannen servis dan Kongregasyon. O kontrer, si nou obeir Zeova dan nou fason panse, parol ek kondwit, sa pou montre ki nou’n progrese spirityelman. (Rom. 16:19) Nou devret swiv sa konsey pour kontan kanmarad e devlop en lafwa for. Wi, annou pran byen aker parol ki Pol ti dir Timote e met tou nou zefor ladan pour ki lezot i vwar nou progre.

¹⁹ En lot kalite ki ganny reflekte dan nou progre spirityel ek matirite Kretyen i lazwa, ki form parti fri lespri Bondye. (Gal. 5:22, 23) Lot lartik pou montre ki mannyer nou kapab devlop e gard nou lazwa pandan moman difisil.

Ki ou pou reponn?

• Ki lezot i kapab aprann lo nou atraver nou parol?

• Dan ki fason nou kondwit ek lapirte i montre nou progre?

• Akoz bann Kretyen i devret en legzanp lanmour ek lafwa?

[Kestyon]

[Portre lo paz 11]

Byen zenn, Timote ti demontre en gran matirite

[Portre lo paz 13]

Eski lezot i vwar ou progre?