Sa ki nou aprann avek Zezi

Lo lavi fanmir

Ki pwennvi lo maryaz ki fer bann fanmir ere?

Maryaz i en linyon sakre. Ler Zezi ti ganny demande si i permet pour divorse, i ti dir: “Zot pa’n lir, ki depi okonmansman Kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe. . . . Si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.” (Matye 19:4-6, 9) Kan en koup marye i swiv konsey Zezi e zot fidel avek kanmarad tou dimoun dan fanmir i santi zot an sekirite e ere.

Akoz lanmour pour Bondye i fer bann fanmir ere?

Zezi ti dir: “Kontan Senyer ou Bondye avek tou ou leker, avek tou ou lam, e avek tou ou lespri. Sa se premye e pli gran konmannman.” Lekel sa dezyenm pli gran komannman? Zezi ti dir: “Kontan ou prosen [enkli bann dimoun ki viv ansanm avek ou setadir ou fanmir] parey ou kontan ou prop lekor.” (Matye 22:37-39) Alor en bon relasyon avek Bondye i lakle pour en fanmir ere akoz i nou lanmour pour li ki pous nou pour kontan kanmarad.

 Ki mannyer bann msye ek madanm i kapab fer kanmarad ere?

Bann msye i fer zot madanm ere ler zot swiv legzanp Zezi. I ti annan en leta lespri sakrifis dan fason ki i ti demontre lanmour anver kongregasyon, son madanm senbolik. (Efezyen 5:25) Zezi ti dir: “Fis-de-Lonm pa’n vin pour ganny servi, me pour servi.” (Matye 20:28) Zezi pa ti zanmen kriyel ni brit avek bann ki i ti pran swen avek, me i ti donn zot rekonfor. (Matye 11:28) Alor bann msye i devret egzers zot lotorite dan en bon fason ki anmenn byenfe pour tou dimoun dan fanmir.

Bann madanm i kapab retir byenfe atraver legzanp Zezi. Labib i dir: “Bondye i sef Kris.” I osi dir ki “en mari i sef son madanm.” (1 Korentyen 11:3) Zezi pa ti mazinen ki i ti tro enportan pour soumet avek Bondye. I ti annan en profon respe pour son Papa. Zezi ti dir: “Mon touzour fer sa ki fer li plezir.” (Zan 8:29) En madanm ki soumet anba lotorite son msye akoz son lanmour e respe pour Bondye i kontribye pour fer son lavi fanmir ere.

Ki paran i kapab aprann lo pwennvi ki Zezi ti annan lo zanfan?

Zezi ti pas letan avek bann zanfan e i ti enterese avek sa ki zot ti mazinen e santi. Labib i dir: “Zezi ti apel sa bann zanfan kot li, e i ti dir: ‘Les bann zanfan vin kot mwan.’” (Lik 18:15, 16) En lot fwa, bann dimoun ti kritik serten pti garson ki ti pe eksprim zot lafwa dan Zezi. Me Zezi ti felisit sa bann pti marmay par dir avek bann ki ti pe kritik zot: “Zanmen zot in deza lir: ‘Dan labous bann zanfan ek bann pti baba, ou’n fer sorti kantik’?”—Matye 21:15, 16.

Ki zanfan i kapab aprann avek Zezi?

Zezi in kit en bon legzanp lo ki mannyer bann zanfan i devret annan lentere pour bann keksoz spirityel. Ler i ti annan 12 an, zot ti trouv li “dan tanp; i ti pe asize parmi bann profeser, i ti pe ekout zot e kestyonn zot.” Ki lefe sa ti annan lo bann dimoun ki ti la? “Tou dimoun ki ti tann li, ti etonnen par son lentelizans ek son repons.” (Lik 2:42, 46, 47) Me, sa konnesans ki Zezi ti annan pa ti fer li vin vantar. O kontrer i ti fer li annan respe pour son paran. Labib i dir: “I ti kontinyen obei zot.”—Lik 2:51.