Mesi! Sa enn ki Bondye in swazir pour sov nou
Mesi! Sa enn ki Bondye in swazir pour sov nou
“Parey tou dimoun i mor dan Adan, demenm dan Kris tou pou reviv.”—1 KOR. 15:22.
1, 2. (a) Ki mannyer Andre ek Filip ti reazir ler zot ti zwenn Zezi? (b) Akoz nou dir ki nou annan plis levidans ki bann Kretyen dan premye syek ki Zezi in ganny apwente konman Mesi?
ANDRE ti dir avek son frer Pyer: “Nou’n trouv Mesi.” I ti konvenki ki Zezi ki ti sorti Nazaret ti sa Enn ki Bondye in swazir. Filip ti krwar e ti al rod son zanmi Natanael e ti dir li: “Nou’n trouv li sa enn ki Moiz ek bann profet ti ekri lo li. I apel Zezi, Garson Zozef ki sorti Nazaret.”—Zan 1:40, 41, 45.
2 Eski ou vreman konvenki ki Zezi i sa Mesi promiz ki pou anmenn delivrans? (Ebr. 2:10) Konpare avek son bann disip dan premye syek nou annan bokou plis levidans ozordi ki Zezi i sa Enn ki Bondye ti apwent konman Mesi. Parol Bondye i donn bann laprev konvenkan ki Zezi ti Kris depi son nesans ziska son rezireksyon. (Lir Zan 20:30, 31.) Labib i osi montre ki Zezi ti pou kontinyen akonplir son rol konman Mesi ler i pou dan lesyel. (Zan 6:40; lir 1 Korentyen 15:22.) Dan en sans spirityel, ou osi ou kapab dir ki ou’n “trouv Mesi ozordi.” Me premyerman annou vwar ki mannyer bann premye disip ti kapab dir ki zot ti’n trouv Mesi.
Ptitapti “Sen Sekre” konsernan Mesi ti ganny revele
3, 4. (a) Ki mannyer bann disip dan premye syek ti kapab “trouv Mesi”? (b) Akoz ou kapab dir ki zis Zezi ki ti kapab akonplir tou bann profesi konsernan Mesi?
3 Ki mannyer bann disip Zezi dan premye syek ti kapab dir avek lasirans ki i ti Mesi? Atraver bann profet, ptitapti Zeova ti revele ki mannyer sa Mesi ki ti pou vini ti pou kapab ganny idantifye. En spesyalis Labib ti konpar lafason ki Zezi ti pou ganny idantifye avek en stati ki ti’n ganny fer avek bann bout marb. Admeton, plizyer zonm ki pa’n zanmen deza koz avek kanmarad i antre dan en lasanm sakenn avek en bout marb. Si ler sa bann bout marb i ganny aziste ansanm zot form en stati konplet, i ti pou toutafe normal pour ou krwar ki en dimoun ti’n bezwen koup sa stati an morso e donn sak zonm en bout. Parey sak bout marb ki form sa stati, sak profesi lo Mesi ti pou donn en lenformasyon enportan lo li.
4 Alor, eski i ti pou posib pour en sel dimoun kapab akonplir tou sa bann profesi lo Mesi par azar? En serser ti dir ki probabilite ki en dimoun ti pou’n kapab akonplir tou sa bann profesi lo Mesi par azar ti pou “telman enposib” ki sa lide ti pou bezwen ganny rezete. “Zis Zezi tousel dan listwar ki’n kapab fer sa.”
5, 6. (a) Ki mannyer Bondye pou egzekit zizman kont Satan? (b) Ki mannyer Bondye ti ptitapti revele dan ki fanmir sa “desandans” ki ti’n ganny promet pou sorti?
5 Sa bann profesi lo Mesi i santre lo sa “sen sekre.” Sa sen sekre i annan plizyer laspe enportan e i konsern tou kreasyon Bondye. (Kol. 1:26, 27; Zen. 3:15) Zizman Bondye kont Satan, “sa serpan lantikite,” ki’n fer imen komet pese e mor i ganny enkli dan sa sekre. (Rev. 12:9) Ki mannyer sa zizman ti pou ganny egzekite? Zeova ti predir ki en “madanm” ti pou donn nesans en “desandans” ki ti pou bles Satan lo son latet. Sa “desandans” ki’n ganny predir ti pou kraz latet sa serpan e elimin sa enn ki’n fer rebelyon, e fer maladi ek lanmor egziste. Premyerman Satan ti pou bles “desandans” sa madanm lo son talon dan en sans senbolik, akoz Bondye ti permet li.
6 Ptitapti Zeova ti revele lekel ki ti pou vin sa “desandans” ki ti’n ganny promet. Bondye ti dir avek Abraam: “Atraver ou desandans tou nasyon lo later pou sirman ganny beni.” (Zen. 22:18) Moiz ti predir ki sa Enn ti pou vin “en profet” pli gran ki li. (Det. 18:18, 19) David ti ganny lasirans e pli tar bann profet ti konfirmen ki sa Mesi ti pou enn son desandans e i ti pou erit tronn David pour touzour.—2 Sam. 7:12, 16; Zer. 23:5, 6.
Laprev ki Zezi ti Mesi
7. Akoz nou kapab dir ki Zezi ti desandans “madanm” Bondye?
7 Bondye ti anvoy son Garson, son premye kreasyon konman sa “desandans” ki ti sorti dan Son lorganizasyon spirityel ki i konsider konman son madanm. Sa ti vedir ki sel Garson Bondye ti pou bezwen “renons” son lavi dan lesyel pour ne konman en imen parfe. (Fili. 2:5-7; Zan 1:14) Lespri sen ti “kouver” Mari e sa ti garanti ki sa zanfan ki ti pou ne ti pou ‘sen, e ganny apele Garson Bondye.’—Lik 1:35.
8. Ki mannyer Zezi ti akonplir sa profesi konsernan Mesi ler i ti prezant son lekor pour ganny batize dan delo?
8 Sa bann profesi lo Mesi ti endike kote e kan Zezi ti pou ne. Zezi ti ne Betleenm parey i ti’n ganny predir. (Mika 5:2) Dan premye syek, bann Zwif ti annan en gran lekspektasyon. Vi ki serten ti enpasyan pour vwar Mesi, zot ti demande konsernan Zan Batis: “Pa limenm li Mesi.” Me Zan ti reponn: “Me sa ki pe vini, i pli for ki mwan.” (Lik 3:15, 16) Ler Zezi ti vin kot Zan ver lafen lannen 29 N.L. pour ganny batize a laz trant an, i ti prezant son lekor konman sa Mesi dan sa letan fikse zis parey i ti’n ganny profetize. (Dan. 9:25) Apre i ti konmans son minister, an dizan: “Ler in arive, Rwayonm Bondye i pros.”—Mark 1:14, 15.
9. Menm si bann disip Zezi pa ti annan tou detay, ki konviksyon solid zot ti annan?
9 Bann dimoun ti bezwen sanz zot pwennvi an rapor avek sa ki zot ti pe espekte. Bann dimoun ti annan rezon akeyir Zezi konman Lerwa, me sa letan zot pa ti vreman konpran ki i ti pou konmans rennyen pli tar e ki sa ti pou ganny fer dan lesyel. (Zan 12:12-16; 16:12, 13; Akt 2:32-36) Me ler Zezi ti demande: “Zot, ki zot dir mon ete?” Deswit Pyer ti reponn: “Oumenm Mesi, Garson Bondye vivan.” (Mat. 16:13-16) Pyer ti donn menm larepons ler en kantite parmi bann disip Zezi ti kit li akoz en lansennyman.—Lir Zan 6:68, 69.
Ekout Mesi
10. Akoz Zeova ti met lanfaz lo nesesite pour ekout son Garson?
10 Garson Bondye ti en lanz pwisan ler i ti dan lesyel. Lo later Zezi ti pe reprezant son Papa. (Zan 16:27, 28) I ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.” (Zan 7:16) Zour transfigirasyon Zeova ti konfirmen ki Zezi ti sa Enn ki ti pou vin Mesi, I ti dir: “Ekout li.” (Lik 9:35) Wi, nou devret ekout oubyen obeir sa Enn ki’n ganny swazir. Pour fer sa nou bezwen annan lafwa e fer bann bon aksyon, sa de keksoz i vreman enportan pour fer plezir Bondye e pour ganny lavi eternel.—Zan 3:16, 35, 36.
11, 12. (a) Akoz bann Zwif dan premye syek pa ti aksepte Zezi konman Mesi? (b) Lekel ki ti annan lafwa dan Zezi?
11 Menm si Zezi ti annan bann laprev enpresyonan ki donn levidans ki i ti Mesi, laplipar Zwif dan premye syek pa ti aksepte li konman Mesi. Akoz? Akoz zot ti annan zot prop pwennvi lo Mesi, enkli sa lide ki i ti pou vin sa lider ki ti pou delivre zot anba dominasyon bann Romen. (Lir Zan 12:34.) Alor, zot pa ti kapab aksepte en Mesi ki ti akonplir bann profesi ki ti dir ki i ti pou ganny meprize, evite, en zonm douler ki konnen ki si sa maladi e finalman ganny touye. (Iza. 53:3, 5) Menm serten parmi bann disip fidel Zezi ti dezapwente akoz i pa ti delivre zot lo plan politik. Me zot ti reste fidel, e avek letan zot ti ganny en konnesans egzakt.—Lik 24:21.
12 En lot rezon akoz dimoun ti rezet Zezi konman Mesi promiz ti akoz son lansennyman, ki zot ti vwar difisil pour aksepte. Zezi ti ansennyen ki pour antre dan Rwayonm en dimoun ti pou bezwen “aret mazin son lekor,” “manz” son laser ek son disan, “ne de nouvo” e “pa fer parti lemonn.” (Mark 8:34; Zan 3:3; 6:53; 17:14, 16) Bann dimoun orgeye, ris e ipokrit ti vwar li tro difisil pour viv dapre sa bann standar. Me, bann Zwif ki ti annan limilite ti aksepte Zezi konman Mesi, sa ti osi leka pour serten Samariten e zot ti dir sa parol konsernan li: “Nou konnen ki limenm sover lemonn.”—Zan 4:25, 26, 41, 42; 7:31.
13. Ki mannyer Zezi ti ganny blese lo son talon dan en sans senbolik?
13 Zezi ti predir ki i ti pou ganny kondannen par bann sef relizye e ganny met a mor lo en poto par lezot nasyon, me lo trwazyenm zour i ti pou resisite. (Mat. 20:17-19) Lefet ki i ti dir ki i ti “Mesi, Garson Bondye” devan bann manm Sannedren, i ti ganny akize konmkwa i ti pe blasfenm. (Mat. 26:63-66) Pilat ti vwar ki i “pa [ti’n] fer nanryen pour li merit lanmor,” me vi ki bann Zwif ti osi akiz li pour revolt, Pilat “ti livre Zezi dan zot lanmen” parey zot ti’n demande. (Lik 23:13-15, 25) Malgre bann laprev enpresyonan ki i ti’n ganny anvoye par Bondye, zot ti rezet “sa enn ki donn lavi,” e fer konplo pour touy li. (Akt 3:13-15) Mesi ti ganny “touye” parey i ti’n ganny predir e i ti ganny kloute lo en poto Zour Lapak lannen 33 N.L. (Dan. 9:26, 27; Akt 2:22, 23) Par sa lanmor kriyel, i ti akonplir sa profesi ki ti ganny predir dan Zenez 3:15 kot i ti pou ganny blese lo son “talon.”
Akoz Mesi ti bezwen mor
14, 15. (a) Ki sa de rezon akoz Zeova ti permet ki Zezi i mor? (b) Ki Zezi ti fer apre ki i ti ganny resisite?
14 I annan de rezon enportan akoz Zeova ti permet ki Zezi i mor. Premyerman, lefet ki Zezi ti pou reste fidel ziska lanmor ti en laspe enportan sa “sen sekre.” I ti prouve dan sa pli bon fason ki en zonm parfe i kapab gard son “devosyon anver Bondye” e soutenir souvrennte Bondye malgre sa pli gro leprev sorti kot Satan. (1 Tim. 3:16, NW) Dezyenmman, parey Zezi ti dir, “Fis-de-Lonm [in] vin pour . . . donn son lavi konman pri pour liberasyon bokou dimoun.” (Mat. 20:28) Sa “pri” oubyen ranson in pey santans pese ki bann desandans Adan in erite e permet tou dimoun ki aksepte Zezi konman sa mwayen ki Bondye in swazir pour anmenn delivrans e donn lavi eternel.—1 Tim. 2:5, 6.
15 Apre trwa zour dan latonm, Kris ti resisite e pour karant zour i ti aparet avek son bann disip pour donn laprev ki i ti vivan e pour donn zot plis lenstriksyon. (Akt 1:3-5) Apre sa i ti mont dan lesyel pour prezant valer son sakrifis presye devan Zeova e esper sa letan fikse kot son prezans konman Lerwa dan Rwayonm Bondye ti pou konmanse. Antretan, i ti annan bokou keksoz pour fer.
I pe kontinyen zwe son rol konman Mesi
16, 17. Fer resorti rol Zezi konman Mesi apre ki i ti mont dan lesyel.
16 Tou dilon bann syek depi son rezireksyon, Zezi in fidelman sirvey aktivite kongregasyon Kretyen kot i pe dirize konman Lerwa. (Kol. 1:13) Dan letan fikse ki ti’n ganny predir, i pou konmans servi son pouvwar konman Lerwa dan Rwayonm Bondye. Bann profesi Labib ek bann levennman i konfirmen ki son prezans konman Lerwa e letan “lafen” ti konmanse an 1914. (Mat. 24:3; Rev. 11:15) Deswit apre, ansanm avek son bann lanz sen i ti pous Satan dan lesyel.—Rev. 12:7-10.
17 Sa travay predikasyon e fer disip ki Zezi ti konmanse lannen 29 N.L. i pros pour ariv lo son pik. Byento i pou ziz tou bann vivan. Alors i pou dir avek bann ki resanble bann mouton e ki’n aksepte li konman sa mwayen ki Zeova i servi pour anmenn delivrans pour “erit Rwayonm ki’n ganny prepare pour zot depi kreasyon lemonn.” (Mat. 25:31-34, 41) Sa bann ki’n rezet Zezi konman Lerwa pou ganny detrir ler i gid sa larme lesyel ki pou egzekit zizman kont tou bann move dimoun. Apre sa, Zezi pou ansenn Satan e zet li ek son bann demon dan “labim.”—Rev. 19:11-14; 20:1-3.
18, 19. Ki Zezi in fer pour akonplir son rol konman Mesi e ki rezilta sa i anmennen pour bann imen obeisan?
18 Pandan sa Mil an kot Zezi pou dirize, i pou vreman akonplir tou son promes an rapor avek bann diferan tit ki i annan tel parey “Konseye Merveye, Bondye Pwisan, Papa Eternel, e Prens Lape.” (Iza. 9:6, 7) Par mwayen dominasyon son Rwayonm bann dimoun pou vin parfe, sa i enkli bann mor ki pou resisite. (Zan 5:26-29) Sa Mesi pou gid bann imen ki anvi kot “sours delo ki donn lavi,” pour ki zot annan en relasyon kot zot pou anpe avek Zeova. (Lir Revelasyon 7:16, 17.) Apre sa tes final, tou bann rebel enkli Satan ek son bann demon pou ganny “zete dan lak dife avek souf.” I a sa moman ki latet sa “serpan” pou ganny kraze.—Rev. 20:10.
19 Pa sa Mesi i akonplir son rol dan en fason merveye e parfe! Paradi pou ranpli avek dimoun ki pou’n ganny delivre avek pese, zot pou viv pour touzour avek en lasante parfe e zot pou ere. Tou repros pou ganny retire lo non Zeova ki sakre e son drwa pour dirize pou ganny konpletman zistifye. Pa en gran leritaz pe esper tou bann ki obeir sa Enn ki Zeova in swazir!
Eski ou’n trouv Mesi?
20, 21. Ki bann rezon nou annan pour koz avek lezot lo Mesi?
20 Depi 1914 nou pe viv dan sa letan ki ganny apele prezans Kris oubyen pa·rou·siʹa. Menm si son prezans konman Lerwa dan Rwayonm Bondye i envizib, par kont i evidan dapre lakonplisman bann profesi. (Rev. 6:2-8) Me, zis parey bann Zwif dan premye syek, laplipar dimoun ozordi i inyor levidans konsernan prezans Mesi. Zot osi zot oule en Mesi ki vin zot lider politik oubyen enn ki pou servi bann dirizan politik pour fer sa ki li i oule. Me ou ou’n arive konnen ki aprezan Zezi pe rennyen konman Lerwa dan Rwayonm Bondye. Eski pa ou ti vreman kontan pour konn sa? Zis parey bann disip dan premye syek, ou ti santi ou pouse pour dir: “Nou’n trouv Mesi.”
21 Ler ou koz lo laverite ozordi, eski ou fer resorti rol ki Zezi i annan konman Mesi? Si ou fer sa ou pou montre ou lapresyasyon pour sa ki i’n deza fer pour ou, sa ki i pe fer aprezan e sa ki i pou akonplir dan lavenir. San okenn dout parey Andre ek Filip, ou’n koz avek ou fanmir ek zanmi konsernan Mesi. Avek plis devouman, akoz ou pa apros zot e montre zot ki Zezi Kri i vreman sa Mesi ki’n ganny swazir par Bondye pour anmenn delivrans?
Eski ou kapab eksplike?
• Ki mannyer bann disip dan premye syek ti kapab rekonnet Mesi?
• Donn de rezon enportan akoz Zezi ti mor.
• Ki Zezi pou fer dan lavenir pour akonplir son rol konman Mesi?
[Kesyon]