Premye krwayans: Nanm i imortel

Kote sa krwayans i sorti? “Bann premye filozof Kretyen ti adopte sa nide Grek konsernan nanm imortel e zot ti krwar ki nanm in ganny kree par Bondye e i’n ganny mete dan lekor zour konsepsyon.”—The New Encyclopædia Britannica (1988), Volim 11, paz 25.

Ki Labib i dir? “Nanm ki fer pese, i pou mor.”—Ezekyel 18:4, King James Version.

Labib i dir sa konsernan kreasyon sa premye imen: “Zeova ti alor form zonm avek lapousyer sorti dan later e i ti soufle souf lavi dan son nennen, e sa zonm ti vin en nanm [dan langaz Ebre, neʹphesh] vivan.”—Zenez 2:7.

Sa mo Ebre neʹphesh, ki’n ganny tradwir “nanm,” i vedir ‘en kreatir ki respire.’ Ler Bondye ti kree sa premye zonm, Adan, I pa ti met dan li en nanm imortel me plito en lafors lavi ki ganny soutenir par respirasyon. Alors, dapre Labib “nanm” i refer avek en dimoun ouswa zannimo. San sa lafors lavi ki Bondye in donnen, sa nanm i mor.—Zenez 3:19; Ezekyel 18:20.

Sa lansennyman konsernan nanm imortel ti soulev lezot kestyon: Kote nanm i ale apre lanmor? Ki arive avek nanm bann move dimoun? Ler bann swadizan Kretyen ti aksepte sa krwayans konsernan nanm imortel, sa ti fer ki zot ti bezwen aksepte en lot krwayans. Sa i sa lansennyman konsernan lanfer.

Konpar sa bann verse Labib: Eklezyast 3:19; Matye 10:28; Akt 3:23

REALITE:

Ler en dimoun i mor i aret egziste