Bondye i kontan nou—Ki mannyer nou konnen

I ANNAN en kestyon ki depi plizyer syek dimoun pe demande, enn ki vreman enportan: Si Bondye i kontan nou, akoz i annan sa kantite soufrans? Sirman ou pou dakor ki si ou kontan en dimoun, ou pa pou anvi sa dimoun i soufer e si i dan problenm ou pou esey ed li. Anliny avek sa, bokou dimoun i santi ki lefet ki i annan en kantite soufrans dan lemonn, Bondye pa kapab enterese avek nou. I enportan alor pour vwar premyerman levidans ki montre ki Bondye i kontan e enterese avek nou.

Kreasyon i laprev lanmour Bondye

Zeova i sa Bondye ki’n “kre lesyel ek later ek lanmer ek tou sa ki lo later e dan lanmer.” (Akt 4:24) Anmezir nou reflesir lo sa ki Zeova in kree, sirman nou devret konklir ki i enterese avek nou. Mazin par egzanp bann keksoz ki ou kontan e trouv plezir ladan. Eski ou kontan bann bon manze? Zeova ti’n kapab kree zis en kalite nouritir pour soutenir nou lavi. Me plito, i’n kree plizyer varyete nouritir ki bon dan labous. Pareyman, Bondye in ranpli later avek bann zoli pye dibwa, fler ek peizaz ki fer lavi gou e enteresan.

Egzamin osi lafason nou’n ganny kree. Nou kontan fer riye, nou annan sa abilite pour apresye lanmizik e pour admir bann zoli keksoz ki pa neseser pour kit nou vivan, me tousala i bann kado sorti kot Bondye ki fer nou lavi gou. Mazin osi ou relasyon avek lezot. Lekel ki pa apresye konpanni bann bon zanmi ouswa en pti anmaye avek en dimoun ki nou kontan en kantite? Alor, nou abilite pour kontan i en kado sorti kot Bondye ki kontan nou! Vi ki Bondye ti kree imen avek sa abilite pour kontan, sa kalite i bezwen form parti personnalite Bondye.

Labib i asir nou lanmour Bondye

Labib i dir nou ki Bondye i lanmour. (1 Zan 4:8) Son lanmour pa ganny demontre zis dan son kreasyon, i osi evidan  dan son Parol, Labib. Par egzanp, Labib i donn nou gidans ki ede pour nou annan en bon lasante, i ankouraz nou pour servi tou keksoz avek moderasyon e averti nou kont bwar e manz tro bokou.—1 Korentyen 6:9, 10.

Labib i osi donn konsey saz konsernan nou relasyon avek lezot, i ankouraz nou pour kontan kanmarad e tret lezot avek respe, dinyite ek labonte. (Matye 7:12) I kondann bann pratik ek latitid ki anmenn soufrans, parey vorasite, groker, rimer, zalouzi, adilter ek mert. Si tou dimoun ti esey viv an armoni avek bann bon konsey dan Lekritir, sirman i ti pou annan mwens soufrans dan lemonn antye.

Par kont, pli gran fason ki Bondye in demontre son lanmour ti par donn son Garson Zezi konman en ranson pour limanite. Zan 3:16 i dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” Alor Zeova in fini fer laranzman pour elimin totalman lanmor ek tou sort soufrans pour touzour.—1 Zan 3:8.

I kler alor ki i annan en kantite laprev ki montre ki Zeova i kontan nou. Sa i montre osi ki i pa pran plezir pour vwar nou soufer. I pou azir pour elimin soufrans. Nou napa okenn dout lo sa, Labib i dir nou egzakteman ki mannyer Bondye pou elimin soufrans.

[Portre lo paz 4]

Sa abilite pour kontan i en kado sorti kot Bondye ki kontan nou