Lafason ki Satan i dirize pa pou reisi

“Sa enn ki mesan pou mal pase.”—EKLE. 8:13.

1. Akoz zizman bann move dimoun ki pou ganny egzekite byento i en nouvel rekonfortan?

TO OU TAR bann move dimoun pou ganny zize. Zot pou bezwen rann kont pour sa ki zot in fer. (Prov. 5:22; Ekle. 8:12, 13) Sa nouvel i rekonfortan, sirtou pour bann ki kontan ladrwatir, soufer akoz lenzistis e ganny maltrete par bann move dimoun. Satan oubyen Dyab ki papa tou mesanste i enn parmi bann mesan ki pou ganny zize.—Zan 8:44.

2. Akoz i ti demann letan pour ki sa kestyon ki ti ganny souleve dan Zarden Edenn i ganny reponn?

² Lefet ki Satan ti annan en tro gran lopinyon lo li menm an Edenn, sa ti fer li fer bann dimoun rezet lafason ki Zeova i dirize. Sa ti fer ki nou premye paran ti zwenn avek Satan pour kestyonn lotorite ki Zeova i annan e alor Zeova ti vwar zot konman bann peser. (Rom. 5:12-14) Byensir, Zeova ti konnen ki zot ti pou devenir akoz zot ti mank respe e rebel kont li. Me i ti neseser pour bann imen ek lanz pli byen konpran sa ki ti pou arive. Alor, sa ti demann en pe plis letan afen ki sa kestyon i ganny reponn e montre dan en fason kler ki sa bann rebel ti vreman annan tor.

3. Ki pwennvi nou devret annan lo bann gouvernman imen?

³ Vi ki bann imen ti rezet gidans Zeova, zot ti bezwen etablir zot prop kalite gouvernman. Ler zapot Pol ti ekrir bann krwayan Ronm i ti koz konsernan sa bann gouvernman konman “bann lotorite ki gouvernen” oubyen bann lotorite siperyer. Dan letan Pol, gouvernman Romen anba dominasyon Nero depi lannen 54 N.L., ziska 68 N.L., ki ti gouvernman prensipal. Pol ti dir ki sa bann lotorite “i ganny etabli par Bondye.” (Lir Romen 13:1, 2.) Eski sa i vedir ki Pol ti pe siport sa lide ki dominasyon imen i pli siperyer ki sa ki pour Bondye? Sa i pa ditou leka. O kontrer, i ti pe senpleman dir ki osi lontan ki Zeova i permet sa bann dirizan imen ki pe gouvernen egziste, bann Kretyen i devret respekte “sa lord ki’n ganny etablir par Bondye” e aksepte sa bann dirizan.

En semen ki anmenn ver maler

4. Eksplike akoz dominasyon imen pa pou reisi.

⁴ Kantmenm sa, dominasyon imen ki ganny enfliyanse par Satan pa pou reisi. Akoz? Premyerman, akoz i pa baze lo lasazes Bondye. Zis Zeova ki posed lasazes parfe. Alor i sa sel gid ki nou kapab depan lo la pour konnen ki si sa en bon dominasyon. (Zer. 8:9; Rom. 16:27) Kontrerman avek bann imen ki souvan aprann atraver zot leksperyans ek lerer, Zeova i touzour konn sa pli bon fason pour azir. Tou gouvernman ki pa swiv son gidans pa pou reisi. Pour sa rezon, san pran kont son move motivasyon, depi o konmansman lafason ki Satan i dirize par servi bann imen sirman pa ti pou reisi.

5, 6. Kwa ki ti aparaman fer Satan opoz Zeova?

⁵ En dimoun rezonnab i souvan evite konmans fer en keksoz si i konnen ki i pa pou reisi. Si i persiste pour fer sa keksoz, i pou oblize rekonnet son fot. En kantite fwa listwar in prouve ki i pa fer sans pour opoz sa Kreater tou pwisan. (Lir Proverb 21:30. *) Me Satan ti  les li ganny avegle par sa tro gran lopinyon ki i ti annan lo li menm ensi ki son lorgey e sa ti fer li rezet Zeova. Alor Dyab ti volonterman pran en semen ki ti pou finalman anmenn zis maler.

⁶ Sa latitid arogan ki Satan i annan ti sa menm latitid ki plitar en dirizan Babilonnyen ti demontre ler i ti vant son lekor an dizan: “Mon pou mont dan lesyel. Mon pou met mon tronn parlao bann zetwal Bondye, e mon pou asiz lo montanny kot renyon i deroule, dan sa bout pli lwen dan rezyon nor. Mon pou mont pli o ki bann nyaz; mon pou fer mwan vin parey sa enn Tre O.” (Iza. 14:13-15) Sa proze bet ki sa dirizan ti antreprann pa ti reisi e sa ti anmenn en laont dan lakour rwayal Babilonn. Pareyman, Satan ek son lemonn pou byento eksperyans en defet total.

Akoz Bondye in permet sa arive?

7, 8. Lefet ki Zeova in permet mesanste egziste pour en pe letan, ki serten byenfe sa in anmennen?

⁷ Serten i kapab demann zot lekor akoz Zeova pa ti anpes bann imen pran kote avek Satan e anpes zot swiv sa kalite dominasyon ki definitivman pa ti pou reisi. Konman sa Bondye Tou pwisan, i ti pou’n sirman kapab fer sa. (Egz. 6:3) Me i pa’n fer li. Son lasazes ti permet li vwar ki pli meyer solisyon i pour pa enterfer dan rebelyon bann imen pour en pe letan. Finalman, drwa Zeova konman en Dirizan drwat ki annan lanmour pou ganny zistifye e bann imen fidel pou ganny byenfe atraver son desizyon.

⁸ Pa bann imen ti pou’n ganny eparnyen en kantite soufrans si zot ti’n rezet propozisyon Satan e kontinyen soumet avek Bondye! Kantmenm sa, vi ki Zeova ti deside pour les bann imen gouvernen pandan en serten letan, sa in anmenn byenfe. Sa in fer ki bann dimoun senser in vwar pour zot menm ki i pli saz pour ekout Bondye e annan konfyans dan li. Pandan bann syek ki’n pase, bann imen in esey diferan kalite gouvernman, me napa enn ki’n prouve ki zot sa enn ideal. Sa realite in ranforsi konviksyon bann adorater Bondye ki vreman Zeova i diriz dan sa pli bon fason. I vre ki lefet ki Bondye in permet Satan dominen sa in fer limanite ek bann ki ador Bondye avek fidelite soufer en kantite. Me vi ki Bondye in permet ki mesanste i egziste pour en pe letan, sa in osi anmenn byenfe pour bann adorater fidel.

 En rebelyon ki’n anmenn laglwar pour Zeova

9, 10. Eksplike ki mannyer dominasyon Satan in glorifye Zeova.

⁹ Zeova in les Satan enfliyans bann imen e permet ki zot diriz zot menm, me sa pa’n anmenn okenn dezonner lo fason ki I gouvernen. O kontrer, listwar in prouve ki sa parol ki Zeremi ti ganny enspire pour dir i vre, konmkwa bann imen pa kapab gouvern zot prop lekor. (Lir Zeremi 10:23. *) An plis ki sa, rebelyon Satan in donn Zeova sa loportinite pour demontre Son bann bon kalite dan en fason pli remarkab ankor. Ki mannyer?

¹⁰ Vi ki nou kapab vwar bann move konsekans ki dominasyon Satan i anmennen, bann kalite parfe ki Zeova i annan i vin pli evidan ankor, sinon i pa ti pou fasil pour nou remarke. Dan sa fason, i’n ganny glorifye dan lizye bann ki kontan li. Wi, menm si i paret kontradiktwar, dominasyon Satan in vreman glorifye Bondye. I’n demontre ki Zeova in regle sa kestyon ki’n ganny souleve an rapor avek son souvrennte dan sa pli bon fason. Pour montre ki sa i vre, annou egzamin an bref serten kalite Zeova e vwar ki mannyer move dominasyon Satan i pous Zeova pour demontre son bann kalite plis ankor.

11. Ki mannyer Zeova in demontre lanmour?

¹¹ Lanmour. Labib i dir nou ki “Bondye i lanmour.” (1 Zan 4:8) Premyerman se lanmour ki ti pous Bondye pour kree imen. Deplis, lefet ki nou’n ganny kree dan en fason ki fer nou annan lakrent e dan en fason merveye, sa i montre ki Bondye i kontan nou. Avek lanmour Zeova in osi donn bann imen en zoli landrwa reste kot i annan tou sa ki neseser pour zot ere. (Zen. 1:29-31; 2:8, 9; Ps. 139:14-16) Me dek ki mesanste ti aparet dan fanmir imen, Zeova ti eksprim son lanmour dan lezot nouvo fason. Ki mannyer sa? Zapot Zan ti sit sa ki Zezi ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Eski i ti annan en fason pli remarkab ki Bondye ti kapab demontre son lanmour pour limanite apard ki anvoy son sel Garson lo later pour liber bann ki’n fer pese? (Zan 15:13) Sa fason ekstraordiner ki Zeova in demontre lanmour in vin konman en legzanp pour bann imen swiv. Sa i donn zot sa loportinite pour reflekte lanmour Bondye, sa kalite lanmour ki fer pase lentere lezot avan sa ki pour zot, dan zot lavi tou le zour zis parey Zezi ti fer.—Zan 17:25, 26.

12. Dan ki fason Zeova in demontre pwisans?

¹² Pwisans. Zis ‘Bondye Tou pwisan’ ki annan pouvwar pour donn lavi. (Rev. 11:17; Ps. 36:9) Normalman, ler en dimoun i ne son lavi i konmanse, zis parey en paz vid. Ler i mor, sa paz ki ti vid i aprezan ranpli avek bann desizyon, aksyon, leksperyans ki i’n fer dan son lavi e ki fer li inik e annan son prop  personnalite. Sa lenformasyon i kapab ganny prezerve dan memwar Zeova. Dan son letan fikse, Zeova i kapab redonn lavi sa dimoun ki’n mor e i pou revin sa menm dimoun ki i ti ete avan son lanmor. (Zan 5:28, 29) Alor menm si sa pa ti plan Bondye pour bann imen o konmansman, lanmor i donn Zeova sa loportinite pour montre ki i annan pouvwar pour resisit bann mor. Vreman, Zeova i ‘Bondye Tou pwisan.’

13. Ki mannyer sakrifis Zezi i demontre lazistis parfe Zeova?

¹³ Lazistis. Zeova pa koz manti; ni azir dan en fason enzis. (Det. 32:4; Tit 1:2) I touzour respekte son bann standar lo laverite ek lazistis ki o nivo, menm ler i pa paret dan son lavantaz. (Rom. 8:32) Pa Zeova ti’n vreman bezwen soufer pour vwar son Garson byenneme mor lo en poto martir konman en dimoun ki pa fidel e ki blasfenm! Me akoz son lanmour pour bann imen enparfe, Zeova ti pare pour soufer pour siport son prop standar parfe an rapor avek lazistis. (Lir Romen 5:18-21.) En lemonn ranpli avek lenzistis ti donn Zeova sa loportinite pour prouve ki zis li ki demontre sa pli o nivo lazistis.

14, 15. Dan ki fason Zeova ti demontre lasazes ek pasyans dan sa pli bon fason?

¹⁴ Lasazes. Deswit apre ki Adan ek Ev ti fer pese, Zeova ti dir dan ki fason i ti pou retir move konsekans tou mesanste ki zot rebelyon ti anmennen. (Zen. 3:15) Sa aksyon ki I ti pran imedyatman, e bann detay ki I ti revele ptitapti konsernan son plan avek son bann serviter, ti atir latansyon lo son lasazes plis ankor. (Rom. 11:33) Napa nanryen ki kapab anpes Bondye rezourd nenport problenm. Dan en lemonn ki ranpli avek en kantite keksoz imoral, lager, dimoun ki pa rezonnab, ki dezobeisan, san pitye, fer lapliferans e ipokrit, Zeova in ganny en ta loportinite pour montre bann imen ek lanz ki si sa vre lasazes. Disip Zak ti dir: “Lasazes ki sorti dan lesyel i premyerman pir, answit i kontan lape, i modere, pare pour met dakor, i ranpli avek pitye ek bon laksyon, san fer preferans e san lipokrizi.”—Zak 3:17.

¹⁵ Pasyans. Pasyans ki Zeova i annan pa ti pou sitan evidan si i pa ti akoz lenperfeksyon, pese ek febles bann imen. Vi ki Zeova in pare pour demontre pandan plizyer milye lannen ki i posed bann kalite merveye dan en fason parfe, sa i devret pous nou pour nou demontre rekonesans. Zapot Pyer ti byen dir ki nou devret “konsider pasyans nou Senyer konman en mwayen pour sov nou.”—2 Pyer 3:9, 15.

16. Vi ki Zeova i pare pour pardonnen, akoz sa i anmenn bokou lazwa?

¹⁶ Pare pour pardonnen. Nou tou nou fer pese e fer fot en kantite fwa. (Zak 3:2; 1 Zan 1: 8, 9) Pa nou devret vreman rekonesan ki Zeova i pare pour pardonnen “dan en gran fason”! (Iza. 55:7) Annou osi egzamin sa laverite: Lefet ki nou’n ne konman bann imen enparfe, nou kapab santi sa gran lazwa ler Bondye i pardonn nou nou bann fot. (Ps. 51:5, 9, 17) Ler nou personnelman eksperyans sa laspe tousan dan personnalite Zeova, sa i ranforsi nou lanmour pour li e i ankouraz nou pour swiv son legzanp dan lafason ki nou azir anver lezot.—Lir Kolosyen 3:13.

Akoz sa lemonn i malad

17, 18. Dan ki fason dominasyon Satan pa’n reisi?

¹⁷ Laplipar ditan sistenm Satan dan lemonn antye, setadir sa sistenm ki son prop dominasyon in etablir, pa’n reisi diran bann syek ki’n pase. An 1991, magazin The European ti fer sa remark: “Eski sa lemonn i malad? Wi annefe, me . . . pa akoz aksyon Bondye, son bann dimoun menm ki’n fer sa lemonn tonm malad.” Pa sa i vre! Ler zot ti ganny enfliyanse par Satan, nou premye paran ti swazir dominasyon imen plito ki dominasyon Zeova. Alor zot in etablir en fason gouvernen ki pa ti pou reisi. Soufrans ek maler ki bann dimoun in eksperyanse dan lemonn antye i donn laprev ki dominasyon imen pe soufer avek en maladi terib.

¹⁸ Lafason ki Satan i dirize i ankouraz legoizm. Me, legoizm pa pou zanmen kapab ganny laviktwar lo lanmour, akoz lafason ki Zeova i dirize i baze lo lanmour. Lafason ki Satan i gouvernen pa’n reisi anmenn stabilite, boner oubyen sekirite. Lafason ki Zeova i dirize pou ganny zistifye! Eski nou annan levidans konsernan sa ozordi? Wi, nou pou vwar sa dan lartik swivan.

[Not anba lo paz]

Ki nou’n aprann lo dominasyon par lir . . .

• Romen 13:1, 2?

• Proverb 21:30?

• Zeremi 10:23?

• Kolosyen 3:13?

[Kestyon]

[Portre lo paz 25]

Dominasyon Satan pa’n zanmen anmenn byenfe pour limanite

[Portre lo paz 26]

Zeova i annan pouvwar pour resisit bann mor

[Portre lo paz 27]

Zeova ti demontre son lanmour ek lazistis atraver sakrifis son Garson