Vin pour Zeova i en labonte ekstraordiner
Vin pour Zeova i en labonte ekstraordiner
“Nou apartenir a Senyer.”—ROM. 14:8.
1, 2. (a) Ki privilez nou annan? (b) Ki kestyon nou pou egzaminen?
I TI vreman en loner spesyal pour Izrael kan Zeova ti dir zot: “Zot pou sirman vin mon propriyete spesyal parmi tou lezot pep.” (Egz. 19:5) Dan nou letan osi bann manm kongregasyon Kretyen i annan sa loner pour vin pour Zeova. (1 Pyer 2:9; Rev. 7:9, 14, 15) I en privilez ki kapab benefisye nou pour touzour.
2 Vin pour Zeova i pa zis en privilez me i osi en responsabilite. Serten i kapab mazinen: ‘Eski mon pou kapab fer sa ki Zeova i ekspekte avek mwan? Si zanmen mon fer pese, eski i pou rezet mwan? Si mon vin pour Zeova, eski mon pou nepli lib?’ I byen pour mazin lo sa bann konsern. Me premyerman, i byen pour reflesir lo en lot kestyon: Ki byenfe i annan pour vin pour Zeova?
Vin pour Zeova i anmenn lazwa
3. Ki byenfe Raab ti gannyen lefet ki i ti deside pour servi Zeova?
3 Eski bann dimoun ki vin pour Zeova i benefisye akoz sa? Egzamin legzanp Raab, en prostitye ki ti viv dan ansyen lavil Zeriko. Sirman i ti ganny elve pour pratik ladorasyon imoral bann bondye Kanaan. Me pourtan, kan i ti tann konsernan laviktwar ki Zeova ti’n fer Izrael gannyen, i ti realize ki Zeova i sa vre Bondye. Alor i ti riske son lavi pour protez pep swazir Bondye e menm plas son lavenir dan zot lanmen. Labib i dir: “Demenm, Rahab, sa prostitye, li osi, eski i pa ti ganny rann zis devan Bondye par son bann laksyon ler i ti resevwar bann mesaze ki i ti ede e fer zot pas par en lot semen?” (Zak 2:25) Mazin benediksyon ki i ti gannyen kan i ti form parti pep pir Bondye, en pep ki ti ganny enstrir par Lalwa Bondye, dan lanmour ek lazistis. Pa i ti’n bezwen ere pour kit deryer son ansyen fason viv! I ti marye avek en Izraelit e elve son garson Boaz ki ti servi Bondye dan en fason eksepsyonnel.—Zoz. 6:25; Rit 2:4-12; Mat. 1:5, 6.
4. Ki byenfe Rit ti gannyen akoz son desizyon pour servi Zeova?
4 Rit ki ti sorti Moab osi ti deside pour servi Zeova. Kan i ti ankor en fiy, i tre probab ki i ti ador Kemos ek lezot bondye dan Moab, me pli tar i ti aprann lo Zeova sa vre Bondye e i ti marye avek en Izraelit ki ti’n vin pran refiz dan son pei. (Lir Rit 1:1-6. *) Pli tar, ler Rit ek son belser Orpa ti pe al Betleenm avek Naomi zot belmer, Naomi ti demann sa de madanm pour retourn kot zot. I pa ti pou fasil pour zot reste Izrael. Orpa ti “retourn kot son pep ek son bann bondye,” me Rit pa ti ale. I ti azir dapre son lafwa e i ti konnen ki i anvi vin pour Zeova. I ti dir Naomi: “Pa ensiste avek mwan pour abandonn ou, e pour aret swiv ou; akoz kot ou ale mon pou ale, e kot ou pas lannwit mon pou pas lannwit. Ou pep pou vin mon pep, e ou Bondye mon Bondye.” (Rit 1:15, 16) Rit ti benefisye avek Lalwa Bondye lefet ki i ti swazir pour servi Zeova, akoz dan lalwa, provizyon spesyal ti ganny fer pour bann vev, pov e dimoun ki ti napa later. I ti trouv lazwa, proteksyon ek sekirite anba lezel Zeova.
5. Ki ou’n aprann konsernan bann dimoun ki servi Zeova fidelman?
5 Petet ou konn serten dimoun ki apre ki zot in dedye zot lavi avek Zeova zot in servi li fidelman pour plizyer lannen. Demann zot ki byenfe zot in gannyen pour servi li. Menm si napa personn ki san problenm, levidans i definitivman siport parol sa psalmis: “Ere sa pep ki Zeova i zot Bondye!”—Ps. 144:15.
Zeova i annan ekspektasyon rezonnab
6. Akoz nou pa devret per pangar nou pa reisi fer sa ki Zeova i ekspekte nou fer?
6 Manke ou osi ou’n mazinen si ou pou kapab fer sa ki Zeova i ekspekte avek ou. Ou kapab santi ki i tro bokou pour ou vin en serviter Bondye, viv an armoni avek son lalwa e koz an son non. Moiz par egzanp, ti santi ki i pa ti kalifye pour koz avek bann Izraelit ek lerwa Lezip. Me Bondye ti rezonnab dan sa ki i ti pe ekspekte avek Moiz. Zeova ti ‘ansenny li ki pour fer.’ (Lir Egzod 3:11; 4:1, 10, 13-15. *) Vi ki Moiz ti aksepte led ki i ti gannyen, i ti trouv lazwa pour akonplir lavolonte Bondye. Dan sa menm fason, Zeova i rezonnab dan sa ki i ekspekte avek nou. I konpran nou lenperfeksyon e i anvi ed nou. (Ps. 103:14) Servi Bondye konman en disip Kris i gou olye en fardo, akoz sa fason viv i benefisye lezot e fer Zeova kontan. Zezi ti dir: “Vin kot mwan . . . mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.”—Mat. 11:28, 29.
7. Akoz ou kapab annan konfyans ki Zeova pou ed ou fer sa ki i ekspekte ou fer?
7 Zeova pou touzour donn nou sa lankourazman ki nou bezwen, tan ki nou depan lo li pour ganny lafors. Zeremi par egzanp, pa ti vreman en dimoun ki ti koz fasilman. Sa i fer ki kan Zeova ti swazir li konman Son profet, Zeremi ti dir: “A, Souvren Senyer Zeova! Vreman, mon pa konn koze, akoz mon ankor tro zenn.” Pli tar i ti menm dir: “Mon pa pou koz ankor o non Zeova.” (Zer. 1:6; 20:9) Pourtan, avek lankourazman Zeova, pour 40 an Zeremi ti pres en mesaz ki bann dimoun pa ti oule tande. Zeova ti touzour reasir li avek sa parol: “Mon avek ou pour sov ou e pour delivre ou.”—Zer. 1:8, 19; 15:20.
8. Ki mannyer nou demontre nou konfyans dan Zeova?
8 Zis parey Zeova ti donn Moiz ek Zeremi lafors, i kapab ed nou pour fer sa ki i ekspekte bann Kretyen i fer ozordi. En fakter enportan se pour depan lo Bondye. Labib i dir: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.” (Prov. 3:5, 6) Nou montre ki nou annan sa kalite konfyans dan Zeova kan nou profit byen sa led ki i donn nou atraver son Parol ek kongregasyon. Si nou les Zeova gid nou dan nou lavi, napa nanryen ki pou anpes nou reste fidel avek li.
Zeova i enterese avek son pep endividyelman
9, 10. Ki kalite proteksyon Psonm 91 i promet?
9 Ler pe mazin lo zot desizyon pour dedye zot lavi avek Zeova, serten in kapab mazinen si zot arive fer pese, zot kapab vin en dimoun ki napa valer devan Bondye e ganny rezete par Zeova. Erezman Zeova i donn nou tou sa proteksyon ki nou bezwen pour protez nou relasyon spesyal avek li. Annou vwar ki mannyer sa i ganny eksprimen dan Psonm 91.
10 Sa psonm i konmans koumsa: “Nenport dimoun ki reste dan landrwa sekre sa enn Tre O pou reste anba lonbraz sa Enn Tou Pwisan. Mon pou dir Zeova: ‘Ou mon landrwa refiz ek mon landrwa proteksyon, mon Bondye dan ki mon pou met konfyans.’ Akoz Zeova li menm pou delivre ou dan pyez sa saser zwazo.” (Ps. 91:1-3) Remarke ki Bondye i promet pour protez sa bann ki kontan li e annan konfyans dan li. (Lir Psonm 91:9, 14. *) Ki proteksyon i pe koz lo la? Bon, Zeova ti protez serten son bann serviter dan letan lontan fizikman, dan serten ka pour protez laliny desandans ki ti pou finalman ariv ziska sa Mesi ki ti’n ganny promet. Par kont, plizyer lezot zonm fidel ti ganny anprizonnen, martirize e touye akoz bann move dimoun ti anvi ki zot kas zot fidelite anver Bondye. (Ebr. 11:34-39) Zot ti ganny sa kouraz ki zot ti bezwen pour andire akoz Zeova ti protez zot spirityelman pour zot pa perdi zot lentegrite. Alor, nou kapab konpran Psonm 91 konman en promes an rapor avek proteksyon spirityel.
11. Kwa sa “landrwa sekre sa enn Tre O” e lekel ki Bondye i proteze ladan?
11 “Landrwa sekre sa enn Tre O” ki ganny mansyonnen par sa psalmis i reprezant proteksyon spirityel dan en sans senbolik. Ladan, sa bann ki reste avek Bondye konman son bann envite, zot sen e sof kont okenn keksoz ouswa dimoun ki pe met zot lafwa ek lanmour pour Bondye an danze. (Ps. 15:1, 2; 121:5) I en landrwa sekre akoz bann non krwayan pa kapab konpran sa. Dan sa landrwa, Zeova i protez bann dimoun ki annefe i dir: ‘Ou mon Bondye dan ki mon pou met konfyans.’ Si nou reste dan sa landrwa refiz, nou pa devret sitan enkyet pangar nou perdi laprouvasyon Zeova par tonm dan en pyez Satan, “sa saser zwazo.”
12. Ki danze ki menas nou relasyon avek Bondye?
12 Ki danze ki menas nou relasyon presye avek Bondye? Sa psalmis i mansyonn plizyer danze, e parmi zot i annan sa “lepidemi ki marse dan fernwanr, . . . [e] destriksyon ki fer ravaz dan milye lazournen.” (Ps. 91:5, 6) “Sa saser zwazo” in atrap bokou avek sa dezir egois pour anvi vin endepandan. (2 Kor. 11:3) I tyonbo lezot par promot vorasite, lorgey ek materyalizm. Lezot ankor i ganny anbete par bann filozofi parey patriyotism, evolisyon ek fo larelizyon. (Kol. 2:8) Bokou in ganny antrennen pour pratik relasyon seksyel imoral. Sa bann keksoz i en danze pour spirityalite e i’n fer bokou dimoun perdi zot lanmour pour Zeova.—Lir Psonm 91:7-10 *; Mat. 24:12.
Protez ou lanmour pour Bondye
13. Ki mannyer Zeova i protez nou avek bann danze ki menas nou byennet spirityel?
13 Ki mannyer Zeova i protez son pep avek sa bann danze spirityel? Sa psonm i dir: “I pou donn lord son prop lanz konsernan ou, pour protez ou dan tou sa ki ou fer.” (Ps. 91:11) Bann lanz dan lesyel i gid e protez nou pour ki nou kapab pres sa bon nouvel. (Rev. 14:6) Apard bann lanz, lansennyman bann ansyen dan kongregasyon i antyerman baze lo Labib e sa i kapab protez nou e anpes nou ganny tronpe par bann fo lansennyman. Zot kapab donn led personnel sa bann ki pe lite pour sirmont en move latitid sa lemonn. (Tit 1:9; 1 Pyer 5:2) “Lesklav fidel e pridan” osi i donn nouritir spirityel ki protez nou avek bann lansennyman lo evolisyon, lanvi pour satisfer bann dezir imoral, tay deryer larises ek popilarite e plizyer lezot dezir ek lenfliyans danzere. (Mat. 24:45, NW) Kwa ki’n ed ou reziste serten sa bann danze?
14. Ki mannyer nou kapab benefisye avek sa proteksyon ki Bondye i donnen?
14 Ki nou devret fer pour reste dan “landrwa sekre” Bondye ki donn proteksyon? Zis parey nou toultan bezwen protez nou lekor avek bann danze fizik parey aksidan, bann kriminel ouswa lenfeksyon, nou bezwen kontinyen azir pour protez nou lekor avek bann danze spirityel. Sa i fer alor ki nou devret regilyerman aksepte gidans ki Zeova i donn nou dan nou bann piblikasyon, renyon ek lasanble. Nou rod konsey avek bann ansyen. Eski pa nou osi benefisye avek bann diferan kalite ki nou bann frer ek ser Kretyen i demontre? Vreman, kan nou asosye avek kongregasyon sa i ed nou pour vin saz.—Prov. 13:20; lir 1 Pyer 4:10.
15. Akoz ou kapab annan konfyans ki Zeova i kapab protez ou avek okenn keksoz ki kapab fer ou perdi son laprouvasyon?
15 Nou napa rezon pour doute ki Zeova i kapab protez nou kont okenn keksoz ki kapab fer nou perdi son laprouvasyon. (Rom. 8:38, 39) I’n protez kongregasyon kont bann pouvwar relizye e politik ki pa anvi touy nou, me ki zot lobzektif se pour separ nou avek nou Bondye sen. Promes Zeova i vre: “Nenport ki zarm ki pou ganny formen kont ou pa pou reisi.”—Iza. 54:17.
Lekel ki donn nou liberte?
16. Akoz lemonn pa kapab ofer nou liberte?
16 Si mon vin pour Zeova, eski mon pou nepli lib? O kontrer, ler nou pour lemonn nou perdi nou liberte. Lemonn i elwannyen avek Zeova e i ganny dirize par en bondye kriyel ki gard bann dimoun konman lesklav. (Zan 14:30) Par egzanp, lemonn Satan i servi presyon ekonomik pour pran liberte bann dimoun. (Konpar Revelasyon 13:16, 17.) Pese osi i annan sa pouvwar tronper pour anprizonn bann dimoun. (Zan 8:34; Ebr. 3:13) Alor, menm si bann non krwayan i promet liberte kan zot promot en serten kalite stil lavi ki al kont lansennyman Zeova, tou sa bann ki ekout zot pou trouv zot lesklav en fason viv imoral e degradan en sel kou.—Rom. 1:24-32.
17. Ki liberte Zeova i ofer nou?
17 De lot kote, Zeova pou liber nou avek tou bann keksoz ki kapab fer nou ditor, si nou met nou lavi dan son lanmen. Dan en serten fason, nou sityasyon i parey pour en dimoun ki met son lavi dan lanmen en sirizyen eksperyanse ki kapab sov li dan en sityasyon danzere. Nou tou nou dan en sityasyon danzere, nou’n erit pese. Zis si nou met nou lavi dan lanmen Zeova, lo baz sakrifis Zezi, ki nou pou kapab annan lespwar pour ganny libere avek lefe pese e viv pour touzour. (Zan 3:36) Zis parey nou konfyans dan en sirizyen i kapab vin pli for ler nou aprann plis lo son repitasyon, nou konfyans dan Zeova pou vin pli for anmezir nou kontinyen aprann keksoz lo li. Alor, annou kontinyen etidye byen Parol Bondye akoz sa pou ed nou kontan li dan en fason ki pou retir okenn lafreyer pour vin pour li.—1 Zan 4:18.
18. Ki byenfe bann ki vin pour Zeova pou gannyen?
18 Zeova i donn tou dimoun sa liberte pour swazir. Son parol i dir: “Ou devret swazir lavi pour ki ou reste vivan, ou ek ou desandans, par kontan Zeova zot Bondye.” (Det. 30:19, 20) I anvi nou eksprim nou lanmour pour li par servi li volonterman. Olye pran nou liberte, vin pour sa Bondye ki nou kontan pou sirman fer e kit nou ere.
19. Akoz vin pour Zeova i en labonte ekstraordiner?
19 Konman bann ki fer pese, nou pa merite vin pour en Bondye parfe. Me sa i posib zis atraver lagras oubyen labonte ekstraordiner Bondye. (2 Tim. 1:9) Se pour sa ki Pol ti ekrir: “Si nou viv, nou viv pour Senyer; e si nou mor, nou mor pour Senyer. Alor, swa ki nou viv swa ki nou mor, nou apartenir a Senyer.” (Rom. 14:8) Sirman nou pa pou zanmen regrete pour apartenir ouswa vin pour Zeova.
[Not anba lo paz]
^ par. 4 Rit 1:1-6: “Dan letan kot bann ziz ti pe dirize, en lafamin ti frap sa pei, alor en zonm ti sorti Betleenm Zida pour al reste konman en etranze dan rezyon Moab, li ansanm avek son madanm ek son de garson. Sa zonm ti apel Elimelek, son madanm ti apel Naomi e son de garson ti apel Malonn ek Kilionn, bann Efratit sorti Betleenm Zida. Finalman zot ti ariv dan rezyon Moab e reste laba. Avek letan, Elimelek, msye Naomi ti mor e sa ti fer ki i ti reste avek son de garson. Pli tar, sa de zonm ti rod zot madanm parmi bann Moabit. Enn ti apel Orpa e lot ti apel Rit. Zot ti reste laba pour apepre di-z-an. Avek letan, Malonn ek Kilionn osi ti mor, e sa ti fer ki sa madanm ti reste san son de zanfan e san son msye. Alor i ti leve, ansanm avek son de belfiy pour sorti dan rezyon Moab, akoz laba dan rezyon Moab i ti’n tande ki Zeova ti pe pran swen avek son pep par donn zot dipen.”
^ par. 6 Egzod 3:11; 4:1, 10, 13-15: “Me Moiz ti dir avek sa vre Bondye: ‘Ki mwan, mon ete ki mon bezwen al kot Faraon e tir bann garson Izrael Lezip?’” “Alor Moiz ti reponn e dir: ‘Me fer krwar zot pa krwar mwan e pa ekout mwan akoz zot dir: “Zeova pa’n aparet avek ou.”’” “Alor Moiz ti dir Zeova: ‘Eskiz mwan Zeova, me mon pa en dimoun ki koz fasilman, ni depi yer ni depi bann zour avan sa, ni menm depi ki ou ti koz avek ou serviter, akoz mon pa konn koze e mon lalang i lour.’” “Me i ti dir: ‘Eskiz mwan Zeova, me silvouple anvoy en lot dimoun ki ou anvi.’ Alor, Zeova ti ankoler avek Moiz e i ti dir: ‘Eski pa Aaron sa Levit i ou frer? Mon konnen ki i pou konn koz byen. Deplis, la i la osi pe vin rankontre ou. Wi, kan i pou vwar ou i pou rezwir dan son leker. Ou devret koz avek li e met parol dan son labous; e mwan mon pou avek ou labous ek son labous; wi mon pou ansenny zot sa ki zot devret fer.’”
^ par. 10 Psonm 91:9, 14: “Akoz ou’n dir: ‘Zeova i mon refiz,’ Ou’n fer Tre O li menm ou landrwa reste.” “Parski i’n donn mwan son lafeksyon, mon pou delivre li. Mon pou protez li parski i’n arive konn mon non.”
^ par. 12 Psonm 91:7-10: “Mil pou tonm dan ou kote e dis mil dan ou kote drwat; me okenn keksoz koumsa pa pou vin pros avek ou. Zis avek ou prop lizye ou pou gete e ou pou vwar pinisyon bann move dimoun. Akoz ou’n dir: ‘Zeova i mon refiz,’ Ou’n fer Tre O li menm ou landrwa reste; ou pa pou ganny okenn maler, napa okenn fleo ki pou apros ou latant.”
Ki ou pou reponn?
• Ki byenfe i annan pour vin pour Zeova?
• Akoz nou kapab fer sa ki Bondye i ekspekte nou fer?
• Ki mannyer Zeova i protez son pep?
[Kestyon]
[Pictures on page 14]
Demann lezot ki byenfe zot in gannyen lefet ki zot in vin pour Zeova
[Picture on page 16]
Ki serten fason Zeova i donn proteksyon?