Byenveni lo sa semen pour sa pli bon lavi!
Byenveni lo sa semen pour sa pli bon lavi!
“Swa ki nou viv swa ki nou mor, nou apartenir a Senyer.”—ROM. 14:8.
1. Ki Zezi ti ansennyen konsernan sa pli bon fason viv?
ZEOVA i anvi ki nou viv sa pli bon lavi. Dimoun i kapab viv zot lavi dan diferan fason me i annan zis enn ki pli bon. Nou pa kapab viv sa pli bon lavi si nou pa viv an armoni avek Parol Bondye e aprann avek legzanp son Garson, Zezi Kri. Zezi ti ansenny son bann disip pour ador Bondye an espri e an verite e i ti demann zot pour fer disip. (Mat. 28:19, 20; Zan 4:24) Ler nou viv an armoni avek lenstriksyon Zezi, nou fer plezir Zeova e ganny Son benediksyon an retour.
2. Ki mannyer en kantite dimoun ti reazir anver mesaz Rwayonm dan premye syek, e ki i ti vedir sa letan pour swiv “Semen Senyer”?
2 Ler bann dimoun ki “annan sa bon kondisyon leker” i vin krwayan e ganny batize, nou annan rezon dir zot: “Byenveni lo sa semen pour sa pli bon lavi!” (Akt 13:48, NW) Dan premye syek Nou Lepok, plizyer milye dimoun sorti dan diferan nasyon ti aksepte laverite e ti batize pour montre zot devosyon anver Bondye. (Akt 2:41) Bann premye disip ti pe swiv “Semen Senyer.” (Akt 9:2; 19:23) Sa lekspresyon ti apropriye akoz bann dimoun ki ti vin disip Kris ti viv en lavi ki montre ki zot ti annan lafwa dan Zezi Kri e imit son legzanp.—1 Pyer 2:21.
3. Kwa ki pous en dimoun pour batize e konbyen dimoun ki’n batize pandan sa dernyen di-z-an?
3 Sa travay pour fer disip in progrese byen vit dan sa bann dernyen zour e aprezan i pe ganny fer dan plis ki 230 pei. Pandan sa dis dernyen lannen ki’n pase, in annan plis ki 2,700,000 dimoun ki’n pran sa desizyon pour servi Zeova e batize pour montre ki zot in dedye zot lavi avek li. Sa i apepre plis ki 5,000 dimoun sak semenn! Desizyon ki en dimoun i fer pour pran batenm i baze lo son lanmour pour Bondye, konnesans lo Labib e lafwa dan sa ki Labib i ansennyen. Batenm i en levennman enportan dan nou lavi, akoz i konmansman en relasyon pros avek Zeova. Sa i osi demontre ki nou annan konfyans ki i pou ed nou servi li fidelman, zis parey i ti ed son bann serviter dan letan pase pour mars lo son semen.—Iza. 30:21.
Akfer batize?
4, 5. Nonm serten benediksyon ek byenfe nou gannyen ler nou batize.
4 Petet ou’n ganny konnesans lo Bondye, ou’n fer bann sanzman dan ou lavi e aprezan ou en proklanmater non batize. Ou merit ganny felisite pour tou sa progre ki ou’n fer. Me eski ou’n dedye ou lavi avek Bondye dan lapriyer e anvi batize? Atraver ou letid Labib, aprezan ou konnen ki ou devret viv en lavi ki santre lo rann glwar Zeova, me pa senpleman fer plezir ou prop lekor oubyen anmas bann byen materyel. (Lir Psonm 148:11-13 *; Lik 12:15) Alor, ki serten benediksyon ek byenfe ou gannyen ler ou batize?
5 Konman en Kretyen ki’n dedye son lavi, ou pou annan sa bi pli enportan dan lavi. Ou pou ere akoz ou pe fer lavolonte Bondye. (Rom. 12:1, 2) Lespri sen Zeova pou ed ou devlop bann kalite Kretyen parey lape ek lafwa. (Gal. 5:22, 23) Bondye pou reponn ou lapriyer e beni ou zefor pour viv en lavi ki an armoni avek son Parol. Ou pou ganny lazwa dan ou minister e ler ou viv dan sa fason ki Bondye i aprouve, sa pou ranforsi ou lespwar pour lavi eternel. Deplis, ler ou dedye ou lavi e batize, sa pou montre ki ou vreman anvi vin en Temwen Zeova.—Iza. 43:10-12.
6. Ki nou pe demontre ler nou batize?
6 Ler nou dedye nou lavi avek Bondye e batize, nou fer konnen piblikman ki nou pour Zeova. Zapot Pol ti dir: “Annefe, personn pa viv pour limenm, e personn pa mor pour limenm. Si nou viv, nou viv pour Senyer; e si nou mor, nou mor pour Senyer. Alor, swa ki nou viv swa ki nou mor, nou apartenir a Senyer.” (Rom. 14:7, 8) Bondye i demontre loner anver nou par donn nou sa liberte pour swazir. Ler nou vreman deside pour viv sa kalite lavi akoz nou kontan Bondye, nou rezwir son leker. (Prov. 27:11) Nou batenm i montre ki nou’n dedye nou lavi avek Bondye e i fer vwar piblikman ki Zeova i nou Dirizan. I montre ki nou’n pran kote avek li an rapor avek sa kestyon ki ti ganny souleve konsernan son souvrennte iniversel. (Akt 5:29, 32) An retour Zeova i avek nou. (Lir Psonm 118:6. *) Ler nou batize sa i fer li posib pour nou resevwar en kantite benediksyon spirityel konmela menm e dan lavenir.
En lasosyasyon frer ek ser ki ini dan lanmour
7-9. (a) Ki lasirans Zezi ti donn avek bann ki ti kit tou keksoz pour swiv li? (b) Ki mannyer sa promes ki Zezi ti fer dan Mark 10:29, 30 pe ganny akonplir?
7 Zapot Pyer ti dir avek Zezi: “Be nou alor ki’n kit tou keksoz pour swiv ou, ki nou pou gannyen?” (Mat. 19:27) Pyer ti anvi konnen ki kalite lavenir li ek lezot disip Zezi ti pou annan. Zot ti’n fer bann gran sakrifis pour dedye zot letan ek lenerzi dan travay predikasyon. (Mat. 4:18-22) Ki lasirans Zezi ti donn zot?
8 Dapre sa resi dan Mark ki pe koz lo menm size, Zezi ti dir avek son bann disip ki zot ti pou form parti sa gran fanmir spirityel. I ti dir: “Tou sa ki’n kit son lakaz, son bann frer, son bann ser, son manman, son papa, son bann zanfan, oubyen son later akoz mwan e akoz Levanzil, pou ganny konmela san fwa plis, bann lakaz, bann frer, bann ser, bann manman, bann zanfan, bann later avek bann persekisyon; e dan lemonn fitir i a ganny lavi eternel.” (Mark 10:29, 30) Lidi, Akilas, Prisil ek Gayis ti parmi sa bann Kretyen dan premye syek ki ti donn landrwa reste zot bann konpanyon Kretyen e ki ti vin zot ‘bann frer, ser ek manman’ parey Zezi ti’n promet.—Akt 16:14, 15; 18:2-4; 3 Zan 1, 5-8.
9 Sa ki Zezi ti dir pe ganny en pli gran lakonplisman dan nou letan. Sa “later” ki son bann disip i kit deryer pe refer avek kalite lavi ki en kantite misyonner, betelit, serviter enternasyonal ek lezot i volonterman sakrifye pour fer avanse lentere Rwayonm dan plizyer pei. En kantite frer ek ser in kit zot lakour pour kapab senplifye zot lavi. Nou vreman kontan pour tann bann leksperyans ki montre ki mannyer Zeova in pran swen avek zot e ki mannyer zot servis pour li in fer zot ere. (Akt 20:35) Deplis, tou bann serviter Zeova ki’n batize e ki form parti sa lasosyasyon frer ek ser dan lemonn antye i kapab ganny beni si zot “rod plito Rwayonm Bondye ek son lazistis.”—Mat. 6:33.
An sekirite dan sa “landrwa sekre”
10, 11. Ki sa “landrwa sekre sa enn Tre O,” e ki mannyer nou kapab ganny akse avek sa landrwa?
10 Dedikasyon ek batenm i anmenn en lot benediksyon, sa privilez pour reste “dan landrwa sekre sa enn Tre O.” (Lir Psonm 91:1. *) Sa i en landrwa senbolik ki reprezant sekirite spirityel, en kondisyon oubyen leta kot nou ganny proteze spirityelman. I en “landrwa sekre” akoz dimoun ki napa menm pwennvi ki Bondye e ki pa met zot konfyans dan li pa arive konn sa landrwa. Ler nou viv an armoni avek nou dedikasyon e met tou nou konfyans dan Zeova, i konmsi nou pe dir avek li: “Ou mon landrwa refiz ek mon landrwa proteksyon, mon Bondye dan ki mon pou met konfyans.” (Ps. 91:2) Zeova i vin sa landrwa kot nou reste an sekirite. (Ps. 91:9) Ki nou kapab demande an plis?
11 Ler nou arive ganny akse avek sa “landrwa sekre” Zeova, sa i montre ki nou’n arive devlop en relasyon personnel avek li e sa i en privilez ek benediksyon. Sa i konmans avek nou dedikasyon ek batenm. Apre, nou batir nou relasyon avek Bondye par apros avek li atraver letid Labib, lapriyer senser e par annan en lobeisans total. (Zak 4:8) Napa en dimoun ki’n deza vin pli pros avek Zeova ki Zezi e i pa’n zanmen perdi konfyans dan son Kreater. (Zan 8:29) Alors, annou pa zanmen annan doutans lo Zeova oubyen lo son dezir ek abilite pour ed nou viv annakor avek ve nou dedikasyon. (Ekle. 5:4) Provizyon spirityel ki Bondye in fer pour son pep i donn laprev ki i vreman kontan nou e anvi ki nou arive servi li.
Apresye nou paradi spirityel
12, 13. (a) Ki si sa sa paradi spirityel? (b) Ki mannyer nou kapab ed bann nouvo batize?
12 Dedikasyon ek batenm i osi donn nou sa posibilite pour reste dan sa paradi spirityel. I en lanvironnman spirityel ki inik, kot bann krwayan i anpe avek Zeova e avek kanmarad. (Ps. 29:11; Iza. 54:13) Napa nanryen dan sa lemonn ki kapab ganny konpare avek nou paradi spirityel. Sa i sirtou evidan dan bann lasanble enternasyonal kot nou bann frer ek ser sorti dan diferan nasyon ek ras oubyen ki koz diferan langaz i zwenn ansanm dan en latmosfer pezib, dan linite e dan lanmour.
13 Sa paradi spirityel ki nou ladan i diferan avek kondisyon deplorab ki egziste dan sa lemonn ozordi. (Lir Izai 65:13, 14. *) Ler nou anons mesaz Rwayonm, nou annan sa privilez pour ofer lezot sa lenvitasyon pour vin dan sa paradi spirityel. I osi en benediksyon pour ed bann ki fek asosye avek kongregasyon e ki bezwen ganny formen dan predikasyon. Bann ansyen i kapab demann nou pour ed serten nouvo zis parey Akilas ek Prisil ti “eksplik . . . pli byen Semen Bondye” avek Apolos.—Akt 18:24-26.
Kontinyen aprann avek legzanp Zezi
14, 15. Ki rezon nou annan pour kontinyen aprann avek legzanp Zezi?
14 Nou annan bann bon rezon pour kontinyen aprann avek legzanp Zezi. Avan vin lo later, Zezi ti pas plizyer milyon lannen pour travay akote son Papa. (Prov. 8:22, 30) I ti konnen ki sa bon fason viv i santre lo servi Bondye e rann temwannyaz lo laverite. (Zan 18:37) I ti kler pour Zezi ki i ti pou egois e montre ki i ti napa bon zizman lo lavenir si i ti swazir pour viv en lot kalite lavi. I ti konnen ki i ti pou pas atraver bann leprev e ganny met a mor. (Mat. 20:18, 19; Ebr. 4:15) Konman nou Legzanp, i’n ansenny nou ki mannyer pour gard nou lentegrite.
15 En pti pe letan apre ki Zezi ti batize, Satan ti tant li pour fer li abandonn sa pli bon fason viv, me sa pa ti abouti dan nanryen. (Mat. 4:1-11) Sa i montre nou ki malgre nenport kwa ki Satan i fer, nou kapab gard nou lentegrite. I tre probab ki i pou fikse son latansyon lo bann ki anvi batize e osi bann ki fek batize. (1 Pyer 5:8) Nou kapab ganny lopozisyon avek manm fanmir ki annan bann bon lentansyon anver nou me ki’n ganny mal enformen konsernan Temwen Zeova. Me, sa bann leprev i donn nou loportinite pour demontre bann bon kalite Kretyen parey respe ek bon zizman ler nou reponn kestyon e donn en temwannyaz. (1 Pyer 3:15) Alor sa i kapab annan en bon lefe lo sa bann ki ekout nou.—1 Tim. 4:16.
Reste atase avek sa pli bon fason viv!
16, 17. (a) Ki sa trwa kondisyon vreman neseser pour reste vivan dapre Deterononm 30:19, 20? (b) Ki mannyer Zezi ek Pol ti siport sa ki Moiz ti ekrir?
16 Apepre 1,500-z-an avan ki Zezi ti vin lo later, Moiz ti konsey bann Izraelit pour swazir sa pli bon fason viv ki ti egziste sa lepok. I ti dir: “Mon pran lesyel ek later konman temwen kont zot ozordi, ki mon met lavi ek lanmor devan zot, benediksyon ek malediksyon; e ou devret swazir lavi pour ki ou reste vivan, ou ek ou desandans, par kontan Zeova zot Bondye, par ekout son lavwa e par reste atase avek li.” (Det. 30:19, 20) Bann Izraelit ti vin enfidel avek Bondye, me sa trwa kondisyon enportan ki Moiz ti mansyonnen pa’n sanze. De plis Zezi ek lezot ankor ti koz lo sa bann kondisyon.
17 Premyerman, ‘nou devret kontan Senyer nou Bondye.’ Nou demontre ki nou kontan Bondye par azir an armoni avek son bann standar drwat. (Mat. 22:37) Dezyenmman, ‘nou devret ekout lavwa Zeova’ par etidye Parol Bondye e obeir son bann komannman. (1 Zan 5:3) Pour fer sa nou bezwen asiste renyon regilyerman, kot nou egzamin Labib. (Ebr. 10:23-25) Trwazyenmman, ‘nou devret reste atase avek Zeova.’ Nenport sityasyon ki nou bezwen fer fas avek, annou touzour annan lafwa dan Bondye e swiv son Garson.—2 Kor. 4:16-18.
18. (a) Ki mannyer Latour Veyer ti dekrir sa laverite an 1914? (b) Ki mannyer nou devret santi konsernan leklersisman lo laverite ozordi?
18 Pa i en benediksyon pour viv an armoni avek laverite dan Labib! An 1914 sa deklarasyon enportan ti ganny pibliye dan Latour Veyer: “Eski pa nou en pep ere ki’n ganny beni? Eski pa nou Bondye i fidel? Si zot konn en keksoz ki pli meyer, pa ezite pour pran. Si zanmen okenn parmi zot i trouv en keksoz ki pli bon, nou ti a kontan zot dir nou. Nou nou pa konn okenn keksoz ki pli meyer oubyen preski osi bon ki sa ki nou’n trouve dan Parol Bondye. . . . . Nou napa ase mo pour eksprim sa lape, lazwa ek benediksyon ki en konnesans kler lo sa vre Bondye in anmennen dan nou leker e dan nou lavi. Konnesans ki nou’n gannyen lo lasazes, lazistis, pwisans ek lanmour Bondye i ranpli nou lespri ek nou leker. Nou pa pe rod nanryen an plis. Nou pa anvi nanryen plis ki sa apard ki sa dezir pour konn plis ankor lo nou Bondye.” (Latour Veyer le 15 Desanm 1914 paz 377-378 an Angle) Nou touzour rekonesan pour sa lalimyer spirityel ek laverite ki nou’n gannyen. Vreman, nou annan plis rezon aprezan pour zwaye akoz nou pe “mars dan lalimyer Zeova.”—Iza. 2:5; Ps. 43:3; Prov. 4:18.
19. Akoz bann ki kalifye pour batenm i devret pran sa pa san tarde?
19 Si ou anvi “mars dan lalimyer Zeova” me ou pa ankor dedye ou lavi e batize, pa tarde pour fer li. Fer tou sa ki neseser pour ranpli bann kondisyon pour batenm ki trouve dan Labib, sa i sa sel fason pour demontre rekonnesans pour sa ki Bondye ek Kris in fer pour nou. Donn Zeova ou lavi, sa keksoz ki annan plis valer pour ou. Montre ki ou anvi fer lavolonte Bondye par swiv son Garson. (2 Kor. 5:14, 15) San okenn dout, sa i sa pli bon fason viv!
[Not anba lo paz]
^ par. 4 Psonm 148:11-13: “Zot bann lerwa lo later e zot tou bann kominote nasyonal, zot bann prens e tou bann ziz lo later, zot zennonm e osi bann vyerz, vyeyar ansanm avek bann garson. Ki zot loue non Zeova, akoz zis son non tousel i gran. Son grander i parlao later ek lesyel.”
^ par. 6 Psonm 118:6: “Zeova i avek mwan; mon pa pou per. Ki imen i kapab fer mwan?”
^ par. 10 Psonm 91:1: “Nenport dimoun ki reste dan landrwa sekre sa enn Tre O pou reste anba lonbraz sa Enn Tou Pwisan.”
^ par. 13 Izai 65:13, 14: “La sa ki Souvren Senyer Zeova in dir: ‘Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou dan lazwa, me zot zot pou onte. Gete! Mon prop serviter pou kriye avek lazwa akoz zot annan lakontantman dan zot leker, me zot zot pou kriye akoz douler dan zot leker e zot pou irle senpleman akoz depresyon.’”
Ki ou pou reponn?
• Ki nou batenm i reprezante?
• Ki benediksyon nou gannyen ler nou dedye nou lavi avek Bondye e batize?
• Akoz i enportan pour aprann avek legzanp Zezi?
• Kwa ki pou ed nou reste atase avek sa pli bon fason viv?
[Kestyon]
[Portre lo paz 29]
Ou batenm i montre ki ou’n swazir sa pli bon fason viv
[Portre lo paz 31]
Eski ou an sekirite dan sa “landrwa sekre”?