Ki pwennvi Bondye lo lalkol?

NOU Kreater, sa enn ki oule sa ki pli bon pour nou, pa defann nou bwar lalkol avek moderasyon. * O kontrer, i’n donn imen “diven pour fer li ere, delwil zoliv pour fer li zwaye, e dipen pour donn li lafors.” (Psonm 104:15, Today’s English Version) En fwa dan en maryaz, Zezi Kri ti fer delo vin “sa pli bon diven.”—Zan 2:3-10, New Jerusalem Bible.

I rezonnab pour krwar ki nou Kreater i konn tre byen ki lefe lalkol i annan lo lekor ek lespri en dimoun. Atraver Labib, nou Papa ki dan lesyel i ‘ansenny nou pour nou prop byenfe,’ e i averti nou kont abiz labwason for. (Izai 48:17) Egzamin sa bann lavertisman ki ganny donnen dan en fason fran:

“Pa bezwen soul zot avek diven, akoz sa pou zis antrenn zot dan en lavi dezordonnen.” (Efezyen 5:18) “Bann soular . . . pa pou zanmen erit rwayonm Bondye.” (1 Korentyen 6:9-11, Jerusalem Bible) Parol Bondye i kondann “soular, parti bwar ek bann lezot keksoz parey.”—Galat 5:19-21, Byington.

Aprezan annou egzamin serten danze ler nou bwar tro bokou lalkol.

Danze pour bwar tro bokou

Menm si lalkol i kapab fer serten dibyen, i annan bann sibstans ladan ki kapab annan lefe lo lafason ki nou lespri ek lekor i fonksyonnen. Labi lalkol i kapab fer nou ganny sa bann problenm swivan:

Bwar tro bokou i annan en lefe lo zizman sa bwarer e ‘anpes li reflesir byen.’ (Proverb 23:33, TEV) Allen, sa msye ki ti ganny mansyonnen o konmansman sa seri lartik i eksplike: “Lalkolism pa zis en maladi ki afekte nou fizikman, me i osi en maladi ki afekte nou fason panse ek latitid. Ou pa oule rekonnet ditor ki ou fer lezot.”

Bwar tro bokou lalkol i osi kapab fer en dimoun perdi pider. Labib i donn sa lavertisman: “Diven ek diven dou i fer nou perdi nou bon motivasyon.” (Osea 4:11) Ki man nyer sa? Bann dezir ek panse ki nou rezete ordinerman i vin akseptab e menm atiran anba lenfliyans lalkol. Nou kapab perdi sa determinasyon pour reste atase avek sa ki byen. Lalkol i kapab fer nou perdi nou bann valer moral ki parey en proteksyon pour nou e sa i kapab fer nou tonbe spirityelman.

Pran par egzanp John, ki ti’n dispit avek son madanm. Dan son lakoler i ti kit lakour e al direkteman dan en bar. I ti’n deza bwar plizyer ver lalkol pour kontrol son lakoler ler en madanm ti apros li. Apre ki i ti’n bwar ankor detrwa ver, John ti kit sa bar avek sa madanm e i ti komet adilter. John ti vreman regrete plitar pour fer en keksoz ki i pa ti’n zanmen mazinen pour fer si i pa ti’n perdi son pider akoz lalkol.

Labi lalkol i fer dimoun napa kontrol lo son parol ek aksyon. Labib i demande: “Lekel ki toultan dan problenm? Lekel ki kontan dispit ek lager? En dimoun ki reste ziska tar aswar, pour bwar zis ankor enn dernyen.” (Proverb 23:29, 30, Contemporary English Version) En dimoun ki abiz lalkol i kapab “santi konmsi i lo lanmer, pe ganny maldemer, pe balanse anler lo ma en bato.” (Proverb 23:34, Bible en français courant) En zonm ki’n bwar tro bokou i kapab leve avek “bann blesir partou lo li, san menm mazinen ki mannyer tousala in arive.”—Proverb 23:35, CEV.

Bwar tro bokou i kapab afekte ou lasante. “A lafen [lalkol] i morde parey en serpan, e anpwazonnen parey en viper.” (Proverb 23:32, New International Version) Lasyans dan domenn medikal in prouve ki sa proverb i vre. Ler en dimoun i annan bokou lalkol dan son lekor, sa lalkol i kapab vin en toksin danzere e i kapab fer li ganny diferan kanser, fetal alcohol syndrome, latak laservel oubyen latak leker, lepatit ki bann dimoun alkolik i gannyen, maladi lefwa, maladi pankreas, fer bann dimoun ki ganny dyabet annan disik ba, sa i zis detrwa konsekans. Menm si en dimoun i bwar tro bokou zis en fwa, sa i kapab fer li tonm dan koma oubyen mor. Me konsekans pli grav letan en dimoun i bwar tro bokou pa ganny dekrir dan bann liv medikal.

Pli gran danze labi lalkol. Menm si en dimoun pa bwar ziska i vin sou, si i pa bwar avek moderasyon sa i kapab afekte li spirityelman. Labib i dir klerman: “Maler sa bann ki lev gran maten pour rod zis labwason for, ki reste ziska ler fernwanr i konmans fer, kot  diven i eksit zot.” Akoz? Izai i eksplike ki konsekans bwar san okenn moderasyon i kapab annan lo spirityalite en dimoun: “Zot pa obzerv bann aktivite Zeova, e zot pa’n vwar travay son lanmen.”—Izai 5:11, 12.

Parol Bondye i konsey nou pour pa “frekant bann gran bwarer diven.” (Proverb 23:20) Bann madanm aze i ganny konseye pour pa “vin lesklav labwason.” (Tit 2:3; nou ki’n met an italik.) Akoz sa? Souvandfwa sa i akoz dimoun i konmans bwar en pti pe plis e en pe pli souvan san ki zot apersevwar. Finalman, sa bwarer i kapab “pa dormi e demande, ‘Kan lizour pou fer, pour ki mon kapab bwar ankor en pe?’” (Proverb 23:35, CEV) Bann bwarer i ariv dan sa staz pli kritik kan dan bomaten zot santi ki zot bezwen bwar pour rekipere akoz lavey zot in tro bwar.

Labib i averti bann dimoun ki viv en “lavi soular, [kontan] bann parti bwar” ki zot “pou bezwen rann kont zot laksyon avek sa enn ki’n pare pour ziz bann vivan ek bann mor.” (1 Pyer 4:3, 5; nou ki’n met an italik.) An rapor avek sa letan difisil ki nou pe viv ladan, Zezi ti donn sa lavertisman: “Fer byen atansyon zot menm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez.”—Lik 21:34; nou ki’n met an italik.

Pour evite ‘les zot vizilans ganny detournen par labwason,’ ki bann dimoun ki pa bwar avek moderasyon i kapab fer?

[Not anba lo paz]

[Portre lo paz 4, 5]

Labi lalkol i kapab anmenn en kantite problenm