“Lespri avek Nouvel-Marye i dir: ‘Vini!’”
“Lespri avek Nouvel-Marye i dir: ‘Vini!’”
“Lespri avek Nouvel-Marye i dir: ‘Vini!’ . . . Ki sa ki swaf i vini, e ki sa ki anvi, i pran delo lavi gratwitman!”—REV. 22:17.
1, 2. Ki plas lentere Rwayonm i devret annan dan nou lavi e akoz?
KI PLAS lentere Rwayonm i devret annan dan nou lavi? Zezi ti ankouraz son bann disip pour kontinyen “rod plito rwayonm Bondye” e i ti asir zot ki si zot ti fer sa, Bondye ti pou donn zot sa ki zot bezwen. (Mat. 6:25-33) I ti konpar Rwayonm Bondye avek en perl ki telman annan gran valer ki kan en marsan i dekouver li, i “vann tou sa ki i posede e i aste sa perl.” (Mat. 13:45, 46) Eski pa nou devret konsider sa travay pour pres lo Rwayonm e fer disip konman en travay vreman enportan?
2 Parey nou ti vwar dan sa de lartik avan, kan nou koz avek lardyes oubyen san okenn lafreyer, e nou servi byen Parol Bondye dan minister, sa i montre ki nou pe ganny gide par lespri sen Bondye. Sa menm lespri sen i osi zwe en gran rol pour nou partisip regilyerman dan sa travay pour pres lo Rwayonm. Annou vwar ki mannyer.
En lenvitasyon pour tou dimoun!
3. Ver ki kalite delo tou bann imen i ganny envite pour “vini”?
3 Lespri sen pe fer sa lenvitasyon avek tou dimoun. (Lir Revelasyon 22:17.) Zot tou zot ganny envite pour “vini” e satisfer zot laswaf avek en kalite delo spesyal. I pa sa delo ki i annan de idrozenn ek en loksizenn ladan. Menm si delo i vreman enportan pour soutenir lavi lo later, Zezi pa ti pe mazin sa kalite delo kan i ti dir sa madanm Samariten kot pwi: “Sa ki bwar delo ki mwan mon pou donn li, i pa pou zanmen swaf. Sa delo ki mon pou donn li, pou vin en sours lavi eternel ki pou koul an labondans.” (Zan 4:14) Sa delo ekstraordiner ki bann imen i ganny envite pour bwar i donn lavi eternel.
4. Akoz i ti neseser pour ganny delo lavi e ki sa delo i reprezante?
4 Sa bezwen pour bwar sa kalite delo ti vin neseser kan Adan, premye zonm, ti dakor avek son madanm Ev pour dezobeir Zeova, sa enn ki ti’n kree zot. (Zen. 2:16, 17; 3:1-6) Sa premye koup ti ganny tire dan sa zarden ki ti zot lakour “pour ki [Adan] pa anvoy son lanmen e pran osi sa fri dan pye dibwa lavi e manze e viv pour en letan endefini.” (Zen. 3:22) Lanmor ti ganny entrodwir dan ras imen atraver Adan, zanset limanite. (Rom. 5:12) Delo lavi i reprezant tou bann provizyon ki Zeova in fer pour ki bann imen obeisan i ganny libere avek pese ek lanmor, e sa pou fer li posib pour zot ganny lavi parfe pour touzour dan Paradi lo later. Sa bann provizyon in posib atraver sakrifis Zezi konman en ranson.—Mat. 20:28; Zan 3:16; 1 Zan 4:9, 10.
5. Lekel ki sours sa lenvitasyon pour vini e “pran delo lavi gratwitman”? Eksplike.
5 Lekel ki envit nou pour vini e “pran delo lavi gratwitman”? “Larivyer delo lavi, ki ti kler konman kristal” i reprezant tou provizyon pour ganny lavi atraver Zezi, ki pou antyerman vin disponib pour bann imen pandan Renny Milener Kris. Sa larivyer i ganny vwar pe koule “sorti kot tronn Bondye ek Lanyo.” (Rev. 22:1) Alor, Zeova, sa Enn ki donn lavi ki Sours sa delo lavi. (Ps. 36:9) Li ki fer sa delo disponib atraver Zezi Kri, sa “Lanyo.” (Zan 1:29) Sa larivyer senbolik i sa mwayen ki Zeova pou servi pour repar tou move konsekans ki limanite in eksperyanse akoz dezobeisans Adan. Wi, sa lenvitasyon pour “vini” i sorti kot Zeova.
6. Kan ki “larivyer delo lavi” i konmans koule?
6 Menm si sa “larivyer delo lavi” pou koul dan en sans konplet pandan sa Mil An ki Kris pou dirize, i’n konmans koule pandan “Zour Senyer” ki ti konmans avek letan ki “Lanyo” ti ganny kouronnen dan lesyel konman lerwa an 1914. (Rev. 1:10) Sa ti fer alor ki serten provizyon pour ganny lavi ti disponib apre sa. Parol Bondye, Labib, i enn parmi akoz son mesaz i ganny refer avek konman “delo.” (Efe. 5:26) Tou dimoun i ganny envite pour “pran delo lavi” par ekoute e aksepte sa bon nouvel Rwayonm. Me lekel ki pe ofer sa lenvitasyon pandan zour Senyer?
“Nouvel-Marye” i dir: “Vini!”
7. Lekel ki ti premye pour ofer sa lenvitasyon pour “vini” pandan “Zour Senyer” e avek lekel?
7 Sa bann ki form sa nouvel marye, setadir bann Kretyen swazir, i premye pour ofer sa lenvitasyon pour “vini.” Avek lekel? Bon, nouvel marye pa pe dir “vini” avek son prop lekor. I pe koz avek tou sa bann ki annan lespwar pour ganny lavi eternel lo later apre ki sa ‘konba gran zour Bondye Tou pwisan’ pou’n fini.—Lir Revelasyon 16:14, 16.
8. Kwa ki montre ki bann Kretyen swazir in ofer lenvitasyon sorti kot Zeova depi 1918?
8 Depi lannen 1918, bann disip swazir Kris pe ofer sa lenvitasyon. Pandan sa lannen, sa diskour piblik avek tit “Millions Now Living Will Never Die” (Plizyer milyon ki pe viv konmela pa pou zanmen mor) ti donn sa lespwar ki bokou dimoun pou ganny lavi dan en paradi lo later apre Armagedon. En diskour ki ti ganny donnen dan en lasanble bann Etidyan Labib ki ti ganny fer Cedar Point, Ohio, Leta-z-ini an 1922, ti ankouraz bann ki ti pe ekoute pour ‘anons sa Lerwa ek son Rwayonm.’ Sa demann ti ed sa bann ki form sa nouvel marye ki ankor lo later pour ofer sa lenvitasyon avek plis dimoun. An 1929, dan Latour Veyer le 15 Mars an Angle, i ti annan en lartik avek tit “Lenvitasyon amikal” e son teks tenm ti ganny tire dan Revelasyon 22:17. Sa lartik ti dir: “Bann Kretyen swazir ki ankor lo later i zwenn ansanm avek [sa enn Tre O] dan sa lenvitasyon amikal e dir ‘vini.’ Sa mesaz i devret ganny anonse avek tou sa ki anvi konn ladrwatir ek laverite. I devret ganny fer la konmela.” Ziska ozordi, bann ki form sa nouvel marye i ankor pe kontinyen ofer sa lenvitasyon avek lezot.
“Ki tou sa ki tande i dir: ‘Vini!’”
9, 10. Ki mannyer bann ki’n tann sa lenvitasyon i ganny envite pour dir “vini!” an retour?
9 Me ki pour dir lo bann ki tann sa lenvitasyon pour “vini”? Zot osi zot ganny envite pour dir “vini!” Par egzanp, Latour Veyer le 1 Out 1932 an Angle paz 232 i dir: “Bann Kretyen swazir i devret ankouraz tou bann ki anvi partisipe pour anons sa bon nouvel lo rwayonm. I pa neseser ki zot ganny swazir par Senyer pour zot kapab anons mesaz Senyer. I en gran rekonfor pour Temwen Zeova konnen aprezan ki zot annan sa privilez pour anmenn delo lavi ver sa group dimoun ki pou sirviv Armagedon e ganny lavi eternel lo later.”
10 Pour met lanfaz lo responsabilite sa bann ki tann sa lenvitasyon pour zot osi dir “vini!” Latour Veyer le 15 Out 1934 an Angle paz 249 i dir: “Bann Yonadab i devret al ansanm avek bann Yeou, setadir bann Kretyen swazir, e anons sa mesaz lo Rwayonm, menm si zot pa bann Temwen ki’n ganny swazir par lespri sen Zeova.” An 1935, lidantite sa “gran lafoul” ki ganny mansyonnen dan Revelasyon 7:9-17 ti vin pli kler. Se sa ki ti fer annan en pli gran devouman pour ofer sa lenvitasyon sorti kot Bondye. Depi sa, lakantite dimoun ki form sa gran lafoul bann vre adorater in kontinyelman ogmante, konmela i annan plis ki set milyon ki’n aksepte sa lenvitasyon. Apre ki zot in apresye sa mesaz ki zot in tande, zot in dedye zot lavi avek Bondye, batize dan delo e apre zot in zwenn ansanm avek nouvel marye pour envit lezot avek devouman pour ‘vini e pran delo lavi gratwitman!’
“Lespri” i dir: “Vini!”
11. Dan premye syek Nou Lepok, ki rol lespri sen ti pe zwe dan travay predikasyon?
11 Kan i ti pe prese dan en sinagog Nazaret, Zezi ti ouver roulo profet Izai e lir: “Lespri Senyer [Zeova] i lo mwan, akoz in konsakre mwan pour anons Bonn Nouvel pour bann pov. I’n anvoy mwan pour proklanm delivrans pour bann prizonnyen, e fer bann aveg war kler, pour donn laliberte bann ki ganny oprimen, pour proklanm en lannen kot Senyer pou montre son faver.” Apre sa, Zezi ti aplik sa parol avek li an dizan: “Ozordi sa parol Lekritir ki zot in tande in akonpli.” (Lik 4:17-21) Avan mont dan lesyel, Zezi ti dir son bann disip: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen . . . ziska tou bann landrwa pli elwannyen lo later.” (Akt 1:8) Dan premye syek, lespri sen ti zwe en rol vreman remarkab an rapor avek predikasyon sa bon nouvel.
12. Ki mannyer lespri sen Bondye i enplike pour ofer sa lenvitasyon dan nou letan?
12 Dan ki fason lespri sen i enplike dan sa travay pour ofer sa lenvitasyon avek lezot dimoun ozordi? Zeova i Sours lespri sen. I servi son lespri sen pour ouver leker ek lespri nouvel marye pour ki i konpran son Parol, Labib. Lespri sen i pous zot pour ofer sa lenvitasyon e eksplik laverite dan Lekritir avek tou sa ki annan lespwar pour viv pour touzour dan Paradi lo later. Me ki pour dir konsernan bann ki aksepte sa lenvitasyon, zot vin disip Zezi Kri e zot ofer sa lenvitasyon avek lezot ankor? Lespri sen i annan lefe lo zot osi. Lefet ki zot in ganny batize ‘o non lespri sen,’ zot korpere avek lespri sen e depan lo la pour ed zot. (Mat. 28:19) Mazin osi lo sa mesaz ki ganny prese par bann Kretyen swazir ek gran lafoul ki kontinyen ogmante. Sa mesaz i sorti dan Labib, sa liv ki ti ganny ekrir anba lenspirasyon lespri sen Bondye. Alor, sa lenvitasyon i ganny ofer par mwayen lespri sen. Anfet, nou ganny gide par lespri sen. Ki mannyer sa i devret annan lefe lo lakantite letan nou pase pour ofer sa lenvitasyon?
Zot “kontinyen dir: ‘Vini’”
13. Ki sa fraz “lespri ek nouvel marye i kontinyen dir: ‘Vini!’” pe endike?
13 Lespri ek nouvel marye pa zis dir: “Vini.” Sa verb ki ganny servi dan langaz orizinal i montre en aksyon ki kontinyen. Kan New World Translation ti ganny tradwir, sa ti ganny pran an konsiderasyon e se pour sa rezon ki sa verse in ganny tradwir koumsa: “Lespri ek nouvel marye i kontinyen dir: ‘Vini!’” Sa i montre ki lenvitasyon Bondye pe ganny ofer regilyerman. Me, ki pour dir lo sa ki tande e aksepte sa lenvitasyon? Zot osi zot dir: “Vini!” Gran lafoul bann vre adorater i ganny dekrir konmkwa zot pe “ofer [Bondye] ladorasyon lizour konman aswar dan son tanp.” (Rev. 7:9, 15) Dan ki sans zot ofer ladorasyon ouswa servis sakre “lizour konman aswar”? (Lir Lik 2:36, 37; Akt 20:31; 2 Tesalonisyen 3:8.) Legzanp Ann, sa madanm aze ki ti en profet ek zapot Pol i montre ki ‘servi Bondye, nwit e zour’ ouswa “lizour konman aswar” i enplik regilarite ek bokou zefor dan minister.
14, 15. Ki mannyer Danyel ti montre lenportans pour ador Bondye regilyerman?
14 Danyel osi ti montre lenportans pour ador Bondye dan en fason regilye. (Lir Danyel 6:4-10, 16. *) I pa ti sanz son labitid spirityel, setadir son labitid pour priy Bondye “trwa fwa par zour . . . parey i ti abitye fer,” ni menm pour en mwan, menm si sa ti vedir ki i ti pou ganny zete dan trou lyon. Pa son aksyon ti en levidans kler pour bann ki ti pe gete ki napa nanryen pli enportan ki ador Zeova regilyerman!—Mat. 5:16.
15 Apre ki Danyel ti’n pas en lannwit dan trou lyon, lerwa li menm ti al laba e kriye: “O Danyel, serviter sa Bondye vivan, eski ou Bondye ki ou pe servi kontinyelman in nobou sov ou parmi bann lyon?” Deswit Danyel ti reponn: “O lerwa, viv pour en letan endefini. Mon Bondye in anvoy son lanz pour ferm lagel sa bann lyon e zot pa’n touy mwan, parski mon’n ganny trouve inosan devan li; e osi devan ou, mon pa’n fer nanryen mal, O lerwa.” Zeova ti beni Danyel lefet ki i ti servi li “kontinyelman.”—Dan. 6:19-22.
16. Danyel ti regilyerman ador Bondye, ki kestyon sa i motiv nou pour demande konsernan nou partisipasyon dan predikasyon?
16 Danyel ti volonterman pare pour mor dan plas aret son labitid spirityel. Me nou? Ki sakrifis nou pe fer ouswa pare pour fer pour ki nou kapab anons sa bon nouvel lo Rwayonm Bondye regilyerman? Sirman, nou pa devret les en mwan pase san koz avek lezot lo Zeova! Si i posib, eski pa nou devret fer bokou zefor pour partisip dan minister sak semenn? Menm si fizikman nou annan serten limit e kapab rann temwannyaz zis pour 15 minit par mwan, nou devret raport sa ki nou’n fer. Akoz? Parski, ansanm avek lespri ek nouvel marye, nou anvi kontinyen dir “vini!” Wi, nou oule fer tou sa ki nou kapab pour reste bann proklanmater regilye.
17. Nou pa devret manke pour ofer ki kalite lenvitasyon sorti kot Zeova?
17 Nou devret rod fason pour ogmant nou partisipasyon pour ofer lenvitasyon Zeova dan tou lokazyon ki nou gannyen, pa zis pandan sa letan ki nou’n swazir pour partisip dan predikasyon. Pa i vreman en privilez pour envit sa bann ki swaf pour ‘vini e pran delo lavi gratwitman!’ Nou kapab fer sa dan lezot moman osi, parey kan nou pe vwayaze, rod konmisyon, dan vakans, kot travay e ler pe al lekol. Menm si lotorite i met restriksyon lo nou travay predikasyon, nou kontinyen pres dan en fason diskre, petet par fer bann lakaz enn ant ant ouswa par fer plis temwannyaz enformel.
Kontinyen dir: “Vini!”
18, 19. Ki mannyer ou devret montre ki ou apresye sa privilez pour travay ansanm avek Bondye?
18 Pour plis ki katreven di-z-an, lespri ek nouvel marye pe dir “vini!” avek tou bann ki swaf delo lavi. Eski ou’n deza tann sa lenvitasyon eksitan? Alor ou ganny ankouraze pour ofer sa lenvitasyon avek lezot osi.
19 Nou pa konnen pour konbyen letan ankor sa lenvitasyon sorti kot Zeova pou kontinyen ganny ofer, me si nou reponn sa lapel par dir “vini!,” nou vin konman bann ki pe travay ansanm avek Zeova. (1 Kor. 3:6, 9) Pa sa i en gran privilez! Annou kontinyen montre ki nou apresye sa privilez e “rann glwar Bondye” par pres regilyerman. (Ebr. 13:15) Ansanm avek sa bann ki form nouvel marye, nou tou ki annan sa lespwar pour viv lo later, annou kontinyen dir: “Vini!” Nou swete ki bokou plis ankor pou “pran delo lavi” gratwitman!
[Not anba lo paz]
^ par. 14 Danyel 6:4-10, 16: “Sa letan, bann o zofisye ek dirizan ti pe kontinyen rod kek rezon pour akiz Danyel an rapor avek sa rwayonm; me zot pa ti vwar okenn rezon pour akiz li oubyen koripsyon, lefet ki i ti diny konfyans e okenn neglizans oubyen koripsyon pa ti ganny trouve dan li. Alors, sa bann zonm kosto ti pe dir: ‘Sirman nou pa pou trouv okenn rezon pour akiz Danyel, eksepte si nou trouv en keksoz dan lalwa son Bondye pour servi kont li.’ Alors, sa bann o zofisye ek dirizan ti antre an gran nonm kot lerwa, e zot ti pe dir li: ‘O lerwa Daryis, kontinyen viv menm pour en letan endefini. Tou bann o zofisye dan sa rwayonm, bann zofisye ek dirizan, bann o zofisye rwayal ek gouverner, ti zwenn ansanm pour rod sizesyon kanmarad pour etablir en lalwa rwayal, pour enpoz en lenterdiksyon, konmkwa nenport ki, ki fer en demann anver nenport bondye oubyen zonm dan lespas trant zour eksepte anver ou, O lerwa, sa dimoun i devret ganny zete dan trou lyon. Aprezan, O lerwa, fotespere ou etablir sa lalwa e siny sa dokiman, pour ki i pa sanze, dapre lalwa bann Med ek Pers, ki pa kapab ganny aboli.’ Annakor avek sa, li menm li lerwa Daryis ti siny sa dokiman ek sa lenterdiksyon. Me Danyel, osito ki i ti konnen ki sa dokiman ti’n ganny sinyen, i ti antre dan son lakaz, e lafnet dan son lasanm anler ki ti vir ver Zerizalenm ti ouver, e menm trwa fwa par zour i ti tonm azenou e fer lapriyer e ofer louanz devan son Bondye, zis parey i ti abitye fer depi avan sa.” “An rezilta, lerwa li menm ti donn lord e zot ti anmenn Danyel e zet li dan trou lyon. Lerwa ti reponn e dir Danyel: ‘Ou Bondye ki ou pe servi kontinyelman, li menm ki pou delivre ou.’”
Ki ou’n aprann?
• Lekel ki ganny envite pour “vini”?
• Akoz i kapab ganny dir ki Zeova i sours sa lenvitasyon pour “vini”?
• Ki rol lespri sen i zwe pour ofer sa lenvitasyon pour “vini” avek lezot?
• Akoz nou devret fer bokou zefor pour partisip regilyerman dan minister?
[Kestyon]
[Chart/Pictures on page 25]
(For fully formatted text, see publication)
Kontinyen dir: “Vini!”
1914
5,100 proklanmater
1918
Bokou pou viv dan Paradi lo later
1922
“Anonse, anonse, anonse, sa Lerwa ek son rwayonm”
1929
Kretyen swazir ki ankor lo later i dir: “Vini!”
1932
Pa zis Kretyen swazir ki ganny envite pour dir “vini!”
1934
Bann Yonadab i ganny envite pour prese
1935
“Gran lafoul” i ganny idantifye
2009
7,313,173 proklanmater