Servi byen sa “lepe ki Lespri i donnen”
Servi byen sa “lepe ki Lespri i donnen”
“Pran Laparol Bondye konman en lepe ki Lespri i donnen.”—EFE. 6:17.
1, 2. Ki mannyer nou devret reazir anver sa bezwen pour annan plis proklanmater?
APRE ki i ti’n vwar bezwen spirityel lafoul, Zezi ti dir son bann disip: “I annan en gran rekolt ki’n pare me napa ase zouvriye. Pour sa rezon, sipliy met rekolt pour anvoy zouvriye.” Zezi pa ti zis les keksoz koumsanmenm. Apre ki i ti’n dir sa parol, “Zezi ti apel son douz zapot” e anvoy zot al prese ouswa al fer “rekolt.” (Mat. 9:35-38; 10:1, 5) Pli tar, Zezi ti “swazir [“swasanndis,” NW] lezot disip e anvoy zot devan li, de par de,” pour al fer sa menm travay.—Lik 10:1, 2.
2 Ozordi osi i annan demann pour plis proklanmater Rwayonm. Lasistans Memoryal dan lemonn antye pour lannen servis 2009 ti 18,168,323. Sa sif i montre ki i ti annan omwen 10 milyon dimoun an plis apard Temwen Zeova ki ti asiste. Sa i montre ki vreman lagrenn dan plantasyon in mir pour larekolt. (Zan 4:34, 35) Dan sa ka, nou devret priye e demande pour ganny plis zouvriye. Me ki mannyer nou kapab azir an armoni avek sa bann demann? Nou kapab fer sa par vin bann proklanmater efikas anmezir nou partisip avek bokou devouman dan sa travay pour pres sa bon nouvel Rwayonm e fer disip.—Mat. 28:19, 20; Mark 13:10.
3. Dan ki fason lespri sen Bondye i zwe en rol enportan pour ed nou pour vin bann proklanmater efikas?
3 Lartik avan ti montre nou ki lespri sen Bondye i vreman esansyel pour nou kapab “anons mesaz Bondye san okenn lafreyer.” (Akt 4:31) Sa menm lespri sen i kapab ed nou pour vin bann proklanmater efikas. En fason nou kapab amelyor nou lefikasite dan minister i kan nou servi byen Labib, sa zouti merveye ki Zeova in donn nou atraver lespri sen. (2 Tim. 3:16) Sa mesaz ki ladan in ganny enspire par Bondye. Alor, dan predikasyon, kan nou byen servi Labib konman baz nou lansennyman, nou pe ganny gide par lespri sen. Avan vwar konman nou kapab fer sa, annou reflesir lo ki degre pwisan sa Parol i ete.
‘Parol Bondye i annan pwisans’
4. Ki lefe mesaz Bondye ki ganny trouve dan Labib i kapab annan lo en dimoun?
4 Parol oubyen mesaz Bondye i vreman annan pwisans! (Ebr. 4:12) Dan en sans senbolik, sa mesaz dan Labib i pli koupe ki okenn lepe ki zonm in fer, akoz i kapab separ zwentir ek lanmwel lezo. Laverite sorti dan Lekritir i tous leker sa dimoun e i annan en gran lefe lo son panse ek santiman. I osi met okler sa ki sa dimoun i vreman ete anndan. Laverite sorti dan Labib i annan sa pouvwar pour transform en dimoun e i kapab fer li sanze konpletman. (Lir Kolosyen 3:10.) Wi, Parol Bondye i kapab sanz lavi bann dimoun!
5. Dan ki fason Labib i gid nou e avek ki rezilta?
5 Deplis, i annan lasazes dan Labib ki pa kapab ganny trouve okenn par. Dan Labib i annan bann bon lenformasyon ki kapab montre bann dimoun konman pour viv dan sa lemonn difisil. Parol Bondye i ekler nou, i pa kler zis la devan nou, me i kler sa semen ki devan nou. (Ps. 119:105) I en led vreman eksepsyonnel kan nou pe fer fas avek problenm ouswa kan nou annan bann desizyon pour fer konsernan nou zanmi, divertisman, lanplwa, resanz ek lezot keksoz ankor. (Ps. 37:25; Prov. 13:20; Zan 15:14; 1 Tim. 2:9) Si nou aplik bann prensip dan Parol Bondye, nou pou kapab annan en bon relasyon avek lezot. (Mat. 7:12; Fili. 2:3, 4) Kan nou les parol Bondye ekler sa semen devan nou, sa i fer ki nou pou pran an konsiderasyon lefe ki en desizyon pou annan dan nou lavi. (1 Tim. 6:9) Lekritir in predir konsernan plan Bondye pour lavenir e sa i ed nou pour annan en stil lavi ki an armoni avek sa plan. (Mat. 6:33; 1 Zan 2:17, 18) En dimoun i kapab vreman annan en lavi ki fer sans si i les li ganny gide par bann prensip sorti kot Bondye.
6. Dan nou batay spirityel, ki degre pwisan Labib i ete?
6 Mazinen osi ki Labib i en zouti vreman pwisan dan nou batay spirityel. Pol ti dekrir Parol Bondye konman “en lepe ki Lespri i donnen.” (Lir Efezyen 6:12, 17.) Kan i ganny prezante dan en fason efikas, sa mesaz ki dan Labib i kapab liber bann dimoun ki anba kontrol Satan spirityelman. I en lepe ki sov lavi olye detrir lavi. Eski pa nou devret fer bokou zefor pour servi li byen?
Anons byen mesaz laverite
7. Akoz i enportan pour aprann servi byen sa “lepe ki Lespri i donnen”?
7 En solda pou byen kapab servi son bann zarm avek lefikasite dan en lager, si i’n antrenn son lekor e aprann pour servi zot byen. I parey kan nou servi sa “lepe ki Lespri i donnen” dan nou batay spirityel. Pol ti ekrir: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.”—2 Tim. 2:15.
8, 9. Kwa ki pou ed nou pour vreman konpran sa ki Labib i dir? Donn en legzanp.
8 Kwa ki pou ed nou “anons byen mesaz laverite” dan nou minister? Avan kapab transmet klerman sa ki Labib i dir avek lezot, nou menm nou devret konpran sa ki i pe dir. Pour arive fer sa, fodre nou port byen latansyon lo konteks enn oubyen plizyer verse. Dapre en diksyonner, “konteks en mo ouswa en fraz i enplik bann mo oubyen fraz ki vin avan e apre li, e sa i ede pour kapab konpran son sans pli klerman.”
9 Pour arive konpran byen en verse dan Labib, nou devret egzamin bann verse ki avan e apre sa resi. Parol Pol dan Galat 5:13 i en legzanp ki montre sa. I ti ekrir: “Mon bann frer, zot in ganny apele pour vin lib. Me selman pa fer sa laliberte en preteks pour viv selon dezir zot laser. Okontrer, les zot ganny gide par lanmour pour servi kanmarad.” Lo ki kalite liberte Pol ti pe koz lo la dan sa verse? Eski i ti pe refer avek liberte avek pese ek lanmor, latasman ki en dimoun i annan avek bann fo krwayans ouswa avek en lot keksoz? Konteks sa verse i montre ki Pol ti pe koz lo ‘liberte avek malediksyon Lalwa.’ (Gal. 3:13, 19-24; 4:1-5) I ti pe koz lo sa liberte ki en dimoun i annan kan i swiv Kris. Sa bann ki ti apresye sa kalite liberte ti les zot ganny gide par lanmour pour servi lezot. Bann dimoun ki ti napa lanmour ti koz an mal deryer ledo lezot ouswa fer kankan avek lezot.—Gal. 5:15.
10. Pour arive konpran vre sinifikasyon bann verse, ki nou devret egzaminen e ki mannyer nou devret fer sa?
10 Sa mo konteks i kapab annan en lot sans. I kapab osi enplik rod plis detay lo lorizin, sirkonstans ek sityasyon, pour pli byen konpran sinifikasyon en verse. Nou devret rod plis detay lo lekel ki ti ekrir sa liv dan Labib, kan i ti ekrir li e dan ki sirkonstans i ti ganny ekrir. I osi enportan pour rod rezon akoz sa liv ti ganny ekrir e si i posib egzamin tradisyon, nivo moralite ek kalite larelizyon ki ti egziste sa letan. *
11. Ki nou devret fer byen atansyon kan nou pe eksplik bann verse Labib?
11 Pour arive “anons byen mesaz laverite,” nou bezwen fer plis ki zis eksplik byen sa laverite ki dan Labib. Nou bezwen fer sir ki nou pa servi Labib pour fer dimoun per. Menm si nou kapab servi Labib pour defann laverite parey Zezi ti fer kan Satan ti pe tant li, Labib pa en mayos ki nou servi pour bat sa bann ki ekout nou. (Det. 6:16; 8:3; 10:20; Mat. 4:4, 7, 10) Nou devret swiv konsey zapot Pyer: “Rann glwar dan zot leker Kris konman zot Senyer. Zot devre touzour pare pour donn en repons bann ki demann zot leksplikasyon konsernan lesperans ki dan zot. Me fer li avek labonte ek respe.”—1 Pyer 3:15, 16.
12, 13. Laverite dan Parol Bondye i kapab detrir ki kalite “kan lennmi”? Donn en legzanp.
12 Kan i ganny byen servi, ki laverite dan Parol Bondye i kapab fer? (Lir 2 Korentyen 10:4, 5.) Laverite dan Lekritir i kapab “detri bann kan lennmi,” setadir i kapab ekspoz bann fo krwayans, bann pratik danzere ek filozofi ki reflekte lasazes bann imen enparfe. Nou kapab servi Labib pour retir okenn lide ki al “kont konnesans Bondye.” Lansennyman dan Labib i kapab ed lezot pour aziste zot fason panse pour ki i an armoni avek laverite.
13 Pran par egzanp leksperyans en madanm 93 an ki reste Lenn. Depi ptipti i ti ganny ansennyen pour krwar dan reenkarnasyon. Kan i ti konmans etidye Labib atraver let sorti kot enn son garson ki reste dan pei deor, i ti pare pour aksepte sa ki i ti pe aprann lo Zeova ek son bann promes. Par kont, sa lansennyman lo reenkarnasyon ti’n telman anrasinen dan son lespri ki i pa ti dakor kan son garson ti ekrir li lo kondisyon bann dimoun mor. I ti dir: “Mon zis pa kapab konpran sa laverite ki dan zot Labib. Tou larelizyon i ansennyen ki i annan en keksoz dan nou ki imortel. Mon’n touzour krwar ki lekor i mor e sa parti envizib dan nou i kontinyelman reenkarnen dan lezot lekor pour apepre 8,400,000 fwa. Ki mannyer sa i kapab pa vre? Eski laplipar larelizyon i fo?” Eski “lepe ki Lespri i donnen” i kapab detrir bann krwayans ki’n sitan anrasinen koumsa? Apre plis diskisyon baze lo Labib lo sa size, detrwa semenn pli tar sa madanm ti ekrir: “Finalman mon pe konmans konpran laverite lo lanmor. Mon vreman ere pour konnen ki kan rezireksyon pou arive, nou pou kapab zwenn bann dimoun ki nou kontan ki’n mor. Mon swete ki Rwayonm Bondye i vini byento.”
Servi li pour konvenk lezot
14. Ki i enplike pour konvenk bann ki ekout nou?
14 Servi Labib dan en fason efikas dan minister i pa zis en zafer sit verse. Pol ti koz avek “konviksyon” e nou osi nou devret fer parey. (Lir Akt 19:8, 9; 28:23.) Si nou koz avek konviksyon nou pou arive konvenk ouswa persyad en dimoun pour sanz son pwennvi lo en keksoz. Sa enn ki’n ganny persyade i “sitan konvenki ki [i] met son konfyans dan en [keksoz].” Kan nou persyad en dimoun pour aksepte lansennyman Labib, nou pe konvenk li pour met son konfyans dan sa lansennyman. Pour arive fer sa, nou pou bezwen konvenk sa enn ki pe ekout nou lo sa laverite par deryer sa ki nou pe dir. Nou kapab fer sa dan sa bann fason swivan.
15. Ki mannyer ou kapab atir latansyon lo Labib dan en fason ki sa dimoun pou annan respe pour li?
15 Sit direkteman sa ki dan Labib pour ki sa dimoun i annan respe pour li. Kan ou entrodwir en verse, montre sa dimoun ki i vreman enportan pour konn pwennvi Bondye lo sa size. Apre ki ou’n demann en kestyon e ganny larepons sa met lakour, petet ou kapab dir en keksoz koumsa: ‘Annou egzamin pwennvi Bondye lo sa size.’ Ouswa ou kapab demande: ‘Ki Bondye i annan pour dir lo sa sityasyon?’ Si ou entrodwir en verse dan sa fason, sa pou montre ki Labib i sorti kot Bondye e i pou ed sa dimoun ki pe ekoute pour annan respe pour li. I vreman enportan pour fer sa sirtou kan nou pe rann temwannyaz avek en dimoun ki krwar dan Bondye me ki pa familye avek sa ki Labib i dir.—Ps. 19:7-10.
16. Kwa ki pou ed ou eksplik bann verse korekteman?
16 Fer plis ki zis lir bann verse; eksplike. Pol ti abitye ‘eksplik [bann dimoun] e montre dapre Lekritir’ sa bann keksoz ki i ti ansennyen. (Akt 17:3) Dan en verse Labib i souvan annan plis ki en pwen e sa i fer ki petet ou pou bezwen met lanfaz lo bann lekspresyon spesifik ki relye avek sa ki ou pe koz lo la. Ou kapab fer sa par repet sa fraz ouswa mo ki siport sa pwen ouswa par demann bann kestyon ki pou ed sa dimoun ki ou pe koz avek pour rekonnet zot. Apre sa, eksplik sinifikasyon sa bout dan sa verse. Enn fwa ki sa in ganny fer, ed sa dimoun ki pe ekout ou pour vwar ki mannyer i kapab aplik sa verse.
17. Ki mannyer ou kapab servi Lekritir pour konvenk lezot?
17 Servi Lekritir pour fer dimoun reflesir e konvenk zot. Par servi bann parol senser ki fer reflesir, Pol ti reisi konvenk bann dimoun kan i ti pe “diskit lo Lekritir avek [zot].” (Akt 17:2, 4) Fer bokou zefor parey Pol pour tous leker bann ki ekout ou. Esey konn sa ki dan son leker par servi bann kestyon zantiy ki reflekte lentere senser dan li. (Prov. 20:5) Evite koz dan en fason tro fran. Devlop bann pwen dan en fason kler e lozik. Levidans satisfezan i merit ganny servi. Sa ki ou dir i devret antyerman baze lo Labib. I pli byen pour servi zis en verse e eksplik li byen e servi legzanp pour klarifye en pwen ladan, dan plas pour lir de oubyen trwa verse Labib enn deryer lot. Kan ou pe servi bann levidans ki siport sa pwen, sa pou persyad lezot. (Prov. 16:23) Parler, i pou neseser pour ou fer resers e transmet lezot lenformasyon. Sa madanm 93 an ki’n ganny mansyonnen pli boner ti bezwen konnen akoz lansennyman lo nanm (ouswa lespri) imortel i sitan popiler. Pour arive persyad li pour aksepte sa ki Labib i dir lo sa size, i ti vreman enportan pour fer li konpran kote sa doktrin i sorti e ki mannyer in ganny aksepte par laplipar larelizyon. *
Kontinyen servi li byen
18, 19. Akoz nou devret kontinyen servi byen sa “lepe ki Lespri i donnen”?
18 Labib i dir ki “senn sa lemonn pe sanze.” Bann move dimoun pe vin pli pir deplizanpli. (1 Kor. 7:31, NW; 2 Tim. 3:13) Alor, i vreman enportan pour kontinyen “detri bann kan lennmi” par servi “Laparol Bondye [sa] lepe ki Lespri i donnen.”
19 Pa nou vreman ere ki nou annan Parol Bondye, Labib e nou kapab servi son mesaz pwisan pour derasin tou bann fo lansennyman e arive tous leker bann dimoun senser! Napa okenn fo lansennyman ouswa krwayans ki pli for ki sa mesaz. Alor, annou fer bokou zefor pour servi byen sa “lepe ki Lespri i donnen” kan nou pe fer sa travay ki Bondye in donn nou pour pres lo Rwayonm.
[Not anba lo paz]
^ par. 10 Bann bon led pour trouv bann lenformasyon enportan lo bann liv dan Labib i “All Scripture Is Inspired of God and Beneficial,” Insight on the Scriptures e bann lartik parey “Parol Zeova i vivan” dan Latour Veyer.
^ par. 17 Vwar brosir What Happens to Us When We Die? paz 5-16.
Ki ou’n aprann?
• Ki degre pwisan Parol Bondye i ete?
• Ki i enplike pour “anons byen mesaz laverite”?
• Ki sa mesaz dan Labib i kapab fer avek “bann kan lennmi”?
• Dan minister, ki mannyer ou kapab konvenk lezot plis?
[Kestyon]
[Pwen adisyonnel]
Konman pour servi parol Bondye pour konvenk lezot
▪ Fer zot devlop respe pour Labib
▪ Eksplik bann verse
▪ Rezonn dan en fason konvenkan pour tous leker
[Portre lo paz 20]
Ou devret aprann pour servi sa “lepe ki Lespri i donnen” dan en fason efikas