Lakle pour en fanmir ere

Annan en bon relasyon avek boper oubyen belmer

Jenny * i dir: Manman Ryan pa ti kanmi pour dir ki i pa ti apresye mwan. Me sityasyon pa ti diferan pour Ryan avek mon paran. Anfet, mon pa’n zanmen vwar zot azir brit avek okenn dimoun parey zot azir avek Ryan. Nou tou le de nou anba presyon ler nou pe vizit nou paran.

Ryan i dir: Mon manman ti krwar ki napa personn ki ti ase byen pour marye avek son bann zanfan, alor depi o konmansman i ti rod defo avek Jenny. Paran Jenny ti azir dan sa menm fason avek mwan, zot ti toultan pe kraz mwan. Problenm se ki apre sa bann lensidan, nou de Jenny, sakenn ti pou defann son paran e kritik kanmarad.

DEZAKOR avek boper oubyen belmer i kapab en keksoz gou ki bann komedyen i servi pour fer fars lo la, me i pa ditou en keksoz ki fer riye dan vre lavi. En madanm marye dan Lenn ki apel Reena i dir: “Pour plizyer lannen, mon belmer in enterfer dan nou lavi maryaz. Mon ti souvan tir mon lakoler lo mon msye akoz mon pa ti kapab tir mon lakoler lo son manman. I ti paret konmsi i ti pe toultan bezwen swazir ant swa pour vin en bon msye oubyen en bon garson.”

Akoz serten boper oubyen belmer i enterfer dan lavi maryaz zot zanfan? Jenny, sa madanm ki’n ganny mansyonnen o konmansman sa lartik i donn en rezon. I dir: “I kapab difisil pour zot vwar en zenn dimoun ki napa leksperyans vin sa enn ki pou pran swen avek zot garson oubyen fiy.” Dilip, msye Reena ti donn en lot rezon. I dir: “Bann paran ki’n fer sakrifis e pran swen avek zot zanfan i kapab santi ki zot pe ganny met dekote. Zot kapab osi vreman enkyet ki zot garson oubyen fiy napa ase leksperyans pour fer zot maryaz reisi.”

Nou bezwen dir ki pa toultan boper oubyen belmer ki enterfer dan lavi maryaz zot zanfan, me plito zot zanfan ki rod zot led. Annou pran legzanp Michael ek Leanne, en koup marye Ostrali. Michael i dir: “Leanne i sorti dan en fanmir kot zot tre pros avek kanmarad e zot abitye diskit keksoz fran antre zot. Alor, apre ki nou ti’n marye, i ti kontinyen rod konsey avek  son papa konsernan bann desizyon ki nou ti vreman bezwen pran. Son papa ti annan bokou leksperyans pour partaz avek nou, me lefet ki i ti al rod konsey avek son papa olye diskit avek mwan, sa ti fer mon tris.”

I kler ki bann dezakor avek boper oubyen belmer i kapab met presyon lo maryaz. Eski sa i leka dan ou maryaz? Eski ou annan en bon lantant avek paran ou konzwen e eski i menm zafer pour ou konzwen vizavi ou paran? Annou egzamin de problenm ki kapab leve dan maryaz e ki ou kapab fer pour fer fas avek zot.

DEFI 1: I paret ki ou konzwen i tro atase avek son paran. Luis, en msye marye Lespanny, i dir: “Mon madanm ti santi ki i pa ti pou fidel anver son paran si i pa ti viv pros avek zot.” Luis ti azoute: “De lot kote, ler nou garson ti ne, mon paran ti vin vizit nou preski tou le zour, e sa ti fer mon madanm strese. Sa ti anmenn en kantite dezakor ant nou de.”

Bann prensip: Kan Labib pe koz lo laranzman maryaz, i dir ki avek letan “en zonm pou kit son papa ek son manman e i devret atase avek son madanm e zot devret vin en sel laser.” (Zenez 2:24) Vin “en sel laser” i enplik plis ki zis viv ansanm. Sa i vedir ki sa msye ek sa madanm i form en nouvo fanmir, setadir en fanmir ki pas avan sa fanmir ki zot in ne ladan. (1 Korentyen 11:3) Byensir, msye ek madanm i touzour bezwen onor zot paran e souvan sa i enplik donn zot latansyon. (Efezyen 6:2) Me ki ou pou fer si lafason ki ou konzwen i desarz son responsabilite anver son paran i fer ou santi konmsi i pe inyor ou oubyen negliz ou?

Ki ou kapab fer: Vwar keksoz avek en lespri pli ouver. Eski vreman ou konzwen i tro atase avek son paran oubyen i zis ki ou napa sa menm kalite relasyon avek ou paran? Si sa i leka, ki lefe lanvironnman ki ou’n grandi ladan i kapab annan lo lafason ou vwar sa sityasyon? Eski petet ou en pti pe zalou?—Proverb 14:30; 1 Korentyen 13:4; Galat 5:26.

Ou bezwen egzamin ou lekor onnetman pour ou kapab reponn sa bann kestyon. I vreman enportan ki ou fer li. Apre tou, si bann dezakor ki egziste ant ou ek ou boper oubyen belmer i souvan fer ou ek ou konzwen dispit, alor problenm pa avek zot boper oubyen belmer me plito avek zot lavi maryaz.

En kantite problenm dan maryaz i leve akoz i pa egziste de konzwen ki partaz egzakteman menm pwennvi lo en sityasyon. Eski ou kapab esey vwar keksoz parey ou konzwen i vwar? (Filipyen 2:4; 4:5) Sanmenm ki en msye marye sorti Meksiko ki apel Adrián ti fer. I dir: “Mon madanm ti grandi dan en fanmir ki’n afekte li emosyonnelman e se pour sa rezon mon pa ti tro frekant son paran. Pour fini kont mon ti aret frekant zot net pour plizyer lannen. Sa ti fer annan dezakor dan nou maryaz akoz mon madanm ti touzour anvi reste pros avek son fanmir, sirtou son manman.”

Avek letan, Adrián ti devlop en pwennvi balanse lo sa sityasyon. I dir: “Menm si mon konnen ki si mon madanm i vwar son paran tro souvan sa pou afekte li emosyonnelman, me si i pa vwar zot ditou i kapab osi en problenm. Mon’n fer tou sa ki mon kapab pour reganny e gard en bon relasyon avek mon boper ek belmer.” *

ESEY SA: Zot tou le de met an ekrir tou sa ki annan pour fer avek zot boper oubyen belmer ki afekte zot. Si i posib konmans par “mon santi ki . . .” Apre sanz papye avek kanmarad. Ansanm avek en leta lespri lekip, mazinen ki fason zot kapab ed kanmarad pour amelyor sityasyon.

DEFI 2: Ou boper oubyen belmer i souvan enterfer dan ou lavi maryaz pour donn konsey menm si ou pa’n demann zot. En madanm marye ki apel Nelya sorti Kazakstan i dir: “Sa premye set lannen nou maryaz nou ti pas avek fanmir mon msye. I ti souvan annan dezakor lo ki mannyer nou ti elve nou zanfan e osi lo  lezot size parey ki mannyer mon kwi manze oubyen fer netwayaz. Mon ti koz avek mon msye ek mon belmer lo sa size, me sa ti zis anmenn plis problenm ankor.”

Bann prensip: Ler ou’n marye, ou nepli anba lotorite ou paran. O kontrer Labib i dir ki “Kris i sef tou zonm, ki en mari i sef son madanm.” (1 Korentyen 11:3) Par kont, parey nou’n mansyonnen o konmansman, en msye ensi ki son madanm i devret onor son paran. Annefe, Proverb 23:22 i dir: “Ekout ou papa ki’n fer ou, e pa mepriz ou manman zis akoz i’n vye.” Me ki ou pou fer si ou paran oubyen paran ou konzwen i desot limit e esey enpoz zot prop pwennvi dan ou maryaz?

Ki ou kapab fer: Si i paret ki zot pe enterfer, met ou dan zot plas e esey konpran akoz. Ryan sa msye ki ti ganny mansyonnen o konmansman sa lartik i dir: “Dan serten ka paran i bezwen konnen ki zot ankor enportan dan lavi zot zanfan. I kapab ki zot pa fer ekspre pour enterfer e okenn problenm ki leve i kapab ganny rezourd si zot met an pratik sa bon konsey ki Labib i donnen pour “siport kanmarad, pardonn kanmarad sak fwa ki enn ant zot i ofans en lot.” (Kolosyen 3:13) Me ki ou pou fer si ou belmer oubyen boper i enterfer dan ou lavi maryaz e fer annan dezakor ant ou ek ou konzwen?

Serten koup marye in aprann pour met en limit dan zot relasyon avek zot paran. Sa pa vedir ki ou bezwen dir dan en fason brit tou sa ki zot devret fer oubyen pa fer. * Souvan, zot kapab fer sa kler par lafason ki zot azir anver kanmarad akoz sa pou demontre ki ou konzwen i pas premye dan ou lavi. Par egzanp, en msye sorti Zapon ki apel Masayuki i dir: “Menm si bann paran i eksprim zot pwennvi, pa toudswit tonm dakor avek zot. Gard antet ki zot de ou konzwen zot pe batir en nouvo fanmir. Alor, premyerman esey vwar ki mannyer ou konzwen i santi lo sa konsey ki zot in gannyen avek ou paran.”

ESEY SA: Diskit avek ou konzwen lo bann fason spesifik ki anmenn dezakor ler zot paran i enterfer dan zot maryaz. Ansanm, met an ekrir tou bann limit ki zot kapab etablir e ki mannyer zot pou fer sir ki sa bann limit i ganny respekte san ki zot aret onor zot paran.

En kantite dezakor avek boper oubyen belmer i kapab ganny evite si nou esey konpran zot lentansyon e pa les sa bann dezakor fer ou ek ou konzwen dispit. An rapor avek sa, Jenny i admet: “Defwa sa bann diskisyon ki nou de mon konzwen i fer konsernan nou paran ti annan en serten lefe lo nou santiman e i ti vreman aparan ki si nou ti koz lo zot lenperfeksyon, nou ti pou fer ditor kanmarad. Me finalman, nou ti aprann pour aret servi zot lenperfeksyon konman en mayos pour fer ditor kanmarad, me nou ti esey rezourd sa problenm ki nou ti pe rankontre. Rezilta ki sa in anmennen se ki nou’n vin pli pros avek kanmarad.

[Not anba lo paz]

DEMANN OU LEKOR . . .

▪ Ki bann bon kalite mon boper ek belmer i annan?

▪ Ki mannyer mon kapab onor mon paran san negliz mon konzwen?